Kojolɔi

9 Be ko lɛ, Abimelek,+ Yerubaal binuu lɛ, tee emami nyɛmimɛi hii lɛ aŋɔɔ yɛ Shekem, ni eyakɛɛ amɛ kɛ enii* shĩabii lɛ fɛɛ akɛ: 2 “Nyɛfainɛ, nyɛbia onukpai* ni yɔɔ Shekem lɛ fɛɛ akɛ, ‘Te nɔ ni nyɛsumɔɔ lɛ, akɛ Yerubaal bihii 70 lɛ fɛɛ+ aye nyɛnɔ aloo akɛ nuu kome aye nyɛnɔ? Ni nyɛkaia hu akɛ, mi lɛ, nyɛheloo kɛ lá* ji mi.’”

3 No hewɔ lɛ, emami nyɛmimɛi hii lɛ yakɛɛ Shekem onukpai lɛ fɛɛ nɔ ni ewie lɛ, ni amɛyiŋ tsɔ* kɛyanyiɛ Abimelek sɛɛ, ejaakɛ amɛkɛɛ akɛ: “Lɛ ji wɔnyɛmi.” 4 Amɛŋɔ jwiɛtɛi kapɛji 70 kɛjɛ Baal-berit shĩa*+ lɛ amɛhã lɛ, ni Abimelek kɛ shika lɛ yabɔ hii komɛi ni ebuuu nɔ ko ni tsuuu nɔ ko nɔ ko apaa koni amɛnyiɛ esɛɛ. 5 No sɛɛ lɛ, etee epapa shĩa lɛ yɛ Ofra,+ ni eyagbe enyɛmimɛi hii lɛ,+ ni ji Yerubaal bihii lɛ, hii 70, yɛ tɛ kome nɔ. Mɔ pɛ ni yi ná wala ji Yotam, Yerubaal bihii lɛ ateŋ gbekɛ kwraa lɛ, ejaakɛ eyatee.

6 Kɛkɛ ni Shekem onukpai lɛ fɛɛ kɛ mɛi fɛɛ ni yɔɔ Bet-milo lɛ bua amɛhe naa, ni amɛwó Abimelek maŋtsɛ+ yɛ tso agbo lɛ masɛi, yɛ akulashiŋ ni yɔɔ Shekem lɛ masɛi.

7 Be ni ayakɛɛ Yotam lɛ, amrɔ nɔŋŋ ni etee eyadamɔ Gerizim Gɔŋ+ lɛ yiteŋ, ni ebo ekɛɛ amɛ akɛ: “Nyɛboa mi toi, nyɛ Shekem onukpai, ni Nyɔŋmɔ hu baabo nyɛ toi.

8 “Be ko lɛ, tsei tee koni amɛyafɔ amɛteŋ mɔ kome mu ni amɛwó lɛ amɛnɔ maŋtsɛ. No hewɔ lɛ, amɛyakɛɛ oliv tso akɛ, ‘Ye wɔnɔ.’+ 9 Shi oliv tso kɛɛ amɛ akɛ, ‘Ani mihã mu* ni anáa kɛjɛɔ mimli ni akɛwoɔ Nyɔŋmɔ kɛ gbɔmɛi ahiɛ nyam lɛ aŋmɛɛ mi koni miya ni kɔɔyɔɔ ayatswa mi kɛya kɛba yɛ tsei krokomɛi lɛ anɔ?’ 10 Kɛkɛ ni tsei lɛ yakɛɛ agbami tso akɛ, ‘Ba ni obaye wɔnɔ.’ 11 Shi agbami tso kɛɛ amɛ akɛ, ‘Ani mihã miŋɔɔmɔ kɛ yibii kpakpai ni miwoɔ lɛ aŋmɛɛ mi koni miya ni kɔɔyɔɔ ayatswa mi kɛya kɛba yɛ tsei krokomɛi lɛ anɔ?’ 12 No sɛɛ lɛ, tsei lɛ yakɛɛ wain tso akɛ, ‘Ba ni obaye wɔnɔ.’ 13 Wain tso hã amɛ hetoo akɛ, ‘Ani mihã miwain hee ni hãa Nyɔŋmɔ kɛ gbɔmɛi náa miishɛɛ lɛ aŋmɛɛ mi koni miya ni kɔɔyɔɔ ayatswa mi kɛya kɛba yɛ tsei krokomɛi lɛ anɔ?’ 14 Naagbee lɛ, tsei krokomɛi lɛ fɛɛ yakɛɛ ŋmei tso akɛ, ‘Ba ni obaye wɔnɔ.’+ 15 Kɛkɛ ni ŋmei tso kɛɛ tsei lɛ akɛ, ‘Kɛ́ nyɛmiifɔ mi mu koni nyɛwó mi nyɛnɔ maŋtsɛ lɛɛlɛŋ lɛ, no lɛ, nyɛbaa koni nyɛbabaa abo yɛ mihɔɔŋ lɛ shishi. Shi kɛjeee nakai lɛ, no lɛ, la ajɛ mimli ashã Lebanon tseneduru tsei lɛ.’

16 “No hewɔ lɛ, ani nyɛye anɔkwa ni nyɛye sane ni ja akɛ nyɛwó Abimelek maŋtsɛ,+ ni ani nyɛfee Yerubaal kɛ eshĩabii lɛ ekpakpa, ni nyɛto lɛ najiaŋ bɔ ni sa pɛpɛɛpɛ? 17 Be ni mipapa wu ehã nyɛ lɛ,+ ekɛ ewala* wo oshãra mli koni ehere nyɛ kɛje Midian dɛŋ.+ 18 Shi ŋmɛnɛ lɛ, nyɛte shi nyɛwo mipapa shĩa lɛ, ni nyɛgbe ebihii lɛ, hii 70, yɛ tɛ kome nɔ.+ Ni nyɛwó Abimelek, enyɔŋ yoo lɛ binuu+ lɛ maŋtsɛ yɛ Shekem onukpai lɛ anɔ, ejaakɛ nyɛnyɛmi ji lɛ. 19 Anɔkwa, kɛji ŋmɛnɛ gbi nɛɛ, nyɛye Yerubaal kɛ eshĩabii lɛ anɔkwa ni nyɛye sane ni ja lɛ, no lɛ, nyɛnáa miishɛɛ yɛ Abimelek hewɔ, ni lɛ hu ená miishɛɛ yɛ nyɛ hewɔ. 20 Shi kɛjeee nakai lɛ, no lɛ, la ajɛ Abimelek mli ashã Shekem onukpai lɛ kɛ Bet-milo,+ ni la ajɛ Shekem onukpai lɛ kɛ Bet-milo mli ashã Abimelek.”+

21 Kɛkɛ ni Yotam+ jo foi ni eyatee ehe yɛ Beer, ni eyahi jɛmɛ yɛ enyɛmi nuu, Abimelek hewɔ.

22 Abimelek ye* Israel nɔ afii etɛ. 23 Kɛkɛ ni Nyɔŋmɔ hã nyɛɛ te shi yɛ* Abimelek kɛ Shekem onukpai lɛ ateŋ, ni amɛnyiɛ Abimelek shishi. 24 Enɛ ba lɛ nakai koni akɛtɔ gbe ni agbe Yerubaal bihii 70 lɛ musuŋshaa naa lɛ he owele, bɔ ni afee ni amɛlá lɛ yi sɔ̃ lɛ abakã amɛnyɛmi nuu Abimelek nɔ yɛ gbe ni egbe amɛ lɛ hewɔ,+ kɛ agbɛnɛ hu Shekem onukpai lɛ anɔ, yɛ ye ni amɛye amɛbua lɛ ni egbe enyɛmimɛi hii lɛ hewɔ. 25 No hewɔ lɛ, Shekem onukpai lɛ tsu mɛi ni amɛyawo lɛ ka yɛ gɔji lɛ ayiteŋ, ni amɛshɔ̃ɔ mɔ fɛɛ mɔ ni tsɔɔ gbɛ lɛ nɔ kɛhoɔ lɛ nii yɛ edɛŋ. Ni ayakɛɛ Abimelek.

26 Kɛkɛ ni Gaal, Ebed binuu lɛ, kɛ enyɛmimɛi hii lɛ fo mli kɛtee Shekem,+ ni Shekem onukpai lɛ mu amɛfɔ̃ enɔ. 27 Amɛje kpo kɛtee amɛŋmɔji ashi ni amɛyakpa amɛwain ŋmɔji lɛ amli yibii lɛ, amɛŋa wain yɛ wain yibii lɛ amli, ni amɛye gbi jurɔ, ni no sɛɛ lɛ amɛtee amɛnyɔŋmɔ+ lɛ shĩa lɛ, ni amɛyaye ni amɛyanu ni amɛlomɔ Abimelek. 28 Kɛkɛ ni Gaal, Ebed binuu lɛ kɛɛ akɛ: “Namɔ ji Abimelek, ni namɔ ji Shekem ni esa akɛ wɔsɔmɔ lɛ lɛ? Ani jeee Yerubaal+ binuu ji lɛ, ni ani jeee Zebul ewó akɛ nɔkwɛlɔ? Nyɛsɔmɔa Shekem papa, Hamor bihii lɛ moŋ! Shi mɛni hewɔ esa akɛ wɔsɔmɔ Abimelek? 29 Eji mɛi nɛɛ yɛ mishishi kulɛ, makpa Abimelek maŋtsɛ.” Kɛkɛ ni ekɛɛ Abimelek akɛ: “Taomɔ asraafoi pii ofata osraafoi lɛ ahe ni oje kpo kɛba.”

30 Be ni Zebul, maŋ lɛ mli lumɔ lɛ nu Gaal, Ebed binuu lɛ wiemɔi lɛ, emli wo la. 31 No hewɔ lɛ, etsu mɛi kɛtee Abimelek ŋɔɔ nigii* ayakɛɛ lɛ akɛ: “Naa! Gaal, Ebed binuu lɛ kɛ enyɛmimɛi hii lɛ yɛ Shekem bianɛ, ni amɛmiiwo maŋ lɛ yiŋ koni amɛte shi amɛwo bo. 32 No hewɔ lɛ, bo kɛ ohii lɛ ayi gbɛ nyɔɔŋ, ni nyɛbawo ka yɛ ŋa lɛ nɔ. 33 Leebi kɛ́ hulu te shi nɔŋŋ lɛ, tee shi mra ni oyatutua maŋ lɛ; ni kɛ́ lɛ kɛ ehii lɛ je kpo ni amɛkɛ bo abawu lɛ, feemɔ bɔ fɛɛ bɔ ni ooonyɛ ni oye enɔ kunim.”*

34 No hewɔ lɛ, Abimelek kɛ mɛi fɛɛ ni fata ehe lɛ te shi nyɔɔŋ, ni amɛjara amɛmli kui ejwɛ ni amɛwo Shekem he ka. 35 Be ni Gaal, Ebed binuu lɛ je kpo ni eyadamɔ maŋ lɛ agbó lɛ naa lɛ, Abimelek kɛ mɛi ni fata ehe lɛ fã kpo kɛjɛ he ni amɛwo ka lɛ yɛ lɛ. 36 Be ni Gaal na mɛi lɛ, ekɛɛ Zebul akɛ: “Naa! Mɛi miikpeleke shi kɛmiijɛ gɔji lɛ ayiteŋ kɛmiiba.” Shi Zebul kɛɛ lɛ akɛ: “Gɔji lɛ ahɔɔŋ lɛ ji nɔ ni onaa oookɛɛ hii lɛ.”

37 Sɛɛ mli lɛ, Gaal kɛɛ akɛ: “Naa! Mɛi miikpeleke shi kɛmiijɛ shikpɔŋ lɛ teŋ kɛmiiba, ni kuu kome miiba kɛmiijɛ gbɛ ni kã Meonenim tso agbo lɛ he lɛ nɔ.” 38 Zebul to he ehã lɛ akɛ: “Jeee bo oshwã akɛ, ‘Namɔ ji Abimelek ni esa akɛ wɔsɔmɔ lɛ lɛ?’+ Ani jeee mɛi ni owie oshi lɛ nɛ? Agbɛnɛ, jee kpo koni okɛ amɛ ayawu.”

39 No hewɔ lɛ, Gaal je kpo ni enyiɛ Shekem onukpai lɛ ahiɛ ni ekɛ Abimelek yawu. 40 Abimelek tiu Gaal, ni Gaal jo foi, ni agbegbee mɛi babaoo ashwie shi aahu kɛyashi maŋ lɛ agbó lɛ naa tɔ̃ɔ.

41 Ni Abimelek tee nɔ ehi Aruma, ni Zebul+ shwie Gaal kɛ enyɛmimɛi hii lɛ kɛje Shekem. 42 Enɔ jetsɛremɔ lɛ, mɛi ni yɔɔ maŋ lɛ mli lɛ je kpo kɛtee ŋa lɛ nɔ, ni ayakɛɛ Abimelek. 43 No hewɔ lɛ, eŋɔ ehii lɛ, ni ejara amɛmli kui etɛ ni ehã amɛwo ka yɛ ŋa lɛ nɔ. Be ni ena mɛi lɛ miije kpo kɛmiijɛ maŋ lɛ mli lɛ, eyatutua amɛ ni egbe amɛ. 44 Abimelek kɛ kuu ni fata ehe lɛ tee amɛhiɛ ni amɛyadamɔ maŋ lɛ agbó lɛ naa, ni kui enyɔ ni shwɛ lɛ tee nɔ amɛtutua mɛi fɛɛ ni yɔɔ ŋa lɛ nɔ lɛ, ni amɛgbe amɛ. 45 Abimelek wu eshi maŋ lɛ nakai gbi muu lɛ fɛɛ ni eŋɔ maŋ lɛ. Egbe mɛi ni yɔɔ mli lɛ, ni ekpãtã maŋ lɛ hiɛ+ ni ekɛ ŋoo shwã maŋ lɛ mli.

46 Be ni Shekem mɔɔ lɛ mli onukpai lɛ fɛɛ nu enɛ lɛ, amrɔ nɔŋŋ ni amɛyabote teemɔhe ko* ni yɔɔ El-berit shĩa* lɛ mli.+ 47 Be ni ayakɛɛ Abimelek akɛ Shekem mɔɔ lɛ mli onukpai lɛ fɛɛ ebua amɛhe naa lɛ, amrɔ nɔŋŋ ni 48 Abimelek kɛ hii ni fata ehe lɛ fɛɛ kwɔ kɛtee Zalmon Gɔŋ lɛ nɔ. Abimelek kɔ lema ehiɛ edɛŋ ni efo tso nine ko, ni ewó efɔ̃ ekɔɔŋ nɔ, ni ekɛɛ mɛi ni fata ehe lɛ akɛ: “Nɔ ni nyɛna akɛ mifee lɛ, nyɛ hu nyɛhe afea oya ni nyɛfea nakai nɔŋŋ!” 49 No hewɔ lɛ, amɛteŋ mɔ fɛɛ mɔ fo tso nine ni amɛyi Abimelek sɛɛ. Kɛkɛ ni amɛkɛ tsei aniji lɛ yashwie teemɔhe lɛ he, ni amɛwo teemɔhe lɛ mli la. No hewɔ lɛ, mɛi fɛɛ ni yɔɔ Shekem mɔɔ lɛ mli lɛ gboi, hii kɛ yei aaafee 1,000.

50 Kɛkɛ ni Abimelek tee Tebez; ni ebɔ nsara ewo Tebez he ni ekɛ amɛ wu, ni eŋɔ maŋ lɛ. 51 No mli lɛ, mɔɔ ni wa ko yɛ maŋ lɛ teŋ, ni maŋ lɛ mli hii kɛ yei lɛ fɛɛ kɛ onukpai lɛ fɛɛ jo foi kɛtee jɛmɛ. Amɛŋa amɛyi amɛwo mli ni amɛkwɔ kɛtee mɔɔ lɛ yiteŋ. 52 Abimelek tee mɔɔ lɛ he ni eyatutua mɔɔ lɛ. Ebɛŋkɛ mɔɔ lɛ shinaa lɛ koni ewo mli la. 53 Kɛkɛ ni yei lɛ ateŋ mɔ kome ŋmɛɛ wiɛbi he etswa Abimelek yiteŋ ni ejwa eyitso ŋoŋo lɛ.+ 54 Oya nɔŋŋ ni etsɛ esɔɔlɔ ni hiɛ etawuu nii lɛ ni ekɛɛ lɛ akɛ: “Gbalamɔ oklante lɛ ni ogbe mi, koni akakɛɛ yɛ mihe akɛ, ‘Yoo ko ni gbe lɛ.’” No hewɔ lɛ, esɔɔlɔ lɛ tsu lɛ klante ni egbo.

55 Be ni Israel hii lɛ na akɛ Abimelek egbo lɛ, amɛ fɛɛ amɛku amɛsɛɛ kɛtee shĩa. 56 No hewɔ lɛ, Nyɔŋmɔ wo Abimelek nyɔmɔ yɛ efɔŋ ni efee epapa yɛ gbe ni egbe enyɛmimɛi hii 70 lɛ hewɔ.+ 57 Nyɔŋmɔ hã efɔŋ fɛɛ ni Shekem hii lɛ fee lɛ babua amɛyiteŋ. No hewɔ lɛ, Yotam, Yerubaal+ binuu lɛ loomɔ+ lɛ ba amɛnɔ.