Ezekiel
17 Yehowa kɛɛ mi ekoŋŋ akɛ: 2 “Gbɔmɔ bi,* gbá ajenu ni obu Israel shĩa lɛ abɛ.+ 3 Kɛɛmɔ akɛ, ‘Nɔ ni Nuŋtsɔ Ofe Yehowa kɛɛ nɛ: “Okropɔŋ+ wulu lɛ kɛ efiji agboi, kɛ etsɛji kakadaji kɛ emli kɔlai srɔtoi babaoo lɛ ba Lebanon,+ ni ebaku tseneduru tso lɛ yiteŋ.+ 4 Eku eyiteŋ tso ni etsɛ̃ lɛ, ni ekɛba jarayelɔi lɛ ashikpɔŋ* lɛ nɔ ni edu yɛ jarayelɔi lɛ amaŋ lɛ mli.+ 5 Kɛkɛ ni ekɔ shikpɔŋ lɛ nɔ dumɔwui lɛ eko+ ni edu yɛ shikpɔŋ kpakpa nɔ. Edu dumɔwu nɛɛ yɛ nui babaoo ahe tamɔ faa naa tso.* 6 No hewɔ lɛ, ekwɛ̃ ni etsɔ wain tso kpitioo ni lɛɛ shi+ ni ebai edɔrɔ kɛba eŋɔɔgbɛ ni eshishifãi lɛ miikwɛ̃ yɛ eshishi. No hewɔ lɛ, etsɔ wain tso ni etsɛ̃rɛ̃, ni egbala niji.+
7 “‘“Ni okropɔŋ wulu kroko+ kɛ efiji agboi kɛ etsɛji agboi ba.+ Kɛkɛ ni wain tso nɛɛ kɛ ekãa kpã eshishifãi lɛ amli kɛtee eŋɔɔ kɛje abɔɔ ni adu lɛ yɛ mli* lɛ he, ni ekpã ebai lɛ hu amli kɛtee eŋɔɔ koni okropɔŋ nɛɛ ahã lɛ nu.+ 8 No mli lɛ, adu lɛ yɛ shikpɔŋ kpakpa ni yɔɔ nui babaoo amasɛi nɔ momo, koni egbala niji ni ewo yibii ni etsɔ wain tso wulu.”’+
9 “Kɛɛmɔ akɛ, ‘Nɔ ni Nuŋtsɔ Ofe Yehowa kɛɛ nɛ: “Ani ebaahi? Ani mɔ ko famɔŋ eshishifãi+ lɛ ni ehã enɔ yibii lɛ akpɔtɔ ni ehã eniji ni etsɛ̃rɛ̃ lɛ agbi?+ Ebaagbi aahu akɛ ehe ehiaŋ ni akɛ nineshiwalɛ loo mɛi babaoo afã tso lɛ kɛ eshishifãi lɛ afɔ̃ shi. 10 Eyɛ mli akɛ ayadu yɛ he kroko moŋ, shi ani ebaahi? Kɛ́ bokã kɔɔyɔɔ lɛ tswa eshwie nɔ lɛ, ani egbiŋ kwraa? Ebaagbi yɛ abɔɔ ni ekwɛ̃ yɛ mli* lɛ mli.”’”
11 Ni Yehowa kɛɛ mi ekoŋŋ akɛ: 12 “Ofainɛ kɛɛmɔ atuatselɔi ashĩa lɛ akɛ, ‘Nyɛnaaa nɔ ni nibii nɛɛ tsɔɔ lo?’ Kɛɛmɔ akɛ, ‘Naa! Babilon maŋtsɛ lɛ ba Yerusalem ni ebamɔ enɔ maŋtsɛ lɛ kɛ emli lumɛi lɛ ni ekɛ amɛ tee Babilon.+ 13 Agbɛnɛ, emɔ maŋtsɛ seshibii* lɛ eko,+ ni ekɛ lɛ kpaŋ kpaŋmɔ ni ehã ekã lɛ kitã.+ Kɛkɛ ni emɔmɔ shikpɔŋ lɛ nɔ gbɔmɛi wuji lɛ kɛtee,+ 14 koni aba maŋtsɛyeli lɛ shi ni ekawó ehe nɔ dɔŋŋ, bɔ ni afee ni eba lɛ akɛ, ja eye ekpaŋmɔ lɛ nɔ dani ebaaya nɔ ehi shi.+ 15 Shi sɛɛ mli lɛ, maŋtsɛ lɛ tse ehiɛ* atua+ ni etsu mɛi kɛtee Ejipt koni amɛhã lɛ okpɔŋɔi+ kɛ asraafoi babaoo.+ Ani ebaahi ehã lɛ? Ani agbalaŋ mɔ ni feɔ nibii nɛɛ toi? Ani ebaanyɛ eku kpaŋmɔ lɛ mli ni eye ehe?’+
16 “‘“Gbii abɔ ni mihiɛ kã nɛɛ,” Nuŋtsɔ Ofe Yehowa kɛɛ, “ebaagbo yɛ Babilon, yɛ he ni maŋtsɛ* ni wó lɛ* maŋtsɛ lɛ yɔɔ lɛ, mɔ ni ebuuu ekitã lɛ ni eku ekpaŋmɔ lɛ mli lɛ.+ 17 Ni Farao asraafoi babaoo lɛ kɛ etawulɔi babaoo lɛ po nyɛŋ aye abua lɛ yɛ ta mli,+ kɛ́ atswa kpokui kɛ gbogboi awo ehe koni akɛkpãtã mɛi babaoo awala* hiɛ lɛ. 18 Ebuuu kitã lɛ ni eku kpaŋmɔ lɛ mli. Akɛni ewo shi,* shi efee nibii nɛɛ fɛɛ hewɔ lɛ, ehe ejeŋ mli.”’
19 “‘No hewɔ lɛ, nɔ ni Nuŋtsɔ Ofe Yehowa kɛɛ nɛ: “Gbii abɔ ni mihiɛ kã nɛɛ, mikɛ nɔ ni baajɛ mikitã lɛ ni ebuuu+ lɛ kɛ mikpaŋmɔ lɛ ni eku mli lɛ mli kɛba lɛ baaba enɔ. 20 Mikɛ miyaa lɛ baaha enɔ, ni miyaa ni mikɛgbɔbiɔ lɛ baadu lɛ.+ Mikɛ lɛ baaba Babilon, shi mikɛ lɛ baaye sane yɛ jɛmɛ yɛ anɔkwa ni eyeee mi lɛ fɛɛ hewɔ.+ 21 Akɛ klante baagbe etawulɔi ni baajo foi lɛ fɛɛ, ni abaagbɛ mɛi ni baashwɛ lɛ ashwã he fɛɛ he.*+ Kɛkɛ lɛ no baahã ole akɛ mi Yehowa, mi diɛŋtsɛ miwie.”’+
22 “‘Nɔ ni Nuŋtsɔ Ofe Yehowa kɛɛ nɛ: “Maku tso ko ni etsɛ̃ kɛjɛ tseneduru tso ni kwɔ lɛ yiteŋ+ ni madu, etsei niji ni yɔɔ ŋwɛi tɔ̃ɔ lɛ ahe maku tso ni etsɛ̃ lɛ kɛjɛ,+ ni mi diɛŋtsɛ madu yɛ gɔŋ ko ni kwɔ gojoo nɔ.+ 23 Madu yɛ Israel gɔŋ ko ni kwɔ nɔ; ni ebaagbala niji, ni ebaawo yibii, ni ebaatsɔ tseneduru tso wulu. Ni loofɔji srɔtoi fɛɛ baahi eshishi ni amɛbaahi ebai lɛ ahɔɔŋ lɛ mli. 24 Ni ŋa nɔ tsei lɛ fɛɛ baaná ale akɛ, mi Yehowa, mi diɛŋtsɛ miba tso ni kwɔ lɛ shi ni miwó tso ni baa shi lɛ nɔ;+ mihã tso ni ebu kusuu lɛ egbi, ni mihã tso ni egbi lɛ egba fɔfɔi.+ Mi, Yehowa, mi diɛŋtsɛ miwie ni mifee.”’”