3 Mose

15 Yehowa tee nɔ ekɛ Mose kɛ Aaron wie ekɛɛ: 2 “Nyɛkɛ Israelbii lɛ awiea ni nyɛkɛa amɛ akɛ, ‘Kɛji nu ko hoɔ kɛjɛɔ nuu ko nuutso* mli lɛ, nu ni hoɔ lɛ nɛɛ hãa efeɔ mɔ ni he tseee.+ 3 Ehe tseee yɛ ehe ni hoɔ nu lɛ hewɔ, kɛ́ nu lɛ tee nɔ eho kɛjɛ enuutso mli jio, nɔ ko tsĩ nu lɛ naa jio, ehe tseee lolo.

4 “‘Saa fɛɛ saa ni mɔ ni he hoɔ nu lɛ kãa nɔ lɛ he tseee, ni nɔ fɛɛ nɔ ni etaa nɔ lɛ hu he tseee. 5 Mɔ ni taa esaa lɛ he lɛ afɔ etadei ahe, ekɛ nu aju ehe, ni ehe tseee kɛyashi gbɛkɛ.+ 6 Mɔ fɛɛ mɔ ni taa nɔ ko ni mɔ ni he hoɔ nu lɛ eta nɔ lɛ nɔ lɛ afɔ etadei ahe, ekɛ nu aju ehe, ni ehe tseee kɛyashi gbɛkɛ. 7 Mɔ fɛɛ mɔ ni taa mɔ ni he hoɔ nu lɛ he* lɛ afɔ etadei ahe, ekɛ nu aju ehe, ni ehe tseee kɛyashi gbɛkɛ. 8 Kɛ́ mɔ ni he hoɔ nu lɛ tsɛ̃ lajɔ̃ eshwie mɔ ko ni he tse he lɛ, nakai mɔ lɛ afɔ etadei ahe, ekɛ nu aju ehe, ni ehe tseee kɛyashi gbɛkɛ. 9 Kooloo nɔtamɔnii* fɛɛ nɔtamɔnii ni mɔ ni he hoɔ nu lɛ taa nɔ lɛ he tseee. 10 Mɔ fɛɛ mɔ ni taa nɔ ko ni mɔ ni he hoɔ nu lɛ eta nɔ lɛ he lɛ, ehe tseee kɛyashi gbɛkɛ, ni mɔ fɛɛ mɔ ni hiɛɔ nibii nɛɛ afɔ etadei ahe, ekɛ nu aju ehe, ni ehe tseee kɛyashi gbɛkɛ. 11 Kɛ́ mɔ ni he hoɔ nu lɛ+ kɛ nu fɔko edɛ̃ ni eta mɔ ko he lɛ, no lɛ, nakai mɔ lɛ afɔ etadei ahe, ekɛ nu aju ehe, ni ehe tseee kɛyashi gbɛkɛ. 12 Sũ nii ni mɔ ni he hoɔ nu lɛ taa he lɛ, ajwara lɛ, ni tso nii fɛɛ tso nii ni etaa he lɛ, akɛ nu afɔ mli.+

13 “‘Kɛ́ mɔ lɛ he ni hoɔ nu lɛ sɛɛ fo, ni ebafee mɔ ni he tse lɛ, ekane gbii kpawo kɛhã ehetsuumɔ, ni efɔ etadei ahe, ekɛ nu ni hoɔ mli nu aju ehe, kɛkɛ lɛ ehe baatse.+ 14 Gbi ni ji kpaanyɔ lɛ nɔ lɛ, eŋɔ ŋa mli okpoi enyɔ loo shĩa okpoi bibii enyɔ,+ ni eba Yehowa hiɛ yɛ kpee buu lɛ shinaa lɛ naa, ni ekɛ amɛ abahã osɔfo lɛ. 15 Ni osɔfo lɛ kɛ amɛ baahã, ekome kɛhã esha afɔle, ni ekroko lɛ hu kɛhã shãa afɔle, ni osɔfo lɛ baakpãtã ehã mɔ lɛ yɛ Yehowa hiɛ yɛ ehe ni ho nu lɛ hewɔ.

16 “‘Agbɛnɛ, kɛji mai* je nuu ko mli lɛ, ekɛ nu aju ehe fɛɛ, ni ehe tseee kɛyashi gbɛkɛ.+ 17 Ekɛ nu afɔ atade fɛɛ atade loo kooloo hewolo fɛɛ kooloo hewolo ni mai lɛ eko etee mli lɛ he, ni nii lɛ he tseee kɛyashi gbɛkɛ.

18 “‘Kɛ́ nuu ko kɛ yoo ko wɔ,* ni mai* je nuu lɛ mli lɛ, amɛkɛ nu aju amɛhe, ni amɛhe tseee kɛyashi gbɛkɛ.+

19 “‘Kɛji lá ho yoo ko lɛ, ehe tseee gbii kpawo+ yɛ be ni efeɔ eyei anii lɛ mli. Mɔ fɛɛ mɔ ni taa ehe lɛ he tseee kɛyashi gbɛkɛ.+ 20 Nɔ fɛɛ nɔ ni ekãa nɔ be ni efeɔ eyei anii lɛ he tseee, ni nɔ fɛɛ nɔ ni etaa nɔ lɛ he tseee.+ 21 Mɔ fɛɛ mɔ ni taa esaa lɛ he lɛ afɔ etadei ahe, ekɛ nu aju ehe, ni ehe tseee kɛyashi gbɛkɛ. 22 Mɔ fɛɛ mɔ ni taa nɔ ko ni yoo lɛ eta nɔ he lɛ afɔ etadei ahe, ekɛ nu aju ehe, ni ehe tseee kɛyashi gbɛkɛ. 23 Kɛ́ saa ni yoo lɛ eta nɔ loo nɔ kroko ni eta nɔ lɛ he mɔ lɛ ta lɛ, ehe tseee kɛyashi gbɛkɛ.+ 24 Ni kɛ́ nuu ko kɛ yoo lɛ wɔ, ni yoo lɛ yeianiifeemɔ lá lɛ eko tee nuu lɛ he lɛ,+ nuu lɛ he tseee gbii kpawo, ni saa fɛɛ saa ni nuu lɛ baakã nɔ lɛ he tseee.

25 “‘Kɛ́ lá ho yoo ko gbii babaoo+ be ni eshɛko be ni ekɛfeɔ eyei anii,+ aloo kɛ́ eefee eyei anii ni lá ni hoɔ lɛ lɛ sɛɛ tsɛ fe bɔ ni ehoɔ lɛ daa lɛ, ehe tseee yɛ gbii fɛɛ ni lá lɛ hoɔ lɛ lɛ amli, tamɔ gbii ni efeɔ eyei anii lɛ nɔŋŋ. 26 Saa fɛɛ saa ni ebaakã nɔ gbii abɔ ni lá lɛ hoɔ lɛ lɛ baatamɔ saa ni ekãa nɔ be ni efeɔ eyei anii lɛ nɔŋŋ,+ ni nɔ fɛɛ nɔ ni ebaata nɔ lɛ he tseee tamɔ bɔ ni ebaa lɛ be mli ni efeɔ eyei anii lɛ. 27 Mɔ fɛɛ mɔ ni taa nibii nɛɛ ahe lɛ he tseee, ni esa akɛ efɔ etadei ahe, ekɛ nu aju ehe, ni ehe tseee kɛyashi gbɛkɛ.+

28 “‘Shi kɛji lá ni hoɔ lɛ lɛ sɛɛ fo lɛ, ekane gbii kpawo ehã ehe, ni no sɛɛ lɛ, ehe baatse.+ 29 Gbi ni ji kpaanyɔ lɛ nɔ lɛ, eŋɔ ŋa mli okpoi enyɔ loo shĩa okpoi bibii enyɔ,+ ni ekɛ amɛ abahã osɔfo lɛ yɛ kpee buu lɛ shinaa lɛ naa.+ 30 Osɔfo lɛ kɛ ekome ashã esha afɔle, ni ekɛ ekroko lɛ hu ashã shãa afɔle, ni osɔfo lɛ akpãtã ahã yoo lɛ yɛ Yehowa hiɛ yɛ lá ni ho lɛ ni no hã efee mɔ ni he tseee lɛ hewɔ.+

31 “‘No hewɔ lɛ, nyɛhãa Israelbii lɛ atsea amɛhe kɛjea nii ni woɔ amɛhe muji lɛ ahe, koni amɛkabule misɔlemɔ buu ni yɔɔ amɛteŋ lɛ ní amɛgboi yɛ amɛhe muji lɛ mli.+

32 “‘Enɛ ji mla ni kã shi hã nuu ni he hoɔ nu kɛ nuu ni he tseee yɛ mai* ni jeɔ emli lɛ hewɔ+ 33 kɛ yoo ni miifee eyei anii+ ni no hewɔ lɛ ehe tseee kɛ nuu loo yoo ko ni he hoɔ nu+ kɛ nuu ni kɛ yoo ni he tseee wɔɔ* lɛ.’”