2 Samuel

12 No hewɔ lɛ, Yehowa tsu Natan+ kɛtee David ŋɔɔ. Eba eŋɔɔ+ ni ebakɛɛ lɛ akɛ: “Hii enyɔ komɛi hi maŋ kome mli, mɔ kome lɛ niiatsɛ ni, ni mɔ kroko lɛ ohiafo ni. 2 Niiatsɛ lɛ yɛ gwantɛŋi kɛ tsinai babaoo diɛŋtsɛ;+ 3 shi ohiafo lɛ bɛ nɔ ko nɔ ko fe gwantɛŋbi yoo bibioo kome ni ehé.+ Ekwɛ lɛ, ni ekɛ ohiafo lɛ kɛ ebihii lɛ fɛɛ da yɛ he kome. Eyeɔ nii fioo ni eyɔɔ lɛ eko, ni enuɔ nu yɛ ekɔɔpoo naa ni ewɔɔ yɛ ekpɔkɔiaŋ. Ebatsɔ tamɔ ebiyoo. 4 Sɛɛ mli lɛ, mɔ ko bato niiatsɛ lɛ gbɔ, shi emɔɔɔ lɛ diɛŋtsɛ egwantɛŋi kɛ etsinai lɛ eko ni ekɛhoo niyenii ehã mɔ ni ebato lɛ gbɔ lɛ. Shi eyamɔ ohiafo lɛ gwantɛŋbi lɛ ni ekɛhoo niyenii ehã egbɔ lɛ.”+

5 Kɛkɛ ni David mli wo la waa ewo nuu lɛ, ni ekɛɛ Natan akɛ: “Gbii abɔ ni Yehowa hiɛ kã nɛɛ,+ nuu ni fee nakai lɛ sa gbele! 6 Ni esa akɛ eto gwantɛŋbi lɛ najiaŋ toi ejwɛ,+ ejaakɛ efee enɛ ni emusuŋ etsɔɔɔ lɛ.”

7 Kɛkɛ ni Natan kɛɛ David akɛ: “Bo ji nakai nuu lɛ! Nɔ ni Yehowa, Israel Nyɔŋmɔ lɛ kɛɛ nɛ: ‘Mi mifɔ bo mu ni miwó bo Israel nɔ maŋtsɛ,+ ni mihere bo kɛje Saul dɛŋ.+ 8 Ni mijɛ misuɔmɔ mli mikɛ onuŋtsɔ shĩa lɛ hã bo,+ ni mikɛ onuŋtsɔ ŋamɛi+ lɛ wo odɛŋ, ni mikɛ Israel kɛ Yuda shĩa lɛ hã bo.+ Ni kɛ́ enɛɛmɛi faaa po lɛ, kulɛ, majɛ misuɔmɔ mli mafee nibii krokomɛi mafata he mahã bo.+ 9 Mɛni hewɔ ni ogbe Yehowa wiemɔ lɛ he guɔ ni ofee efɔŋ yɛ ehiɛ nɛɛ? Okɛ klante gbe Uria, Hitnyo lɛ!+ Kɛkɛ ni be ni okɛ Amonbii lɛ aklante lɛ egbe lɛ sɛɛ+ lɛ, oŋɔ eŋa lɛ akɛ oŋa.+ 10 No hewɔ lɛ, klante kpaŋ yɛ oshĩa lɛ kɔkɔɔkɔ,+ ejaakɛ oŋɔ Uria, Hitnyo lɛ ŋa lɛ akɛ oŋa ni okɛgbe mihe guɔ.’ 11 Nɔ ni Yehowa kɛɛ nɛ: ‘Naa, mibatee haomɔ shi yɛ bo diɛŋtsɛ oshĩa lɛ mli mawo bo;+ ni maŋɔ oŋamɛi lɛ yɛ bo diɛŋtsɛ ohiɛ ni mikɛ amɛ baahã nuu kroko,*+ ni ekɛ oŋamɛi lɛ baaná bɔlɛ shwane ketekete.*+ 12 Bo lɛ ofee yɛ teemɔŋ,+ shi mi lɛ, mibafee enɛ yɛ Israel fɛɛ hiɛ ni mafee lɛ shwane ketekete.’”*

13 Kɛkɛ ni David kɛɛ Natan akɛ: “Mifee esha mishi Yehowa.”+ Natan to he ehã David akɛ: “Yehowa hu kɛ ohe esha lɛ eke bo.*+ Ogboŋ.+ 14 Shi akɛni ojieee bulɛ kpo otsɔɔɔ Yehowa yɛ sane nɛɛ mli hewɔ lɛ, bɔ fɛɛ bɔ ni fee lɛ, binuu ni afɔ ahã bo lɛ baagbo.”

15 Kɛkɛ ni Natan tee eshĩa.

Ni Yehowa tswa gbekɛ ni Uria ŋa lɛ efɔ ehã David lɛ nɔ, ni hela mɔ lɛ. 16 David kpa anɔkwa Nyɔŋmɔ lɛ fai yɛ gbekɛ lɛ hewɔ. David hiɔ ŋmaa ni eyeee nɔ ko nɔ ko kwraa ni eyakãa shi yɛ shikpɔŋ yɛ etsũ lɛ mli nyɔɔŋ muu fɛɛ.+ 17 No hewɔ lɛ, eshĩa onukpai lɛ badamɔɔ emasɛi ni amɛkaa akɛ amɛbaawó enɔ kɛjɛ shikpɔŋ lɛ, shi ekpɛlɛɛɛ, ni ekɛ amɛ yeee nii hu. 18 Yɛ gbi ni ji kpawo lɛ nɔ lɛ, gbekɛ lɛ gbo, shi David tsuji lɛ miishe gbeyei akɛ amɛbaakɛɛ lɛ akɛ gbekɛ lɛ egbo. Amɛkɛɛ akɛ: “Be ni gbekɛ lɛ hiɛ kã po lɛ, kɛ́ wɔkɛ lɛ wie lɛ, ebooo wɔ toi. No hewɔ lɛ, te wɔɔfee tɛŋŋ wɔkɛɛ lɛ akɛ gbekɛ lɛ egbo lɛ? Kɛ́ wɔkwɛɛɛ ni ahi lɛ, no baahã efee nɔ ko ni ehiii kwraa.”

19 Be ni David na akɛ etsuji lɛ miiwie ablɛbi lɛ, ekɔ sɛɛ akɛ gbekɛ lɛ egbo. David bi etsuji lɛ akɛ: “Gbekɛ lɛ egbo lo?” Amɛkɛɛ akɛ: “Egbo.” 20 Kɛkɛ ni David te shi yɛ shikpɔŋ lɛ. Eju ehe, ekpa mu,+ etsake etadei lɛ, ni etee Yehowa shĩa+ lɛ ni eyakoto shi. No sɛɛ lɛ, etee eshĩa* lɛ ni ebi ni abahã lɛ niyenii, ni eye. 21 Etsuji lɛ bi lɛ akɛ: “Mɛni hewɔ ofee onii nakai? Be ni gbekɛ lɛ yɔɔ wala mli lɛ, ohi ŋmaa, ni ofó aahu; shi be ni gbekɛ lɛ gbo nɔŋŋ lɛ, ote shi ni oye nii.” 22 Eto he akɛ: “Be ni gbekɛ lɛ yɔɔ wala mli lɛ, mihi ŋmaa+ ni mifó aahu, ejaakɛ mikɛɛ mihe akɛ, ‘Ekolɛ Yehowa aaana mi mɔbɔ ni ehã gbekɛ lɛ ahi shi.’+ 23 Amrɔ nɛɛ ni egbo lɛ, mɛni hewɔ esa akɛ mahi ŋmaa? Ani manyɛ mahã eba ekoŋŋ?+ Mi moŋ maya eŋɔɔ,+ shi jeee lɛ ebaaku esɛɛ kɛba miŋɔɔ.”+

24 Kɛkɛ ni David shɛje eŋa Bat-sheba+ mii. Etee eŋɔɔ ni ekɛ lɛ yawɔ. Sɛɛ mli lɛ, efɔ binuu ni ewo lɛ Solomon.*+ Ni Yehowa sumɔ lɛ,+ 25 ni ekɛ wiemɔ tsu gbalɔ Natan+ koni eyawo lɛ Yedidia,* yɛ Yehowa hewɔ.

26 Yoab tee nɔ ewu eshi Raba,+ ni ji Amonbii+ lɛ amaŋ lɛ, ni eŋɔ maŋtiase lɛ.*+ 27 No hewɔ lɛ, Yoab tsu mɛi kɛtee David ŋɔɔ ayakɛɛ lɛ akɛ: “Miwu mishi Raba,+ ni miŋɔ nui amaŋ* lɛ. 28 No hewɔ lɛ, buamɔ asraafoi ni eshwɛ lɛ anaa, ni obɔ nsara owo maŋ lɛ he ni okɛ maŋ lɛ awu ni oŋɔ. Kɛjeee nakai lɛ, mi mayaŋɔ maŋ lɛ, ni mi, migbɛ́i baakã nɔ.”

29 No hewɔ lɛ, David bua asraafoi lɛ fɛɛ anaa ni etee ekɛ Raba yawu, ni eŋɔ maŋ lɛ. 30 Kɛkɛ ni ejie Malkam akekere lɛ yɛ eyitso. Ekɛ ehe ojarawatɛi lɛ fɛɛ tsiimɔ ji shika tsuru talɛnta kome,* ni akɛwo David yitso. Eloo ta mli nii+ babaoo hu kɛjɛ maŋ lɛ mli.+ 31 Ni eloo mɛi ni yɔɔ maŋ lɛ mli lɛ kɛtee ni ehã amɛkɛ saalai folɔ tɛi, ni amɛkɛ dadei ni naa bala kɛ dade lemai tsu nii, ni amɛfee brikii* hu. Nakai ji bɔ ni efee Amonbii lɛ amaji lɛ fɛɛ. Naagbee lɛ, David kɛ asraafoi lɛ fɛɛ ku amɛsɛɛ kɛtee Yerusalem.