2 Samuel
16 Be ni David fo mli yɛ gɔŋ lɛ yiteŋ+ kɛtee fioo lɛ, naa Mefiboshet+ sɔɔlɔ Ziba,+ ni eba koni ekɛ David abakpe, ni ehiɛ tejii enyɔ ni awo amɛnɔ nii, ni amɛtere blodoi 200, wain yibii keekii* 100, latsa beiaŋ* aduawa keekii* 100, kɛ gbɛ́ ni akɛ wain ewo mli.+ 2 Kɛkɛ ni maŋtsɛ lɛ bi Ziba akɛ: “Mɛni hewɔ okɛ nibii nɛɛ eba?” Ziba kɛɛ akɛ: “Mikɛ tejii lɛ ba koni maŋtsɛ lɛ shĩabii lɛ atara nɔ, mikɛ blodo lɛ kɛ latsa beiaŋ aduawa lɛ ba koni oblahii lɛ aye, ni wain lɛ hu, mikɛba koni kɛ́ etɔ mɔ ko yɛ ŋa lɛ nɔ lɛ, ni enu eko.”+ 3 Ni maŋtsɛ lɛ bi lɛ akɛ: “Ni nɛgbɛ onuŋtsɔ nabi* lɛ yɔɔ?”+ Kɛkɛ ni Ziba kɛɛ maŋtsɛ lɛ akɛ: “Eyɛ Yerusalem, ejaakɛ ekɛɛ akɛ, ‘Ŋmɛnɛ lɛ, Israel shĩa lɛ baaŋɔ mitsɛ maŋtsɛyeli lɛ ahã mi ekoŋŋ.’”+ 4 Kɛkɛ ni maŋtsɛ lɛ kɛɛ Ziba akɛ: “Naa! Nɔ fɛɛ nɔ ni ji Mefiboshet nii lɛ, bo onɔ ni.”+ Ziba kɛɛ akɛ: “Miikoto bo. Hã mihiɛ aba nyam yɛ ohiɛ, minuŋtsɔ maŋtsɛ.”+
5 Be ni Maŋtsɛ David shɛ Bahurim lɛ, nuu ko ni jɛ Saul weku shĩa lɛ mli ni atsɛɔ lɛ Shimei,+ ni ji Gera binuu lɛ ba, ni be ni ebaa fɛɛ lɛ, eebolɔ kɛ loomɔ.+ 6 Ni eefɔ̃ tɛi eetswia David kɛ Maŋtsɛ David tsuji lɛ, kɛ asraafoi lɛ fɛɛ kɛ tawulɔi kãkãlɔi ni yɔɔ David ninejurɔ kɛ ebɛku lɛ fɛɛ. 7 Be ni Shimei lomɔɔ lɛ, eekɛɛ akɛ: “Jee biɛ, jee biɛ, bo nuu ni oye lá yi sɔ̃! Bo yaka gbɔmɔ! 8 Yehowa ehã Saul, mɔ ni obaye enajiaŋ akɛ maŋtsɛ lɛ, shĩa lɛ lá lɛ fɛɛ ebabua oyiteŋ, ni Yehowa kɛ maŋtsɛyeli lɛ ewo obinuu Absalom dɛŋ. Agbɛnɛ, sane fɔŋ enina bo, ejaakɛ oyeɔ lá yi sɔ̃!”+
9 Kɛkɛ ni Zeruia binuu, Abishai+ kɛɛ maŋtsɛ lɛ akɛ: “Mɛni hewɔ esa akɛ gbee ni egbo+ nɛɛ alomɔ minuŋtsɔ maŋtsɛ?+ Ofainɛ, hã maya, ni mayafo eyitso.”+ 10 Shi maŋtsɛ lɛ kɛɛ akɛ: “Mɛni enɛ kɔɔ yɛ nyɛhe,* nyɛ Zeruia bihii?+ Hã elomɔ mi,+ ejaakɛ Yehowa ekɛɛ lɛ akɛ,+ ‘Loomɔ David!’ No hewɔ lɛ, namɔ baanyɛ abi lɛ akɛ, ‘Mɛni hewɔ ofeɔ enɛ nɛɛ?’” 11 Kɛkɛ ni David kɛɛ Abishai kɛ etsuji lɛ fɛɛ akɛ: “Naa! Mi diɛŋtsɛ mibinuu ni jɛ mimusuŋ lɛ po miitao miwala,*+ enyiɛ nɔŋŋ Benyaminnyo!+ Nyɛshia lɛ ni elomɔa mi, ejaakɛ Yehowa ekɛɛ lɛ akɛ elomɔ mi! 12 Ekolɛ Yehowa baana mimanehulu lɛ,+ ni Yehowa kɛ ekpakpa baato mi najiaŋ moŋ fe loomɔ ni elomɔɔ mi ŋmɛnɛ nɛɛ.”+ 13 Kɛkɛ ni David kɛ ehii lɛ tee nɔ amɛkpeleke shi, nakai beiaŋ nɔŋŋ lɛ, Shimei hu nyiɛ gɔŋ lɛ masɛi yɛ David koŋ nɔ eelomɔ+ ni eefɔ̃ tɛi kɛ mulu babaoo.
14 Sɛɛ mli lɛ, maŋtsɛ lɛ kɛ mɛi ni fata ehe lɛ fɛɛ yashɛ he ni amɛyaa lɛ ni etɔ amɛ bliboo, ni amɛjɔɔ amɛhe.
15 Ni Absalom hu kɛ Israel hii lɛ fɛɛ yashɛ Yerusalem, ni Ahitofel+ hu fata ehe. 16 Be ni David naanyo Hushai,*+ Arkinyo+ lɛ ba Absalom ŋɔɔ lɛ, Hushai kɛɛ Absalom akɛ: “Maŋtsɛ yi aná wala!+ Maŋtsɛ yi aná wala!” 17 Kɛkɛ ni Absalom bi Hushai akɛ: “Ani nɛkɛ ji gbɛ ni otsɔɔ nɔ ojieɔ suɔmɔ ni tsakeee kpo otsɔɔ onaanyo lɛ? Mɛni hewɔ okɛ onaanyo lɛ eyaaa lɛ?” 18 Ni Hushai kɛɛ Absalom akɛ: “Dabi, mi lɛ, mɔ ni Yehowa, maŋ lɛ, kɛ Israel hii lɛ fɛɛ ehala lɛ, lɛ ji mɔ ni mikɛyaa. Lɛ mikɛbaahi shi. 19 Ni agbɛnɛ hu, miiwie ekoŋŋ, Namɔ esa akɛ masɔmɔ? Ani esaaa akɛ misɔmɔɔ ebinuu lɛ? Bɔ ni misɔmɔ opapa lɛ, nakai nɔŋŋ masɔmɔ bo.”+
20 Kɛkɛ ni Absalom kɛɛ Ahitofel akɛ: “Nyɛwoa mi ŋaa.*+ Mɛni esa akɛ wɔfee?” 21 Kɛkɛ ni Ahitofel kɛɛ Absalom akɛ: “Okɛ otsɛ hemɛi*+ ni eshi yɛ esɛɛ koni amɛkwɛ shĩa*+ lɛ aná bɔlɛ. Kɛkɛ lɛ Israel fɛɛ baanu akɛ ohã ohe eje fu ewo otsɛ, ni no baahã mɛi ni nyiɛ osɛɛ lɛ ahe awa amɛ.” 22 No hewɔ lɛ, amɛfee mama tsũ ko amɛhã Absalom yɛ tsũ lɛ yiteŋ,+ ni Absalom kɛ etsɛ hemɛi* lɛ ná bɔlɛ+ yɛ Israel fɛɛ hiɛ.+
23 Nakai gbii lɛ amli lɛ, abuɔ ŋaa ni Ahitofel+ woɔ lɛ oookɛɛ eji* anɔkwa Nyɔŋmɔ lɛ wiemɔ. Nakai ji bɔ ni David kɛ Absalom fɛɛ buɔ ŋaa fɛɛ ni Ahitofel woɔ lɛ.