1 Samuel
24 Be ni Saul ku esɛɛ kɛjɛ Filistibii lɛ asɛɛnyiɛmɔ lɛ mli kɛba nɔŋŋ lɛ, akɛɛ lɛ akɛ: “Naa! David yɛ En-gedi ŋa lɛ nɔ.”+
2 No hewɔ lɛ, Saul ŋɔ hii 3,000 ni he esa ni ahala kɛjɛ Israel fɛɛ ni etee eyatao David kɛ ehii lɛ yɛ tɛsai ni gɔji anɔ abotiai nyiɛɔ nɔ lɛ anɔ. 3 Saul bashɛ toi atsũ ni akɛ tɛ fee ni yɔɔ gbɛ lɛ he lɛ he, he ni tɛkplo ko yɔɔ lɛ, ni ebote tɛkplo lɛ mli koni eyawa,* no mli lɛ, David kɛ ehii lɛ hu tara tɛkplo lɛ mli yɛ sɛɛgbɛ tɔ̃ɔ he ni ewo duŋ lɛ.+ 4 David hii lɛ kɛɛ lɛ akɛ: “Ŋmɛnɛ ji gbi ni Yehowa miikɛɛ bo akɛ, ‘Naa! mikɛ ohenyɛlɔ lɛ miiwo odɛŋ,+ ni obaanyɛ ofee lɛ nɔ fɛɛ nɔ ni sa ohiɛ’ lɛ.” No hewɔ lɛ, David te shi ni eyafo Saul atade ni nine bɛ he lɛ naa nigii. 5 Shi no sɛɛ lɛ, David tsui tee nɔ ebu lɛ fɔ*+ akɛni efo Saul atade ni nine bɛ he lɛ naa lɛ hewɔ. 6 Ekɛɛ ehii lɛ akɛ: “Ekaba lɛ nakai kɔkɔɔkɔ yɛ Yehowa hiɛ akɛ mafee nɔ ko tamɔ nɛkɛ mashi minuŋtsɔ, mɔ ni Yehowa efɔ lɛ mu lɛ, akɛ mawó minine nɔ yɛ enɔ, ejaakɛ lɛ ji mɔ ni Yehowa efɔ lɛ mu.”+ 7 No hewɔ lɛ, David tsɔ wiemɔi nɛɛ anɔ etsĩ ehii lɛ anaa,* ni ehãaa amɛta Saul he. Shi Saul lɛ, ete shi kɛje tɛkplo lɛ mli ni eyi egbɛ nɔ.
8 Kɛkɛ ni David te shi ni eje kpo kɛje tɛkplo lɛ mli ni ebo etsɛ Saul akɛ: “Minuŋtsɔ maŋtsɛ!”+ Be ni Saul fo ehe ekwɛ esɛɛ lɛ, David kula shi ni ekɛ ehiɛ bu shi ni ekoto lɛ. 9 David bi Saul akɛ: “Mɛni hewɔ oboɔ mɛi ni kɛɔ akɛ, ‘Naa! David miitao eye bo awui’ lɛ anaa wiemɔ toi lɛ?+ 10 Ŋmɛnɛ gbi nɛɛ, bo diɛŋtsɛ okɛ ohiŋmɛi ena bɔ ni Yehowa jie bo ewo midɛŋ yɛ tɛkplo lɛ mli. Shi be ni mɔ ko kɛɛ mi akɛ migbe bo lɛ,+ mina bo mɔbɔ ni mikɛɛ akɛ, ‘Miwóŋ minine nɔ yɛ minuŋtsɔ nɔ, ejaakɛ lɛ ji mɔ ni Yehowa efɔ lɛ mu.’+ 11 Ni naa, mitsɛ, bo lɛ kwɛmɔ, jeee otade ni nine bɛ he lɛ naa mihiɛ yɛ midɛŋ nɛɛ? Be ni mifo otade ni nine bɛ he lɛ naa lɛ, migbeee bo. Agbɛnɛ bo diɛŋtsɛ ona ni oyɔse akɛ mitoko miyiŋ akɛ maye bo awui loo matse ohiɛ atua, ni mifeko bo esha ko hu,+ shi bo moŋ ogbɔbiɔ mi koni ogbe mi.*+ 12 Yehowa akojo mi kɛ bo teŋ,+ ni Yehowa nɔŋŋ atɔ onɔ owele ehã mi,+ shi mi lɛ, miwóŋ minine nɔ yɛ onɔ.+ 13 Bɔ ni blema abɛ ko kɛɔ lɛ, ‘Mɛi fɔji adɛŋ nɔ fɔŋ jɛɔ,’ shi mi lɛ, miwóŋ minine nɔ yɛ onɔ. 14 Namɔ sɛɛ po Israel maŋtsɛ lɛ efã kɛnyiɛ nɛɛ? Namɔ otiuɔ lɛ? Gbee ni egbo? Aloo ŋmoŋ?+ 15 Yehowa afee kojolɔ ni ekojo mi kɛ bo teŋ, ni ekwɛ ni eye misane ehã mi,+ ni ekojo mi, ni ejie mi yɛ odɛŋ.”
16 Be ni David kɛ lɛ wie wiemɔi nɛɛ egbe naa nɔŋŋ lɛ, Saul bi akɛ: “Mibinuu David, bo ogbee minuɔ lɛ?”+ Ni Saul wo yara ni ebɔi yaafo. 17 Ekɛɛ David akɛ: “Oja fe mi, ejaakɛ okɛ mi eye jogbaŋŋ, shi mi lɛ, mikɛ efɔŋ eto bo najiaŋ.+ 18 Lɛɛlɛŋ, ŋmɛnɛ lɛ, ohã mile ekpakpa ni ofee mi lɛ akɛ, ogbeee mi be ni Yehowa jie mi ewo odɛŋ lɛ.+ 19 Ejaakɛ namɔ nine shɛɔ ehenyɛlɔ nɔ ni ewoɔ lɛ gbɛ ni eya ni eyeee lɛ awui ko? Yehowa kɛ nɔ kpakpa baajwere bo+ yɛ nɔ ni ofee ohã mi ŋmɛnɛ lɛ hewɔ. 20 Ni agbɛnɛ naa! Mile akɛ bɔ fɛɛ bɔ ni fee lɛ obaaye maŋtsɛ,+ ni odɛŋ Israel maŋtsɛyeli lɛ baadamɔ shi shiŋŋ yɛ. 21 No hewɔ lɛ, okɛ Yehowa akã mi kitã+ akɛ okpãtãŋ miseshibii* ni baaba yɛ misɛɛ lɛ ahiɛ, koni migbɛ́i akalaaje yɛ mitsɛ shĩa lɛ.”+ 22 No hewɔ lɛ, David kã Saul kitã, ni no sɛɛ lɛ, Saul tee shĩa.+ Shi David kɛ ehii lɛ kwɔ kɛtee teemɔhe lɛ.*+