2 Samuel
11 Ni eba mli akɛ, afi lɛ shishijee mli* be ni maŋtsɛmɛi lɛ yaa ta lɛ, David tsu Yoab kɛ etsuji lɛ kɛ Israel asraafoi lɛ fɛɛ koni amɛya amɛyakpãtã Amonbii lɛ ahiɛ. Ni amɛyawo Raba+ he ka, shi David hi shi yɛ Yerusalem.+
2 Gbi ko gbɛkɛnaashi lɛ, David te shi kɛjɛ esaatso nɔ ni eeshara shi yɛ maŋtsɛ tsũ* lɛ yiteŋ. Ejɛ tsũ lɛ yiteŋ ena yoo ko miiju ehe, ni yoo lɛ he yɛ fɛo waa. 3 David tsu mɔ ko ni eyatao mɔ ni yoo lɛ ji, ni mɔ lɛ bakɛɛ akɛ: “Bat-sheba,+ Eliam biyoo lɛ,+ ni ji Uria,+ Hitnyo+ lɛ ŋa lɛ ni.” 4 Kɛkɛ ni David tsu mɛi koni ayaŋɔ lɛ kɛba.+ Ni yoo lɛ ba eŋɔɔ, ni David kɛ lɛ wɔ.+ (Enɛ ba be ni yoo lɛ miitsuu ehe yɛ ehe ni tseee lɛ hewɔ.*)+ No sɛɛ lɛ, yoo lɛ ku esɛɛ kɛtee eshĩa.
5 Yoo lɛ ná musu, ni etsu ayakɛɛ David akɛ: “Miná musu.” 6 Kɛkɛ ni David tsu ayakɛɛ Yoab akɛ: “Hã Uria, Hitnyo lɛ aba miŋɔɔ.” No hewɔ lɛ, Yoab wo Uria gbɛ kɛtee David ŋɔɔ. 7 Be ni Uria ba David ŋɔɔ lɛ, ebi lɛ bɔ ni Yoab yɔɔ, bɔ ni asraafoi lɛ yɔɔ, kɛ bɔ ni ta lɛ yaa nɔ ehãa. 8 Kɛkɛ ni David kɛɛ Uria akɛ: “Kpelekemɔ shi kɛya oshĩa ni oyajɔɔ ohe.”* Be ni Uria shi maŋtsɛ lɛ shĩa lɛ, akɛ maŋtsɛ tsuijurɔ naa nikeenii* lɛ tsu kɛyi esɛɛ. 9 Shi Uria kpelekeee shi kɛyaaa lɛ diɛŋtsɛ eshĩa lɛ, ekɛ maŋtsɛ* lɛ tsuji krokomɛi lɛ fɛɛ wɔ maŋtsɛ lɛ shĩa lɛ agbó lɛ naa. 10 No hewɔ lɛ, ayakɛɛ David akɛ: “Uria kpelekeee shi kɛyaaa lɛ diɛŋtsɛ eshĩa lɛ.” Kɛkɛ ni David bi Uria akɛ: “Ani jeee gbɛfãa mli ojɛ kɛba nɛɛ? Mɛni hewɔ ni okpelekeee shi kɛyaaa bo diɛŋtsɛ oshĩa lɛ?” 11 Uria kɛɛ David akɛ: “Adeka+ lɛ kɛ Israel kɛ Yuda yɛ mama tsũi amli, ni minuŋtsɔ Yoab kɛ minuŋtsɔ tsuji lɛ ebɔ nsara yɛ ŋa lɛ nɔ. No hewɔ lɛ, ani mi lɛ miya mi diɛŋtsɛ mishĩa ni miyaye nii, ni minu nɔ ko, ni mikɛ miŋa awɔ lo?+ Gbii abɔ ni ohiɛ kã ni oyɔɔ wala mli* nɛɛ, mifeŋ enɛ kɔkɔɔkɔ!”
12 Kɛkɛ ni David kɛɛ Uria akɛ: “Hii biɛ ŋmɛnɛ hu, ni wɔ lɛ, mawo bo gbɛ koni oya.” No hewɔ lɛ, Uria hi Yerusalem nakai gbi lɛ kɛ enɔ jetsɛremɔ. 13 Kɛkɛ ni David tsu ayatsɛ lɛ kɛba koni ekɛ lɛ abaye nii ni ekɛ lɛ abanu nii. Ni ehã etɔ dãa. Shi be ni je na lɛ, etee ni eyakã esaatso lɛ nɔ yɛ maŋtsɛ* lɛ tsuji lɛ amasɛi, ni ekpelekeee shi kɛyaaa eshĩa lɛ. 14 Leebi be ni je tsɛre lɛ, David ŋma Yoab wolo, ni ekɛtsu Uria kɛtee. 15 Eŋma yɛ wolo lɛ mli akɛ: “Nyɛkɛ Uria atoa ta lɛ naa, yɛ he ni ta lɛ mli wa fe fɛɛ lɛ. Ni nyɛgbalaa nyɛhe shi kɛjea ehe, koni atswa lɛ nɔ ni egbo.”+
16 No mli lɛ, Yoab ekpá maŋ lɛ shi jogbaŋŋ, ni ekɛ Uria to he ni ele akɛ tawulɔi kãkãlɔi yɔɔ lɛ. 17 Be ni maŋ lɛ mli hii lɛ fã kpo ni amɛkɛ Yoab bawu lɛ, David tsuji lɛ ekomɛi gboi, ni Uria, Hitnyo lɛ fata mɛi ni gboi lɛ ahe.+ 18 Agbɛnɛ, Yoab hã ayabɔ David ta lɛ mli saji fɛɛ. 19 Efã mɔ ni etsu lɛ akɛ: “Kɛ́ okɛɛ maŋtsɛ lɛ ta lɛ mli saji lɛ fɛɛ ogbe naa, 20 ni aleenɔ, maŋtsɛ lɛ mli fu ni ebi bo akɛ, ‘Be ni nyɛkɛ maŋ lɛ wuɔ lɛ, mɛni hewɔ nyɛtee maŋ lɛ he kpaakpa nakai lɛ? Ani nyɛleee akɛ amɛbaajɛ maŋ lɛ gbogbo lɛ yiteŋ amɛtsɛ̃rɛ̃ nyɛ gãii? 21 Namɔ gbe Abimelek,+ Yerubeshet*+ binuu lɛ? Ani jeee yoo ko ni fɔ̃ wiɛbi kɛjɛ gbogbo lɛ yiteŋ, ni egbe lɛ yɛ Tebez? Mɛni hewɔ nyɛbɛŋkɛ gbogbo lɛ kpaakpa nakai lɛ?’ No lɛ, kɛɛmɔ akɛ, ‘Otsulɔ Uria, Hitnyo lɛ hu egbo.’”
22 No hewɔ lɛ, mɔ ni atsu lɛ lɛ tee ni eyabɔ David nibii fɛɛ ni Yoab tsu lɛ ni eyabɔ lɛ. 23 Kɛkɛ ni mɔ ni atsu lɛ lɛ kɛɛ David akɛ: “Amɛhii lɛ anine tsɔ wɔnɔ; ni amɛje kpo kɛbatutua wɔ yɛ ŋa lɛ nɔ, shi wɔshwie amɛ kɛtee maŋ lɛ agbó lɛ naa tɔ̃ɔ. 24 Shi no mli lɛ, gãitsɛ̃lɔi lɛ miitsɛ̃rɛ̃ otsuji lɛ gãi kɛmiijɛ gbogbo lɛ yiteŋ, ni maŋtsɛ lɛ tsuji lɛ ekomɛi gboi; otsulɔ Uria, Hitnyo lɛ hu gbo.”+ 25 Kɛkɛ ni David kɛɛ mɔ ni atsu lɛ lɛ akɛ: “Yaakɛɛ Yoab akɛ: ‘Kaahã sane nɛɛ miigba onaa, ejaakɛ klante nyɛɔ egbeɔ mɔ fɛɛ mɔ. Wajemɔ ota lɛ ni okɛ maŋ lɛ awu ni oye maŋ lɛ nɔ kunim.’+ Ni owo lɛ hewalɛ.”
26 Be ni Uria ŋa lɛ nu akɛ ewu Uria egbo lɛ, efó ewu lɛ. 27 Be ni awerɛhoyeli be lɛ ho nɔŋŋ pɛ lɛ, David tsu ni ayaŋɔ yoo lɛ kɛba eshĩa lɛ, ni ebatsɔ eŋa,+ ni efɔ binuu ehã lɛ. Shi nɔ ni David fee nɛɛ, esaaa Yehowa hiɛ* kwraa.+