2 Mose
30 “Feemɔ afɔleshaa latɛ ní ashã tsofa-kɛ-ŋma yɛ nɔ;+ okɛ akasia tso afee.+ 2 Feemɔ lɛ koji ejwɛ ni fɛɛ yeɔ egbɔ, ekɛlɛ afee ninetalɔ kome,* elɛɛmɔ afee ninetalɔ kome, ni ekwɔlɛ afee ninetalɔi enyɔ. Ekolontoi lɛ amamɔ nɔ, ní fɛɛ afee nɔ muu kome.+ 3 Okɛ shika tsuru krɔŋŋ aha he: enɔ kɛ ehe fɛɛ kɛkpe kɛ ekolontoi lɛ ahe; ni okɛ shika tsuru aye sãma kɛbã naa kɛkpe. 4 Agbɛnɛ hu, okɛ shika tsuru afee gai enyɔ owo he yɛ nɔ ni akɛbã naa lɛ shishigbɛ, yɛ ekoŋ biɛ kɛ biɛ, koni akɛ tsei ní akɛbaawó lɛ ahɔlɔ mli. 5 Okɛ akasia tso agbɔ tsei nɛɛ, ní okɛ shika tsuru aha he. 6 Okɛma pateeshɛŋ lɛ ni bɛŋkɛ Odaseyeli adeka+ lɛ kɛ enaanɔ lɛ hiɛ, he ni majie mihe kpo matsɔɔ bo yɛ lɛ.+
7 “Aaron+ baashã tsofa-kɛ-ŋma+ yɛ afɔleshaa latɛ nɛɛ nɔ+ daa leebi kɛ́ eesaa kanei lɛ,+ koni lasu lɛ ate shi yɛ nɔ. 8 Agbɛnɛ hu, kɛ́ Aaron su kanei lɛ yɛ hulushinyɔɔ mli* lɛ, ebaashã tsofa-kɛ-ŋma lɛ. Eji tsofa-kɛ-ŋma afɔle ni abaashã yɛ Yehowa hiɛ daa, yɛ nyɛyinɔi fɛɛ amli. 9 Nyɛkashãa tsofa-kɛ-ŋma ko ní mla eŋmɛɛɛ gbɛ yɛ nɔ,+ ni nyɛkashãa shãa afɔle loo ŋmaa* afɔle ko yɛ nɔ, ni nyɛkafɔsea dãa afɔle hu nyɛshwiea nɔ. 10 Aaron akpãtã yɛ ekolontoi lɛ anɔ shi kome daa afi.+ Ekɛ kooloo ni akɛshã esha afɔle kɛhã kpatamɔ lɛ lá+ lɛ eko akpãtã ahã afɔleshaa latɛ nɛɛ shi kome daa afi, yɛ nyɛyinɔi fɛɛ amli. Eyɛ krɔŋkrɔŋ fe fɛɛ hã Yehowa.”
11 Ni Yehowa kɛɛ Mose akɛ: 12 “Be fɛɛ be ni obaakane Israelbii* lɛ ní okɛna amɛyifalɛ lɛ,+ amɛteŋ mɔ fɛɛ mɔ awo kpɔmɔnɔ ko ahã Yehowa yɛ ewala* hewɔ, yɛ be ni obaakane amɛ lɛ mli. Afee nakai bɔ ni afee ni kɛ́ aŋmala amɛgbɛ́ii lɛ, haomɔ ko akaba amɛnɔ. 13 Nɔ ni mɛi fɛɛ ni abaaŋmala amɛgbɛ́ii lɛ baahã nɛ: shekel* fã yɛ shekel ni akɛtsuɔ nii yɛ he krɔŋkrɔŋ lɛ naa.*+ Gerai* 20 feɔ shekel kome. Shekel fã ji onia ni abaatsu ahã Yehowa lɛ.+ 14 Mɔ fɛɛ mɔ ni eye kɛjɛ afii 20 kɛyaa ni abaaŋma egbɛ́i lɛ baatsu onia nɛɛ ehã Yehowa.+ 15 Kɛ́ nyɛmiitsu onia ni atsuɔ ahãa Yehowa ni akɛkpãtãa ahãa nyɛwala* lɛ, niiatsɛmɛi akahã fe shekel* fã, ni ohiafoi hu akahã nɔ ni shɛɛɛ shekel fã. 16 Hemɔ kpatamɔ jwiɛtɛi shika lɛ yɛ Israelbii lɛ adɛŋ, ni okɛhã koni akɛtsu kpee buu lɛ mli sɔɔmɔ lɛ he nii, koni etsɔ kaimɔ nɔ yɛ Yehowa hiɛ ehã Israelbii lɛ, ní akɛkpãtã ahã nyɛwala.”*
17 Yehowa tee nɔ ekɛ Mose wie ekɛɛ: 18 “Okɛ akɔɔble afee okpolu kɛ enɔmaanɔ koni akɛfɔflɔ;+ ni okɛma kpee buu lɛ kɛ afɔleshaa latɛ lɛ teŋ, ní okɛ nu awo mli.+ 19 Aaron kɛ ebihii lɛ baafɔflɔ amɛniji kɛ amɛnaji ahe yɛ jɛmɛ.+ 20 Kɛ́ amɛmiiya kpee buu lɛ mli loo amɛmiiya afɔleshaa latɛ lɛ he koni amɛyasɔmɔ, ní amɛyashã afɔlei ni akɛ la shãa ni jeɔ lasu amɛhã Yehowa lɛ, amɛkɛ nu afɔflɔ koni amɛkagboi. 21 Amɛfɔflɔ amɛniji kɛ amɛnaji ahe koni amɛkagboi, ni enɛ atsɔ mla* ni kã shi hã amɛ daa, kɛhã lɛ kɛ eseshibii lɛ yɛ amɛyinɔi fɛɛ amli.”+
22 Yehowa tee nɔ ekɛ Mose wie ekɛɛ: 23 “No sɛɛ lɛ, ŋɔɔ tsofai kpakpai ni jeɔ ŋma, ni ji: mire ni ewa susumɔnii 500, kɛ sinamon ni jeɔ ŋma nakai falɛ fã, ni ji, susumɔnii 250, kalamo ni jeɔ ŋma susumɔnii 250, 24 kɛ kasia susumɔnii 500 ní asusu yɛ shekel ni akɛtsuɔ nii yɛ he krɔŋkrɔŋ lɛ naa,*+ kɛ oliv mu hin* kome. 25 Ni okɛfee mufɔɔ mu krɔŋkrɔŋ; esa akɛ afutu lɛ jogbaŋŋ.*+ Ebaatsɔ mufɔɔ mu krɔŋkrɔŋ.
26 “Okɛ mu nɛɛ afɔ kpee buu+ lɛ kɛ Odaseyeli adeka lɛ, 27 kɛ okpɔlɔ lɛ kɛ ehe nibii lɛ fɛɛ, kanetso lɛ kɛ ehe nibii lɛ, tsofa-kɛ-ŋma afɔleshaa latɛ lɛ, 28 shãa afɔle afɔleshaa latɛ lɛ kɛ ehe nibii lɛ fɛɛ, kɛ okpolu lɛ kɛ enɔmaanɔ lɛ mu. 29 Tsuumɔ amɛhe koni amɛtsɔmɔ krɔŋkrɔŋ fe fɛɛ.+ Mɔ fɛɛ mɔ ni baata nibii nɛɛ ahe lɛ, esa akɛ efee krɔŋkrɔŋ.+ 30 Ni ofɔ Aaron+ kɛ ebihii+ lɛ mu, ni ofee amɛ krɔŋkrɔŋ koni amɛsɔmɔ akɛ osɔfoi amɛhã mi.+
31 “Okɛ Israelbii lɛ awie akɛ, ‘Enɛ baaya nɔ afee mufɔɔ mu krɔŋkrɔŋ kɛhã mi yɛ nyɛyinɔi fɛɛ amli.+ 32 Akɛkakpa gbɔmɔ ko hewolo nɔ, ni nyɛkafea eko hu ni afutu lɛ tamɔ bɔ ni afutu no lɛ. Eji nɔ krɔŋkrɔŋ. Ni ebaaya nɔ efee nɔ krɔŋkrɔŋ ehã nyɛ. 33 Mɔ fɛɛ mɔ ni baafee mu ko ni tamɔ no, loo ekɛ eko baashwie mɔkpɔŋ ko* nɔ lɛ, afo lɛ ashɛ afɔ̃* kɛje emaŋbii lɛ ateŋ.’”+
34 Ni Yehowa kɛɛ Mose akɛ: “Ŋɔɔ tsofai ni jeɔ ŋma nɛɛ eko:+ stakte* kɛ onika kɛ galbano ni jeɔ ŋma kɛ frankinsɛnsi krɔŋŋ, ni eko fɛɛ eko falɛ afee pɛpɛɛpɛ. 35 Okɛfee tsofa-kɛ-ŋma;+ afutu tsofai nɛɛ jogbaŋŋ,* awo mli ŋoo,+ emli atse, ní efee krɔŋkrɔŋ. 36 Shimɔmɔ eko ni ebo munyɔmunyɔ ni okɛ eko ama Odaseyelinɔ ni yɔɔ kpee buu lɛ mli lɛ hiɛ, he ni majie mihe kpo matsɔɔ bo yɛ lɛ. Etsɔ nɔ krɔŋkrɔŋ fe fɛɛ ehã nyɛ. 37 Tsofa-kɛ-ŋma nɛɛ ni ofutuɔ tsofai srɔtoi kɛfeɔ lɛ, nyɛkafea eko ni tamɔ no nyɛhãa nyɛ diɛŋtsɛ nyɛhe.+ Nyɛbua lɛ akɛ nɔ krɔŋkrɔŋ hã Yehowa. 38 Mɔ fɛɛ mɔ ni baafee eko ni tamɔ no koni enu eŋma lɛ he lɛ, afo lɛ ashɛ afɔ̃* kɛje emaŋbii lɛ ateŋ.”