3 Mose

22 Yehowa tee nɔ ekɛ Mose wie ekɛɛ: 2 “Kɛɛmɔ Aaron kɛ ebihii lɛ akɛ, amɛkwɛ jogbaŋŋ yɛ* bɔ ni amɛkɛ Israelbii lɛ anibii krɔŋkrɔŋi ní amɛfeɔ lɛ krɔŋkrɔŋ amɛhãa mi+ lɛ tsuɔ nii amɛhãa lɛ ahe, ní amɛkawo migbɛ́i krɔŋkrɔŋ lɛ he muji.+ Miji Yehowa lɛ. 3 Kɛɛmɔ amɛ akɛ, ‘Yɛ nyɛyinɔi fɛɛ amli lɛ, nyɛseshibii lɛ ateŋ mɔ ni he tseee ni baabɛŋkɛ nibii krɔŋkrɔŋi ni Israelbii lɛ feɔ lɛ krɔŋkrɔŋ amɛhãa Yehowa lɛ, nakai mɔ* lɛ, abaafo lɛ ashɛ afɔ̃* kɛje mihiɛ.+ Miji Yehowa lɛ. 4 Aaron seshibii lɛ ateŋ nuu fɛɛ nuu ni miiye kpiti+ loo ehe hoɔ nu+ lɛ akaye nibii krɔŋkrɔŋi lɛ eko kɛyashi be ni ehe baatse,+ ni nakai nɔŋŋ hu nuu fɛɛ nuu ni taa mɔ ko ni he tseee he akɛni mɔ lɛ kɛ mɔ ko ni egbo* ewo ehe muji+ lɛ hewɔ, aloo nuu fɛɛ nuu ni mai* eje ehe,+ 5 aloo nuu fɛɛ nuu ni taa kooloi bibiibibii* ni he tseee+ lɛ ateŋ eko he, loo etaa mɔ ko ni yɛ yiŋtoo ko hewɔ lɛ ehe tseee he, ní mɔ lɛ baanyɛ ahã lɛ hu efee mɔ ni he tseee lɛ akaye eko.+ 6 Mɔ* ni taa nibii nɛɛ ateŋ eko he lɛ he tseee kɛyashi gbɛkɛ, ni ekaye nibii krɔŋkrɔŋi lɛ ateŋ eko, shi ekɛ nu aju ehe.+ 7 Kɛ́ hulu nyɔ shi lɛ, ehe baatse, ni no sɛɛ lɛ, ebaanyɛ eye nibii krɔŋkrɔŋi lɛ eko, ejaakɛ eniyenii ni.+ 8 Agbɛnɛ hu, ekaye kooloo ko ní egbo loo nɔ fɛɛ nɔ ni kooloi awuiyelɔi etserɛ emli ní ekɛwo ehe muji.+ Miji Yehowa lɛ.

9 “‘Amɛye nɔ ni mifã amɛ lɛ nɔ, koni amɛkafee esha yɛ no hewɔ, ní amɛgboi yɛ no hewɔ akɛni amɛbule lɛ lɛ hewɔ. Miji Yehowa, mɔ ni feɔ amɛ krɔŋkrɔŋ lɛ.

10 “‘Mɔkpɔŋ ko mɔkpɔŋ ko* akaye nibii krɔŋkrɔŋi lɛ eko.+ Gbɔ ko ni ebato osɔfo ko gbɔ loo apaafonyo ko akaye nibii krɔŋkrɔŋi lɛ eko. 11 Shi kɛ́ osɔfo ko kɛ eshika hé mɔ* ko lɛ, nakai mɔ lɛ baanyɛ aye eko. Nyɔji ni afɔ amɛ yɛ eshĩa lɛ hu baanyɛ aye eniyenii lɛ eko.+ 12 Kɛ́ osɔfo ko biyoo kɛ mɔ ko ni jeee osɔfo* bote gbalashihilɛ mli lɛ, osɔfo lɛ biyoo lɛ akaye nibii krɔŋkrɔŋi ní akɛbatsu onia lɛ eko. 13 Shi kɛ́ osɔfo ko biyoo batsɔ okulafo loo ewu shwie lɛ, ni ebɛ bi ko, ni eku esɛɛ ebahi epapa shĩa lɛ tamɔ be mli ni eji oblayoo lɛ, no lɛ, ebaanyɛ eye epapa niyenii lɛ eko;+ shi mɔkpɔŋ ko* akaye eko.

14 “‘Agbɛnɛ, kɛ́ mɔ ko ejeee gbɛ ni eye nɔ krɔŋkrɔŋ ko lɛ, no lɛ, eto afɔle krɔŋkrɔŋ lɛ najiaŋ ni ekɛ ejara lɛ mlijai enumɔ mli ekome afata he ebahã osɔfo lɛ.+ 15 No hewɔ lɛ, amɛkabule nibii krɔŋkrɔŋi ni Israelbii lɛ kɛbahãa Yehowa lɛ+ 16 koni akagbala amɛtoi akɛni amɛye amɛnibii krɔŋkrɔŋi lɛ ni no ehã amɛye fɔ lɛ hewɔ; ejaakɛ miji Yehowa, mɔ ni feɔ amɛ krɔŋkrɔŋ lɛ.’”

17 Yehowa tee nɔ ekɛ Mose wie ekɛɛ: 18 “Okɛ Aaron kɛ ebihii lɛ kɛ Israelbii lɛ fɛɛ awie ni okɛɛ amɛ akɛ, ‘Kɛ́ Israelnyo ko loo gbɔ ko ni ebahi Israel lɛ kɛ shãa afɔle+ miiba abahã Yehowa koni ekɛye eshiwoi anɔ loo ekɛmiiba ekɛbahã yɛ esuɔmɔnaa lɛ,+ 19 ekɛ tsinanuu loo gwantɛŋnuu* loo abotianuu aba, nɔ ni kpa ko bɛ ehe,+ bɔ ni afee ni ená ehiɛ dromɔ. 20 Nyɛkɛ nɔ ko ni eje kpa akabaa,+ ejaakɛ no hãŋ nyɛná ehiɛ dromɔ.

21 “‘Kɛ́ mɔ ko kɛ naanyobɔɔ afɔle+ miiba abahã Yehowa koni ekɛye eshiwoo nɔ loo ekɛmiiba ekɛbahã akɛ nɔ ko ni ejɛ esuɔmɔ mli ekɛmiihã lɛ, ekɛ kooloo ni kpa ko bɛ ehe aba, tsina loo too, bɔ ni afee ni ená ehiɛ dromɔ. Kpa ko kpa ko kwraa akahi ehe. 22 Kooloi ni akɛbaahã akɛ afɔle lɛ eko eko akafee nɔ ni eshwila, ehe ko eku, nɔ ko efo lɛ, kpala eshwie ehe, nɔ ko eshwie ehewolo nɔ ni ehiɛ emɔmɔ akaka, loo afilimata efee lɛ; nyɛkɛ enɛɛmɛi ateŋ eko eko akabahãa Yehowa, ni nyɛkashãa afɔle ni tamɔ nɛkɛ hu yɛ afɔleshaa latɛ lɛ nɔ nyɛhãa Yehowa. 23 Nyɛbaanyɛ nyɛkɛ tsina loo gwantɛŋ ni nane kome kɛ fe ekrokomɛi lɛ loo enane kome yɛ kuku fe ekrokomɛi lɛ abahã akɛ afɔle ni ajɛɔ suɔmɔ mli akɛhãa, shi akpɛlɛŋ nɔ akɛ shiwoo afɔle. 24 Nyɛkɛ kooloo ni dɔrɔ efite loo nɔ ni dɔrɔ ejwara aloo ajie loo afolɔ edɔrɔ akabahãa Yehowa, ni nyɛkɛ kooloi ni tamɔ enɛɛmɛi akabahãa akɛ afɔle yɛ nyɛshikpɔŋ lɛ nɔ. 25 Ni nyɛkahea enɛɛmɛi ateŋ eko eko yɛ gbɔ ko dɛŋ ni nyɛkɛbahãa akɛ nyɛ-Nyɔŋmɔ lɛ niyenii,* ejaakɛ amɛhe efite ni amɛje kpa. Akpɛlɛŋ nɔ ahãŋ nyɛ.’”

26 Yehowa tsa nɔ ekɛɛ Mose akɛ: 27 “Kɛ́ afɔ tsina loo gwantɛŋ loo abotia lɛ, ekɛ enyɛ ahi shi gbii kpawo,+ shi kɛjɛ gbi ni ji kpaanyɔ lɛ nɔ kɛyaa lɛ, abaakpɛlɛ nɔ kɛ́ akɛ lɛ bahã akɛ afɔle, ni ji afɔle ni akɛ la shãa ahãa Yehowa. 28 Shi nyɛkagbea tsina loo too kɛ ebi fɛɛ yɛ gbi kome nɔ.+

29 “Kɛ́ nyɛkɛ shidaa afɔle miihã Yehowa lɛ,+ nyɛfea lɛ bɔ ni baahã nyɛná ehiɛ dromɔ. 30 Aye yɛ nakai gbi lɛ nɔ nɔŋŋ. Nyɛkashia eko kɛyashi leebi.+ Miji Yehowa lɛ.

31 “Nyɛyea mikitãi lɛ anɔ daa.+ Miji Yehowa lɛ. 32 Nyɛkawoa migbɛ́i krɔŋkrɔŋ lɛ he muji,+ ni nyɛfea mi krɔŋkrɔŋ yɛ Israelbii lɛ ateŋ.+ Miji Yehowa, mɔ ni feɔ nyɛ krɔŋkrɔŋ lɛ,+ 33 mɔ ni jie nyɛ kɛje Ejipt shikpɔŋ lɛ nɔ koni mahã nyɛna akɛ miji Nyɔŋmɔ+ lɛ. Miji Yehowa lɛ.”