Bɔfoi Lɛ Anitsumɔi
25 Agbɛnɛ, be ni Festo+ bashɛ kpokpaa lɛ nɔ ni ebɔi nɔyeli lɛ, enɔ gbii etɛ lɛ, ejɛ Kaisarea ekwɔ kɛtee Yerusalem. 2 Ni osɔfoi hiɛnaanɔbii lɛ kɛ Yudafoi lɛ ahiɛnaanɔbii lɛ bawie Paulo he sane fɔŋ amɛtsɔɔ lɛ.+ Ni amɛbɔi Festo faikpamɔ 3 koni ebo amɛ toi* ni ehã ayaŋɔ Paulo kɛba Yerusalem. Shi no mli lɛ amɛkpɛ mli akɛ amɛbaawo Paulo antɛo koni amɛgbe lɛ yɛ gbɛ lɛ nɔ.+ 4 Shi Festo hã hetoo akɛ, ahã Paulo ahi tsuŋwoohe lɛ yɛ Kaisarea, ni akɛ, etsɛŋ ni lɛ diɛŋtsɛ ebaashi kɛya jɛmɛ. 5 Ekɛɛ, “No hewɔ lɛ, nyɛhãa mɛi ni yɔɔ hegbɛ yɛ nyɛteŋ lɛ kɛ mi akpelekea shi kɛyaa koni kɛ́ nuu lɛ efee nɔ fɔŋ ko lɛɛlɛŋ lɛ, amɛyatsɔɔ naa.”+
6 No hewɔ lɛ, be ni ehi amɛteŋ aaafee gbii kpaanyɔ loo nyɔŋma lɛ, ekpeleke shi kɛtee Kaisarea, ni enɔ jetsɛremɔ lɛ, eho eta kojomɔ sɛi lɛ nɔ ni efã akɛ akɛ Paulo aba. 7 Be ni eba lɛ, Yudafoi ni ejɛ Yerusalem amɛba lɛ babɔle lɛ kɛkpe, ni amɛkɛ saji babaoo ni yɔɔ hiɛdɔɔ shwie enɔ, shi amɛnyɛɛɛ amɛkɛ odaseyeli ko ahã kɛtsɔɔ naa.+
8 Shi Paulo jie enaa ekɛɛ: “Mifeko esha ko mishiko Yudafoi lɛ a-Mla lɛ loo sɔlemɔ shĩa lɛ loo Kaisare.”+ 9 Akɛni Festo miisumɔ ni ehiɛ aba nyam yɛ Yudafoi lɛ ahiɛ hewɔ lɛ,+ ehere Paulo nɔ akɛ: “Ani oosumɔ ni okwɔ kɛya Yerusalem ni ayakojo bo yɛ jɛmɛ yɛ mihiɛ yɛ saji nɛɛ ahe?” 10 Shi Paulo kɛɛ akɛ: “Midamɔ Kaisare kojomɔ sɛi lɛ hiɛ, he ni esa akɛ akojo mi yɛ lɛ. Mifeko Yudafoi lɛ efɔŋ ko, tamɔ bɔ ni bo hu obaná ole lɛ. 11 Kɛ́ efɔŋfeelɔ ji mi lɛɛlɛŋ ni mifee nɔ ko ni hãa mifeɔ mɔ ni sa gbele lɛ,+ mijooo gbele naa foi; shi kɛ́ saji ni hii nɛɛ kɛshwie minɔ lɛ eko eko bɛ mli lɛ, gbɔmɔ ko gbɔmɔ ko bɛ hegbɛ ni eŋɔɔ mi ewoɔ amɛdɛŋ ni ekɛsa amɛhiɛ. Mikɛ misane lɛ miihã Kaisare yeli!”+ 12 Agbɛnɛ, be ni Festo kɛ eŋaawolɔi lɛ ewie etã lɛ, ehere nɔ akɛ: “Okɛ osane lɛ ehã Kaisare; no hewɔ lɛ, obaaya Kaisare ŋɔɔ.”
13 Gbii komɛi asɛɛ lɛ, Maŋtsɛ Agripa kɛ Bernike ba Kaisarea koni amɛbasara Festo ni amɛŋa lɛ. 14 Akɛni amɛbaaye gbii saŋŋ yɛ jɛmɛ hewɔ lɛ, Festo kɛ Paulo sane lɛ fɔ̃ maŋtsɛ lɛ hiɛ ekɛɛ:
“Nuu ko yɛ biɛ ni Felike shi lɛ akɛ gboklɛfonyo, 15 ni be ni miyɔɔ Yerusalem lɛ, osɔfoi hiɛnaanɔbii lɛ kɛ Yudafoi lɛ anukpai lɛ bawie ehe sane amɛtsɔɔ mi,+ ni amɛbi koni mabu lɛ fɔ. 16 Shi mihere amɛnɔ akɛ ejeee Romabii akusum akɛ aŋɔɔ mɔ ko ahãa koni akɛsa mɛi ahiɛ, be mli ni mɔ ni akɛ sane efɔ̃ enɔ lɛ kɛ mɛi ni kɛ sane lɛ fɔ̃ enɔ lɛ ekpeko hiɛ kɛ hiɛ, ni mɔ lɛ náko hegbɛ kɛjie enaa yɛ sane ni akɛfɔ̃ enɔ lɛ he.+ 17 No hewɔ lɛ, be ni amɛbashɛ biɛ lɛ, mishashaooo shi kwraa, shi enɔ jetsɛremɔ lɛ, miho mita kojomɔ sɛi lɛ nɔ ni mifã akɛ akɛ nuu lɛ aba. 18 Be ni mɛi ni kɛ sane fɔ̃ɔ enɔ lɛ badamɔ shi lɛ, amɛkɛ nibii fɔji ni misusu akɛ efee lɛ ateŋ ekome folo po efɔ̃ɔɔ enɔ.+ 19 Sane lɛ kɛkɛ ji akɛ amɛkɛ lɛ miitaa naa yɛ amɛ diɛŋtsɛ amɛnyɔŋmɔ ni amɛjáa* lɛ he+ kɛ agbɛnɛ hu yɛ nuu ko ni atsɛɔ lɛ Yesu ni egbo shi Paulo miima nɔ mi akɛ ehiɛ kã lɛ he.+ 20 Akɛni minaaa bɔ ni matsu naataamɔ nɛɛ he nii mahã hewɔ lɛ, mibi kɛji ebaasumɔ ni eya Yerusalem koni ayakojo lɛ yɛ jɛmɛ yɛ nɛkɛ saji nɛɛ ahe.+ 21 Shi be ni Paulo bi ni ahã ehi tsuŋwoohe lɛ kɛyashi Anunyamtsɛ lɛ* baakojo sane lɛ,+ mifã koni akɛ lɛ ato kɛyashi matsu ni akɛ lɛ aya Kaisare ŋɔɔ.”
22 Kɛkɛ ni Agripa kɛɛ Festo akɛ: “Mi diɛŋtsɛ hu masumɔ ni mabo nuu lɛ toi.”+ Ekɛɛ akɛ: “Wɔ́ lɛ, obaabo lɛ toi.” 23 No hewɔ lɛ, enɔ jetsɛremɔ lɛ, Agripa kɛ Bernike wula kiŋkãa kɛba ni amɛkɛ tatsɛmɛi kɛ maŋ lɛ mli hii ni ji gbɔmɛi agboi lɛ babote sanetoiboohe lɛ; ni be ni Festo fã lɛ, akɛ Paulo ba mli. 24 Ni Festo kɛɛ: “Maŋtsɛ Agripa kɛ nyɛ hii fɛɛ ni nyɛkɛ wɔ yɔɔ biɛ, nuu nɛɛ ni nyɛnaa lɛ nɛɛ ji mɔ ni Yudafoi lɛ fɛɛ bakpa mi fai yɛ ehewɔ yɛ Yerusalem kɛ biɛ hu kɛ bolɔmɔ akɛ esaaa akɛ ehiɔ wala mli dɔŋŋ lɛ.+ 25 Shi miyɔse akɛ efeko nɔ ko ni hãa efeɔ mɔ ni sa gbele.+ No hewɔ lɛ, be ni nuu nɛɛ diɛŋtsɛ bi ni akɛ esane lɛ ayahã Anunyamtsɛ lɛ, mikpɛ mli akɛ matsu ni akɛ lɛ aya. 26 Shi mileee sane pɔtɛɛ ni maŋma yɛ ehe kɛyahã mi-Nuŋtsɔ lɛ. No hewɔ ni mikɛ lɛ eba nyɛ fɛɛ nyɛhiɛ nɛɛ, ni titri lɛ bo Maŋtsɛ Agripa ohiɛ, koni kɛji atao sane lɛ mli atã lɛ, maná nɔ ko maŋma. 27 Ejaakɛ efeɔ mi akɛ jwɛŋmɔ bɛ mli akɛ abaaŋɔ gboklɛfonyo ko kɛya ni atsɔɔɔ saji ni akɛshwie enɔ.”