9 Anɔkwa hiɛshikamɔ ema eshĩa;
Eko akulashiŋi kpawo yɛ eshĩa lɛ mli.
2 Esaa kooloo ni egbe lɛ jogbaŋŋ;
Efutu ewain lɛ;
Ni eŋmɛ ekpɔlɔ lɛ hu.
3 Etsu etsuji yei lɛ kɛtee agbó lɛ naa
Koni amɛyadamɔ maŋ lɛ mli hei ni kwɔlɔ lɛ amɛbolɔ akɛ:+
4 “Mɔ fɛɛ mɔ ni jwɛŋmɔ esako lɛ aba biɛ.”
Yoo lɛ kɛɔ mɔ ni bɛ jwɛŋmɔ lɛ akɛ:
5 “Nyɛbaa nyɛbayea miniyenii lɛ eko
Ni nyɛbanua wain ni mifutu lɛ hu eko.
6 Nyɛkpaa kwashiafeemɔ ni nyɛhi wala mli;+
Nyɛnyiɛa niiashishinumɔ gbɛ lɛ nɔ tɛ̃ɛ.”+
7 Mɔ fɛɛ mɔ ni jajeɔ hefɛoyelɔ lɛ, ebaawo lɛ diɛŋtsɛ ehe hiɛgbele,+
Ni mɔ fɛɛ mɔ ni jajeɔ mɔ fɔŋ lɛ, ebaaye lɛ diɛŋtsɛ ehe awui.
8 Kaajaje hefɛoyelɔ, kɛjeee nakai lɛ ebaanyɛ bo.+
Jajemɔ hiɛshikalɔ, ni ebaasumɔ bo.+
9 Wo hiɛshikalɔ ŋaa, ni ehiɛ baakã shi waa fe tsutsu lɛ.+
Tsɔɔmɔ jalɔ nii, ni ebaakase nii kɛfata enilee lɛ he.
10 Yehowa gbeyeishemɔ ji nɔ klɛŋklɛŋ ni hãa mɔ náa hiɛshikamɔ,+
Ni Mɔ Krɔŋkrɔŋ Fe Fɛɛ+ lɛ ni aaale lɛ ji niiashishinumɔ.
11 Ejaakɛ minɔ obaatsɔ ni obaaná gbii pii,+
Ni akɛ afii pii baafata owala he.
12 Kɛ́ ohiɛ kã shi lɛ, bo diɛŋtsɛ obaaná he sɛɛ,
Shi kɛ́ ofee ohe hefɛoyelɔ lɛ, okome obaatere.
13 Yoo kwashia yɛ hoo.+
Ebɛ jwɛŋmɔ, ni eleee nɔ ko nɔ ko.
14 Etaa shi yɛ eshĩa lɛ shinaa lɛ naa
Yɛ sɛi nɔ yɛ maŋ lɛ mli hei ni kwɔlɔ lɛ,+
15 Ni eboɔ etsɛɔ mɛi ni hoɔ lɛ,
Mɛi ni nyiɛ amɛgbɛ nɔ tɛ̃ɛ lɛ, akɛ:
16 “Mɔ fɛɛ mɔ ni jwɛŋmɔ esako lɛ aba biɛ.”
Yoo lɛ kɛɔ mɛi ni bɛ jwɛŋmɔ lɛ akɛ:+
17 “Nu ni aju lɛ, enumɔ ŋɔɔ,
Ni niyenii ni ayeɔ yɛ teemɔŋ lɛ, eŋɔɔ tamɔ nɔ ko.”+
18 Shi amɛleee akɛ mɛi ni egboi ni bɛ hewalɛ dɔŋŋ lɛ ji mɛi ni yɔɔ jɛmɛ,
Ni akɛ, mɛi ni yoo lɛ fɔ̃ amɛ nine lɛ yɛ Gbonyobu lɛ mli tɔ̃ɔ.+