2 Maŋtsɛmɛi

10 No mli lɛ, Ahab+ yɛ bihii 70 yɛ Samaria. No hewɔ lɛ, Yehu ŋmala woji ni ekɛtsu kɛtee Samaria, akɛyahã Yezreel lumɛi lɛ, kɛ onukpai+ lɛ, kɛ mɛi ni kwɛɔ Ahab bii* lɛ ekɛɛ: 2 “Akɛni nyɛnuŋtsɔ lɛ bii lɛ, kɛ ta shwiilii lɛ, kɛ okpɔŋɔi lɛ, kɛ maŋ ni atswa gbogbo awo he lɛ, kɛ tawuu nibii lɛ yɛ nyɛŋɔɔ hewɔ lɛ, kɛ́ nyɛnine shɛ wolo nɛɛ nɔ lɛ, 3 nyɛhalaa nyɛnuŋtsɔ lɛ bihii lɛ ateŋ mɔ ni hi kɛ mɔ ni sa* fe fɛɛ, ni nyɛkɛ lɛ ata etsɛ maŋtsɛ sɛi lɛ nɔ. Ni nyɛwu kɛfã nyɛnuŋtsɔ lɛ shĩa lɛ he.”

4 Shi amɛshe gbeyei waa ni amɛkɛɛ akɛ: “Naa! Kɛ́ maŋtsɛmɛi enyɔ po nyɛɛɛ ehiɛ adamɔ lɛ,+ te wɔɔfee tɛŋŋ ni wɔɔnyɛ ehiɛ wɔdamɔ lɛ?” 5 No hewɔ lɛ, maŋtsɛ shĩa lɛ nɔkwɛlɔ lɛ, kɛ mɔ ni kwɛɔ maŋ lɛ nɔ lɛ, kɛ onukpai lɛ, kɛ mɛi ni kwɛɔ Ahab bii lɛ tsu ayakɛɛ Yehu akɛ: “Otsuji ji wɔ, ni wɔbaafee nɔ fɛɛ nɔ ni obaakɛɛ wɔ. Wɔwóoo mɔ ko mɔ ko maŋtsɛ. Feemɔ nɔ fɛɛ nɔ ni hi yɛ ohiɛ.”

6 Kɛkɛ ni eŋma wolo nɔ ni ji shii enyɔ nɔ eyahã amɛ ekɛɛ: “Kɛji nyɛyɛ migbɛfaŋ, ni nyɛmiisumɔ ni nyɛbo mi toi lɛ, no lɛ, wɔ nɛkɛ be mli lɛ, nyɛkɛ nyɛnuŋtsɔ lɛ bihii lɛ ayitsei abahãa mi yɛ Yezreel.”

No mli lɛ, maŋtsɛ lɛ bihii 70 lɛ yɛ maŋ lɛ mli hii ni abuɔ waa lɛ aŋɔɔ ni amɛmiitsɔse amɛ. 7 Be ni amɛnine shɛ wolo lɛ nɔ nɔŋŋ lɛ, amɛmɔmɔ maŋtsɛ bihii lɛ, hii 70,+ ni amɛgbe amɛ, ni amɛkɛ amɛyitsei lɛ wo kɛntɛŋi amli ni amɛkɛtsu ni akɛyahã lɛ yɛ Yezreel. 8 Ni tsulɔ lɛ ba mli ni ebakɛɛ Yehu akɛ: “Amɛkɛ maŋtsɛ bihii lɛ ayitsei lɛ eba.” No hewɔ lɛ, Yehu kɛɛ akɛ: “Nyɛtoa amɛ kui enyɔ yɛ maŋ lɛ agbó lɛ naa kɛyashi leebi.” 9 Be ni eje kpo leebi lɛ, eyadamɔ maŋbii lɛ fɛɛ ahiɛ ni ekɛɛ akɛ: “Nyɛfeko efɔŋ ko.* Anɔkwa, mikpaŋ minuŋtsɔ lɛ yi nɔ, ni migbe lɛ,+ shi namɔ gbe mɛnɛɛmɛi fɛɛ? 10 Agbɛnɛ, nyɛnáa nyɛlea akɛ Yehowa wiemɔi fɛɛ ni Yehowa wie eshi Ahab shĩa lɛ, emli ekome po efeŋ efolo,*+ ni Yehowa efee nɔ ni etsɔ etsulɔ Elia nɔ ewie lɛ.”+ 11 Agbɛnɛ hu, Yehu gbe mɛi fɛɛ ni shwɛ yɛ Ahab shĩa lɛ yɛ Yezreel, kɛ Ahab hii ni abuɔ waa lɛ fɛɛ, kɛ enanemɛi lɛ, kɛ esɔfoi+ lɛ, kɛyashi eshwɛɛɛ emɔ ko mɔ ko.+

12 Kɛkɛ ni ete shi ni eyi gbɛ koni eya Samaria. Tsũ ni tookwɛlɔi lɛ fimɔɔ amɛgwantɛŋi yɛ mli lɛ* yɛ gbɛ lɛ nɔ. 13 Yehu kɛ Yuda maŋtsɛ Ahazia+ nyɛmimɛi hii lɛ kpe yɛ jɛmɛ, ni ekɛɛ amɛ akɛ, “Namɛi ji nyɛ?” Ni amɛkɛɛ akɛ: “Ahazia nyɛmimɛi hii ji wɔ, ni wɔmiiya koni wɔyabi maŋtsɛ bihii lɛ kɛ maŋnyɛ bihii lɛ ashi.” 14 Amrɔ nɔŋŋ ni ekɛɛ akɛ: “Nyɛmɔmɔa amɛ hiɛkãalɔi!” No hewɔ lɛ, amɛmɔmɔ amɛ hiɛkãalɔi ni amɛgbe amɛ, hii 42, yɛ bu ni akɛtoɔ nu ni yɔɔ tsũ ni afimɔɔ gwantɛŋi yɛ mli lɛ masɛi lɛ he. Egbe amɛ fɛɛ, eshwɛɛɛ amɛteŋ mɔ ko mɔ ko.+

15 Be ni eshi jɛmɛ ni eyaa lɛ, ekɛ Yehonadab,+ Rekab+ binuu lɛ kpe ní eeba koni ekɛ lɛ abakpe. Be ni eŋa* lɛ lɛ, ekɛɛ lɛ akɛ: “Ani otsui fɛɛ kɛ mi kpãa gbee,* tamɔ bɔ ni mitsui kɛ otsui kpãa gbee lɛ?”

Yehonadab hã hetoo akɛ: “Hɛɛ, ekɛ bo kpãa gbee.”

“Kɛ́ ekɛ mi kpãa gbee lɛ, no lɛ kpã onine mli ohã mi.”

No hewɔ lɛ, ekpã enine mli ehã lɛ, ni Yehu sha lɛ kɛbafata ehe yɛ shwiili lɛ mli. 16 Kɛkɛ ni Yehu kɛɛ lɛ akɛ: “Fatamɔ mihe ni wɔya ni oyakwɛ bɔ ni mikpɛlɛɛɛ ni ajáa nyɔŋmɔ kroko yɛ Yehowa sɛɛ.”*+ No hewɔ lɛ, amɛhã efata Yehu he yɛ eta shwiili lɛ mli kɛtee. 17 Kɛkɛ ni eyashɛ Samaria, ni egbe mɛi fɛɛ ni eshwɛ yɛ Ahab shĩa lɛ yɛ Samaria kɛyashi ekpãtã amɛ fɛɛ amɛhiɛ+ tamɔ bɔ ni Yehowa etsɔ Elia nɔ ewie lɛ.+

18 Agbɛnɛ hu, Yehu bua maŋbii lɛ fɛɛ anaa ni ekɛɛ amɛ akɛ: “Ahab já Baal fioo pɛ,+ shi Yehu baajá Baal waa fe lɛ. 19 No hewɔ lɛ, nyɛyatsɛa Baal gbalɔi lɛ fɛɛ,+ mɛi fɛɛ ni jáa lɛ lɛ, kɛ esɔfoi lɛ fɛɛ+ ni amɛba miŋɔɔ. Nyɛkashia amɛteŋ mɔ ko mɔ ko, ejaakɛ mashã afɔle kpele mahã Baal. Mɔ fɛɛ mɔ ni baaa lɛ, eyi naŋ wala.” No mli lɛ, Yehu miitsɔ ŋaa koni ekpãtã Baal jálɔi lɛ ahiɛ.

20 Yehu kɛɛ kɛtsa nɔ akɛ: “Nyɛtsɛa henaabuamɔ krɔŋkrɔŋ nyɛhãa Baal.” No hewɔ lɛ, amɛtsɛ kpee lɛ. 21 No sɛɛ lɛ, Yehu tsu ni ayatswa adafi yɛ Israel fɛɛ, ni Baal jálɔi lɛ fɛɛ ba. Ashiii amɛteŋ mɔ ko mɔ ko, amɛ fɛɛ kwa amɛba. Amɛbote Baal jamɔhe*+ lɛ, ni Baal jamɔhe lɛ yi, kɛjɛ naagbeehe kome kɛyashi naagbeehe kroko. 22 Yehu kɛɛ mɔ ni kwɛɔ atadei atsũ lɛ nɔ lɛ akɛ: “Yaajie atadei obahã Baal jálɔi lɛ fɛɛ.” No hewɔ lɛ, eyajie atadei ebahã amɛ. 23 Kɛkɛ ni Yehu kɛ Yehonadab,+ Rekab binuu lɛ bote Baal jamɔhe lɛ. Ni ekɛɛ Baal jálɔi lɛ akɛ: “Nyɛkwɛa nyɛteŋ jogbaŋŋ koni nyɛná nɔmimaa akɛ Yehowa jálɔ ko kwraa bɛ biɛ akɛ ja Baal jálɔi kɛkɛ.” 24 Ni amɛtee mli koni amɛyashã afɔlei kɛ shãa afɔlei. No mli lɛ, Yehu ehã ehii lɛ ateŋ mɛi 80 edamɔ agbó lɛ naa ni ekɛɛ amɛ akɛ: “Nyɛteŋ mɔ ni baahã hii ni mikɛbaawo nyɛdɛŋ nɛɛ ateŋ mɔ ko ajo foi lɛ, no lɛ, ekɛ ewala baatse.”*

25 Be ni Yehu shã shãa afɔle lɛ egbe naa nɔŋŋ lɛ, ekɛɛ bulɔi* lɛ kɛ asafoiatsɛmɛi lɛ akɛ: “Nyɛbaa mli ni nyɛbagbea amɛ! Nyɛkahãa amɛteŋ mɔ ko mɔ ko joa foi.”+ No hewɔ lɛ, bulɔi lɛ kɛ asafoiatsɛmɛi lɛ kɛ klante gbe amɛ ni amɛshɛrɛ amɛ amɛshwie agbó lɛ naa, ni bulɔi lɛ kɛ asafoiatsɛmɛi lɛ tee aahu kɛyashi Baal jamɔhe lɛ sɛɛtsu* lɛ mli. 26 Kɛkɛ ni amɛyajie Baal jamɔhe lɛ wɔŋ tɛi+ lɛ kɛje kpo ni amɛshã eko fɛɛ eko.+ 27 Amɛkumɔ Baal wɔŋ tɛ lɛ amɛshwie shi,+ ni amɛkumɔ Baal jamɔhe+ lɛ hu amɛshwie shi, ni amɛkɛ jɛmɛ fee tiafi, ni nakai eji kɛbashi ŋmɛnɛ.

28 Nɛkɛ ji bɔ ni fee ni Yehu jie Baal jamɔ kɛje Israel kwraa. 29 Shi Yehu tsiii ehe kɛjeee eshai ni Yeroboam, Nebat binuu lɛ hã Israel fee lɛ ahe; enɛ kɔɔ shika tsuru tsinabii amagai ni yɔɔ Betel kɛ Dan lɛ ahe.+ 30 Ni Yehowa kɛɛ Yehu akɛ: “Akɛni ofee onii jogbaŋŋ ni ofee nɔ ni sa mihiɛ, ni ji akɛ ofee nibii fɛɛ ni yɔɔ mitsui mli akɛ mafee Ahab shĩa lɛ hewɔ lɛ,+ obihii baata Israel maŋtsɛ sɛi lɛ nɔ kɛyashi yinɔ ni ji ejwɛ nɔ.”+ 31 Shi Yehu kwɛɛɛ koni eye Yehowa, Israel Nyɔŋmɔ lɛ Mla lɛ nɔ* kɛ etsui muu fɛɛ.+ Etsiii ehe kɛjeee eshai ni Yeroboam hã Israel fee lɛ ahe.+

32 Nakai gbii lɛ amli lɛ, Yehowa hã Israel shikpɔŋ lɛ dalɛ lɛ nɔ bɔi gbɔmɔ fiofio. Hazael tee nɔ ekɛ amɛ wu yɛ Israel shikpɔŋ lɛ nɔ fɛɛ,+ 33 ekɛ Israel wu kɛjɛ Yordan Faa lɛ bokãgbɛ, ni ji Gilead shikpɔŋ lɛ fɛɛ—Gadbii lɛ ashikpɔŋ lɛ, Rubenbii lɛ ashikpɔŋ lɛ, kɛ Manasebii+ lɛ ashikpɔŋ lɛ—kɛjɛ Aroer ni yɔɔ Arnon Jɔɔ* lɛ masɛi lɛ, kɛyashi Gilead kɛ Bashan.+

34 Yehu shihilɛ mli saji krokomɛi fɛɛ, nibii fɛɛ ni efee kɛ nibii wuji fɛɛ ni efee lɛ, aŋmala yɛ Israel maŋtsɛmɛi ayinɔsaji awolo lɛ mli. 35 Kɛkɛ ni Yehu gbo,* ni afu lɛ yɛ Samaria, ni ebinuu Yehoahaz+ baye maŋtsɛ yɛ esɛɛ. 36 Bei* abɔ ni Yehu kɛye Israel nɔ yɛ Samaria ji afii 28.