2 Kronika
1 David binuu Solomon ná hewalɛ kpele yɛ emaŋtsɛyeli lɛ mli, ni Yehowa, e-Nyɔŋmɔ lɛ kɛ lɛ yɛ, ni ehã etsɔ gbɔmɔ wulu.+
2 Solomon tsu ni ayatsɛ Israel fɛɛ kɛba, asraafoi akpei anɔkwɛlɔi lɛ kɛ asraafoi ohai anɔkwɛlɔi lɛ, kɛ kojolɔi lɛ, kɛ Israel onukpai lɛ fɛɛ, ni ji tsɛmɛi ashĩai onukpai lɛ. 3 Kɛkɛ ni Solomon kɛ asafo muu lɛ fɛɛ tee he grɔŋŋ ni yɔɔ Gibeon lɛ,+ ejaakɛ no mli lɛ, jɛmɛ ji he ni anɔkwa Nyɔŋmɔ lɛ kpee buu lɛ, ni ji mama tsũ ni Yehowa tsulɔ Mose fee yɛ ŋa lɛ nɔ lɛ yɔɔ. 4 Shi no mli lɛ, David eyawó anɔkwa Nyɔŋmɔ lɛ Adeka lɛ kɛjɛ Kiriat-yearim+ kɛba he ni David esaa ehã Adeka lɛ; no mli lɛ, efee mama tsũ ko ehã lɛ yɛ Yerusalem.+ 5 Ni akɛ akɔɔble afɔleshaa latɛ+ ni Bezalel,+ mɔ ni tsɛ ji Uri, ni lɛ hu etsɛ ji Hur lɛ fee lɛ ebama Yehowa sɔlemɔ buu lɛ hiɛ; ni Solomon kɛ asafo lɛ yasɔleɔ yɛ hiɛ.* 6 Solomon shã afɔlei yɛ Yehowa hiɛ yɛ jɛmɛ, ni eshã shãa afɔlei 1,000 yɛ akɔɔble afɔleshaa latɛ+ lɛ ni yɔɔ kpee buu lɛ hiɛ lɛ nɔ.
7 Nyɔŋmɔ jie ehe kpo etsɔɔ Solomon yɛ nakai nyɔɔŋ lɛ mli, ni Nyɔŋmɔ kɛɛ lɛ akɛ: “Bi nɔ ni osumɔɔ ni mahã bo.”+ 8 Kɛkɛ ni Solomon kɛɛ Nyɔŋmɔ akɛ: “Ojie suɔmɔ ni tsakeee ni fa babaoo kpo otsɔɔ mitsɛ David,+ ni ohã mibatsɔ maŋtsɛ yɛ esɛɛ.+ 9 Yehowa Nyɔŋmɔ, agbɛnɛ, hã shi ni owo mitsɛ David lɛ aba mli,+ ejaakɛ owó mi maŋtsɛ yɛ mɛi ni yi fa tamɔ shikpɔŋ lɛ nɔ mulu lɛ anɔ.+ 10 No hewɔ lɛ, hã mi hiɛshikamɔ kɛ nilee+ koni mikɛnyiɛ maŋ nɛɛ hiɛ,* ejaakɛ namɔ po baanyɛ akojo omaŋ kpeteŋkpele nɛɛ?”+
11 Kɛkɛ ni Nyɔŋmɔ kɛɛ Solomon akɛ: “Akɛni enɛ ji nɔ ni oshweɔ yɛ otsui mli ni obiii ni oná nii, kɛ jwetrii, kɛ anunyam, aloo ni mɛi ni nyɛɔ bo lɛ agboi,* loo walasɛɛtsɛlɛ,* shi obi hiɛshikamɔ kɛ nilee koni okɛkojo miwebii ni miwó bo amɛnɔ maŋtsɛ lɛ hewɔ lɛ,+ 12 obaaná hiɛshikamɔ kɛ nilee; shi agbɛnɛ hu, mahã oná nii, kɛ jwetrii, kɛ anunyam bɔ ni maŋtsɛmɛi ni etsɔ ohiɛ lɛ eko kwraa náaa nakai, ni mɛi ni baaba yɛ osɛɛ lɛ ateŋ mɔ ko hu náŋ nakai.”+
13 Kɛkɛ ni Solomon je kpee buu lɛ hiɛ yɛ he grɔŋŋ ni yɔɔ Gibeon lɛ,+ ni etee Yerusalem; ni eye Israel nɔ maŋtsɛ. 14 Solomon tee nɔ ebua shwiilii kɛ okpɔŋɔi* anaa; eyɛ shwiilii 1,400 kɛ okpɔŋɔi* 12,000,+ ni ekɛ amɛ to shwiilii amaji+ lɛ amli, kɛ agbɛnɛ hu, yɛ maŋtsɛ lɛ masɛi yɛ Yerusalem.+ 15 Maŋtsɛ lɛ hã jwiɛtɛi kɛ shika tsuru bu yɛ Yerusalem tamɔ tɛi,+ ni ehã tseneduru tsei hu bu tamɔ sikamore tsei ni yɔɔ Shefela lɛ.+ 16 Akɛ Solomon okpɔŋɔi lɛ jɛɔ Ejipt kɛbaa,+ ni maŋtsɛ lɛ jarayelɔi gbɛfalɔi lɛ yahéɔ amɛ kuikui,* kuu fɛɛ kuu kɛ ejara.+ 17 Shwiilii ni akɛjɛɔ Ejipt kɛbaa lɛ ekome jara ji jwiɛtɛi kapɛji 600, ni okpɔŋɔ kome hu jara ji 150; ni maŋtsɛ lɛ jarayelɔi gbɛfalɔi lɛ nɔŋŋ yahéɔ enɛɛmɛi amɛbahãa Hitbii amaŋtsɛmɛi lɛ kɛ Siriabii amaŋtsɛmɛi lɛ fɛɛ.