Yakobo Wolo Lɛ
3 Minyɛmimɛi, esaaa akɛ nyɛteŋ mɛi babaoo tsɔmɔɔ tsɔɔlɔi ejaakɛ nyɛle akɛ wɔbaaná kojomɔ ni tsii fe* mɛi krokomɛi anɔ.+ 2 Ejaakɛ wɔ fɛɛ wɔtɔ̃ɔ* babaoo.+ Kɛ́ mɔ ko tɔ̃ɔɔ yɛ wiemɔ mli lɛ, no lɛ gbɔmɔ ni eye emuu ji lɛ, ni enyɛɔ ekudɔɔ egbɔmɔtso muu lɛ fɛɛ jogbaŋŋ.* 3 Kɛ́ wɔkɛ okpɔŋɔi amanyoflɛi wo amɛdaaŋ koni amɛbo wɔ toi lɛ, wɔkɛkudɔɔ amɛgbɔmɔtso muu lɛ fɛɛ hu. 4 Kwɛmɔ meelei hu: Eyɛ mli akɛ amɛdara waa ni kɔɔyɔi ni naa wa kpalaa amɛ moŋ, shi kudɔɔ bibioo ko kɛkɛ akɛkudɔɔ amɛ kɛyaa he fɛɛ he ni kudɔɔtsɛ lɛ sumɔɔ ni eya lɛ.
5 Nakai nɔŋŋ lilɛi lɛ hu, gbɔmɔtso lɛ henii bibioo ko kɛkɛ ni, shi eshwãa waa. Kwɛ bɔ ni la bibioo nyɛɔ eshãa koo kpele! 6 Lilɛi lɛ hu, la ni.+ Wɔgbɔmɔtso lɛ henii lɛ ateŋ lɛ, lilɛi lɛ tamɔ jeŋ ko ni mli eyi obɔ kɛ nibii ni ejaaa, ejaakɛ ebuleɔ gbɔmɔtso muu lɛ fɛɛ,+ ni emaa shihilɛ gbɛ muu lɛ fɛɛ* naa la, ni Gehena* enáa ela lɛ kɛjɛɔ. 7 Ejaakɛ ŋa mli kooloi kɛ loofɔji kɛ kooloi ni wamɔɔ kɛ ŋshɔŋ loi henɔi lɛ fɛɛ lɛ, gbɔmɔ baanyɛ ajɔɔ amɛhe, ni ejɔɔ amɛhe hu. 8 Shi gbɔmɔ ko gbɔmɔ ko nyɛŋ ajɔɔ lilɛi lɛ he. Anyɛɛɛ akudɔ lɛ, ni eyeɔ awui, pɔizin ni gbeɔ mɔ eyi lɛ obɔ.+ 9 No nɔŋŋ wɔkɛjieɔ Yehowa,* ni ji Tsɛ lɛ yi, shi no nɔŋŋ hu wɔkɛlomɔɔ gbɔmɛi ni abɔ amɛ “tamɔ Nyɔŋmɔ henɔ” lɛ.+ 10 Daa kome lɛ nɔŋŋ mli jɔɔmɔ kɛ loomɔ jɛɔ.
Minyɛmimɛi, esaaa akɛ nibii yaa nɔ yɛ nɛkɛ gbɛ nɔ.+ 11 Nuhiŋmɛi yɔɔ nɛɛ, ebaaa nuŋma* kɛ nu ni joɔ fɛɛ kɛjɛɛɛ hiŋmɛi kome lɛ nɔŋŋ mli, aloo jeee nakai? 12 Minyɛmimɛi, agbami tso nyɛŋ awo oliv, ni wain tso hu nyɛŋ awo agbami, aloo jeee nakai?+ Ni nuhiŋmɛi ni ŋoo yɔɔ mli hu nyɛŋ aba nuŋma.
13 Namɔ hiɛ kã shi ni enuɔ nii ashishi yɛ nyɛteŋ? Etsɔ enifeemɔi kpakpai lɛ anɔ ehã ana akɛ ekɛ mlijɔlɛ ni jɛɔ hiɛshikamɔ mli kɛbaa lɛ tsuɔ enitsumɔi. 14 Shi kɛ́ awuŋayeli ni naa wa+ kɛ naataamɔi*+ yɛ nyɛtsuii amli lɛ, nyɛkashwãa+ ni nyɛmalea nyɛshia anɔkwale lɛ. 15 Hiɛshikamɔ nɛɛ, jeee ŋwɛi ejɛ; shi moŋ shikpɔŋ nɔ nɔ ni,+ kooloi anɔ ni, daimonioi anɔ ni. 16 Ejaakɛ he fɛɛ he ni awuŋayeli kɛ naataamɔi* yɔɔ lɛ, jɛmɛ basabasafeemɔ kɛ nihiinii fɛɛ hu yɔɔ.+
17 Shi hiɛshikamɔ ni jɛ ŋwɛi lɛ, klɛŋklɛŋ kwraa lɛ, eyɛ krɔŋŋ,+ no sɛɛ lɛ, esumɔɔ toiŋjɔlɛ,+ enuɔ nii ashishi,+ eboɔ toi oya, eyi obɔ kɛ mɔbɔnalɛ kɛ yibii kpakpai,+ ekwɛɛɛ hiɛiaŋ,+ efeee osato.+ 18 Agbɛnɛ hu, jalɛ yibii lɛ, toiŋjɔlɛ mli aduɔ yɛ+ ahãa mɛi ni sumɔɔ toiŋjɔlɛ* lɛ.*+