Wolo Ni Akɛmaje Romabii Lɛ
3 No hewɔ lɛ, mɛni Yudanyo kɛfe mɛi krokomɛi, aloo mɛɛ sɛɛnamɔ yɔɔ ketiafoo mli mɔ? 2 Yudafoi lɛ fe mɛi krokomɛi yɛ gbɛi babaoo nɔ. Klɛŋklɛŋ nɔ lɛ ji akɛ, atu Nyɔŋmɔ wiemɔi krɔŋkrɔŋi lɛ awo amɛdɛŋ.+ 3 No hewɔ lɛ, mɛni ji sane lɛ? Kɛ́ mɛi komɛi bɛ hemɔkɛyeli lɛ, ani hemɔkɛyeli ni amɛbɛ lɛ hewɔ lɛ gbɔmɛi nyɛŋ amɛkɛ amɛhiɛ afɔ̃ Nyɔŋmɔ nɔ dɔŋŋ? 4 Dabida! Shi moŋ, kɛji gbɔmɔ fɛɛ gbɔmɔ tsɔ amalelɔ po lɛ,+ Nyɔŋmɔ lɛ, ebaaya nɔ efee anɔkwafo,+ tamɔ bɔ ni aŋma lɛ, akɛ: “Koni abu bo jalɔ yɛ owiemɔi amli ni oye kunim kɛ́ aakojo bo.”+ 5 Shi kɛ́ ja ni wɔjaaa lɛ hãa Nyɔŋmɔ jalɛ lɛ jeɔ kpo lɛ, mɛni wɔyɔɔ kɛɛmɔ? Kɛ́ Nyɔŋmɔ jie emlifu kpo lɛ, ani no tsɔɔ akɛ ejeee jalɔ? (Bɔ ni gbɔmɔ wieɔ miwieɔ nɛɛ.) 6 Dabida! Kɛjeee nakai lɛ, te aaafee tɛŋŋ ni Nyɔŋmɔ akojo je lɛ?+
7 Shi kɛ́ mimalemɔ lɛ hãa Nyɔŋmɔ anɔkwale lɛ jeɔ kpo faŋŋ kɛwoɔ ehiɛ nyam lɛ, mɛni hewɔ akojoɔ mi akɛ eshafeelɔ lɛ? 8 Ni mɛni hewɔ wɔkɛɛɛ akɛ, “Nyɛhãa wɔfea nibii fɔji koni nibii kpakpai aba,” tamɔ bɔ ni mɛi komɛi foɔ sane amɛfɔ̃ɔ wɔnɔ akɛ wɔkɛɔ lɛ? Toigbalamɔ ni akɛbaaba nakai mɛi lɛ anɔ lɛ sa.+
9 No hewɔ lɛ, te tɛŋŋ? Ani wɔhi fe mɛi krokomɛi lɛ? Dabi kwraa! Ejaakɛ wɔtsɔ hiɛ wɔwie momo akɛ Yudafoi kɛ Greekbii fɛɛ yɛ esha shishi;+ 10 tamɔ bɔ ni aŋma lɛ, akɛ: “Gbɔmɔ ko bɛ ni ji jalɔ, mɔ kome folo po bɛ;+ 11 mɔ ko mɔ ko bɛ ni yɔɔ sɛɛyoomɔ; mɔ ko mɔ ko bɛ ni taoɔ Nyɔŋmɔ sɛɛ gbɛ. 12 Gbɔmɛi fɛɛ egbá afã, amɛ fɛɛ kwa amɛtsɔmɔ mɛi ni ehiii hãaa nɔ ko; mɔ ko mɔ ko bɛ ni jieɔ mlihilɛ kpo, mɔ kome folo po bɛ.”+ 13 “Amɛsɛ̃ tamɔ gbonyobu ni naa kã; amɛkɛ amɛlilɛii lakaa mɔ.”+ “Onufui anaa pɔizin yɛ amɛnaabu.”+ 14 “Ni loomɔ kɛ joomɔ eyi amɛdaaŋ.”+ 15 “Amɛnaji yɛ oya kɛ lashishwiemɔ.”+ 16 “Fitemɔ kɛ hiɛkpatamɔ yɛ amɛgbɛi anɔ, 17 ni amɛleee toiŋjɔlɛ gbɛ lɛ.”+ 18 “Nyɔŋmɔ gbeyeishemɔ kome folo po bɛ amɛhiɛ.”+
19 Agbɛnɛ, wɔle akɛ nibii fɛɛ ni Mla lɛ kɛɔ lɛ, mɛi ni yɔɔ Mla lɛ shishi lɛ ekɛwieɔ, koni naabu fɛɛ naabu afee diŋŋ, ni je lɛ fɛɛ ana akɛ amɛsa mɛi ni Nyɔŋmɔ gbalaa amɛtoi.+ 20 No hewɔ lɛ, mɔ ko mɔ ko* bɛ ni abaatsɔ mla nitsumɔi anɔ abu lɛ jalɔ yɛ ehiɛ,+ ejaakɛ mla lɛ hãa wɔnaa faŋŋ akɛ wɔji eshafeelɔi.+
21 Shi agbɛnɛ jeee mla lɛ nɔ ni mɔ ko baaye lɛ ni baahã abu lɛ jalɔ yɛ Nyɔŋmɔ hiɛ,+ tamɔ bɔ ni Mla lɛ kɛ Gbalɔi lɛ yeɔ he odase lɛ,+ 22 hɛɛ, mɛi fɛɛ ni yɔɔ hemɔkɛyeli lɛ, abuɔ amɛ jalɔi yɛ Nyɔŋmɔ hiɛ kɛtsɔ Yesu Kristo ni amɛheɔ enɔ amɛyeɔ lɛ nɔ. Ejaakɛ srɔto ko bɛ gbɔmɛi ateŋ.+ 23 Ejaakɛ gbɔmɛi fɛɛ efee esha ni amɛnyɛɛɛ amɛjie Nyɔŋmɔ sui ni yɔɔ nyam lɛ kpo,*+ 24 ni eji dromɔ nikeenii+ akɛ atsɔɔ kpɔmɔnɔ ni Kristo Yesu+ wo kɛkpɔ̃ amɛ lɛ nɔ abuɔ amɛ jalɔi yɛ Nyɔŋmɔ dromɔ+ lɛ naa. 25 Nyɔŋmɔ kɛ lɛ hã akɛ afɔle+ koni kɛtsɔ elá lɛ mli hemɔkɛyeli+ ni wɔbaaná lɛ nɔ lɛ, asaa* wɔ kɛ Nyɔŋmɔ teŋ. Nyɔŋmɔ fee enɛ koni ekɛjie lɛ diɛŋtsɛ ejalɛ lɛ kpo, ejaakɛ emɔ etsui mli* ni ekɛ eshai ni afee yɛ blema lɛ ke. 26 Efee enɛ koni ekɛjie lɛ diɛŋtsɛ ejalɛ lɛ kpo+ yɛ benɛ be nɛɛ mli, koni abu lɛ jalɔ kɛ́ eebu mɔ ni heɔ Yesu nɔ eyeɔ lɛ hu jalɔ lɛ.+
27 No hewɔ lɛ, ani wɔbaanyɛ wɔshwã? Dabida. Mɛɛ mla tsĩɔ wɔnaa ni wɔkashwã? Ani mla ni kɛɔ akɛ nitsumɔi ahe hiaa lɛ?+ Dabida, shi moŋ mla ni kɛɔ akɛ wɔná hemɔkɛyeli lɛ ji nɔ ni tsĩɔ wɔnaa. 28 Ejaakɛ wɔbuɔ akɛ, hemɔkɛyeli nɔ atsɔɔ abuɔ gbɔmɔ jalɔ, shi jeee mla nitsumɔi anɔ.+ 29 Aloo Nyɔŋmɔ lɛ, Yudafoi lɛ pɛ a-Nyɔŋmɔ ni?+ Ani jeee jeŋmajiaŋbii lɛ hu a-Nyɔŋmɔ ni?+ Hɛɛ, jeŋmajiaŋbii lɛ hu a-Nyɔŋmɔ ni.+ 30 Akɛni Nyɔŋmɔ lɛ, Nyɔŋmɔ kome+ ni hewɔ lɛ, ebaabu mɛi ni afo amɛ ketia lɛ jalɔi+ yɛ hemɔkɛyeli naa, ni ebaatsɔ hemɔkɛyeli ni mɛi ni afoko amɛ ketia lɛ hu yɔɔ lɛ nɔ ebu amɛ jalɔi.+ 31 No hewɔ lɛ, ani wɔmiitsɔ wɔhemɔkɛyeli lɛ nɔ wɔmiigu mla lɛ? Dabida! Shi moŋ, wɔhãa anaa faŋŋ akɛ, mla lɛ ja.+