2 Mose
14 Agbɛnɛ, Yehowa kɛɛ Mose akɛ: 2 “Kɛɛmɔ Israelbii lɛ akɛ, amɛku amɛsɛɛ ni amɛyabɔ nsara yɛ Pihahirot hiɛ, yɛ Migdol kɛ ŋshɔ lɛ teŋ, yɛ Baal-zefon hiɛ.+ Nyɛyabɔa nsara lɛ yɛ Baal-zefon hiɛ, yɛ ŋshɔ lɛ naa. 3 Kɛkɛ lɛ, Farao baakɛɛ yɛ Israelbii lɛ ahe akɛ, ‘Amɛmiitsomlo yɛ shikpɔŋ lɛ nɔ, ni amɛleee nɔ ni amɛbaafee. Ŋa lɛ esa amɛyi.’ 4 Maŋmɛ gbɛ ní Farao akpiliŋ etsui,+ ni ebaatiu Israelbii lɛ, ni maye Farao kɛ esraafoi lɛ fɛɛ anɔ kunim ni mikɛbaawo mihiɛ nyam;+ ni Ejiptbii lɛ baaná ale lɛɛlɛŋ akɛ miji Yehowa lɛ.”+ No hewɔ lɛ, amɛfee nakai.
5 Sɛɛ mli lɛ, ayakɛɛ Ejipt maŋtsɛ lɛ akɛ Israelbii lɛ ejo foi amɛtee. Amrɔ lɛ, Farao kɛ etsuji lɛ tsake amɛjwɛŋmɔ yɛ Israelbii lɛ ahe,+ ni amɛkɛɛ: “Mɛni wɔfee nɛɛ? Mɛni hewɔ wɔŋmɛɛ Israelbii lɛ ahe ni amɛkpa wɔ sɔɔmɔ akɛ nyɔji lɛ?” 6 No hewɔ lɛ, efee etayaa shwiilii lɛ klalo, ni eloo emaŋbii lɛ efata ehe.+ 7 Eŋɔ shwiilii 600 ni aje gbɛ ahala, kɛ Ejipt shwiilii krokomɛi lɛ fɛɛ, ni tawulɔi tara eko fɛɛ eko mli. 8 No hewɔ lɛ, Yehowa ŋmɛ gbɛ ni Farao, Ejipt maŋtsɛ lɛ, kpiliŋ etsui, ni be ni Israelbii lɛ miiya kɛ ekãa* lɛ, etiu amɛ.+ 9 Ejiptbii lɛ tiu amɛ,+ ni Farao okpɔŋɔi kɛ amɛhe shwiilii lɛ, kɛ ekpɔŋɔnɔtaralɔi lɛ, kɛ esraafoi lɛ fɛɛ miihe anina Israelbii lɛ be ni amɛbɔ nsara yɛ ŋshɔ lɛ naa, yɛ Pihahirot, yɛ Baal-zefon hiɛ lɛ.
10 Be ni Farao bɛŋkɛ Israelbii lɛ, amɛhole amɛhiŋmɛii anɔ ni amɛna akɛ Ejiptbii lɛ miitiu amɛ. Gbeyei mɔmɔ Israelbii lɛ ni amɛbolɔ amɛtsɛ Yehowa.+ 11 Amɛkɛɛ Mose akɛ: “Ani fuuhei ni bɛ Ejipt lɛ hewɔ okɛ wɔ ba biɛ ni wɔbagboi yɛ ŋa lɛ nɔ lɛ?+ Mɛni ofee wɔ nɛɛ? Mɛni hewɔ onyiɛ wɔhiɛ kɛshi Ejipt lɛ? 12 Ani jeee enɛ nɔŋŋ wɔkɛɛ bo yɛ Ejipt lɛ, akɛ, ‘Ŋmɛɛmɔ wɔhe koni wɔsɔmɔ Ejiptbii lɛ’? Ejaakɛ ehi hã wɔ akɛ wɔbaasɔmɔ Ejiptbii lɛ, moŋ fe nɔ ni wɔbaagboi yɛ ŋa lɛ nɔ.”+ 13 Kɛkɛ ni Mose kɛɛ Israelbii lɛ akɛ: “Nyɛkashea gbeyei.+ Nyɛdamɔa shi shiŋŋ ni nyɛkwɛa nyɛyiwala ni Yehowa baahere ŋmɛnɛ gbi nɛɛ.+ Ejaakɛ Ejiptbii lɛ ni nyɛnaa ŋmɛnɛ gbi nɛɛ, nyɛnaŋ amɛ dɔŋŋ kɛmiiya naanɔ.+ 14 Yehowa diɛŋtsɛ baawu ahã nyɛ,+ shi nyɛ lɛ, nyɛfea diŋŋ.”
15 Agbɛnɛ, Yehowa kɛɛ Mose akɛ: “Mɛni hewɔ obolɔɔ otsɛɔ mi? Kɛɛmɔ Israelbii lɛ akɛ, amɛtsa amɛnyiɛmɔ lɛ nɔ. 16 Shi bo lɛ, wó otso lɛ nɔ, ni okpã onine mli yɛ ŋshɔ lɛ nɔ, ní emli agba enyɔ, koni Israelbii lɛ anyiɛ shikpɔŋ gbiŋ nɔ kɛtsɔ ŋshɔ lɛ mli. 17 Shi mi lɛ, maŋmɛ gbɛ ní Ejiptbii lɛ akpiliŋ amɛtsui, ni amɛbaanyiɛ Israelbii lɛ asɛɛ; ni maye Farao kɛ esraafoi lɛ kɛ etayaa shwiilii lɛ kɛ ekpɔŋɔnɔtaralɔi lɛ fɛɛ anɔ kunim, ni mikɛbaawo mihiɛ nyam.+ 18 Ni kɛ́ miye Farao, etayaa shwiilii lɛ, kɛ ekpɔŋɔnɔtaralɔi lɛ anɔ kunim kɛwo mihiɛ nyam lɛ, Ejiptbii lɛ baaná ale lɛɛlɛŋ akɛ miji Yehowa lɛ.”+
19 Ni anɔkwa Nyɔŋmɔ lɛ bɔfo+ lɛ ni nyiɛ Israelbii lɛ ahiɛ lɛ shi amɛhiɛ ni eyaje amɛsɛɛgbɛ, ni atatu ni damɔ shi jaŋŋ ni yɔɔ amɛhiɛ lɛ je amɛhiɛ kɛtee amɛsɛɛgbɛ, ni eyadamɔ amɛsɛɛ.+ 20 No hewɔ lɛ, atatu ni damɔ shi jaŋŋ lɛ baje Ejiptbii lɛ kɛ Israelbii lɛ ateŋ.+ Ehã duŋ wo yɛ afã kome. Shi yɛ afã kroko lɛ, ehã la kpɛ yɛ nyɔɔŋ lɛ mli.+ No hewɔ lɛ, nyɔɔŋ lɛ mli fɛɛ lɛ, Ejiptbii lɛ bɛŋkɛɛɛ Israelbii lɛ.
21 Agbɛnɛ, Mose kpã enine mli yɛ ŋshɔ lɛ nɔ;+ ni Yehowa hã bokã kɔɔyɔɔ ko ni naa wa tswa yɛ nyɔɔŋ lɛ mli fɛɛ, ni etsi ŋshɔ lɛ kɛtee sɛɛ, ni ehã ŋshɔ lɛ shishi tsɔ shikpɔŋ gbiŋ,+ ni nui lɛ amli gba enyɔ.+ 22 No hewɔ lɛ, Israelbii lɛ nyiɛ shikpɔŋ gbiŋ nɔ kɛtsɔ ŋshɔ lɛ mli,+ ni no mli lɛ, nui lɛ mamɔ shi tamɔ gbogbo yɛ amɛninejurɔ kɛ amɛbɛku nɔ.+ 23 Ejiptbii lɛ tiu amɛ, ni Farao okpɔŋɔi lɛ kɛ etayaa shwiilii lɛ kɛ ekpɔŋɔnɔtaralɔi lɛ fɛɛ tiu amɛ kɛtee ŋshɔ lɛ teŋ.+ 24 Leebi buu be lɛ mli lɛ,* Yehowa jɛ atatu kɛ la ni damɔ shi jaŋŋ+ lɛ mli ekwɛ Ejiptbii lɛ, ni ehã Ejiptbii lɛ jijaa. 25 Efamɔfamɔɔ amɛshwiilii lɛ ataii,* ni no hã ewa kɛhã amɛ akɛ amɛaakudɔ shwiilii lɛ, ni Ejiptbii lɛ kɛɛ akɛ: “Nyɛhãa wɔjoa Israelbii lɛ anaa foi, ejaakɛ Yehowa kɛ wɔ miiwu eehã amɛ.”+
26 Ni Yehowa kɛɛ Mose akɛ: “Kpã onine mli yɛ ŋshɔ lɛ nɔ koni nui lɛ aku sɛɛ abaha Ejiptbii lɛ, amɛtayaa shwiilii lɛ, kɛ amɛkpɔŋɔnɔtaralɔi lɛ anɔ.” 27 Amrɔ lɛ, Mose kpã enine mli yɛ ŋshɔ lɛ nɔ, ni be ni eshwɛ fioo ni je baatsɛre lɛ, ŋshɔ lɛ ku sɛɛ etsɔ bɔ ni eyɔɔ tsutsu lɛ nɔŋŋ. Be ni Ejiptbii lɛ bɔi ŋshɔ lɛ naa foijee lɛ, Yehowa shɛrɛ amɛ eshwie ŋshɔ lɛ mli.+ 28 Nui lɛ ni ku sɛɛ lɛ baha tayaa shwiilii lɛ kɛ okpɔŋɔnɔtaralɔi lɛ kɛ Farao asraafoi lɛ fɛɛ ni tiu Israelbii lɛ kɛtee ŋshɔ lɛ mli lɛ anɔ.+ Amɛteŋ mɔ kome folo po yi náaa wala.+
29 Shi Israelbii lɛ nyiɛ shikpɔŋ gbiŋ nɔ kɛtsɔ ŋshɔ lɛ mli,+ ni nui lɛ mamɔ shi tamɔ gbogbo yɛ amɛninejurɔ kɛ amɛbɛku nɔ.+ 30 Nɛkɛ ji bɔ ni fee ni Yehowa here Israelbii lɛ ayiwala kɛjɛ Ejiptbii lɛ adɛŋ yɛ nakai gbi lɛ nɔ,+ ni Israelbii lɛ na Ejiptbii lɛ jwere ŋshɔ lɛ naa ni amɛgboi. 31 Agbɛnɛ hu, Israelbii lɛ na hewalɛ* kpele ni Yehowa jie lɛ kpo etsɔɔ Ejiptbii lɛ, ni Israelbii lɛ bɔi Yehowa gbeyei shemɔ, ni amɛhe Yehowa kɛ etsulɔ Mose amɛye.*+