Yeremia
14 Nɔ ni Yehowa kɛɛ Yeremia* yɛ nu hɔmɔ he lɛ nɛ:+
2 Yuda miiye awerɛho,+ ni egbói lɛ elaaje.
Amɛtara shikpɔŋ mɔbɔmɔbɔ,
Ni bolɔmɔ miijɛ Yerusalem kɛmiiya ŋwɛi.
3 Ni amɛnuŋtsɔmɛi lɛ etsu amɛtsuji* lɛ koni amɛyayɛ nu kɛba.
Amɛtee nubui* lɛ ahe shi amɛnáaa nu.
Amɛkɛ amɛgbɛ́i lɛ eku amɛsɛɛ kɛba efolo.
Amɛhiɛ egboi ni amɛnijiaŋ eje wui,
Ni amɛha amɛyitsei anɔ.
4 Akɛni shikpɔŋ lɛ egbala,
Yɛ nugbɔ ni enɛɛɛ shikpɔŋ lɛ nɔ lɛ hewɔ lɛ,+
Okwaafoi lɛ ehao ni amɛha amɛyitsei anɔ.
5 Adowayoo ni yɔɔ ŋa mli lɛ po ejo foi eshi ebii ni efɔ etsɛko lɛ
Ejaakɛ jwɛi bɛ.
6 Ŋa mli tejii damɔɔ gɔŋkpɔi kpatai lɛ anɔ.
Amɛfuɔ kɔɔyɔɔ lɛ mli waa tamɔ ŋa mli gbei;
Amɛhiŋmɛii anɔ eha ejaakɛ amɛnáaa baa amɛkpe.+
7 Eyɛ mli akɛ wɔ diɛŋtsɛ wɔtɔmɔi lɛ miiye odase eeshi wɔ moŋ,
Shi Ao Yehowa, tsu saji ahe nii yɛ ogbɛ́i lɛ hewɔ.+
Ejaakɛ wɔtuatsemɔi lɛ fa,+
Ni bo ji mɔ ni wɔfee esha wɔshi.
8 Ao Israel hiɛnɔkamɔ, e-Yiwalaherelɔ+ yɛ haomɔ beiaŋ,
Mɛni hewɔ otsɔ tamɔ gbɔ yɛ shikpɔŋ lɛ nɔ nɛɛ,
Tamɔ gbɛfalɔ ko ni toɔ shi eyeɔ jenamɔ kɛkɛ nɛɛ?
9 Mɛni hewɔ otsɔ tamɔ nuu ni he ejɔ̃ ehe nɛɛ,
Tamɔ nuu kãkãlɔ ko ni nyɛɛɛ mɔ yiwala ahere nɛɛ?
Kaashi wɔ.
10 Nɔ ni Yehowa wieɔ yɛ maŋ nɛɛ he nɛ: “Amɛsumɔɔ ni amɛkpa shi;+ amɛtsĩii amɛnaji anaa.+ No hewɔ lɛ, Yehowa bɛ amɛhe miishɛɛ.+ Agbɛnɛ, ebaakai amɛtɔmɔ lɛ ni ebaagbala amɛtoi yɛ amɛhe eshai lɛ ahewɔ.”+
11 Kɛkɛ ni Yehowa kɛɛ mi akɛ: “Kaasɔle obi nɔ kpakpa ohã maŋ nɛɛ.+ 12 Kɛ́ amɛhi ŋmaa lɛ mibooo amɛfaikpamɔi lɛ atoi,+ ni kɛ́ amɛshã shãa afɔlei kɛ ŋmaa* afɔlei lɛ, mináaa he miishɛɛ,+ ejaakɛ mikɛ klante, kɛ hɔmɔ, kɛ tsɛŋemɔ hela baakpãtã amɛhiɛ.”+
13 Kɛkɛ ni mikɛɛ akɛ: “Ao Nuŋtsɔ Ofe Yehowa! Naa, gbalɔi lɛ miikɛɛ amɛ akɛ, ‘Nyɛnaŋ klante, ni hɔmɔ hu baŋ nyɛnɔ, shi mahã nyɛ toiŋjɔlɛ diɛŋtsɛ yɛ biɛ nɛɛ.’”+
14 Kɛkɛ ni Yehowa kɛɛ mi akɛ: “Gbalɔi lɛ miigba amale gbalɛi yɛ migbɛ́i mli.+ Mitsuko amɛ, ni mifãko amɛ hu, ni mikɛ amɛ ewieko.+ Amale ninaa, kɛ klamɔ ni sɛɛnamɔ bɛ he, kɛ amɛ diɛŋtsɛ amɛtsui mli lakamɔ ji nɔ ni amɛgbaa amɛtsɔɔ nyɛ lɛ.+ 15 No hewɔ lɛ, nɔ ni Yehowa kɛɔ nɛ: ‘Gbalɔi ni gbaa yɛ migbɛ́i mli shi mitsuko amɛ, ni amɛkɛɔ akɛ klante kɛ hɔmɔ baŋ shikpɔŋ nɛɛ nɔ lɛ, klante kɛ hɔmɔ baakpãtã amɛhiɛ.+ 16 Ni abaashɛrɛ mɛi ni amɛgbaa amɛtsɔɔ amɛ lɛ ashwie Yerusalem gbɛjegbɛi lɛ anɔ yɛ hɔmɔ kɛ klante hewɔ, ni amɛnáŋ mɔ ko afu amɛ,+—amɛ, kɛ amɛŋamɛi, kɛ amɛbihii, kɛ amɛbiyei—ejaakɛ mafɔse sane fɔŋ ni sa amɛ lɛ mashwie amɛnɔ.’+
17 “Kɛɛmɔ amɛ nɛkɛ wiemɔi nɛɛ,
‘Hã yaafonui babaoo aho kɛjɛ mihiŋmɛii amli jenamɔ kɛ jetsɛremɔ, ekakpa,+
Ejaakɛ ajwara mimaŋ lɛ biyoo ni ji oblayoo fro lɛ, ni akumɔ lɛ kwraa,+
Ni apila lɛ waa.
18 Kɛ́ mitee ŋa lɛ nɔ miyakwɛ lɛ,
Minaa mɛi ni akɛ klante egbe amɛ!+
Ni kɛ́ miba maŋ lɛ mli lɛ,
Minaa helai ni hɔmɔ lɛ kɛba lɛ!+
Ejaakɛ gbalɔ lɛ kɛ osɔfo lɛ fɛɛ eyakpa shi yɛ shikpɔŋ ni amɛleee lɛ nɔ.’”+
19 Ani okpoo Yuda kwraa? Ani onyaŋe* Zion?+
Mɛni hewɔ otswa wɔ nɔ bɔ ni ehiii wɔ tsamɔ nɛɛ?+
Wɔkwɛ toiŋjɔlɛ gbɛ, shi nɔ ko kpakpa ko baaa,
Wɔkwɛ tsamɔ be gbɛ, shi gbeyeishemɔ moŋ yɔɔ!+
21 Ogbɛ́i lɛ hewɔ lɛ, kaakpoo wɔ;+
Kaanyaŋe onunyam maŋtsɛ sɛi lɛ.
Kaimɔ okɛ wɔ teŋ kpaŋmɔ lɛ, ni kaaku mli.+
22 Ani jeŋmaji lɛ amagai ni he bɛ sɛɛnamɔ lɛ ateŋ eko baanyɛ ahã nugbɔ anɛ?
Ani ŋwɛi lɛ diɛŋtsɛ po baanyɛ ahã nugbɔ anɛ?
Ao Yehowa, wɔ-Nyɔŋmɔ, ani jeee bo okome too pɛ?+
Wɔhiɛ kã onɔ,
Ejaakɛ bo pɛ ofee nibii nɛɛ fɛɛ.