147 Nyɛjiea Yah yi!
Ehi akɛ abaalá kɛjie wɔ-Nyɔŋmɔ lɛ yi;
Eŋɔɔ ni esa jogbaŋŋ akɛ abaajie eyi!+
2 Yehowa miitswa Yerusalem eema shi;+
Ebuaa Israelbii ni egbɛ eshwã lɛ anaa.+
3 Etsaa mɛi ni tsuii ekumɔ lɛ;
Ni efimɔɔ amɛfaji lɛ anɔ.
4 Ekaneɔ ŋulamii lɛ ayibɔ;
Ekɛ amɛteŋ eko fɛɛ eko gbɛ́i tsɛɔ lɛ.+
5 Wɔ-Nuŋtsɔ lɛ je agbo, ni ehewalɛ da;+
Eniiashishinumɔ lɛ, anyɛɛɛ shishi ana.+
6 Yehowa holeɔ mɛi ni he jɔ+ lɛ anɔ,
Shi etsirɛɔ mɛi fɔji lɛ etswiaa shi.
7 Nyɛláa shidaa lala nyɛhãa Yehowa;
Nyɛláa kɛjiea wɔ-Nyɔŋmɔ lɛ yi kɛ saŋku,
8 Mɔ ni kɛ atatui haa ŋwɛi,
Mɔ ni hãa nugbɔ nɛɔ shwieɔ shikpɔŋ lɛ nɔ,+
Mɔ ni hãa jwɛi kwɛ̃ɔ+ yɛ gɔji lɛ anɔ lɛ.
9 Ehãa kooloi lɛ niyenii,+
Kɛ kwaakwaalabitei abii ni bolɔɔ kɛhã niyenii lɛ hu.+
10 Okpɔŋɔ+ hewalɛ esaaa ehiɛ;
Ni enáaa gbɔmɔ naji ni yɔɔ hewalɛ hu he miishɛɛ.+
11 Yehowa náa mɛi ni sheɔ lɛ gbeyei lɛ ahe miishɛɛ,+
Mɛi ni mɛɔ esuɔmɔ ni tsakeee lɛ.+
12 Ao Yerusalem, wo Yehowa hiɛ nyam.
Ao Zion, jiemɔ o-Nyɔŋmɔ lɛ yi.
13 Ewajeɔ omaŋ lɛ agbói lɛ asɛɛ adabaŋi lɛ;
Ejɔɔ obii ni yɔɔ omli lɛ.
14 Ehãa toiŋjɔlɛ baa oshikpɔŋ lɛ nɔ;+
Ehãa otɔɔ kɛ wiiti kpakpa.+
15 Etsuɔ ekitã lɛ kɛbaa shikpɔŋ lɛ nɔ;
Ewiemɔ lɛ he yɛ oya.
16 Etsuɔ snoo kɛbaa tamɔ too hetsɔi yɛŋ;+
Egbɛɔ aisi eshwãa tamɔ lamulu.+
17 Eshɛrɛɔ enyɔŋmɔŋtɛi lɛ eshwieɔ shi tamɔ niyenii atrɔmai.+
Namɔ baanyɛ adamɔ efɛ̃i lɛ naa?+
18 Etsuɔ ewiemɔ lɛ kɛbaa ni amɛsereɔ.
Ehãa ekɔɔyɔɔ lɛ tswaa,+ ni nui lɛ hoɔ.
19 Ejajeɔ ewiemɔ lɛ etsɔɔ Yakob,
Etaomɔ nii kɛ eyiŋkpɛi lɛ etsɔɔ Israel.+
20 Efeko nakai ehãko jeŋmaŋ ko jeŋmaŋ ko pɛŋ;+
Amɛleee eyiŋkpɛi lɛ ahe nɔ ko nɔ ko.
Nyɛjiea Yah yi!+