WOLO NI JI EJWƐ
(Lala 90-106)
Mose, anɔkwa Nyɔŋmɔ lɛ gbɔmɔ lɛ sɔlemɔ.+
90 Ao Yehowa, bo ji wɔshihilɛhe+ yɛ yinɔi fɛɛ amli.
2 Be ni anáko afɔ gɔji lɛ,
Ni onáko ofɔ shikpɔŋ lɛ kɛ je lɛ,+
Bo ji Nyɔŋmɔ kɛjɛ naanɔ kɛmiiya naanɔ.+
3 Ohãa gbɔmɔ adesa kuɔ esɛɛ kɛyaa sũ mli;
Okɛɔ akɛ: “Nyɛ gbɔmɛi abii, nyɛkua nyɛsɛɛ.”+
4 Ejaakɛ yɛ ohiɛ lɛ, afii akpe tamɔ nyɛ kpaakpa nyɛ,+
Etamɔ nyɔɔŋ buu be nɔŋŋ.
5 Obɛɔ amɛ oshwieɔ;+ amɛtsɔɔ tamɔ lamɔ ni alaa;
Leebi lɛ amɛtamɔ jwɛi ni kwɛ̃ɔ.+
6 Leebi lɛ ekwɛ̃ɔ ni efeɔ frɔ̃frɔ̃,
Shi kɛ́ eshɛ gbɛkɛ lɛ egbiɔ ni eŋalaa.+
7 Ejaakɛ wɔhiɛ kpãtãa yɛ omlifu lɛ naa,+
Ni omlila lɛ hãa gbeyei mɔmɔɔ wɔ.
8 Okɛ wɔtɔmɔi lɛ eshwie ohiɛ;+
Ohiɛ la lɛ jieɔ wɔteemɔŋ saji lɛ akpo.+
9 Wɔgbii lɛ tãa yɛ omlifu lɛ hewɔ;
Ni wɔwala afii lɛ baa naagbee oya tamɔ kɔɔyɔɔ hakumɔ.
10 Wɔwala afii lɛ, afii 70 ni,
Ni kɛ́ wɔyɛ gbɔmɔtsoŋ hewalɛ lɛ, afii 80.+
Shi amɛmli eyi kɛ haomɔ kɛ awerɛho;
Amɛhoɔ kɛyaa oya, ni wɔfilikiɔ kɛyaa.+
11 Namɔ le bɔ ni omlifu lɛ naa wa hã?
Omlila lɛ naa wa tamɔ gbeyeishemɔ ni sa bo lɛ nɔŋŋ.+
12 Tsɔɔmɔ wɔ bɔ ni wɔɔfee wɔkane wɔgbii lɛ+
Koni wɔná tsui ni hiɛ kã shi.
13 Ao Yehowa, kuu osɛɛ!+ Mɛɛ be nɔŋŋ enɛ baaba naagbee?+
Naa otsuji mɔbɔ.+
14 Leebi lɛ, okɛ osuɔmɔ ni tsakeee lɛ ashɛje wɔmii,+
Koni wɔlá nyamɔ lala ni wɔmii ashɛ wɔhe+ yɛ wɔgbii lɛ fɛɛ amli.
15 Hã wɔmii ashɛ wɔhe tamɔ gbii abɔ ni ohã wɔna nɔ lɛ nɔŋŋ,+
Tamɔ afii abɔ ni wɔkɛna amanehulu lɛ nɔŋŋ.+
16 Hã otsuji ana onitsumɔi lɛ,
Ni amɛbii ana onunyam lɛ.+
17 Yehowa, wɔ-Nyɔŋmɔ lɛ dromɔ lɛ ahi wɔnɔ;
Hã wɔninenaa nitsumɔi lɛ ashwere.
Hɛɛ, hã wɔninenaa nitsumɔi lɛ ashwere.+