Nɔ Ni Yohane Ŋma
14 “Nyɛkayea nyɛtsui.+ Nyɛhea Nyɔŋmɔ nɔ nyɛyea;*+ nyɛhea mi hu minɔ nyɛyea.* 2 Shihilɛhei pii yɛ mi-Tsɛ shĩa lɛ. Kɛjeee nakai kulɛ, mikɛɛ nyɛ, ejaakɛ miiya koni miyasaa he ko mato nyɛ.+ 3 Agbɛnɛ hu, kɛ́ mitee ni miyasaa he ko mito nyɛ lɛ, maba ekoŋŋ ni mikɛ nyɛ aya mishĩa lɛ, koni he ni miyɔɔ lɛ, nyɛ hu nyɛhi jɛmɛ.+ 4 Ni he ni miyaa lɛ, nyɛle gbɛ lɛ.”
5 Toma+ kɛɛ lɛ akɛ: “Nuŋtsɔ, wɔleee he ni oyaa. Te feɔ tɛŋŋ ni wɔleɔ gbɛ lɛ?”
6 Yesu kɛɛ lɛ akɛ: “Miji gbɛ+ lɛ kɛ anɔkwale+ lɛ kɛ wala+ lɛ. Mɔ ko mɔ ko baaa Tsɛ lɛ ŋɔɔ akɛ ja etsɔ minɔ.+ 7 Kɛji nyɛle mi lɛ, nyɛbaale* mi-Tsɛ hu; kɛjɛ bianɛ kɛyaa lɛ, nyɛná nyɛle lɛ ni nyɛna lɛ hu.”+
8 Filipo kɛɛ lɛ akɛ: “Nuŋtsɔ, tsɔɔmɔ wɔ Tsɛ lɛ, ni no fa hã wɔ.”
9 Yesu kɛɛ lɛ akɛ: “Kɛjɛ jeeŋmɔ ni mikɛ nyɛ yɔɔ nɛɛ, oleko mi lolo Filipo? Mɔ fɛɛ mɔ ni ena mi lɛ ena Tsɛ lɛ hu.+ Te tɛŋŋ ni okɛɔ akɛ, ‘Tsɔɔmɔ wɔ Tsɛ lɛ’? 10 Ani oheee oyeee akɛ mi kɛ Tsɛ lɛ efee ekome, ni Tsɛ lɛ hu kɛ mi efee ekome?+ Nibii ni mikɛɔ nyɛ lɛ, jeee mi diɛŋtsɛ miyiŋ mitoɔ miwieɔ,+ shi Tsɛ lɛ ni yaa nɔ ekɛ mi feɔ ekome lɛ miitsu enitsumɔi. 11 Nyɛhea mi nyɛyea akɛ mi kɛ Tsɛ lɛ efee ekome ni Tsɛ lɛ hu kɛ mi efee ekome; kɛjeee nakai lɛ, nyɛhea nyɛyea yɛ nitsumɔi lɛ diɛŋtsɛ ahewɔ.+ 12 Lɛɛlɛŋ, lɛɛlɛŋ, miikɛɛ nyɛ akɛ, mɔ fɛɛ mɔ ni heɔ minɔ eyeɔ* lɛ, ebaatsu nitsumɔi ni mitsuɔ lɛ hu; ni ebaatsu nitsumɔi ni fe nomɛi,+ ejaakɛ miiya Tsɛ lɛ ŋɔɔ.+ 13 Agbɛnɛ hu, nɔ fɛɛ nɔ ni nyɛbaabi yɛ migbɛ́i mli lɛ, no mafee, koni awo Tsɛ lɛ hiɛ nyam yɛ Bi lɛ hewɔ.+ 14 Kɛ́ nyɛbi nɔ ko yɛ migbɛ́i mli lɛ, mafee.
15 “Kɛ́ nyɛsumɔɔ mi lɛ, nyɛbaaye mikitãi lɛ anɔ.+ 16 Ni mabi Tsɛ lɛ ni ebaahã nyɛ yelikɛbualɔ* kroko ni ekɛ nyɛ ahi shi kɛya naanɔ,+ 17 anɔkwale lɛ mumɔ lɛ,+ ni je lɛ nyɛŋ aná lɛ, ejaakɛ enaaa no ni eleee no hu.+ Nyɛle no, ejaakɛ no yaa nɔ ekɛ nyɛ hiɔ shi, ni eyɛ nyɛmli. 18 Mishiŋ nyɛ tamɔ mɛi ni agbo ashi amɛ.* Miiba nyɛŋɔɔ.+ 19 Eshwɛ fioo ni je lɛ enaŋ mi dɔŋŋ, shi nyɛ lɛ nyɛbaana mi,+ ejaakɛ mihiɛ kã ni nyɛ hu nyɛhiɛ baakã. 20 Nakai gbi lɛ nɔ lɛ, nyɛbaale akɛ mi kɛ mi-Tsɛ efee ekome ni nyɛ hu nyɛ kɛ mi efee ekome ni mi hu mi kɛ nyɛ efee ekome.+ 21 Mɔ fɛɛ mɔ ni yɔɔ mikitãi lɛ ni eyeɔ nɔ lɛ, lɛ ji mɔ ni sumɔɔ mi. Ni mɔ fɛɛ mɔ ni sumɔɔ mi lɛ, mi-Tsɛ baasumɔ lɛ, ni mi hu masumɔ lɛ ni majie mihe kpo faŋŋ matsɔɔ lɛ.”
22 Yuda,+ jeee Yuda Iskariot, kɛɛ lɛ akɛ: “Nuŋtsɔ, mɛni eba hewɔ ni oto oyiŋ akɛ obaajie ohe kpo faŋŋ otsɔɔ wɔ, shi jeee je lɛ?”
23 Yesu hã lɛ hetoo akɛ: “Kɛ́ mɔ ko sumɔɔ mi lɛ, ebaaye miwiemɔ lɛ nɔ,+ ni mi-Tsɛ baasumɔ lɛ, ni wɔbaaba eŋɔɔ ni ekɛ wɔ baahi shi.*+ 24 Mɔ fɛɛ mɔ ni sumɔɔɔ mi lɛ, eyeee miwiemɔi lɛ anɔ. Wiemɔ lɛ ni nyɛnuɔ lɛ, jeee minɔ ni, shi moŋ Tsɛ lɛ ni tsu mi lɛ nɔ ni.+
25 “Be mli ni mikɛ nyɛ yɔɔ lolo nɛɛ, miikɛɛ nyɛ nibii nɛɛ. 26 Shi yelikɛbualɔ* lɛ, mumɔ krɔŋkrɔŋ lɛ, ni Tsɛ lɛ baatsu yɛ migbɛ́i mli lɛ, lɛ ebaatsɔɔ nyɛ nibii fɛɛ, ni ebaahã nyɛkai nibii fɛɛ ni mikɛɛ nyɛ lɛ.+ 27 Miishi toiŋjɔlɛ miihã nyɛ; miihã nyɛ mitoiŋjɔlɛ lɛ.+ Jeee bɔ ni je lɛ kɛhãa lɛ mikɛhãa nyɛ. Nyɛkayea nyɛtsui ni nyɛtsui akafãa hu. 28 Nyɛnu akɛ mikɛɛ nyɛ akɛ, ‘Miishi kɛmiiya, ni maba nyɛŋɔɔ ekoŋŋ.’ Kɛ́ nyɛsumɔɔ mi lɛ, nyɛbaaná miishɛɛ babaoo akɛ miiya Tsɛ lɛ ŋɔɔ, ejaakɛ Tsɛ lɛ da fe mi.+ 29 No hewɔ lɛ, amrɔ nɛɛ miikɛɛ nyɛ dani eba mli, koni kɛ́ eba mli lɛ, nyɛhe nyɛye.+ 30 Mikɛ nyɛ ewieŋ babaoo dɔŋŋ, ejaakɛ je lɛ nɔyelɔ+ lɛ miiba, ni ebɛ hewalɛ ko yɛ minɔ.+ 31 Shi bɔ ni afee ni je lɛ ale akɛ misumɔɔ Tsɛ lɛ, miifee bɔ ni Tsɛ lɛ ewo mi kitã akɛ mifee lɛ pɛpɛɛpɛ.+ Nyɛtea shi, nyɛhãa wɔjea biɛ wɔyaa.