Yona
4 Shi enɛ eŋɔɔɔ Yona naa kwraa, ni emli fu waa. 2 No hewɔ lɛ, esɔle ehã Yehowa akɛ: “Ah, Yehowa, ani jeee enɛ nɔŋŋ ji minaagba be ni miyɔɔ mimaŋ lɛ nɔ lɛ? No hewɔ ni shishijee lɛ mika akɛ majo foi kɛya Tarshish lɛ;+ ejaakɛ mile akɛ Nyɔŋmɔ musuŋtsɔlɔ* kɛ mɔbɔnalɔ ji bo, omli fuuu mra ni osuɔmɔ ni tsakeee lɛ fa babaoo,+ ni edɔɔ bo akɛ okɛ amanehulu baaba. 3 Yehowa, agbɛnɛ, ofainɛ ŋɔɔ miwala* kɛya, ejaakɛ ehi hã mi akɛ magbo moŋ fe nɔ ni mihiɛ aaakã.”+
4 Yehowa bi lɛ akɛ: “Ani eja gbɛ akɛ omli afu waa nɛkɛ?”
5 Kɛkɛ ni Yona je kpo kɛjɛ maŋ lɛ mli ni eyata shi yɛ maŋ lɛ bokãgbɛ. Efee agba ko ehã ehe yɛ jɛmɛ, ni eho eta eshishi hɔɔŋ lɛ mli koni ekwɛ nɔ ni baaba maŋ lɛ nɔ.+ 6 Kɛkɛ ni Yehowa Nyɔŋmɔ hã tsene tso* ko kwɛ̃ koni eha Yona nɔ, ní ehã lɛ hɔɔŋ yɛ eyiteŋ ní ehã ehaomɔ lɛ sɛɛ afo. Ni Yona ná tsene tso lɛ he miishɛɛ waa.
7 Shi enɔ jetsɛremɔ leebi maŋkpa lɛ, anɔkwa Nyɔŋmɔ lɛ hã gɔgɔmi baye tsene tso lɛ, ni egbo. 8 Be ni hulu lɛ bɔi tsoo lɛ, Nyɔŋmɔ hã bokã kɔɔyɔɔ ko ni mli edɔ waa hu tswa, ni hulu lɛ shã Yona yiteŋ ni efee gbedee. Etee nɔ ebi koni ahã egbo,* ni nɔ ni ekɛɔ nɔŋŋ ji akɛ, “Ehi hã mi akɛ magbo moŋ fe nɔ ni mihiɛ aaakã.”+
9 Nyɔŋmɔ bi Yona akɛ: “Ani eja gbɛ akɛ omli afu waa nɛkɛ yɛ tsene tso lɛ hewɔ?”+
Kɛkɛ ni ekɛɛ: “Eja gbɛ akɛ mimli afu, mimli efu aahu akɛ miitao magbo.” 10 Shi Yehowa kɛɛ akɛ: “Tsene tso ni ogboko he deŋme ko, ni jeee bo ohã ekwɛ̃ hu lɛ sane miidɔ bo; ekwɛ̃ yɛ gbɛkɛ kome mli, ni ehiɛ kpãtã yɛ gbɛkɛ kome mli. 11 Ni mi lɛ, ani esaaa akɛ Ninive maŋ kpeteŋkpele lɛ+ kɛ emli gbɔmɛi ni fa fe 120,000 ni leee nɔ ni ja kɛ nɔ ni ejaaa* lɛ, kɛ amɛkooloi babaoo lɛ asane dɔɔ mi?”+