1 Maŋtsɛmɛi

8 Solomon bua+ Israel onukpai, weku yitsei lɛ fɛɛ, kɛ Israelbii lɛ atsɛmɛi ashĩai onukpai lɛ anaa yɛ nakai beiaŋ.+ Amɛba Maŋtsɛ Solomon ŋɔɔ yɛ Yerusalem koni amɛyawó Yehowa kpaŋmɔ adeka lɛ kɛjɛ David Maŋ,+ ni ji Zion+ lɛ mli kɛkwɔ kɛba. 2 Israel hii lɛ fɛɛ babua amɛhe naa yɛ Maŋtsɛ Solomon hiɛ yɛ Etanim* nyɔɔŋ lɛ, ni ji nyɔɔŋ ni ji kpawo lɛ nɔ, be ni ayeɔ gbi jurɔ* lɛ.+ 3 No hewɔ lɛ, Israel onukpai lɛ fɛɛ ba, ni osɔfoi lɛ wó Adeka lɛ.+ 4 Amɛkɛ Yehowa Adeka lɛ, kɛ kpee buu lɛ,+ kɛ nibii krɔŋkrɔŋi lɛ fɛɛ ni yɔɔ kpee buu lɛ mli lɛ kwɔ kɛba. Osɔfoi lɛ kɛ Levibii lɛ kɛkwɔ kɛba. 5 Maŋtsɛ Solomon kɛ Israel asafo muu lɛ ni etsu ayatsɛ amɛ kɛba eŋɔɔ lɛ fɛɛ damɔ Adeka lɛ hiɛ. Amɛgbegbee gwantɛŋi kɛ tsinai babaoo+ bɔ ni anyɛɛɛ akane loo abu naa amɛkɛshã afɔle.

6 Kɛkɛ ni osɔfoi lɛ kɛ Yehowa kpaŋmɔ adeka lɛ yama egbɛhe,+ yɛ shĩa lɛ sɛɛtsu lɛ, ni ji He Krɔŋkrɔŋ Fe Fɛɛ lɛ mli yɛ kerubim lɛ afiji lɛ ashishi.+

7 Kerubim lɛ afiji ni amɛgbɛ mli lɛ ha he ni Adeka lɛ ma lɛ, no hewɔ lɛ, kerubim lɛ afiji lɛ ha Adeka lɛ kɛ ehe tsei lɛ anɔ.+ 8 Ehe tsei+ lɛ kɛlɛ aahu akɛ, anaa amɛnaabui yɛ He Krɔŋkrɔŋ lɛ yɛ sɛɛtsu lɛ hiɛ, shi anaaa yɛ kpo lɛ nɔ. Ni amɛyɛ jɛmɛ kɛbashi ŋmɛnɛ. 9 Nɔ ko nɔ ko bɛ Adeka lɛ mli akɛ ja tɛi tɛtrɛbii enyɔ+ ni Mose kɛwo mli+ yɛ Horeb, be ni Yehowa kɛ Israelbii lɛ kpaŋ kpaŋmɔ+ be ni amɛshi Ejipt shikpɔŋ lɛ nɔ lɛ.+

10 Be ni osɔfoi lɛ je kpo kɛjɛ he krɔŋkrɔŋ lɛ, atatu+ lɛ bayi Yehowa shĩa lɛ obɔ.+ 11 Osɔfoi lɛ nyɛɛɛ adamɔ shi ni amɛsɔmɔ yɛ atatu lɛ hewɔ, ejaakɛ Yehowa anunyam lɛ eyi Yehowa shĩa lɛ obɔ.+ 12 Kɛkɛ ni Solomon wie akɛ: “Yehowa kɛɛ ebaahi duŋ kpii lɛ mli.+ 13 Mima shĩa grɔŋŋ* mihã bo, he ko ni ma shi shiŋŋ koni ohi jɛmɛ kɛya naanɔ.”+

14 Kɛkɛ ni maŋtsɛ lɛ tsɔ ehe ni ejɔɔ Israel asafo lɛ fɛɛ be ni Israel asafo lɛ fɛɛ damɔ shi lɛ.+ 15 Ekɛɛ akɛ: “Ajie Yehowa, Israel Nyɔŋmɔ lɛ, mɔ ni kɛ lɛ diɛŋtsɛ enaabu wo mitsɛ David shi, ni etsɔ lɛ diɛŋtsɛ enine nɔ ehã eba mli lɛ yi, mɔ ni kɛɛ akɛ, 16 ‘Kɛjɛ gbi nɔ ni mijie miwebii Israel kɛje Ejipt lɛ, mihalako maŋ ko yɛ Israel wekui lɛ fɛɛ amli koni ama shĩa ahã mi yɛ jɛmɛ koni migbɛ́i lɛ akã nɔ,+ shi mihala David koni eye mimaŋ Israel nɔ.’ 17 No mli lɛ, ekã mitsɛ David tsui nɔ akɛ ema shĩa ehã Yehowa, Israel Nyɔŋmɔ lɛ gbɛ́i lɛ.+ 18 Shi Yehowa kɛɛ mitsɛ David akɛ, ‘Ekã otsui nɔ akɛ oma shĩa ohã migbɛ́i lɛ, ni ehi jogbaŋŋ akɛ nɔ ko nakai kã otsui nɔ. 19 Shi jeee bo ji mɔ ni baama shĩa lɛ, shi moŋ, bo diɛŋtsɛ obinuu ni abaafɔ ahã bo lɛ,* lɛ ji mɔ ni baama shĩa lɛ ehã migbɛ́i lɛ.’+ 20 Yehowa eye shi ni ewo lɛ nɔ, ejaakɛ miye mitsɛ David sɛɛ, ni mita Israel maŋtsɛ sɛi lɛ nɔ tamɔ bɔ ni Yehowa wo shi lɛ pɛpɛɛpɛ. Mima shĩa lɛ hu mihã Yehowa, Israel Nyɔŋmɔ lɛ gbɛ́i lɛ,+ 21 ni misaa he ko hu yɛ jɛmɛ mihã Adeka lɛ ni kpaŋmɔ+ ni Yehowa kɛ wɔtsɛmɛi lɛ kpaŋ be ni ejie amɛ kɛje Ejipt shikpɔŋ lɛ nɔ lɛ yɔɔ mli lɛ.”

22 Kɛkɛ ni Solomon damɔ Yehowa afɔleshaa latɛ lɛ hiɛ yɛ Israel asafo lɛ fɛɛ hiɛ, ni egbɛ enijiaŋ kɛtee ŋwɛi,+ 23 ni ekɛɛ akɛ: “Yehowa, Israel Nyɔŋmɔ, nyɔŋmɔ ko nyɔŋmɔ ko bɛ ŋwɛi loo shikpɔŋ lɛ nɔ ni tamɔ bo,+ ejaakɛ oyeɔ kpaŋmɔ nɔ ni ojieɔ suɔmɔ ni tsakeee+ kpo otsɔɔ otsuji ni nyiɛɔ yɛ ohiɛ kɛ amɛtsui fɛɛ lɛ.+ 24 Oye shi ni owo otsulɔ, ni ji mitsɛ David lɛ nɔ. Bo diɛŋtsɛ okɛ onaabu wo shi, ni ŋmɛnɛ gbi nɛɛ otsɔ bo diɛŋtsɛ onine nɔ ohã eba mli.+ 25 Ni agbɛnɛ, Yehowa, Israel Nyɔŋmɔ, ye shi ni owo otsulɔ, ni ji mitsɛ David lɛ nɔ be ni okɛɛ akɛ: ‘Kɛ́ obihii lɛ ahiɛ hi amɛhe nɔ jogbaŋŋ ni amɛnyiɛ yɛ mihiɛ tamɔ bɔ ni onyiɛ yɛ mihiɛ lɛ, no lɛ ebaŋ kɔkɔɔkɔ akɛ be ko baashɛ ni anáŋ oseshinyo ko ni baata Israel maŋtsɛ sɛi lɛ nɔ.’+ 26 Ni agbɛnɛ, Israel Nyɔŋmɔ, ofainɛ hã shi ni owo otsulɔ, ni ji mitsɛ David lɛ aba mli.

27 “Shi ani Nyɔŋmɔ baaba ebahi shikpɔŋ lɛ nɔ lɛɛlɛŋ?+ Naa! Ŋwɛii, ŋwɛii amli ŋwɛi po edaaa hãaa bo;+ enyiɛ nɔŋŋ shĩa ni mima nɛɛ!+ 28 No hewɔ lɛ, Yehowa, mi-Nyɔŋmɔ, bo otsulɔ sɔlemɔ kɛ faikpamɔ kɛhã mɔbɔnalɛ lɛ toi, ni obo sɔlemɔ ni otsulɔ sɔleɔ kɛhã yelikɛbuamɔ lɛ, kɛ sɔlemɔ ni esɔleɔ yɛ ohiɛ ŋmɛnɛ gbi nɛɛ toi. 29 Hã ohiŋmɛii akã shĩa nɛɛ he jenamɔ kɛ jetsɛremɔ, shĩa ni owie yɛ he akɛ, ‘Migbɛ́i baahi jɛmɛ’ lɛ,+ ni obo sɔlemɔ ni otsulɔ ewó ehiɛ etsɔɔ biɛ ni esɔleɔ lɛ toi.+ 30 Ni obo otsulɔ faikpamɔ kɛhã mɔbɔnalɛ kɛ nɔ ni omaŋ Israel biɔ be ni amɛtsɔ amɛhiɛ amɛhã biɛ ni amɛsɔleɔ lɛ toi, ni onu yɛ he ni oyɔɔ lɛ, he ni oyɔɔ yɛ ŋwɛii+ lɛ; ni onu ni okɛke.+

31 “Kɛ́ mɔ ko fee enyɛmi gbɔmɔ esha ni ahã ekã kitã,* ni kitakamɔ lɛ he loomɔ bakã enɔ, ni be ni kitã lɛ he loomɔ kã enɔ lolo lɛ eba ofɔleshaa latɛ lɛ hiɛ yɛ oshĩa nɛɛ,+ 32 no lɛ, jɛɛ ŋwɛii onu ni otsu he nii, ni okojo otsuji, ni obu mɔ fɔŋ lɛ fɔ,* ni ohã nɔ ni efee lɛ ababua eyiteŋ, ni obu jalɔ lɛ bem* ni ojɔɔ lɛ yɛ lɛ diɛŋtsɛ ejalɛ lɛ naa.+

33 “Kɛ́ henyɛlɔ ko ye omaŋ Israel nɔ kunim yɛ esha ni amɛtee nɔ amɛfee amɛshi bo lɛ hewɔ,+ ni amɛku amɛsɛɛ kɛba oŋɔɔ ni amɛwo ogbɛ́i+ lɛ hiɛ nyam ni amɛsɔle ni amɛkpa bo fai koni ona amɛ mɔbɔ yɛ oshĩa nɛɛ,+ 34 no lɛ, jɛɛ ŋwɛii onu, ni okɛ omaŋ Israel he esha lɛ ake amɛ, ni okɛ amɛ aku sɛɛ kɛba shikpɔŋ ni okɛhã amɛtsɛmɛi lɛ nɔ ekoŋŋ.+

35 “Kɛji aŋa ŋwɛi naa ni nugbɔ enɛɛɛ+ akɛni amɛtee nɔ amɛfee esha amɛshi bo lɛ hewɔ,+ ni amɛtsɔ amɛhiɛ amɛhã biɛ ni amɛwo ogbɛ́i lɛ hiɛ nyam ni amɛtsi amɛhe kɛje esha lɛ he akɛni oba amɛ shi lɛ hewɔ* lɛ,+ 36 no lɛ, jɛɛ ŋwɛii onu, ni okɛ otsuji, ni ji omaŋ Israel he esha lɛ ake amɛ, ejaakɛ obaatsɔɔ amɛ gbɛ+ kpakpa ni esa akɛ amɛnyiɛ nɔ; ni ohã nugbɔ anɛ yɛ shikpɔŋ+ ni okɛhã amɛ akɛ gboshinii lɛ nɔ.

37 “Kɛji hɔmɔ ba shikpɔŋ lɛ nɔ+ jio, tsɛŋemɔ hela ni gbeɔ mɔ jio, jeŋ dɔlɛ ni hãa ŋmɔshi nibii ŋalaa jio, hela ni hãa tsei gboiɔ+ jio, baalabii pii jio, agãi ni fiteɔ nii waa jio; kɛji amɛhenyɛlɔi bawo amɛhe ka yɛ shikpɔŋ lɛ nɔ maji lɛ eko mli jio,* haomɔ kroko fɛɛ haomɔ kroko loo hela fɛɛ hela ni baaba jio,+ 38 no lɛ, sɔlemɔ fɛɛ sɔlemɔ, loo fai fɛɛ fai+ ni mɔ ko loo omaŋ Israel fɛɛ baakpa kɛhã mɔbɔnalɛ (ejaakɛ mɔ fɛɛ mɔ le lɛ diɛŋtsɛ etsui mli haomɔ)+ be ni amɛgbɛ amɛnijiaŋ amɛtsɔɔ shĩa nɛɛ, 39 jɛɛ ŋwɛii, ni ji oshihilɛhe+ lɛ onu ni okɛke+ ni otsu he nii; ni ojɔɔ mɔ fɛɛ mɔ yɛ gbɛ fɛɛ gbɛ ni ekɔ lɛ naa,+ ejaakɛ ole etsuiŋ (bo pɛ ji mɔ ni le adesa fɛɛ adesa tsuiŋ lɛɛlɛŋ),+ 40 koni amɛshe bo gbeyei gbii fɛɛ ni amɛkɛbaahi shikpɔŋ ni okɛhã amɛtsɛmɛi lɛ nɔ lɛ.

41 “Agbɛnɛ hu, kɛ́ gbɔ ko ni jɛɛɛ omaŋ Israel teŋ jɛ maŋsɛɛ shɔŋŋ ba yɛ ogbɛ́i* lɛ hewɔ+ 42 (ejaakɛ amɛbaanu ogbɛ́i kpele+ lɛ he kɛ onineshiwalɛ kɛ onine ni okpã mli lɛ he), ni eba ni ekɛ ehiɛ tsɔɔ shĩa nɛɛ ni esɔle lɛ, 43 no lɛ, jɛɛ ŋwɛii, ni ji oshihilɛhe+ lɛ obo toi, ni ofee nɔ fɛɛ nɔ ni gbɔ lɛ baabi bo lɛ, koni mɛi ni yɔɔ shikpɔŋ lɛ nɔ lɛ fɛɛ ale ogbɛ́i lɛ ni amɛshe bo gbeyei+ tamɔ bɔ ni omaŋ Israel feɔ lɛ, ni amɛná amɛle akɛ ogbɛ́i kã shĩa nɛɛ ni mima lɛ nɔ.

44 “Kɛ́ otsu omaŋbii lɛ koni amɛkɛ amɛhenyɛlɔi ayawu ta, ekɔɔɔ he eko he ni obaatsu amɛ,+ ni amɛwó amɛhiɛ amɛtsɔɔ maŋ ni ohala+ lɛ kɛ shĩa ni mima mihã ogbɛ́i lɛ ni amɛsɔle+ amɛhã Yehowa lɛ,+ 45 no lɛ, jɛɛ ŋwɛii onu amɛsɔlemɔ kɛ amɛfaikpamɔ kɛhã mɔbɔnalɛ lɛ ni oye amɛsane ohã amɛ.

46 “Kɛ́ amɛfee esha amɛshi bo (ejaakɛ mɔ ko mɔ ko bɛ ni efeee esha),+ ni omli fu amɛ, ni okɛ amɛ wo henyɛlɔ ko dɛŋ, ni amɛhenyɛlɔ lɛ ŋɔ amɛ nom kɛtee henyɛlɔ lɛ shikpɔŋ lɛ nɔ, he ni jekɛ jio, he ni jekɛɛɛ jio;+ 47 ni amɛhiɛ tserɛ amɛ yɛ shikpɔŋ ni aŋɔ amɛ nom kɛtee nɔ lɛ nɔ,+ ni amɛku amɛsɛɛ kɛba oŋɔɔ,+ ni amɛkpa bo fai koni ona amɛ mɔbɔ yɛ amɛhenyɛlɔ lɛ shikpɔŋ lɛ nɔ+ amɛkɛɛ, ‘Wɔfee esha ni wɔtɔ̃; wɔfee efɔŋ,’+ 48 ni amɛku amɛsɛɛ kɛba oŋɔɔ kɛ amɛtsui+ fɛɛ kɛ amɛsusuma* fɛɛ yɛ amɛhenyɛlɔ lɛ shikpɔŋ ni aŋɔ amɛ nom kɛtee nɔ lɛ nɔ, ni amɛtsɔ amɛhiɛ amɛhã amɛshikpɔŋ lɛ ni okɛhã amɛtsɛmɛi lɛ kɛ maŋ ni ohala lɛ kɛ shĩa ni mima mihã ogbɛ́i lɛ, ni amɛsɔle amɛhã bo lɛ,+ 49 no lɛ, jɛɛ ŋwɛii, ni ji oshihilɛhe+ lɛ onu amɛsɔlemɔ kɛ amɛfaikpamɔ kɛhã mɔbɔnalɛ lɛ, ni oye amɛsane ohã amɛ, 50 ni okɛ esha ni omaŋbii lɛ efee amɛshi bo lɛ ake amɛ, okɛ efɔŋ fɛɛ efɔŋ ni amɛfee amɛshi bo lɛ ake amɛ. Ni ohã amɛnii afee amɛhenyɛlɔ lɛ mɔbɔ ni ena amɛ mɔbɔ+ 51 (ejaakɛ omaŋ kɛ ogboshinii ji amɛ,+ mɛi ni ojie kɛje Ejipt,+ kɛje dade flɔnɔɔ lɛ mli lɛ).+ 52 Ohiŋmɛii akamɔ ahã fai ni otsulɔ kpaa kɛhã mɔbɔnalɛ+ kɛ fai ni omaŋ Israel kpaa kɛhã mɔbɔnalɛ lɛ, ni obo toi be fɛɛ be ni amɛbaabo amɛtsɛ bo.*+ 53 Ejaakɛ, bo Nuŋtsɔ Ofe Yehowa, bo diɛŋtsɛ oŋɔ amɛ ohã ohe akɛ ogboshinii yɛ mɛi ni yɔɔ shikpɔŋ lɛ nɔ lɛ fɛɛ ateŋ,+ tamɔ bɔ ni otsɔ otsulɔ Mose nɔ owie be ni ojie wɔtsɛmɛi lɛ kɛje Ejipt lɛ.”

54 Be ni Solomon gbe sɔlemɔ nɛɛ kɛ fai ni ekpaa Yehowa kɛhã mɔbɔnalɛ lɛ fɛɛ naa nɔŋŋ lɛ, ete shi yɛ Yehowa afɔleshaa latɛ lɛ hiɛ, he ni no mli lɛ ekula shi yɛ ni egbɛ enijiaŋ kɛtee ŋwɛii lɛ.+ 55 Eho edamɔ shi ni ekɛ gbee ni wa jɔɔ Israel asafo muu lɛ fɛɛ ekɛɛ: 56 “Ajie Yehowa, mɔ ni ehã emaŋ Israel hejɔɔmɔhe, tamɔ bɔ ni ewo shi lɛ pɛpɛɛpɛ+ lɛ yi. Nibii kpakpai ni etsɔ Mose nɔ ewo he shi lɛ ekome folo po ekako shi.+ 57 Yehowa, wɔ-Nyɔŋmɔ lɛ kɛ wɔ ahi shi tamɔ bɔ ni ekɛ wɔtsɛmɛi lɛ hi shi lɛ pɛpɛɛpɛ.+ Ekashi wɔ, ni ekakwa wɔ hu.+ 58 Edɔ wɔtsui kɛba eŋɔɔ,+ koni wɔnyiɛ yɛ egbɛi lɛ fɛɛ nɔ ni wɔye ekitãi, kɛ etaomɔ nii, kɛ eyiŋkpɛi* ni ekɛhã wɔtsɛmɛi lɛ akɛ amɛye nɔ lɛ fɛɛ nɔ. 59 Ni miwiemɔi ni mitsɔ nɔ mikpa Yehowa fai kɛhã mɔbɔnalɛ lɛ ahi Yehowa, wɔ-Nyɔŋmɔ lɛ hiɛ jetsɛremɔ kɛ jenamɔ, koni eye etsulɔ kɛ emaŋ Israel sane ehã amɛ, bɔ ni he baahia kɛhã gbi fɛɛ gbi, 60 koni mɛi ni yɔɔ shikpɔŋ lɛ nɔ lɛ fɛɛ aná ale akɛ Yehowa ji anɔkwa Nyɔŋmɔ lɛ.+ Mɔ ko mɔ ko bɛ sɛɛ dɔŋŋ!+ 61 No hewɔ lɛ, nyɛkɛ nyɛtsui muu fɛɛ ahãa*+ Yehowa, wɔ-Nyɔŋmɔ lɛ, kɛtsɔ nyiɛmɔ ni nyɛaanyiɛ yɛ etaomɔ nii lɛ kɛ ekitãi lɛ anaa lɛ nɔ, tamɔ bɔ ni nyɛfee ŋmɛnɛ gbi nɛɛ.”

62 Ni maŋtsɛ lɛ kɛ Israel fɛɛ shã afɔle kpele yɛ Yehowa hiɛ.+ 63 Solomon shã naanyobɔɔ afɔlei+ ehã Yehowa: Ekɛ tsinai 22,000 kɛ gwantɛŋi 120,000 shã afɔle. Nɛkɛ ji bɔ ni maŋtsɛ lɛ kɛ Israelbii lɛ fɛɛ fee kɛgbele Yehowa shĩa lɛ naa.+ 64 Nakai gbi lɛ, maŋtsɛ lɛ fee kpo lɛ ni yɔɔ Yehowa shĩa lɛ hiɛ lɛ teŋ lɛ krɔŋkrɔŋ, ejaakɛ jɛmɛ ji he ni eshã shãa afɔlei lɛ, kɛ niyenii afɔlei lɛ, kɛ naanyobɔɔ afɔlei lɛ ahe fɔi lɛ yɛ, akɛni akɔɔble afɔleshaa latɛ+ ni yɔɔ Yehowa hiɛ lɛ edaaa bɔ ni shãa afɔlei lɛ, kɛ niyenii afɔlei lɛ, kɛ naanyobɔɔ afɔlei lɛ ahe fɔi+ lɛ fɛɛ baaya nɔ lɛ hewɔ. 65 Nakai be lɛ mli lɛ, Solomon kɛ Israel fɛɛ, asafo babaoo ni jɛ Lebo-hamat* aahu kɛyashi Ejipt Nujɔɔ lɛ he lɛ,+ ye gbi jurɔ+ yɛ Yehowa, wɔ-Nyɔŋmɔ lɛ hiɛ gbii 7, ni amɛsaa amɛye gbi jurɔ lɛ gbii 7 ekoŋŋ, ni fɛɛ fee gbii 14. 66 Enɔ jetsɛremɔ lɛ,* ewo maŋbii lɛ gbɛ, ni amɛjɔɔ maŋtsɛ lɛ, ni amɛtee amɛshĩai kɛ miishɛɛ kɛ tsuijurɔ yɛ nibii kpakpai fɛɛ+ ni Yehowa efee ehã etsulɔ David kɛ emaŋ Israel lɛ hewɔ.