1 Mose
16 Agbɛnɛ Sarai, Abram ŋa lɛ bɛ bi ko,+ shi eyɛ tsulɔ yoo ko ni jɛ Ejipt ní atsɛɔ lɛ Hagar.+ 2 No hewɔ lɛ, Sarai kɛɛ Abram akɛ: “Ofainɛ, bo mi toi! Yehowa etsĩ mi gbɛ ní mikafɔ bii. Ofainɛ, okɛ mitsulɔ yoo lɛ awɔ.* Ekolɛ kɛtsɔ enɔ lɛ maná bii.”+ No hewɔ lɛ, Abram bo nɔ ni Sarai kɛɛ lɛ toi. 3 Be ni Abram ehi Kanaan shikpɔŋ lɛ nɔ afii nyɔŋma sɛɛ lɛ, eŋa Sarai ŋɔ etsulɔ yoo Hagar ní jɛ Ejipt lɛ ehã ewu Abram akɛ eŋa. 4 No hewɔ lɛ, Abram kɛ Hagar wɔ,* ni eŋɔ hɔ. Be ni Hagar na akɛ ehiɛ hɔ lɛ, ebuuu enuŋtsɔ yoo lɛ dɔŋŋ.
5 Kɛkɛ ni Sarai kɛɛ Abram akɛ: “Sane fɔŋ ní akɛye mi lɛ he sɔ̃ lɛ akã onɔ. Mi mikɛ mitsulɔ yoo lɛ wo odɛŋ,* shi be ni ena akɛ ehiɛ hɔ lɛ, ebuuu mi dɔŋŋ. Yehowa akojo mi kɛ bo teŋ.” 6 No hewɔ lɛ, Abram kɛɛ Sarai akɛ: “Naa! Otsulɔ yoo lɛ yɛ odɛŋ. Feemɔ lɛ nɔ fɛɛ nɔ ni sa ohiɛ.” Kɛkɛ ni Sarai kɛ Hagar ye kɛ joomɔ, ni Hagar jo foi etee.
7 Sɛɛ mli lɛ, Yehowa bɔfo ko na lɛ yɛ nuhiŋmɛi* ko he yɛ ŋa lɛ nɔ; nuhiŋmɛi ni yɔɔ Shur+ gbɛ lɛ nɔ lɛ. 8 Ni ebi lɛ akɛ: “Hagar, Sarai tsulɔ yoo, nɛgbɛ ojɛ ni nɛgbɛ oyaa?” Kɛkɛ ni ekɛɛ: “Miijo foi kɛmiije minuŋtsɔ yoo Sarai hiɛ.” 9 Ni Yehowa bɔfo lɛ kɛɛ lɛ akɛ: “Kuu osɛɛ oya onuŋtsɔ yoo lɛ ŋɔɔ, ní oyaba ohe shi ohã lɛ.” 10 Kɛkɛ ni Yehowa bɔfo lɛ kɛɛ: “Mahã oseshi ashwere babaoo, bɔ ni anyɛŋ amɛ akane.”+ 11 Yehowa bɔfo lɛ kɛɛ kɛfata he akɛ: “Amrɔ nɛɛ ohiɛ musu, ni obaafɔ binuu; wo lɛ gbɛ́i akɛ Ishmael,* ejaakɛ Yehowa enu omanehulu lɛ. 12 Ebaatsɔ mɔ ni hiɛ yɔɔ laŋlaŋ tamɔ ŋa mli teji.* Ebaawó enine nɔ yɛ mɔ fɛɛ mɔ nɔ, ni mɔ fɛɛ mɔ baawó enine nɔ yɛ enɔ, ni ebaahi shi yɛ enyɛmimɛi lɛ fɛɛ amasɛi.”*
13 Kɛkɛ ni esɔle etsɛ Yehowa, mɔ ni kɛ lɛ wieɔ lɛ* ekɛɛ: “Oji Nyɔŋmɔ ni naa nii,”+ ejaakɛ Hagar kɛɛ: “Ani mɔ ni naa mi lɛ ji mɔ ni mina yɛ biɛ lɛ lɛɛlɛŋ lɛ?” 14 No hewɔ ni atsɛ nubu lɛ akɛ Beer-lahai-roi* lɛ. (Eyɛ Kadesh kɛ Bered teŋ.) 15 No hewɔ lɛ, Hagar fɔ binuu ehã Abram, ni Abram wo ebinuu lɛ gbɛ́i akɛ Ishmael.+ 16 Abram eye afii 86 be ni Hagar fɔ Ishmael ehã lɛ lɛ.