Yeremia
13 Nɔ ni Yehowa kɛɛ mi nɛ: “Yaa ni oyahé klala bɛlti ni okɛfi ohɛ, shi okɛkatsɔ nu mli.” 2 No hewɔ lɛ, mitee miyahe bɛlti lɛ yɛ Yehowa wiemɔ lɛ naa ni mikɛfi mihɛ. 3 Ni Yehowa kɛɛ mi* nɔ ni ji shii enyɔ nɔ akɛ: 4 “Kɔ bɛlti ni oyahé ni fi ohɛ lɛ, ni ote shi oya Yufrate Faa lɛ naa ni okɛyato tɛsaa fɔji lɛ eko mli yɛ jɛmɛ.” 5 No hewɔ lɛ, mitee mikɛyato yɛ Yufrate lɛ naa tamɔ bɔ ni Yehowa fã mi lɛ.
6 Shi gbii babaoo sɛɛ lɛ, Yehowa kɛɛ mi akɛ: “Tee shi ni oya Yufrate lɛ naa koni oyakɔ bɛlti lɛ ni mifã bo akɛ okɛyato jɛmɛ lɛ.” 7 No hewɔ lɛ, mitee Yufrate lɛ naa ni miyatsa bɛlti lɛ, ni mijie kɛje he ni mikɛto lɛ, ni mina akɛ bɛlti lɛ efite; ehiii kɛ nɔ ko feemɔ dɔŋŋ.
8 Kɛkɛ ni Yehowa kɛɛ mi akɛ: 9 “Nɔ ni Yehowa kɛɛ nɛ, ‘Nɛkɛ pɛpɛɛpɛ ji bɔ ni mafite nɔ ni Yuda kɛshwãa lɛ kɛ nibii babaoo ni Yerusalem kɛshwãa lɛ.+ 10 Nɛkɛ maŋ fɔŋ nɛɛ ni booo miwiemɔi lɛ atoi,+ ni amɛkɛ kuɛŋtimɔ nyiɛɔ amɛ diɛŋtsɛ amɛtsui sɛɛ,+ ni amɛnyiɛɔ nyɔŋmɔi krokomɛi asɛɛ, ni amɛsɔmɔɔ amɛ ni amɛkotoɔ amɛ lɛ, baatsɔ tamɔ bɛlti nɛɛ ni ehiii kɛ nɔ ko feemɔ dɔŋŋ lɛ.’ 11 ‘Ejaakɛ bɔ ni bɛlti kpɛtɛɔ mɔ hɛ lɛ, nakai mihã Israel shĩa muu lɛ fɛɛ kɛ Yuda shĩa muu lɛ fɛɛ kpɛtɛ mi koni amɛtsɔ maŋ,+ kɛ gbɛ́i,+ kɛ yijiemɔ, kɛ nɔ ko fɛfɛo amɛhã mi. Shi amɛbooo mi toi,’+ Yehowa kɛɛ.
12 “Agbɛnɛ hu, kɛɛmɔ amɛ sane nɛɛ hu akɛ, ‘Nɔ ni Yehowa, Israel Nyɔŋmɔ lɛ kɛɛ nɛ: “Atsɔ wain awo gbɛ́ fɛɛ gbɛ́ mli obɔ.”’ Ni amɛbaahere bo nɔ akɛ, ‘Ani wɔleee akɛ esa akɛ atsɔ wain awo gbɛ́ fɛɛ gbɛ́ mli obɔ?’ 13 Kɛkɛ lɛ, kɛɛmɔ amɛ akɛ, ‘Nɔ ni Yehowa kɛɛ nɛ: “Naa, mibahã mɛi fɛɛ ni yɔɔ shikpɔŋ nɛɛ nɔ lɛ, maŋtsɛmɛi ni taraa David maŋtsɛ sɛi lɛ nɔ lɛ, kɛ osɔfoi lɛ kɛ gbalɔi lɛ, kɛ mɛi fɛɛ ni yɔɔ Yerusalem lɛ atɔrɔ dãa kpɔtɔɔ.+ 14 Ni mamɔmɔ amɛ matswia amɛhe, tsɛmɛi kɛ bihii fɛɛ,” Yehowa kɛɛ.+ “Mimusuŋ etsɔŋ mi yɛ amɛhe, ni miyeŋ awerɛho yɛ amɛhewɔ, ni minaŋ amɛ mɔbɔ hu; nɔ ko nɔ ko etsiŋ minaa yɛ amɛhiɛ ni makpãtã lɛ he.”’+
15 Nyɛbaa nyɛtoi shi ni nyɛboa toi jogbaŋŋ.
Nyɛkawóa nyɛhe nɔ, ejaakɛ Yehowa ewie.
16 Nyɛkɛ anunyam ahãa Yehowa, nyɛ-Nyɔŋmɔ lɛ,
Dani ehã duŋ awo
Dani nyɛnaji atɛrɛ yɛ gɔji lɛ anɔ yɛ gbɛkɛnaashi mli.
17 Ni kɛ́ nyɛbooo toi lɛ,
Mafó* yɛ teemɔŋ yɛ nyɛshwãa lɛ hewɔ.
18 Kɛɛmɔ maŋtsɛ lɛ kɛ maŋnyɛ+ lɛ akɛ, ‘Nyɛtaraa shikpɔŋ,
Ejaakɛ nyɛkekere fɛfɛo lɛ baaje nyɛyiteŋ agbee shi.’
19 Aŋamɔ wuoyigbɛ maji lɛ anaa,* ni mɔ ko mɔ ko bɛ ni baagbele.
Aŋɔ Yuda fɛɛ nom, aŋɔ amɛ fɛɛ nom kɛtee kwraa.+
20 Holemɔ ohiŋmɛii anɔ ni okwɛ mɛi ni jɛ kooyigbɛ kɛbaa lɛ.+
Nɛgbɛ tooku lɛ ni akɛhã bo lɛ yɔɔ, ogwantɛŋi fɛfɛji lɛ?+
21 Mɛni obaakɛɛ, kɛ́ toigbalamɔ jɛ
Onanemɛi kpaakpai ni okɛ amɛ bɔ naanyo kɛjɛ shishijee lɛ aŋɔɔ kɛba?+
Ani kɔ̃ɔmɔ etaŋ ohe tamɔ yoo ni miifɔ?+
22 Ni kɛ́ okɛɛ yɛ otsui mli akɛ, ‘Mɛni hewɔ nɛkɛ nibii nɛɛ ba minɔ?’+ lɛ,
Otɔmɔ kpele lɛ hewɔ ajie oshishigbɛ atade lɛ,+
Ni onanetsitsi waa ohe waa lɛ.
23 Ani Kushnyo* baanyɛ atsake ehewolo? Ani kootsɛ baanyɛ atsake ehe turuntarai lɛ?+
No lɛ, nyɛ hu nyɛbaanyɛ nyɛfee ekpakpa,
Nyɛ mɛi ni atsɔse nyɛ koni nyɛfee efɔŋ.
24 No hewɔ lɛ, magbɛ amɛ mashwã tamɔ jwɛi ni ŋa kpataa nɔ kɔɔyɔɔ eloo kɛmiiya.+
25 Enɛ ji ogbɛfaŋnɔ, gbɛfaŋnɔ ni misusu mihã bo,” Yehowa kɛɛ,
26 No hewɔ lɛ, mawó oshishigbɛ atade lɛ nɔ kɛha ohiɛ,
Ni abaana ohiɛgbele lɛ,+
27 Ogbalafitemɔ nifeemɔi+ lɛ kɛ ojwamaŋ bolɔmɔi lɛ,
Oshawofeemɔ ni yɔɔ nyaŋemɔ* lɛ.
Mina onifeemɔi ni yɔɔ nyaŋemɔ lɛ+
Yɛ gɔŋkpɔi lɛ anɔ, yɛ ŋa lɛ nɔ.
Ao Yerusalem, kpoo hã bo!
Mɛɛ be nɔŋŋ obaaya nɔ owo ohe muji kɛyashi?”+