Ezekiel

36 “Bo gbɔmɔ bi,* gbaa otsɔɔ Israel gɔji lɛ ni okɛɛ akɛ, ‘Nyɛ Israel gɔji, nyɛboa Yehowa wiemɔ toi. 2 Nɔ ni Nuŋtsɔ Ofe Yehowa kɛɛ nɛ: “Henyɛlɔ lɛ ewie eshi nyɛ akɛ, ‘Ahãa! Blema hei grɔŋŋi lɛ po etsɔmɔ wɔnii!’”’+

3 “No hewɔ lɛ, gbaa ni okɛɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Akɛni amɛhã nyɛtsɔ amaŋfɔ ni amɛtutua nyɛ kɛjɛ he fɛɛ he, koni nyɛtsɔmɔ mɛi ni je mli* yɛ jeŋmaji lɛ ateŋ lɛ anii, ni mɛi aya nɔ awie nyɛhe ni amɛwie nyɛhe efɔŋ hewɔ lɛ,+ 4 nyɛ Israel gɔji, nyɛboa Nuŋtsɔ Ofe Yehowa wiemɔ toi! Nɔ ni Nuŋtsɔ Ofe Yehowa kɛɔ gɔji lɛ, kɛ gɔŋkpɔi lɛ, kɛ fai lɛ, kɛ jɔi lɛ, kɛ hei ni efee koikoi ni etsɔmɔ amaŋfɔ lɛ,+ kɛ maji ni ashi ashwie shi ni aloo amɛmli nii fɛɛ ni mɛi ni je mli yɛ jeŋmaji ni bɔle amɛ lɛ amli lɛ yeɔ amɛhe fɛo lɛ nɛ;+ 5 nɔ ni Nuŋtsɔ Ofe Yehowa kɛɔ mɛnɛɛmɛi ji: ‘Mawie yɛ mihiɛdɔɔ la+ lɛ mli mashi mɛi ni je mli yɛ jeŋmaji lɛ amli lɛ, kɛ Edom fɛɛ, mɛi ni kɛ miishɛɛ babaoo kɛ hefɛoyeli babaoo*+ shɔ̃ mishikpɔŋ lɛ akɛ amɛ diɛŋtsɛ amɛnɔ lɛ, koni amɛŋɔ elɛɛhei lɛ ni amɛloo enɔ nibii lɛ kɛya lɛ.’”’+

6 “No hewɔ lɛ gbaa yɛ Israel shikpɔŋ lɛ he, ni okɛɛ gɔji lɛ, kɛ gɔŋkpɔi lɛ, kɛ fai lɛ, kɛ jɔi lɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Naa! Mawie yɛ mihiɛdɔɔ kɛ mimlila lɛ mli ejaakɛ nyɛtere jeŋmaji lɛ ahiɛshishwiemɔ lɛ.”’+

7 “No hewɔ lɛ, nɔ ni Nuŋtsɔ Ofe Yehowa kɛɛ nɛ: ‘Mi diɛŋtsɛ miwó minine nɔ kɛkã kitã akɛ jeŋmaji ni bɔle nyɛ lɛ baatere amɛ diɛŋtsɛ amɛhiɛshishwiemɔ lɛ.+ 8 Shi nyɛ Israel gɔji, nyɛbaagbala niji ni nyɛbaawo yibii nyɛhã mimaŋ Israel,+ ejaakɛ etsɛŋ ni amɛbaaku amɛsɛɛ kɛba. 9 Ejaakɛ mikɛ nyɛ yɛ, ni matsɔ mihiɛ mahã nyɛ, ni abaahu nyɛ ni abaadu dumɔwui yɛ nyɛnɔ. 10 Mahã ogbɔmɛi lɛ ayi afa—Israel shĩa muu lɛ fɛɛ, amɛ fɛɛ—ni abaahi maji lɛ amli+ ni abaaku sɛɛ atswa hei ni efee koikoi lɛ.+ 11 Mahã ogbɔmɛi lɛ kɛ oshĩa kooloi lɛ ayi afa lɛɛlɛŋ;+ amɛyi baafa ni amɛbaafɔ babaoo. Ni mahã ahi onɔ tamɔ bɔ ni ahi onɔ yɛ blema lɛ,+ ni mahã oshwere fe be ni eho lɛ;+ ni obaaná ole akɛ miji Yehowa.+ 12 Mahã gbɔmɛi—mimaŋ Israel⁠—​anyiɛ onɔ, ni amɛkɛ bo baafee amɛnɔ.+ Obaatsɔ amɛgboshinii, ni ohãŋ amɛbii agboi dɔŋŋ.’”+

13 “Nɔ ni Nuŋtsɔ Ofe Yehowa kɛɛ nɛ: ‘Akɛni amɛkɛɔ nyɛ akɛ, “Oji shikpɔŋ ni yeɔ gbɔmɛi, ni gbeɔ ojeŋmaji lɛ amli bii”’ lɛ hewɔ lɛ, 14 ‘oyeŋ gbɔmɛi dɔŋŋ ni ogbeŋ ojeŋmaji lɛ amli bii lɛ dɔŋŋ,’ Nuŋtsɔ Ofe Yehowa kɛɛ. 15 ‘Mihãŋ jeŋmaji lɛ ajɛ bo dɔŋŋ ni mihãŋ mɛi awie ashi bo dɔŋŋ,+ ni ohãŋ ojeŋmaji lɛ atɛrɛ dɔŋŋ,’ Nuŋtsɔ Ofe Yehowa kɛɛ.”

16 Ni Yehowa kɛɛ mi ekoŋŋ akɛ: 17 “Gbɔmɔ bi,* be ni Israel shĩa lɛ yɔɔ amɛ diɛŋtsɛ amɛshikpɔŋ lɛ nɔ lɛ, amɛkɛ amɛgbɛi kɛ amɛnifeemɔi lɛ wo nɔ muji.+ Yɛ mihiɛ lɛ, amɛgbɛi lɛ ahe tseee tamɔ bɔ ni yei anii ni yei feɔ lɛ he tseee lɛ.+ 18 No hewɔ lɛ, mifɔse mimlila lɛ mishwie amɛnɔ yɛ lá ni amɛfɔse amɛshwie shikpɔŋ lɛ nɔ lɛ+ kɛ agbɛnɛ hu, shikpɔŋ lɛ nɔ muji ni amɛkɛ amɛmagai ni yɔɔ nyaŋemɔ* lɛ wo lɛ hewɔ.+ 19 No hewɔ lɛ, migbɛ amɛ mishwã jeŋmaji lɛ amli ni mishwie amɛ kɛtee shikpɔji lɛ anɔ.+ Mikojo amɛ yɛ amɛgbɛ kɛ amɛnifeemɔi lɛ anaa. 20 Shi be ni amɛtee nakai jeŋmaji lɛ amli lɛ, mɛi wie amɛhe kɛbule migbɛ́i krɔŋkrɔŋ+ lɛ akɛ, ‘Yehowa maŋ nɛ, shi ahã amɛshi eshikpɔŋ lɛ nɔ.’ 21 No hewɔ lɛ, mafã migbɛ́i krɔŋkrɔŋ ni Israel shĩa lɛ hã abule yɛ jeŋmaji ni amɛtee amɛmli lɛ amli lɛ he.”+

22 “No hewɔ lɛ, kɛɛmɔ Israel shĩa lɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Nyɛ Israel shĩa, jeee nyɛ nyɛhewɔ mitsuɔ nibii ahe nii lɛ, shi migbɛ́i krɔŋkrɔŋ ni nyɛbule yɛ jeŋmaji ni nyɛtee amɛmli lɛ amli lɛ hewɔ.”’+ 23 ‘Bɔ fɛɛ bɔ ni fee lɛ, mafee migbɛ́i kpeteŋkpele+ lɛ ni abule yɛ jeŋmaji lɛ ateŋ, nɔ ni nyɛbule yɛ amɛteŋ lɛ krɔŋkrɔŋ; ni kɛ́ afee mi krɔŋkrɔŋ yɛ nyɛteŋ yɛ amɛhiɛ lɛ,’ Nuŋtsɔ Ofe Yehowa kɛɛ, ‘jeŋmaji lɛ baaná ale akɛ miji Yehowa.+ 24 Majie nyɛ kɛje jeŋmaji lɛ ateŋ ni mabua nyɛnaa kɛjɛ shikpɔji lɛ fɛɛ anɔ, ni mikɛ nyɛ baaba nyɛshikpɔŋ lɛ nɔ.+ 25 Mikɛ nu ni mli tse baashwã nyɛnɔ, ni nyɛhe baatse;+ mahã nyɛhe atse kɛje nyɛmuji nii+ lɛ fɛɛ kɛ nyɛmagai ni yɔɔ nyaŋemɔ* lɛ fɛɛ ahe.+ 26 Mahã nyɛ tsui hee,+ ni mikɛ mumɔ hee hu baawo nyɛmli.+ Majie tsui ni wa tamɔ tɛ*+ lɛ kɛje nyɛgbɔmɔtso mli, ni mahã nyɛ tsui ni he jɔ.* 27 Mikɛ mimumɔ lɛ baawo nyɛmli, ni mahã nyɛnyiɛ yɛ mitaomɔ nii lɛ amli,+ ni nyɛbaabo miyiŋkpɛi* lɛ atoi ni nyɛkɛbaatsu nii. 28 Ni nyɛbaahi shikpɔŋ ni mikɛhã nyɛtsɛmɛi lɛ nɔ, ni nyɛbaatsɔ mimaŋ ni matsɔ nyɛ-Nyɔŋmɔ.’+

29 “‘Mahã nyɛhe atse kɛje nyɛmuji nii lɛ fɛɛ ahe, ni matsɛ ŋmaa* kɛba ni mahã efa, ni mikɛ hɔmɔ baŋ nyɛnɔ.+ 30 Mahã tsei lɛ anɔ yibii lɛ kɛ ŋmɔshi nii lɛ afa, koni hɔmɔ akaye nyɛ dɔŋŋ yɛ jeŋmaji lɛ ateŋ ni nyɛhiɛ shwie shi.+ 31 Kɛkɛ lɛ, nyɛbaakai nyɛgbɛi fɔji lɛ kɛ nyɛnifeemɔi ni ehiii lɛ, ni nyɛ diɛŋtsɛ nyɛhe baafee nyɛ nyaŋemɔ yɛ nyɛtɔmɔ lɛ kɛ nyɛnyaŋemɔ nifeemɔi lɛ ahewɔ.+ 32 Shi nyɛnáa nyɛlea enɛ akɛ: Jeee nyɛ nyɛhewɔ mifeɔ enɛ,’+ Nuŋtsɔ Ofe Yehowa kɛɛ. ‘Shi moŋ, nyɛ Israel shĩa, nyɛhiɛ agboia ni nyɛhiɛ ashwiea shi yɛ nyɛgbɛi lɛ ahewɔ.’

33 “Nɔ ni Nuŋtsɔ Ofe Yehowa kɛɛ nɛ: ‘Yɛ gbi ni mahã nyɛhe atse kɛje nyɛtɔmɔi lɛ fɛɛ ahe lɛ nɔ lɛ, mahã mɛi ahi maji lɛ amli,+ ni abaaku sɛɛ atswa hei ni efee koikoi lɛ.+ 34 Ni abaahu shikpɔŋ ni kã shi amaŋfɔ ni mɔ fɛɛ mɔ ni hoɔ lɛ naa akɛ ekã shi amaŋfɔ lɛ nɔ. 35 Ni mɛi baakɛɛ akɛ: “Shikpɔŋ ni kã shi amaŋfɔ lɛ etsɔ tamɔ Eden abɔɔ,+ ni maji ni efee koikoi ni etsɔmɔ amaŋfɔ ni akumɔ ashwie shi lɛ etsɔ maŋ ni atswa gbogboi awo he ni mɛi yɔɔ mli.”+ 36 Ni maji ni eshwɛ ni bɔle nyɛhe lɛ baaná ale akɛ mi, Yehowa, mi diɛŋtsɛ mitswa nɔ ni akumɔ ashwie shi lɛ, ni midu nii yɛ nɔ ni efee amaŋfɔ lɛ nɔ. Mi, Yehowa, mi diɛŋtsɛ miwie, ni mifee hu.’+

37 “Nɔ ni Nuŋtsɔ Ofe Yehowa kɛɛ nɛ: ‘Mahã Israel shĩa lɛ abi mi ni mafee enɛ hu mahã amɛ: Mahã amɛmaŋbii lɛ ayi afa tamɔ tooku. 38 Maji ni efee koikoi lɛ amli baayimɔ kɛ gbɔmɛi akui+ tamɔ mɛi krɔŋkrɔŋi atooku, tamɔ Yerusalem tooku* yɛ egbijurɔyelii lɛ anɔ;+ ni amɛbaaná amɛle akɛ miji Yehowa.’”