2 Maŋtsɛmɛi

15 Yɛ Israel maŋtsɛ Yeroboam* nɔyeli afi ni ji 27 lɛ nɔ lɛ, Yuda maŋtsɛ Amazia+ binuu Azaria*+ batsɔ maŋtsɛ.+ 2 Be ni Azaria batsɔ maŋtsɛ lɛ, no mli lɛ, eye afii 16, ni eye nɔ afii 52 yɛ Yerusalem. Atsɛɔ enyɛ Yekolia, ni ejɛ Yerusalem. 3 Etee nɔ efee nɔ ni ja yɛ Yehowa hiɛ tamɔ bɔ ni etsɛ Amazia fee lɛ pɛpɛɛpɛ.+ 4 Shi ajieee hei grɔŋŋi lɛ,+ ni no mli lɛ, maŋbii lɛ miishã afɔlei kɛ lasu afɔlei yɛ hei grɔŋŋi lɛ lolo.+ 5 Yehowa hã hela mɔ maŋtsɛ lɛ, ni eye kpiti+ kɛyashi gbi ni egbo; ni ehi shĩa kroko mli,+ ni maŋtsɛ lɛ binuu Yotam+ ji mɔ ni kwɛɔ maŋtsɛ shĩa lɛ nɔ, ni ekojoɔ shikpɔŋ lɛ nɔ bii lɛ.+ 6 Azaria shihilɛ mli saji krokomɛi fɛɛ,+ nibii fɛɛ ni efee lɛ, aŋmala yɛ Yuda maŋtsɛmɛi ayinɔsaji awolo lɛ mli. 7 Kɛkɛ ni Azaria gbo,*+ ni amɛfu lɛ yɛ etsɛmɛi lɛ amasɛi yɛ David Maŋ lɛ mli; ni ebinuu Yotam baye maŋtsɛ yɛ esɛɛ.

8 Yɛ Yuda maŋtsɛ Azaria+ nɔyeli afi ni ji 38 lɛ nɔ lɛ, Yeroboam* binuu Zakaria+ batsɔ Israel maŋtsɛ yɛ Samaria, ni eye nɔ nyɔji ekpaa. 9 Efee efɔŋ yɛ Yehowa hiɛ tamɔ bɔ ni etsɛmɛi lɛ fee lɛ pɛpɛɛpɛ. Etsiii ehe kɛjeee eshai ni Yeroboam, Nebat binuu lɛ hã Israel fee lɛ ahe.+ 10 Kɛkɛ ni Shalum, Yabesh binuu lɛ kpaŋ Zakaria yi nɔ ni egbe lɛ+ yɛ Ibleam.+ Be ni egbe lɛ lɛ sɛɛ lɛ, ebaye maŋtsɛ yɛ esɛɛ. 11 Zakaria shihilɛ mli saji krokomɛi fɛɛ lɛ, aŋmala yɛ Israel maŋtsɛmɛi ayinɔsaji awolo lɛ mli. 12 Enɛ hã nɔ ni Yehowa kɛɛ Yehu lɛ ba mli akɛ: “Obihii+ baata Israel maŋtsɛ sɛi lɛ nɔ kɛyashi yinɔ ni ji ejwɛ nɔ.”+ Ni eba mli nakai pɛpɛɛpɛ.

13 Shalum, Yabesh binuu lɛ batsɔ maŋtsɛ yɛ Yuda maŋtsɛ Uzia+ nɔyeli afi ni ji 39 lɛ nɔ, ni eye nɔ nyɔɔŋ kome yɛ Samaria. 14 Kɛkɛ ni Menahem, Gadi binuu lɛ, kwɔ kɛjɛ Tirza+ kɛba Samaria ni ebagbe Shalum,+ Yabesh binuu lɛ yɛ Samaria. Be ni egbe lɛ lɛ sɛɛ lɛ, ebaye maŋtsɛ yɛ esɛɛ. 15 Shalum shihilɛ mli saji krokomɛi fɛɛ kɛ Zakaria yi nɔ ni ekpaŋ lɛ, aŋmala yɛ Israel maŋtsɛmɛi ayinɔsaji awolo lɛ mli. 16 Nakai beiaŋ ni Menahem jɛ Tirza eba ni ebatswia Tifsa nii ni egbe mɛi fɛɛ ni yɔɔ maŋ lɛ mli kɛ mɛi fɛɛ ni yɔɔ ekpokpai lɛ anɔ lɛ, ejaakɛ Tifsabii lɛ gbeleee agbói lɛ amɛhãaa lɛ. Etswia Tifsa nii, ni yeihɔlɔi ni yɔɔ maŋ lɛ mli lɛ hu lɛ, egbalagbalaa amɛmli.

17 Yɛ Yuda maŋtsɛ Azaria nɔyeli afi ni ji 39 lɛ nɔ lɛ, Menahem, Gadi binuu lɛ, batsɔ Israel maŋtsɛ, ni eye nɔ afii nyɔŋma yɛ Samaria. 18 Etee nɔ efee efɔŋ yɛ Yehowa hiɛ. Ni yɛ egbii lɛ fɛɛ amli lɛ, etsiii ehe kɛjeee eshai fɛɛ ni Yeroboam, Nebat binuu lɛ hã Israel fee lɛ ahe.+ 19 Kɛkɛ ni Asiria maŋtsɛ Pul+ ba shikpɔŋ lɛ nɔ, ni Menahem hã Pul jwiɛtɛi talɛntai* 1,000 koni eye ebua lɛ ni emaŋtsɛyeli lɛ ama shi shiŋŋ.+ 20 No hewɔ lɛ, Menahem he jwiɛtɛi lɛ yɛ hii niiatsɛmɛi+ ni ale waa lɛ adɛŋ yɛ Israelbii lɛ anajiaŋ. Amɛteŋ mɔ fɛɛ mɔ hã lɛ jwiɛtɛi shekeli* 50, ni ekɛhã Asiria maŋtsɛ lɛ. Kɛkɛ ni Asiria maŋtsɛ lɛ ku esɛɛ ni ehiii shikpɔŋ lɛ nɔ. 21 Menahem+ shihilɛ mli saji krokomɛi fɛɛ, nibii fɛɛ ni efee lɛ, aŋmala yɛ Israel maŋtsɛmɛi ayinɔsaji awolo lɛ mli. 22 Kɛkɛ ni Menahem gbo;* ni ebinuu Pekahia baye maŋtsɛ yɛ esɛɛ.

23 Yɛ Yuda maŋtsɛ Azaria nɔyeli afi ni ji 50 lɛ nɔ lɛ, Pekahia, Menahem binuu lɛ batsɔ Israel maŋtsɛ yɛ Samaria, ni eye nɔ afii enyɔ. 24 Etee nɔ efee efɔŋ yɛ Yehowa hiɛ. Etsiii ehe kɛjeee eshai ni Yeroboam, Nebat binuu lɛ hã Israel fee lɛ ahe.+ 25 Kɛkɛ ni asraafoiatsɛ Peka,+ Remalia binuu lɛ kpaŋ Pekahia yi nɔ, ni egbe lɛ yɛ Samaria yɛ maŋtsɛ shĩa lɛ mɔɔ lɛ mli, ekɛ Argob kɛ Arie. No mli lɛ, Gilead hii 50 fata ehe; ni be ni egbe lɛ lɛ sɛɛ lɛ, ebatsɔ maŋtsɛ yɛ esɛɛ. 26 Pekahia shihilɛ mli saji krokomɛi fɛɛ, nibii fɛɛ ni efee lɛ, aŋmala yɛ Israel maŋtsɛmɛi ayinɔsaji awolo lɛ mli.

27 Yɛ Yuda maŋtsɛ Azaria nɔyeli afi ni ji 52 lɛ nɔ lɛ, Peka,+ Remalia binuu lɛ, batsɔ Israel maŋtsɛ yɛ Samaria, ni eye nɔ afii 20. 28 Etee nɔ efee efɔŋ yɛ Yehowa hiɛ, ni etsiii ehe kɛjeee eshai ni Yeroboam, Nebat binuu lɛ hã Israel fee lɛ ahe.+ 29 Yɛ Israel maŋtsɛ Peka gbii lɛ amli lɛ, Asiria maŋtsɛ Tiglat-pileser+ ba ni ebaŋɔ Yion, kɛ Abel-bet-maaka,+ kɛ Yanoa, kɛ Kedesh,+ kɛ Hazor, kɛ Gilead+ kɛ Galilea, ni ji Naftali+ shikpɔŋ lɛ fɛɛ, ni eŋɔ shikpɔji nɛɛ anɔ bii lɛ nom kɛtee Asiria.+ 30 Kɛkɛ ni Hoshea,+ Ela binuu lɛ, kpaŋ Peka, Remalia binuu lɛ yi nɔ, ni etswa lɛ nɔ ni egbe lɛ; ni ebaye maŋtsɛ yɛ esɛɛ yɛ Yotam,+ Uzia binuu lɛ, nɔyeli afi ni ji 20 lɛ nɔ. 31 Peka shihilɛ mli saji krokomɛi fɛɛ, nibii fɛɛ ni efee lɛ, aŋmala yɛ Israel maŋtsɛmɛi ayinɔsaji awolo lɛ mli.

32 Yɛ Israel maŋtsɛ Peka, Remalia binuu lɛ nɔyeli afi ni ji enyɔ lɛ nɔ lɛ, Yuda maŋtsɛ Uzia+ binuu Yotam+ batsɔ maŋtsɛ. 33 Be ni ebatsɔ maŋtsɛ lɛ, no mli lɛ, eye afii 25, ni eye nɔ afii 16 yɛ Yerusalem. Atsɛɔ enyɛ Yerusha, Zadok biyoo lɛ.+ 34 Etee nɔ efee nɔ ni ja yɛ Yehowa hiɛ tamɔ bɔ ni etsɛ Uzia fee lɛ pɛpɛɛpɛ.+ 35 Shi ajieee hei grɔŋŋi lɛ, ni no mli lɛ, maŋbii lɛ miishã afɔlei kɛ lasu afɔlei yɛ hei grɔŋŋi lɛ lolo.+ Lɛ ji mɔ ni tswa Yehowa shĩa lɛ ŋwɛigbɛ* agbó lɛ.+ 36 Yotam shihilɛ mli saji krokomɛi fɛɛ, nɔ ni efee lɛ, aŋmala yɛ Yuda maŋtsɛmɛi ayinɔsaji awolo lɛ mli. 37 Yɛ nakai gbii lɛ amli lɛ, Yehowa hã Rezin, Siria maŋtsɛ lɛ, kɛ Peka,+ Remalia binuu lɛ wu amɛshi Yuda.+ 38 Kɛkɛ ni Yotam gbo* ni afu lɛ yɛ etsɛmɛi lɛ amasɛi yɛ etsɛ David Maŋ lɛ mli. Ni ebinuu Ahaz baye maŋtsɛ yɛ esɛɛ.