Bɔfoi Lɛ Anitsumɔi

19 Eba mli akɛ be ni Apolo+ yɔɔ Korinto lɛ, Paulo yatsɔ kpokpai ni kɛ ŋshɔnaagbɛ jekɛ lɛ anɔ, ni ekpeleke shi kɛbaje Efeso.+ Eyana kaselɔi komɛi yɛ jɛmɛ 2 ni ekɛɛ amɛ akɛ: “Be ni nyɛhe nyɛye lɛ, ani nyɛná mumɔ krɔŋkrɔŋ?”+ Amɛhere lɛ nɔ akɛ: “Ei, wɔnuko dã akɛ mumɔ krɔŋkrɔŋ ko yɛ.” 3 No hewɔ lɛ, ekɛɛ akɛ: “Belɛ, mɛɛ baptisimɔ akɛbaptisi nyɛ?” Amɛkɛɛ: “Yohane baptisimɔ lɛ.”+ 4 Paulo kɛɛ akɛ: “Yohane lɛ, ebaptisi kɛ baptisimɔ ni feɔ tsuitsakemɔ he okadi,+ ni ekɛɛ gbɔmɛi lɛ koni amɛhe mɔ ni baa yɛ esɛɛ,+ ni ji Yesu lɛ, nɔ amɛye.” 5 Be ni amɛnu enɛ lɛ, abaptisi amɛ yɛ Nuŋtsɔ Yesu gbɛ́i lɛ mli. 6 Ni be ni Paulo kɛ eniji ŋmɛlɛ amɛnɔ lɛ, mumɔ krɔŋkrɔŋ lɛ ba amɛnɔ,+ ni amɛbɔi maŋsɛɛ wiemɔi wiemɔ ni amɛgba.+ 7 Amɛyifalɛ aaafee hii 12.

8 Ni ebote kpeehe lɛ,+ ni ewie kɛ ekãa nyɔji etɛ sɔŋŋ, ehã wiemɔi ni ekɛ mɛi susu Nyɔŋmɔ Maŋtsɛyeli lɛ he yɛ gbɛ ni tsɔɔ mɔ yiŋ nɔ.+ 9 Shi be ni amɛteŋ mɛi komɛi kɛ kuɛŋtimɔ kpoo akɛ amɛbaahe amɛye,* ni amɛwie Gbɛ Lɛ+ he wiemɔi fɔji yɛ mɛi babaoo ahiɛ lɛ, egbala ehe shi kɛje amɛhe,+ ni etse kaselɔi lɛ kɛje amɛhe, ni daa gbi lɛ eyahãa wiemɔi yɛ Tirano skul asa lɛ nɔ. 10 Enɛ tee nɔ afii enyɔ, ni no hewɔ lɛ, mɛi fɛɛ ni yɔɔ Asia kpokpaa lɛ nɔ lɛ, Yudafoi kɛ Greekbii fɛɛ, nu Nuŋtsɔ lɛ wiemɔ lɛ.

11 Ni Nyɔŋmɔ tee nɔ etsɔ Paulo nine nɔ etsu hewalɛ nitsumɔi ni nɔ bɛ,+ 12 aahu po akɛ, akɛ klaladukui kɛ atadei ni awoɔ kɛsɔmɔɔ ni esa egbɔmɔtso he lɛ yahãa helatsɛmɛi,+ ni amɛhelai lɛ yaa, ni mumɔi fɔji lɛ jeɔ kpo.+ 13 Shi Yudafoi lɛ ateŋ mɛi komɛi ni kpaa shi amɛfãmɔɔ daimonioi lɛ hu ka akɛ amɛkɛ Nuŋtsɔ Yesu gbɛ́i lɛ baatsu nii yɛ mɛi ni yɔɔ mumɔi fɔji lɛ anɔ; amɛkɛɔ akɛ: “Miitsɔ Yesu, mɔ ni Paulo shiɛɔ lɛ lɛ nɔ miifã nyɛyi.”+ 14 No mli lɛ, Yudanyo ko ni atsɛɔ lɛ Skeva ni eji osɔfoi hiɛnaanɔbii lɛ ateŋ mɔ kome lɛ yɛ bihii kpawo ni feɔ nakai. 15 Shi mumɔ fɔŋ lɛ hã amɛ hetoo akɛ: “Mile Yesu,+ ni mile Paulo hu;+ shi nyɛ lɛ, namɛi ji nyɛ?” 16 Kɛkɛ ni nuu ni yɔɔ mumɔ fɔŋ lɛ tutua amɛ, ni enine tsɔ amɛnɔ ekomekomei, ni efee amɛ butuu, no hewɔ lɛ, amɛjo foi kɛje nakai shĩa lɛ kɛ amɛhe folo* ni amɛpila. 17 Mɛi fɛɛ, Yudafoi kɛ Greekbii fɛɛ ni yɔɔ Efeso lɛ, ná le sane nɛɛ; ni gbeyei mɔmɔ amɛ fɛɛ, ni atee nɔ awó Nuŋtsɔ Yesu gbɛ́i lɛ nɔ gojoo. 18 Ni mɛi ni ebahe Nuŋtsɔ lɛ nɔ amɛye lɛ ateŋ mɛi babaoo baa amɛbajajeɔ amɛnifeemɔi lɛ yɛ faŋŋ. 19 Anɔkwa, mɛi ni tsutsu lɛ amɛfeɔ majik lɛ ateŋ mɛi saŋŋ kɛ amɛwoji lɛ bashwie shi ni amɛshã yɛ mɛi fɛɛ ahiɛ.+ Ni amɛbu fɛɛ naa ni amɛna akɛ fɛɛ feɔ jwiɛtɛi kapɛji 50,000. 20 No hewɔ lɛ, Yehowa* wiemɔ lɛ tsɔ hewalɛ kpele nɔ etee nɔ eshwere ni ehe shi.+

21 Be ni agbe nibii nɛɛ anaa lɛ, Paulo kpɛ eyiŋ akɛ ebaayatsɔ Makedonia+ kɛ Akaia, ni no sɛɛ lɛ, ebaaya Yerusalem.+ Ekɛɛ akɛ: “Kɛ́ mitee jɛmɛ lɛ, maya Roma hu.”+ 22 No hewɔ lɛ, etsu mɛi ni sɔmɔɔ lɛ lɛ ateŋ mɛi enyɔ, Timoteo+ kɛ Erasto,+ kɛtee Makedonia, shi lɛ diɛŋtsɛ lɛ ehi shi be fioo yɛ Asia kpokpaa lɛ nɔ.

23 Nakai be lɛ mli nɔŋŋ lɛ, basabasafeemɔ+ kpele ko bate shi yɛ Gbɛ Lɛ hewɔ.+ 24 Ejaakɛ nuu jwiɛtɛi ŋaalɔ ko ni atsɛɔ lɛ Demetrio ni kɛ jwiɛtɛi feɔ Artemi wɔŋtsũ lɛ henɔi bibii lɛ hãa ŋaalɔi lɛ náa nii pii.+ 25 Ebua amɛ kɛ mɛi krokomɛi ni tsuɔ nakai nitsumɔ lɛ anaa ni ekɛɛ: “Ataamɛi, nyɛle jogbaŋŋ akɛ nitsumɔ nɛɛ nɔ wɔtsɔɔ wɔnáa nii. 26 Amrɔ nɛɛ, nyɛmiina ni nyɛmiinu akɛ jeee yɛ Efeso+ pɛ, shi moŋ yɛ Asia kpokpaa lɛ kpotoo nɔ lɛ, nɛkɛ Paulo nɛɛ ehã mɛi babaoo ayiŋ etsɔ ni ehã amɛná susumɔ kroko, ni ekɛɔ akɛ nyɔŋmɔi ni akɛ niji fee lɛ, jeee nyɔŋmɔi diɛŋtsɛ ji amɛ.+ 27 Agbɛnɛ hu, oshãra ni yɔɔ ji akɛ, jeee akɛ abuŋ wɔnitsumɔ nɛɛ kɛkɛ, shi moŋ nyɔŋmɔyoo kpele Artemi ni Asia kpokpaa lɛ fɛɛ kɛ shikpɔŋ muu lɛ fɛɛ jáa lɛ lɛ sɔlemɔ shĩa lɛ hu, abuŋ lɛ ahãŋ nɔ ko nɔ ko, ni abaabutu enunyam kpele lɛ.” 28 Be ni hii lɛ nu enɛ lɛ, amɛmli fu waa ni amɛbɔi bolɔmɔ akɛ: “Efesobii Artemi lɛ, eje agbo!”

29 No hewɔ lɛ, maŋ lɛ mli fɛɛ fee basabasa ni amɛ fɛɛ amɛsha foi kɛyabote nikwɛmɔhe lɛ, ni amɛgbala Gaio kɛ Aristarko,+ Makedoniabii ni fata Paulo he kɛfãa gbɛ lɛ, amɛfata amɛhe kɛtee. 30 No mli lɛ, Paulo miitao ebote mli ni eya mɛi lɛ ateŋ, shi kaselɔi lɛ eŋmɛɛɛ lɛ gbɛ. 31 Gbijurɔyelii kɛ shwɛmɔi ahe gbɛjianɔtolɔi komɛi hu ni sumɔɔ esane lɛ kɛ wiemɔ tsu ni ayakpa lɛ fai akɛ ekabote nikwɛmɔhe lɛ ni ekɛ ewala yawo oshãra mli. 32 Anɔkwa, mɛi komɛi miibolɔ nɛkɛ, ni mɛi krokomɛi hu miibolɔ nɛkɛ; ejaakɛ mɛi ni bua shi lɛ miifee basabasa, ni amɛteŋ mɛi pii po leee nɔ hewɔ ni amɛbabua amɛhe naa lɛ. 33 No hewɔ lɛ, amɛkɛ Aleksanda je kpo kɛje mɛi ni bua shi lɛ ateŋ, ni Yudafoi lɛ tsirɛ lɛ kɛba hiɛ, ni Aleksanda kɛ enine fee okadi ni eetao ejie enaa yɛ mɛi lɛ ahiɛ. 34 Shi be ni amɛyɔse akɛ Yudanyo ji lɛ lɛ, amɛ fɛɛ amɛkɛ gbee kome bolɔ aaafee ŋmɛlɛtswai enyɔ sɔŋŋ akɛ: “Efesobii Artemi lɛ, eje agbo!”

35 Agbɛnɛ, be ni maŋ lɛ nɔkwɛlɔ lɛ ehã mɛi ni bua shi lɛ efee dioo lɛ, ekɛɛ akɛ: “Ataamɛi Efesobii, mɛɛ gbɔmɔ po yɔɔ ni leee akɛ Efesobii amaŋ lɛ ji Artemi kpele lɛ sɔlemɔ shĩa lɛ kɛ amaga ni jɛ ŋwɛi kɛba lɛ fɛɛ nɔkwɛlɔ? 36 Akɛni ŋwanejee ko bɛ nibii nɛɛ ahe hewɔ lɛ, esa akɛ nyɛfee dioo, ni nyɛkafee gidigidi ko. 37 Ejaakɛ nyɛkɛ hii nɛɛ eba biɛ, ni amɛjeee mɛi ni juɔ sɔlemɔ shĩai amli nii, ni amɛjeee mɛi ni wieɔ amɛshiɔ wɔnyɔŋmɔyoo lɛ hu. 38 No hewɔ lɛ, kɛ́ Demetrio+ kɛ ŋaalɔi ni fata ehe lɛ kɛ mɔ ko yɛ sane ko lɛ, saneyeli gbii yɛ, ni prokɔnsɔlii* hu yɛ; nyɛhãa amɛkɛ sane ni amɛkɛ mɔ lɛ yɔɔ lɛ abaa. 39 Shi kɛ́ nyɛmiitao nɔ ko ni fe no lɛ, esa akɛ akpɛ mli yɛ mla naa henaabuamɔ mli. 40 Ejaakɛ kɛ́ wɔkwɛɛɛ ni ahi lɛ, abaabu wɔ akɛ maŋ hiɛ atuatselɔi yɛ ŋmɛnɛ gbi nɛɛ sane lɛ hewɔ, ejaakɛ wɔbɛ nɔ ko kwraa ni wɔkɛbaajie wɔnaa akɛ no hewɔ mɛi babaoo nɛɛ feɔ basabasa lɛ.” 41 Ni be ni ewie enɛ egbe naa lɛ, ewo mɛi ni ebabua amɛhe naa lɛ gbɛ.