2 Samuel
13 No mli lɛ, David binuu Absalom yɛ nyɛmi yoo ko ni he yɔɔ fɛo waa ni atsɛɔ lɛ Tamar,+ ni David binuu Amnon+ miisumɔ lɛ. 2 Amnon hao aahu akɛ, hela mɔ lɛ yɛ enyɛmi yoo Tamar hewɔ, ejaakɛ no mli lɛ oblayoo fro ni, ni etamɔ nɔ ni Amnon nyɛŋ lɛ nɔ ko efee. 3 Shi Amnon yɛ naanyo ko ni atsɛɔ lɛ Yehonadab,+ ni ji David nyɛmi nuu Shimea+ binuu; Yehonadab ji nuu ko ni hiɛ tɛ̃ waa. 4 No hewɔ lɛ, ebi Amnon akɛ: “Mɛni hewɔ daa leebi lɛ ohaoɔ nakai, bo maŋtsɛ binuu? Mɛni hewɔ okɛɛɛ mi?” Amnon kɛɛ lɛ akɛ: “Miisumɔ Tamar, minyɛmi nuu Absalom nyɛmi yoo+ lɛ.” 5 Yehonadab kɛɛ lɛ akɛ: “Yaakã osaatso lɛ nɔ ni okwa ofee tamɔ obɛ hewalɛ. Kɛ́ opapa ba ni ebasara bo lɛ, kɛkɛ lɛ okɛɛ lɛ akɛ, ‘Ofainɛ, hã minyɛmi yoo Tamar aba ni ebahã mi niyenii. Kɛ́ ebafee helatsɛmɛi aniyenii* lɛ yɛ mihiɛ lɛ, maye yɛ edɛŋ.’”
6 No hewɔ lɛ, Amnon yakã shi, ni ekwa efee tamɔ ebɛ hewalɛ, ni maŋtsɛ lɛ ba ebasara lɛ. Kɛkɛ ni Amnon kɛɛ maŋtsɛ lɛ akɛ: “Ofainɛ, hã minyɛmi yoo Tamar aba ni ebashã* keekii enyɔ ni afee lɛ tamɔ tsui yɛ mihiɛ koni ehiɛ niyenii lɛ yɛ edɛŋ ni maye.” 7 Kɛkɛ ni David tsu ayakɛɛ Tamar yɛ shĩa lɛ akɛ: “Ofainɛ, yaa onyɛmi nuu Amnon shĩa lɛ, koni oyafee niyenii* ohã lɛ.” 8 No hewɔ lɛ, Tamar tee enyɛmi nuu Amnon shĩa lɛ, yɛ he ni ekã lɛ. Eti ashikishaŋ ni akpɔtɔ, ni ekɛfee keekii yɛ Amnon hiɛ, ni eshã* keekii lɛ. 9 Kɛkɛ ni ewó pan lɛ ni etsɔ̃ niyenii lɛ yɛ mli ehã lɛ. Shi Amnon ekpɛlɛɛɛ akɛ ebaaye, ni ekɛɛ akɛ: “Nyɛhãa mɔ fɛɛ mɔ ajea mimasɛi!” No hewɔ lɛ, mɔ fɛɛ mɔ je kpo.
10 Agbɛnɛ, Amnon kɛɛ Tamar akɛ: “Okɛ niyenii lɛ aba sɛɛtsu lɛ mli koni maye yɛ odɛŋ.” No hewɔ lɛ, Tamar wó keekii enyɔ ni efee lɛ tamɔ tsui lɛ ni ekɛbahã enyɛmi nuu Amnon yɛ sɛɛtsu lɛ mli. 11 Be ni ekɛ niyenii lɛ bahã lɛ koni eye lɛ, Amnon mɔ Tamar mli ni ekɛɛ akɛ: “Minyɛmi yoo, ba ni okɛ mi abawɔ.” 12 Shi enyɛmi yoo lɛ kɛɛ lɛ akɛ: “Kaafee nakai, minyɛmi nuu, kaashwie mihiɛ shi, ejaakɛ afeee nɔ ko tamɔ nɛkɛ yɛ Israel.+ Kaafee hiɛgbejianii nɛɛ.+ 13 Nɛgbɛ po mikɛ nɛkɛ hiɛgbele nɛɛ aaatsɔ? Ni bo hu, abaabu bo akɛ hii yaka gbɔmɛi ni yɔɔ Israel lɛ ateŋ mɔ kome. No hewɔ lɛ, ofainɛ, okɛ maŋtsɛ lɛ awie, ejaakɛ mile akɛ ekɛ mi baahã bo aahu.” 14 Shi Amnon ekpɛlɛɛɛ, ni emɔ enyɛmi yoo lɛ akrana naa, ni eto lɛ kabonaa ni ekɛshwie enyɛmi yoo lɛ hiɛ shi. 15 Kɛkɛ ni Amnon banyɛ Tamar waa aahu akɛ, nyɛɛ ni ená kɛhã lɛ lɛ naa wa kwraa fe suɔmɔ ni no mli lɛ eyɔɔ kɛhã Tamar lɛ. Amnon kɛɛ lɛ akɛ: “Tee shi ni oje kpo!” 16 Ni enyɛmi yoo lɛ kɛɛ lɛ akɛ: “Kaafee nakai, minyɛmi nuu, ejaakɛ shwiemɔ ni oshwieɔ mi nɛɛ naa wa kwraa fe nɔ ni ofee mi lɛ!” Shi Amnon booo lɛ toi.
17 Kɛkɛ ni Amnon tsɛ oblanyo ni sɔmɔɔ lɛ lɛ ni ekɛɛ: “Ofainɛ, shwiemɔ nɛkɛ yoo nɛɛ kɛje mihiɛ, ni oŋmɛ shinaa lɛ mli.” 18 (No mli lɛ, Tamar wo atade kakadaŋŋ fɛfɛo* ko, ejaakɛ no ji atade ni maŋtsɛ lɛ biyei, ni ji oblayei froi lɛ woɔ.) No hewɔ lɛ, sɔɔlɔ lɛ shwie lɛ kɛje kpo ni eŋmɛ shinaa lɛ mli. 19 Kɛkɛ ni Tamar loo lamulu eshwie eyiteŋ+ ni egbala atade kakadaŋŋ fɛfɛo ni ewo lɛ; ni eloo eniji eshwie eyiteŋ ni ehiɛ yaafo gegeege kɛnyiɛ gbɛ lɛ nɔ kɛtee.
20 Kɛkɛ ni Tamar nyɛmi nuu Absalom+ bi lɛ akɛ: “Onyɛmi nuu Amnon ji mɔ ni fee bo efɔŋ nɛɛ?* Minyɛmi yoo, bo lɛ kaakɛɛ nɔ ko. Onyɛmi nuu ni.+ Jiemɔ sane nɛɛ kɛje otsui mli.” Kɛkɛ ni Tamar yahi enyɛmi nuu Absalom shĩa lɛ, ni ejeee kpo. 21 Be ni Maŋtsɛ David nu saji nɛɛ fɛɛ lɛ, emli fu waa.+ Shi esumɔɔɔ ni efeɔ nɔ ko ni baagba ebinuu Amnon naa, ejaakɛ esumɔɔ lɛ, ejaakɛ lɛ ji ekromɔbi. 22 Ni Absalom ekɛɛɛ Amnon nɔ ko, efɔŋ jio, ekpakpa jio; ejaakɛ Absalom nyɛ+ Amnon waa akɛni eshwie enyɛmi yoo Tamar hiɛ shi lɛ hewɔ.+
23 Afii enyɔ sɛɛ lɛ, no mli lɛ, Absalom gwantɛŋ hetsɔikulɔi lɛ miiku gwantɛŋi ahetsɔi yɛ Baal-hazor yɛ Efraim+ masɛi, ni Absalom fɔ̃ maŋtsɛ lɛ bihii lɛ fɛɛ nine.+ 24 No hewɔ lɛ, Absalom bana maŋtsɛ lɛ ni ekɛɛ: “Otsulɔ miiku egwantɛŋi ahetsɔi. No hewɔ lɛ, ofainɛ, hã maŋtsɛ lɛ kɛ etsuji lɛ afata mihe kɛya.” 25 Shi maŋtsɛ lɛ kɛɛ Absalom akɛ: “Dabi, mibinuu. Kɛ́ wɔ fɛɛ wɔtee lɛ, wɔbaatsɔ jatsu wɔhã bo.” Eyɛ mli akɛ, Absalom tee nɔ ekpa lɛ fai moŋ, shi ekpɛlɛɛɛ akɛ ebaaya, shi moŋ ejɔɔ lɛ. 26 Kɛkɛ ni Absalom kɛɛ akɛ: “Kɛ́ oyaaa lɛ, belɛ, ofainɛ, hã minyɛmi nuu Amnon kɛ wɔ aya mɔ.”+ Maŋtsɛ lɛ to he ehã lɛ akɛ: “Mɛni hewɔ esa akɛ ekɛ bo aya?” 27 Shi Absalom kpa lɛ fai, no hewɔ lɛ, ehã Amnon kɛ maŋtsɛ lɛ bihii lɛ fɛɛ kɛ lɛ tee.
28 Kɛkɛ ni Absalom fã esɔɔlɔi lɛ akɛ: “Kɛfee lɛ, nyɛkwɛa Amnon, ni kɛ́ nyɛna akɛ enu wain ni etsui mii eshɛ ehe lɛ, makɛɛ nyɛ akɛ, ‘Nyɛgbea Amnon!’ No sɛɛ lɛ, nyɛgbea lɛ. Nyɛkashea gbeyei. Ani jeee mi, mifãa nyɛ? Nyɛwajea nyɛhe ni nyɛfea ekãa.” 29 No hewɔ lɛ, Absalom sɔɔlɔi lɛ fee Amnon bɔ ni Absalom efã amɛ lɛ pɛpɛɛpɛ; kɛkɛ ni maŋtsɛ lɛ bihii krokomɛi lɛ fɛɛ te shi, ni amɛteŋ mɔ fɛɛ mɔ tu eta eteji* nɔ, ni ewo foi. 30 Be ni amɛnyiɛ gbɛ kɛbaa lolo lɛ, ababɔ David amaniɛ akɛ: “Absalom egbe maŋtsɛ lɛ bihii lɛ fɛɛ, ni eshwɛɛɛ amɛteŋ mɔ kome folo po.” 31 Kɛkɛ ni maŋtsɛ lɛ te shi ni egbala etadei lɛ ni eho ekã shikpɔŋ, ni etsuji lɛ fɛɛ gbala amɛtadei kɛdamɔ emasɛi.
32 Shi Yehonadab,+ ni ji David nyɛmi nuu Shimea+ binuu lɛ kɛɛ akɛ: “Minuŋtsɔ akasusu akɛ agbe maŋtsɛ lɛ bihii lɛ fɛɛ, ejaakɛ Amnon pɛ egbo.+ Absalom ji mɔ ni fã ni afee nakai,+ ejaakɛ kɛjɛ gbi nɔ ni Amnon shwie enyɛmi yoo Tamar+ hiɛ shi+ lɛ tɔ̃ɔ ni ekpɛ eyiŋ akɛ ebaafee nakai. 33 No hewɔ lɛ, minuŋtsɔ maŋtsɛ kɛ amaniɛ ni ababɔ akɛ, ‘Maŋtsɛ lɛ bihii lɛ fɛɛ egboi’ lɛ akato etsui mli; Amnon pɛ egbo.”
34 Shi Absalom jo foi.+ Sɛɛ mli lɛ, bulɔ lɛ wó ehiɛ nɔ ni ena akɛ mɛi babaoo miiba yɛ gbɛ ni kã esɛɛ yɛ gɔŋ lɛ masɛi lɛ nɔ. 35 Kɛkɛ ni Yehonadab+ kɛɛ maŋtsɛ lɛ akɛ: “Naa! Maŋtsɛ lɛ bihii lɛ ebashɛ shi, tamɔ bɔ ni otsulɔ wie lɛ pɛpɛɛpɛ.” 36 Be ni enaa nyɔ shi nɔŋŋ ni maŋtsɛ lɛ bihii lɛ ba, ni amɛmiifó waa; ni maŋtsɛ lɛ kɛ etsuji lɛ fɛɛ hu fó waa. 37 Shi Absalom jo foi kɛtee Amihud binuu, Talmai,+ ni ji Geshur maŋtsɛ lɛ ŋɔɔ. David fó ebinuu lɛ gbii pii. 38 Be ni Absalom jo foi kɛtee Geshur+ lɛ, ehi jɛmɛ afii etɛ.
39 Agbɛnɛ, Maŋtsɛ David hiɛ miitse Absalom, ejaakɛ etsɛ etsui eŋmɛ emli yɛ Amnon gbele lɛ he.