Hiob

1 Nuu ko hi Uz shikpɔŋ lɛ nɔ ni atsɛɔ lɛ Hiob.*+ Eji nuu ni ja ni yeɔ anɔkwa;*+ esheɔ Nyɔŋmɔ gbeyei, ni etsiɔ ehe kɛjeɔ nɔ fɔŋ he.+ 2 Afɔ bihii kpawo kɛ biyei etɛ ahã lɛ. 3 Lɛɛ kooloi ni eyɔɔ lɛ ayifalɛ ji gwantɛŋi 7,000 kɛ afukpɔŋɔi 3,000 kɛ tsinai 1,000* kɛ tejii* 500, ni agbɛnɛ hu, eyɛ tsuji babaoo diɛŋtsɛ, ni no hewɔ lɛ, ebatsɔ gbɔmɔ wulu fe Bokãgbɛbii lɛ fɛɛ.

4 Ebihii lɛ ateŋ mɔ fɛɛ mɔ ŋmɛɔ okpɔlɔ yɛ eshĩa yɛ gbi ni eto lɛ nɔ.* Amɛtsɛɔ amɛnyɛmimɛi yei etɛ lɛ koni amɛkɛ amɛ abaye nii ni amɛkɛ amɛ anu nii. 5 Kɛ́ gbii ni amɛkɛŋmɛɔ okpɔlɔ kɛtsaraa nɔ lɛ ba naagbee lɛ, Hiob tsuɔ ni ayatsɛɔ amɛ kɛbaa koni afee amɛ krɔŋkrɔŋ. Ni eteɔ shi leebi maŋkpa ni eshãa shãa afɔlei+ ehãa amɛteŋ mɔ fɛɛ mɔ. Ejaakɛ Hiob kɛɔ akɛ: “Benɛ mibii* lɛ efee esha, ni amɛlomɔ Nyɔŋmɔ yɛ amɛtsui mli.” Nakai Hiob feɔ be fɛɛ be.+

6 Agbɛnɛ gbi ko bashɛ, ni anɔkwa Nyɔŋmɔ lɛ bihii*+ lɛ tee amɛyadamɔ Yehowa hiɛ,+ ni Satan+ hu futu amɛ kɛtee.+

7 Kɛkɛ ni Yehowa bi Satan akɛ: “Nɛgbɛ ojɛ obaa nɛɛ?” Satan hã Yehowa hetoo akɛ: “Mijɛ shikpɔŋ lɛ nɔ shikpaa kɛ enɔ shisharamɔ.”+ 8 Ni Yehowa bi Satan akɛ: “Ani ogbala ojwɛŋmɔ kɛtee* mitsulɔ Hiob nɔ? Mɔ ko mɔ ko bɛ ni tamɔ lɛ yɛ shikpɔŋ lɛ nɔ. Eji nuu ni ja ni yeɔ anɔkwa;*+ esheɔ Nyɔŋmɔ gbeyei, ni etsiɔ ehe kɛjeɔ nɔ fɔŋ he.” 9 Kɛkɛ ni Satan hã Yehowa hetoo akɛ: “Ani jeee nɔ ko ni Hiob náa lɛ hewɔ esheɔ Nyɔŋmɔ gbeyei lɛ?+ 10 Ani jeee afabaŋ ofo kɛbu lɛ+ kɛ eshĩa kɛ nɔ fɛɛ nɔ ni eyɔɔ lɛ he? Ojɔɔ eninenaa nitsumɔ nɔ,+ ni elɛɛ kooloi eshwere babaoo yɛ shikpɔŋ lɛ nɔ. 11 Shi kɛ́ oosumɔ lɛ, kpã onine mli ni ota nɔ fɛɛ nɔ ni eyɔɔ lɛ he,* ni bɔ fɛɛ bɔ ni fee lɛ, ebaalomɔ bo yɛ ohiɛ.” 12 Kɛkɛ ni Yehowa kɛɛ Satan akɛ: “Naa! Nɔ fɛɛ nɔ ni eyɔɔ lɛ, mikɛwo odɛŋ. Lɛ gbɔmɔ lɛ diɛŋtsɛ kɛkɛ ni okɛ onine akasa ehe!” No hewɔ lɛ, Satan je Yehowa hiɛ etee.+

13 Agbɛnɛ, gbi ko be ni ebihii lɛ kɛ ebiyei lɛ miiye nii ni amɛmiinu wain yɛ amɛnyɛmi nuu onukpa lɛ shĩa lɛ,+ 14 tsulɔ ko ba Hiob ŋɔɔ ni ebakɛɛ lɛ akɛ: “Tsinai lɛ miihu, ni tejii lɛ miiye nii yɛ amɛmasɛi, 15 kɛkɛ ni Sabeabii lɛ batutua amɛ ni amɛmɔmɔ amɛ, ni amɛkɛ klante gbe tsuji lɛ. Mikome too pɛ mije mli kɛba koni mibakɛɛ bo.”

16 Be ni ewieɔ lolo lɛ, mɔ kroko hu ba ni ebakɛɛ: “La ni jɛ Nyɔŋmɔ ŋɔɔ jɛ ŋwɛi* bayi shi, ni ebashã gwantɛŋi lɛ kɛ tsuji lɛ, ni ekpãtã amɛhiɛ! Mikome too pɛ mije mli kɛba koni mibakɛɛ bo.”

17 Be ni ewieɔ lolo lɛ, mɔ kroko hu ba ni ebakɛɛ: “Kaldeabii+ lɛ bua amɛhe naa kui etɛ, ni amɛbatutua afukpɔŋɔi lɛ ni amɛmɔmɔ amɛ, ni amɛkɛ klante gbe tsuji lɛ. Mikome too pɛ mije mli kɛba koni mibakɛɛ bo.”

18 Be ni ewieɔ lolo lɛ, mɔ kroko hu ba ni ebakɛɛ: “Obihii lɛ kɛ obiyei lɛ miiye nii ni amɛmiinu wain yɛ amɛnyɛmi nuu onukpa lɛ shĩa lɛ. 19 Trukaa lɛ, kɔɔyɔɔ wulu ko tswa kɛjɛ ŋa lɛ nɔ ni ebashimɔ shĩa lɛ koji ejwɛ lɛ, ni ekumɔ eshwie obii* lɛ anɔ ni amɛgboi. Mikome too pɛ mije mli kɛba koni mibakɛɛ bo.”

20 Kɛkɛ ni Hiob te shi ni egbála etade lɛ, ni eku eyitsɔi; ni eho ekã shikpɔŋ, ni ekula shi 21 ni ekɛɛ:

Yehowa ni kɛhã,+ ni Yehowa eŋɔ kɛtee.

Ajie Yehowa gbɛ́i lɛ yi daa.”

22 Enɛ fɛɛ mli lɛ, Hiob efeee esha ko, ni ekɛ sane hu efɔ̃ɔɔ Nyɔŋmɔ nɔ akɛ efee nɔ fɔŋ ko.*