Wolo Ni Ji Enyɔ Ni Akɛmaje Korintobii Lɛ

10 Agbɛnɛ, mi Paulo, mi diɛŋtsɛ mikɛ Kristo lɛ mlijɔlɛ kɛ emlihilɛ lɛ miikpa nyɛ fai,+ eyɛ mli akɛ kɛ́ miyɛ nyɛteŋ ni wɔmiina wɔhe hiɛ kɛ hiɛ lɛ,+ mijeee mɔ ko moŋ, shi kɛ́ mibɛ nyɛŋɔɔ lɛ, mifeɔ ekãa miwoɔ nyɛ.+ 2 Miikpa fai ni nyɛkwɛ koni kɛ́ miba nyɛŋɔɔ lɛ, mikabafee ekãa tamɔ bɔ ni mito akɛ mafee lɛ, ni mifee nibii ni naa wa mishi mɛi komɛi ni naa wɔ tamɔ nɔ ni wɔnyiɛɔ yɛ heloo lɛ naa lɛ. 3 Ejaakɛ wɔnyiɛɔ yɛ heloo mli moŋ, shi wɔwuuu ta yɛ bɔ ni wɔji yɛ heloo mli lɛ naa. 4 Ejaakɛ tawuu nii ni wɔkɛwuɔ ta lɛ, jeee heloonaa nii ni,+ shi moŋ amɛyɛ hewalɛ yɛ Nyɔŋmɔ gbɛfaŋ,+ ni akɛfãmɔɔ nibii ni amɛshishifãi emɔmɔ shi waa lɛ ashwieɔ. 5 Ejaakɛ wɔmiifãmɔ susumɔi kɛ nɔ fɛɛ nɔ ni kwɔ ni teɔ shi ewoɔ Nyɔŋmɔ nilee lɛ wɔmiishwie,+ ni wɔmiiŋɔ jwɛŋmɔ fɛɛ jwɛŋmɔ nom koni wɔhã ebo Kristo lɛ toi; 6 ni wɔsaa wɔhe wɔto, koni kɛ́ nyɛ diɛŋtsɛ lɛ, nyɛbo toi kɛwula shi nɔŋŋ lɛ, wɔkɛ toigbele fɛɛ toigbele he toigbalamɔ ahã.+

7 Nyɛkwɛɔ nii bɔ ni nyɛnaa amɛ yɛ kponɔgbɛ lɛ kɛkɛ. Kɛ́ mɔ ko yɛ nɔmimaa yɛ lɛ diɛŋtsɛ emli akɛ Kristo nɔ ji lɛ lɛ, ejwɛŋ anɔkwa sane nɛɛ nɔ ekoŋŋ: Bɔ ni eji Kristo nɔ lɛ, nakai nɔŋŋ wɔ hu wɔji Kristo nii. 8 Ejaakɛ kɛ́ mikɛ hegbɛ ni Nuŋtsɔ lɛ ehã mi akɛ mitswa nyɛ mima shi, ni jeee akɛ mikumɔ nyɛ mishwie shi lɛ shi mitsitsi kɛteke nɔ fioo po lɛ,+ mihiɛ gboŋ. 9 Ejaakɛ misumɔɔɔ ni efee tamɔ nɔ ni miitao mikɛ woji ni miŋmalaa lɛ awo nyɛhe gbeyei. 10 Ejaakɛ amɛkɛɔ akɛ: “Ewoji lɛ amli saji tsii ni hewalɛ yɛ mli, shi kɛ́ lɛ gbɔmɔ lɛ diɛŋtsɛ yɛ biɛ lɛ, ehe waaa ni ewiemɔi hu anyɛɛɛ nɔ ko akɔ yɛ mli.” 11 Gbɔmɔ ni tamɔ nɛkɛ lɛ aná ale akɛ, nɔ ni wɔkɛɔ* yɛ woji ni wɔŋmalaa lɛ amli kɛ́ wɔbɛ nyɛŋɔɔ lɛ, nakai nɔŋŋ wɔbaafee* kɛ́ wɔba nyɛŋɔɔ.+ 12 Ejaakɛ wɔkaaa akɛ wɔɔbu wɔhe wɔshi mɛi komɛi anɔ aloo akɛ wɔkɛ wɔhe aaato mɛi komɛi ni jieɔ amɛ diɛŋtsɛ amɛhe yi lɛ ahe.+ Shi moŋ kɛ́ amɛkɛ amɛ diɛŋtsɛ amɛhe susuɔ amɛhe ni amɛkɛ amɛ diɛŋtsɛ amɛhe toɔ amɛhe lɛ, no lɛ, amɛbɛ niiashishinumɔ.+

13 Shi wɔ lɛ, wɔshiŋ wɔtsitsi yɛ husui ni akɛwoko wɔdɛŋ lɛ amli, shi moŋ wɔbaashi wɔtsitsi yɛ he ni Nyɔŋmɔ esusu ehã wɔ* lɛ husu lɛ mli, ni elɛɛ mli aahu kɛbashɛ nyɛnɔ.+ 14 Anɔkwa, wɔkpãaa wɔ diɛŋtsɛ wɔmli fe nine tamɔ nɔ ni wɔshɛɛɛ nyɛŋɔɔ, ejaakɛ wɔ klɛŋklɛŋ wɔkɛ Kristo lɛ he sane kpakpa lɛ ba aahu kɛbashɛ nyɛŋɔɔ.+ 15 Dabi, wɔshiii wɔtsitsi yɛ husui ni akɛwoko wɔdɛŋ lɛ amli, yɛ mɔ kroko nitsumɔi ahe, shi wɔhiɛ kã nɔ akɛ, be mli ni nyɛhemɔkɛyeli lɛ yaa nɔ edaa lɛ, nɔ ni wɔfee yɛ he ni asusu ahã wɔ lɛ mli lɛ baashwere. Kɛkɛ lɛ, wɔbaateke nɔ fe tsutsu lɛ, 16 koni wɔyajaje sane kpakpa lɛ yɛ maji ni yɔɔ nyɛsɛɛgbɛ niiaŋ lɛ amli, bɔ ni afee ni wɔkɛ nɔ ni afee momo yɛ he ni asusu ahã mɔ kroko lɛ akashi wɔtsitsi. 17 “Shi mɔ ni shwãa lɛ, eshwã yɛ Yehowa* hewɔ.”+ 18 Ejaakɛ jeee mɔ ni jieɔ lɛ diɛŋtsɛ ehe yi lɛ ji mɔ ni sa,+ shi moŋ mɔ ni Yehowa* jieɔ eyi lɛ.+