Amos
8 Nɔ ni Nuŋtsɔ Ofe Yehowa jie etsɔɔ mi nɛ: Naa! Kɛntɛŋ kɛ emli latsa beiaŋ aduawa. 2 Ni ekɛɛ, “Amos, mɛni onaa nɛɛ?” Mihã hetoo akɛ, “Kɛntɛŋ kɛ emli latsa beiaŋ aduawa.” Kɛkɛ ni Yehowa kɛɛ mi akɛ: “Mimaŋ Israel naagbee eshɛ. Mikɛ amɛhe ekeŋ amɛ dɔŋŋ.+ 3 ‘Nakai gbi lɛ nɔ lɛ, sɔlemɔ shĩa lɛ lalai lɛ baatsɔ yaafo,’+ Nuŋtsɔ Ofe Yehowa kɛɛ. ‘Abaashɛrɛ gbohii ashwie he fɛɛ he+—jɛmɛ baafee diŋŋ!’
4 Nyɛboa enɛ toi, nyɛ mɛi ni nyɛnaanaa ohiafoi anɔ,
Ní nyɛkpãtãa shikpɔŋ lɛ nɔ bii ni he jɔ lɛ ahiɛ,+
5 Ní nyɛkɛɔ akɛ, ‘Mɛɛ be nyɔɔŋtsere hee gbi jurɔ lɛ baaba naagbee,+ koni wɔhɔ̃ɔ wɔŋmaa* lɛ,
Kɛ Hejɔɔmɔ Gbi lɛ hu,+ koni wɔbɔi ŋmaa hɔɔmɔ?
Koni wɔhã efa* susumɔnɔ lɛ afee bibioo
Ní shekel* nsɛni tɛ lɛ ada,
Koni wɔta wɔshishiumɔ nsɛni lɛ he fioo;*+
6 Koni wɔkɛ jwiɛtɛi ahé mɛi ni ehia amɛ lɛ,
Ní wɔkɛ tokota ahé ohiafo,+
Ní wɔhɔ̃ɔ ŋmaa lɛ mli nɔ ni ehiii lɛ.’
7 Yehowa kɛ Nɔ Ni Yakob Kɛshiɔ Etsitsi lɛ ekã kitã akɛ,+
‘Mihiɛ kpaŋ amɛnifeemɔi lɛ fɛɛ anɔ kɔkɔɔkɔ.+
8 Enɛ hewɔ lɛ, shikpɔŋ lɛ baahoso,
Ni enɔ bii lɛ ateŋ mɔ fɛɛ mɔ baaye awerɛho.+
Shikpɔŋ muu lɛ fɛɛ baawó ehe nɔ tamɔ Nilo lɛ,
Ni ebaayi kɛteke nɔ, ni ebaanyɔ shi tamɔ Nilo lɛ ni yɔɔ Ejipt lɛ.’+
9 ‘Nakai gbi lɛ nɔ lɛ,’ Nuŋtsɔ Ofe Yehowa kɛɛ,
‘Mahã hulu anyɔ shi shwane fintiŋŋ,
Ni mahã shikpɔŋ lɛ nɔ awo duŋ shwane ketekete.+
Mikɛ kpekpe baaŋmɔ hɛ fɛɛ hɛ, ni mahã mɔ fɛɛ mɔ yiteŋ akpa;
Mahã efee tamɔ bi kome he awerɛhoyeli,
Ni enaagbee baafee tamɔ gbi ni joɔ.’
11 ‘Naa! Gbii miiba,’ Nuŋtsɔ Ofe Yehowa kɛɛ,
‘Ni mahã hɔmɔ aba shikpɔŋ lɛ nɔ,
Jeee niyenii* he hɔmɔ, ni jeee nu kumai hu ni,
Shi moŋ, Yehowa wiemɔi lɛ ni abaanu lɛ he hɔmɔ ni.+
12 Amɛbaadidãa kɛaajɛ ŋshɔnaa kɛya ŋshɔnaa,
Ni amɛbaajɛ kooyi kɛya bokã.*
Amɛbaakpa shi amɛtao Yehowa wiemɔ lɛ, shi amɛnaŋ.
13 Nakai gbi lɛ nɔ lɛ, nɔ baanyɔ oblayei froi ni he yɔɔ fɛo
Kɛ oblahii hu anɔ yɛ kumai lɛ hewɔ;
14 Mɛi ni kɛ Samaria fɔyeli lɛ kãa kitã+ ní amɛkɛɔ akɛ,
“Ao Dan, gbii abɔ ni onyɔŋmɔ lɛ hiɛ kã nɛɛ!”+
Kɛ, “Gbii abɔ ni Beer-sheba gbɛ+ lɛ hiɛ kã nɛɛ!”
Amɛbaagbeegbee shi, ni amɛteŋ shi dɔŋŋ’ lɛ.”+