2 Kronika
25 Be ni Amazia batsɔ maŋtsɛ lɛ, no mli lɛ eye afii 25, ni eye nɔ afii 29 yɛ Yerusalem. Atsɛɔ emami Yehoadan,* ni ejɛ Yerusalem.+ 2 Etee nɔ efee nɔ ni ja yɛ Yehowa hiɛ, shi jeee kɛ etsui fɛɛ. 3 Be ni emaŋtsɛyeli lɛ ma shi nɔŋŋ lɛ, egbe etsuji ni gbe etsɛ ni ji maŋtsɛ lɛ.+ 4 Shi egbeee amɛbii lɛ; efee nakai yɛ nɔ ni aŋma yɛ Mla lɛ, ni ji Mose wolo lɛ mli lɛ naa, Yehowa wo kitã yɛ mli akɛ: “Akagbe tsɛmɛi yɛ amɛbii ahewɔ, ni akagbe bii hu yɛ amɛtsɛmɛi ahewɔ; shi agbe mɔ fɛɛ mɔ yɛ lɛ diɛŋtsɛ ehe esha hewɔ.”+
5 Ni Amazia bua Yudabii lɛ fɛɛ anaa ni ehã amɛdamɔ shi yɛ amɛtsɛmɛi ashĩai lɛ anaa, amɛdamɔ shi yɛ asraafoi akpei nɔkwɛlɔi kɛ asraafoi ohai anɔkwɛlɔi ni jɛ Yuda kɛ Benyamin fɛɛ lɛ naa.+ Ekane mɛi ni eye afii 20 kɛyaa lɛ,+ ni ená tawulɔi 300,000 ni atsɔse amɛ* kɛhã ta, ni hiɛɔ akpɔlɔ kɛ tsɛŋ wulu. 6 Agbɛnɛ hu, ekɛ jwiɛtɛi talɛntai* 100 yabɔ Israel tawulɔi kãkãlɔi 100,000 apaa. 7 Shi anɔkwa Nyɔŋmɔ lɛ gbɔmɔ ko ba eŋɔɔ ni ebakɛɛ lɛ akɛ: “Maŋtsɛ, kaahã Israel asraafoi lɛ fata ohe kɛtee, ejaakɛ Yehowa bɛ Israel sɛɛ,+ ebɛ Efraimbii lɛ ateŋ mɔ ko mɔ ko sɛɛ. 8 Okome yaa ni oyafee ekãa yɛ ta lɛ mli. Kɛjeee nakai lɛ, anɔkwa Nyɔŋmɔ lɛ baahã ogbee shi yɛ ohenyɛlɔi lɛ ahiɛ, ejaakɛ Nyɔŋmɔ yɛ hewalɛ ni ekɛyeɔ ebuaa mɔ,+ ni eyɛ hewalɛ ni ekɛhãa mɔ gbeɔ shi hu.” 9 Kɛkɛ ni Amazia bi anɔkwa Nyɔŋmɔ lɛ gbɔmɔ lɛ akɛ: “Ni talɛntai 100 lɛ ni mikɛhã Israel asraafoi lɛ hu?” Anɔkwa Nyɔŋmɔ lɛ gbɔmɔ lɛ kɛɛ lɛ akɛ: “Yehowa baanyɛ ahã bo nɔ ni fe nakai aahu.”+ 10 No hewɔ lɛ, Amazia hã Efraim asraafoi lɛ ni eba eŋɔɔ lɛ ku sɛɛ kɛtee amɛshĩa. Shi amɛmli fu Yuda waa, no hewɔ lɛ, amɛkɛ mlifu ku amɛsɛɛ kɛtee he ni amɛjɛ.
11 Kɛkɛ ni Amazia fee ekãa ni enyiɛ esraafoi lɛ ahiɛ kɛtee Ŋoo Jɔɔ+ lɛ mli, ni eyagbe hii ni jɛ Seir lɛ ateŋ mɛi 10,000.+ 12 Ni Yuda hii lɛ mɔmɔ mɛi 10,000 hiɛkãalɔi. Ni amɛkɛ amɛ tee tɛsaa lɛ yiteŋ, ni amɛtsirɛ amɛyisɛɛ kɛjɛ tɛsaa lɛ yiteŋ ni amɛbatswia shi, ni amɛmli tserɛ. 13 Shi asraafoi lɛ ni Amazia hãaa amɛfata ehe kɛya ta lɛ ni ehã amɛku amɛsɛɛ+ lɛ tee ni amɛyatutua Yuda maji lɛ, kɛjɛ Samaria+ aahu kɛyashi Bet-horon;+ amɛgbe amɛteŋ mɛi 3,000 ni amɛloo ta mli nii babaoo.
14 Shi be ni Amazia yagbe Edombii lɛ ni ekuɔ esɛɛ lɛ, eloo hii ni jɛ Seir lɛ anyɔŋmɔi lɛ kɛba, ni ekɛbamamɔ shi akɛ enyɔŋmɔi,+ ni ekotoɔ amɛ ni eshãa lasu afɔlei ehãa amɛ. 15 No hewɔ lɛ, Yehowa mli fu Amazia waa, ni etsu gbalɔ ko ni eyakɛɛ lɛ akɛ: “Mɛni hewɔ onyiɛ nyɔŋmɔi nɛɛ ni nyɛɛɛ amɛ diɛŋtsɛ amɛwebii lɛ ayiwala amɛhere kɛje odɛŋ lɛ asɛɛ?”+ 16 Shi be ni gbalɔ lɛ kɛ lɛ wieɔ lɛ, maŋtsɛ lɛ kɛɛ lɛ akɛ: “Ani wɔwó bo maŋtsɛ ŋaawolɔ?+ Feemɔ diŋŋ!+ Mɛni ofeɔ ni baahã agbe bo nɛɛ?” Kɛkɛ ni gbalɔ lɛ fee diŋŋ, shi dani ebaafee diŋŋ lɛ, gbalɔ lɛ wie kɛfata he akɛ: “Akɛni ofee enɛ, ni obooo miŋaawoo lɛ toi hewɔ lɛ, mile akɛ Nyɔŋmɔ ekpɛ eyiŋ akɛ ebaakpãtã ohiɛ.”+
17 Be ni Maŋtsɛ Amazia kɛ eŋaawolɔi lɛ tee ajina sɛɛ lɛ, etsu ni ayakɛɛ Israel maŋtsɛ Yehoash, Yehu binuu Yehoahaz binuu lɛ akɛ: “Ba, ni wɔkɛ wɔhe awu ta.”*+ 18 Israel maŋtsɛ Yehoash tsu ayakɛɛ Yuda maŋtsɛ Amazia akɛ: “Lebanon ŋmei tso lɛ tsu ayakɛɛ Lebanon tseneduru tso lɛ akɛ, ‘Okɛ obiyoo ahã mibinuu gbãla.’ Shi Lebanon kooloo awuiyelɔ ko baho ni enaanaa ŋmei tso lɛ nɔ. 19 Ooshwã akɛ, ‘Naa! Mitswia* Edom nii.’+ No hewɔ lɛ, otsui ewó ehe nɔ, ni ootao hiɛnyam. Shi hii omaŋtsɛ shĩa lɛ. Mɛni hewɔ otaoɔ ni amanehulu aba onɔ, ni okɛ Yuda fɛɛ agbee shi nɛɛ?”
20 Shi Amazia booo toi,+ ejaakɛ enɛ jɛ anɔkwa Nyɔŋmɔ lɛ ŋɔɔ koni ekɛ amɛ awo ehenyɛlɔi lɛ adɛŋ,+ ejaakɛ amɛyanyiɛ Edombii lɛ anyɔŋmɔi lɛ asɛɛ.+ 21 No hewɔ lɛ, Israel maŋtsɛ Yehoash kwɔ kɛtee, ni ekɛ Yuda maŋtsɛ Amazia yawu yɛ Bet-shemesh,+ ni ji Yuda nɔ lɛ. 22 Israel ye Yuda nɔ kunim, ni mɔ fɛɛ mɔ jo foi kɛtee eshĩa.* 23 Israel maŋtsɛ Yehoash mɔ Yuda maŋtsɛ Amazia, Yehoahaz* binuu Yehoash binuu lɛ, yɛ Bet-shemesh. Kɛkɛ ni ekɛ lɛ ba Yerusalem, ni ekumɔ Yerusalem gbogbo lɛ kɛjɛ agbó ni atsɛɔ lɛ Efraim Agbó+ lɛ naa kɛyashi agbó ni atsɛɔ lɛ Koŋ Agbó+ lɛ naa, gbogbo ni ekumɔ lɛ kɛlɛ ji ninetalɔi 400.* 24 Eloo shika tsuru kɛ jwiɛtɛi lɛ fɛɛ kɛ nibii fɛɛ ni ana yɛ anɔkwa Nyɔŋmɔ lɛ shĩa lɛ ni Obed-edom kwɛɔ nɔ lɛ,* kɛ maŋtsɛ shĩa lɛ jwetritoohei+ lɛ kɛ mɛi ni emɔmɔ yɛ ta lɛ mli lɛ hu. Ni eku esɛɛ etee Samaria.
25 Yuda maŋtsɛ Amazia,+ Yehoash binuu lɛ, hi shi afii 15 yɛ Israel maŋtsɛ Yehoash,+ Yehoahaz binuu lɛ gbele sɛɛ.+ 26 Amazia shihilɛ mli saji krokomɛi fɛɛ, kɛjɛ shishijee kɛyashi naagbee lɛ, naa! aŋmala yɛ Yuda Maŋtsɛmɛi Awolo lɛ kɛ Israel Maŋtsɛmɛi Awolo lɛ mli. 27 Kɛjɛ be ni Amazia je Yehowa sɛɛ lɛ, akpaŋ eyi nɔ+ yɛ Yerusalem, ni ejo foi kɛtee Lakish, shi atsu hii komɛi kɛtiu lɛ kɛtee Lakish, ni amɛyagbe lɛ yɛ jɛmɛ. 28 Ni amɛwó lɛ amɛfɔ̃ okpɔŋɔi anɔ kɛku amɛsɛɛ, ni ayafu lɛ yɛ Yuda maŋ lɛ mli yɛ etsɛmɛi lɛ amasɛi.