2 Samuel

18 Kɛkɛ ni David kane hii ni fata ehe lɛ, ni ehole asraafoi akpe nɔkwɛlɔi kɛ oha nɔkwɛlɔi eto amɛnɔ.+ 2 Ni David ja hii lɛ amli etɛ, ni ekɛ kuu kome wo Yoab+ dɛŋ, ni ekɛ kuu kome hu wo Yoab nyɛmi nuu Abishai,+ Zeruia binuu+ lɛ dɛŋ, ni ekɛ kuu ni ji etɛ lɛ wo Itai,+ Gatnyo* lɛ dɛŋ. Kɛkɛ ni maŋtsɛ lɛ kɛɛ hii lɛ akɛ: “Mi hu mikɛ nyɛ baaya.” 3 Shi amɛkɛɛ akɛ: “Esaaa akɛ oyaa,+ ejaakɛ kɛ́ wɔjo foi lɛ, no jeee nɔ ko kɛhã amɛ;* ni kɛ́ agbe wɔyifalɛ nɛɛ fã po lɛ, no jeee nɔ ko kɛhã amɛ, ejaakɛ ojara wa tamɔ wɔyi 10,000.+ No hewɔ lɛ, ehi moŋ akɛ obaahi maŋ lɛ mli, ni ojɛ jɛmɛ oye obua wɔ.” 4 Maŋtsɛ lɛ kɛɛ amɛ akɛ: “Mafee nɔ fɛɛ nɔ ni sa nyɛhiɛ.” No hewɔ lɛ, maŋtsɛ lɛ damɔ maŋ lɛ agbó lɛ masɛi, ni hii lɛ fɛɛ to kɛbaho yɛ mɛi oha akui kɛ akpe akui anaa. 5 Kɛkɛ ni maŋtsɛ lɛ fã Yoab, kɛ Abishai, kɛ Itai akɛ: “Nyɛkɛ oblanyo Absalom ayea yɛ mlihilɛ naa yɛ mihewɔ.”+ Hii lɛ fɛɛ nu famɔ ni maŋtsɛ lɛ kɛhã tatsɛmɛi lɛ yɛ Absalom he lɛ.

6 Mɛi lɛ je kpo kɛtee ŋa lɛ nɔ koni amɛkɛ Israel ayakpe, ni awu ta lɛ yɛ Efraim koo lɛ mli.+ 7 Ni David tsuji lɛ ye Israelbii+ lɛ anɔ kunim yɛ jɛmɛ,+ ni agbe amɛteŋ mɛi babaoo yɛ nakai gbi lɛ nɔ—hii 20,000 sɔŋŋ. 8 Ta lɛ gbɛ shwa nakai kpokpaa lɛ nɔ fɛɛ. Agbɛnɛ hu, koo lɛ kpãtã mɛi babaoo hiɛ* yɛ nakai gbi lɛ nɔ fe mɛi ni gboi yɛ klante naa.*

9 Agbɛnɛ Absalom kɛ David tsuji lɛ yakpe hiɛ kɛ hiɛ. Absalom ta teji* ko nɔ, ni teji* lɛ yatsɔ tso agbo ko kɛ eniji wujiwuji shishi, ni eyitso yaka tso agbo lɛ mli, ni esɛŋ shi yɛ kɔɔyɔɔ lɛ mli,* ni teji* lɛ je eshishi etee. 10 Kɛkɛ ni mɔ ko yana ni ebakɛɛ Yoab+ akɛ: “Naa! Mina Absalom ni esɛŋ shi yɛ tso agbo ko nɔ.” 11 Yoab hã nuu ni babɔ lɛ amaniɛ lɛ hetoo akɛ: “Be ni ona lɛ lɛ, mɛni hewɔ otswaaa lɛ nɔ ni egbee shi yɛ jɛmɛ nɔŋŋ? Eji ofee nakai kulɛ, mahã bo jwiɛtɛi kapɛji nyɔŋma kɛ bɛlti.” 12 Shi nuu lɛ kɛɛ Yoab akɛ: “Kɛ́ ahã mi jwiɛtɛi kapɛji 1,000 po,* miwóŋ minine nɔ yɛ maŋtsɛ lɛ binuu lɛ nɔ kɔkɔɔkɔ, ejaakɛ wɔnu famɔ ni maŋtsɛ lɛ kɛhã bo kɛ Abishai kɛ Itai akɛ: ‘Ekɔɔɔ he eko mɔ ni oji lɛ, kwɛmɔ oblanyo Absalom nɔ jogbaŋŋ’ lɛ.+ 13 Eji migbo toi ni migbe lɛ* kulɛ, maŋtsɛ lɛ baanu he kɛ̃, ni bo hu, obuŋ mihe.” 14 Kɛkɛ ni Yoab kɛɛ akɛ: “Miifite be po yɛ ohe!” No hewɔ lɛ, ekɔlɔ plɛkoobii wuji* etɛ ehiɛ edɛŋ ni ekɛyatsurɔ Absalom tsuiŋ be ni esɛŋ shi yɛ tso agbo lɛ nɔ ni ehiɛ kã lolo lɛ. 15 Kɛkɛ ni sɔɔlɔi nyɔŋma ni hiɛɔ Yoab tawuu nii lɛ ba ni amɛbatswia Absalom nii aahu kɛyashi egbo.+ 16 Kɛkɛ ni Yoab kpã tɛtɛrɛmantɛrɛ* lɛ, ni hii lɛ ni tiuɔ Israelbii lɛ ku amɛsɛɛ; Yoab hã amɛfo ta lɛ sɛɛ. 17 Amɛwó Absalom ni amɛyashɛ lɛ amɛfɔ bu agbo ko ni yɔɔ koo lɛ mli lɛ mli, ni amɛto tɛi babaoo diɛŋtsɛ amɛshwie enɔ.+ Ni Israel fɛɛ jo foi kɛtee amɛshĩai amli.

18 Shi Absalom lɛ, be ni eyɔɔ wala mli lɛ, ewó akulashiŋ ko kɛyama Maŋtsɛ Jɔɔ+ lɛ mli kɛhã ehe, ejaakɛ ekɛɛ akɛ: “Mibɛ binuu ko ni baahã migbɛ́i aya nɔ ahi shi.”+ No hewɔ lɛ, ekɛ egbɛ́i wo akulashiŋ lɛ, ni atsɛɔ akulashiŋ lɛ akɛ, Absalom Kaimɔ Nɔ kɛbashi ŋmɛnɛ.

19 Zadok binuu Ahimaaz+ kɛɛ akɛ: “Ofainɛ, hã majo foi ni mayabɔ maŋtsɛ lɛ amaniɛ, ejaakɛ Yehowa ejie lɛ kɛje ehenyɛlɔi lɛ adɛŋ ni ekɛye esane lɛ ehã lɛ.”+ 20 Shi Yoab kɛɛ lɛ akɛ: “Jeee bo obaayabɔ amaniɛ ŋmɛnɛ. Obaanyɛ oyabɔ amaniɛ lɛ gbi kroko, shi ŋmɛnɛ lɛ, oyabɔŋ amaniɛ ko, ejaakɛ maŋtsɛ lɛ diɛŋtsɛ binuu ni egbo lɛ.”+ 21 Kɛkɛ ni Yoab kɛɛ Kushnyo+ ko akɛ: “Yaa ni oyakɛɛ maŋtsɛ lɛ nɔ ni ona lɛ.” Kɛkɛ ni Kushnyo lɛ koto Yoab ni ejo foi kɛtee. 22 Shi Ahimaaz, Zadok binuu lɛ kɛɛ Yoab shi kome ekoŋŋ akɛ: “Bo lɛ, bɔ fɛɛ bɔ ni ji lɛ, ofainɛ hã majo foi kɛyi Kushnyo lɛ sɛɛ.” Kɛkɛ ni Yoab kɛɛ akɛ: “Mibinuu, mɛni hewɔ esa akɛ ojo foi kɛya, be ni amaniɛ ko bɛ ni obaayabɔ?” 23 Shi etee nɔ ekɛɛ akɛ: “Bo lɛ, bɔ fɛɛ bɔ ni ji lɛ, hã majo foi kɛya.” No hewɔ lɛ, Yoab kɛɛ lɛ akɛ: “Joo foi ni oya mɔ!” Ni Ahimaaz wo foi kɛyi gbɛ ni tsɔɔ Yordan kpokpaa lɛ* nɔ lɛ nɔ kɛtee, ni eyaho Kushnyo lɛ he.

24 No mli lɛ, David ta maŋ lɛ agbói+ enyɔ lɛ ateŋ, ni bulɔ+ lɛ kwɔ kɛtee agbó lɛ yiteŋ yɛ gbogbo lɛ nɔ. Ewó ehiɛ nɔ, ni ena nuu ko ni ekome too ehiɛ foi kɛmiiba. 25 No hewɔ lɛ, bulɔ lɛ bo ekɛɛ maŋtsɛ lɛ. Maŋtsɛ lɛ kɛɛ akɛ: “Kɛ́ ekome too lɛ, no lɛ, ehiɛ amaniɛ ko kɛmiiba.” Be ni mɔ ni hiɛ foi lɛ bɛŋkɛɔ fiofio lɛ, 26 bulɔ lɛ saa ena nuu kroko ni hiɛ foi kɛmiiba. Kɛkɛ ni bulɔ lɛ bo etsɛ mɔ ni kwɛɔ agbó lɛ naa lɛ ni ekɛɛ: “Naa! Nuu kroko hu hiɛ foi kɛmiiba ekome too!” Maŋtsɛ lɛ kɛɛ akɛ: “Lɛ hu ehiɛ amaniɛ ko kɛmiiba.” 27 Bulɔ lɛ kɛɛ akɛ: “Miina akɛ klɛŋklɛŋ mɔ lɛ hiɛ foi tamɔ Ahimaaz,+ Zadok binuu lɛ,” ni maŋtsɛ lɛ kɛɛ akɛ: “Gbɔmɔ kpakpa ni, ekɛ sane kpakpa miiba.” 28 Kɛkɛ ni Ahimaaz bo etsɛ maŋtsɛ lɛ ni ekɛɛ: “Sane kpakpa ni eei!” Kɛkɛ ni ekɛ ehiɛ bu shi ni ekoto maŋtsɛ lɛ. Ni ekɛɛ akɛ: “Ajie Yehowa, o-Nyɔŋmɔ lɛ yi, ejaakɛ ejie hii ni tse minuŋtsɔ maŋtsɛ hiɛ atua* lɛ ewo odɛŋ!”+

29 Shi maŋtsɛ lɛ bi akɛ: “Ani oblanyo Absalom yɛ jogbaŋŋ lo?” Kɛkɛ ni Ahimaaz kɛɛ akɛ: “Be ni Yoab tsu maŋtsɛ lɛ tsulɔ kɛ mi* hu lɛ, mina ni aafee gidigidi ko, shi mileee nɔ ni ji.”+ 30 No hewɔ lɛ, maŋtsɛ lɛ kɛɛ akɛ: “Tsi ohe ni oyadamɔ afã dã.” Kɛkɛ ni etsi ehe kɛyadamɔ afã.

31 Kɛkɛ ni Kushnyo lɛ hu ba,+ ni Kushnyo lɛ kɛɛ akɛ: “Minuŋtsɔ maŋtsɛ abo sane nɛɛ toi: Ŋmɛnɛ lɛ, Yehowa ejie bo kɛje mɛi fɛɛ ni tse ohiɛ atua lɛ adɛŋ ni ekɛye osane lɛ ehã bo.”+ 32 Shi maŋtsɛ lɛ bi Kushnyo lɛ akɛ: “Ani oblanyo Absalom yɛ jogbaŋŋ lo?” Kɛkɛ ni Kushnyo lɛ kɛɛ akɛ: “Minuŋtsɔ maŋtsɛ henyɛlɔi lɛ fɛɛ kɛ mɛi fɛɛ ni tse ohiɛ atua koni amɛye bo awui lɛ ayagbe naa tamɔ oblanyo lɛ!”+

33 Enɛ gba maŋtsɛ lɛ naa waa, ni ekwɔ kɛtee ŋwɛi asa ni yɔɔ agbó lɛ yiteŋ lɛ mli ni eyafó, be ni eyaa fɛɛ lɛ, eekɛɛ akɛ: “Ao mibi Absalom, mibi, mibi Absalom oo! Miná ni kulɛ, mi moŋ migbo yɛ onajiaŋ, Ao Absalom mibi, mibi oo!”+