2 Kronika

5 No hewɔ lɛ, Solomon gbe nitsumɔi fɛɛ ni esa akɛ etsu yɛ Yehowa shĩa lɛ he lɛ naa.+ Kɛkɛ ni Solomon kɛ nibii ni etsɛ David ejɔɔ nɔ*+ lɛ ba shĩa lɛ, ni ekɛ jwiɛtɛi lɛ, kɛ shika tsuru lɛ, kɛ nibii lɛ fɛɛ ba ni ekɛbawo anɔkwa Nyɔŋmɔ lɛ shĩa lɛ jwetritoohei lɛ.+ 2 Solomon bua Israel onukpai, weku yitsei lɛ fɛɛ, Israelbii lɛ atsɛmɛi ashĩa onukpai lɛ anaa yɛ nakai beiaŋ. Amɛba Yerusalem koni amɛyawó Yehowa kpaŋmɔ adeka lɛ kɛjɛ David Maŋ,+ ni ji Zion lɛ mli kɛkwɔ kɛba.+ 3 Israel hii lɛ fɛɛ babua amɛhe naa yɛ maŋtsɛ lɛ hiɛ be ni ayeɔ gbi jurɔ* lɛ yɛ nyɔɔŋ ni ji kpawo lɛ nɔ.+

4 No hewɔ lɛ, Israel onukpai lɛ fɛɛ ba, ni Levibii lɛ wó Adeka lɛ.+ 5 Amɛkɛ Adeka lɛ, kɛ kpee buu+ lɛ, kɛ nibii krɔŋkrɔŋi lɛ fɛɛ ni yɔɔ kpee buu lɛ mli lɛ kwɔ kɛba. Osɔfoi lɛ kɛ Levibii* lɛ kɛkwɔ kɛba. 6 Maŋtsɛ Solomon kɛ Israel asafo muu lɛ ni etsu ayatsɛ amɛ kɛba eŋɔɔ lɛ fɛɛ damɔ Adeka lɛ hiɛ. Amɛgbegbee gwantɛŋi kɛ tsinai babaoo bɔ ni anyɛɛɛ akane loo abu naa amɛkɛshã afɔle.+ 7 Kɛkɛ ni osɔfoi lɛ kɛ Yehowa kpaŋmɔ adeka lɛ yama egbɛhe, yɛ shĩa lɛ sɛɛtsu lɛ, ni ji He Krɔŋkrɔŋ Fe Fɛɛ lɛ mli yɛ kerubim lɛ afiji lɛ ashishi.+ 8 Kerubim lɛ afiji ni amɛgbɛ mli lɛ ha he ni Adeka lɛ ma lɛ, no hewɔ lɛ, kerubim lɛ afiji lɛ ha Adeka lɛ kɛ ehe tsei+ lɛ anɔ yɛ ŋwɛigbɛ. 9 Ehe tsei lɛ kɛlɛ aahu akɛ, anaa amɛnaabui yɛ He Krɔŋkrɔŋ lɛ yɛ sɛɛtsu lɛ hiɛ, shi anaaa yɛ kpo lɛ nɔ. Ni amɛyɛ jɛmɛ kɛbashi ŋmɛnɛ. 10 Nɔ ko nɔ ko bɛ Adeka lɛ mli akɛ ja tɛi tɛtrɛbii enyɔ ni Mose kɛwo mli yɛ Horeb,+ be ni Yehowa kɛ Israelbii lɛ kpaŋ kpaŋmɔ+ be ni amɛshi Ejipt lɛ.+

11 Be ni osɔfoi lɛ je kpo kɛjɛ he krɔŋkrɔŋ lɛ (no mli lɛ, osɔfoi ni yɔɔ jɛmɛ lɛ fɛɛ efee amɛhe krɔŋkrɔŋ,+ ekɔɔɔ he eko kuu mli ni amɛyɔɔ),+ 12 Asaf+ kɛ Heman,+ kɛ Yedutun,+ kɛ amɛbihii kɛ amɛnyɛmimɛi hii ni amɛ fɛɛ amɛji Levibii lɛ ateŋ mɛi ni láa+ lɛ wo klala kpakpa, ni amɛhiɛ tsɛŋtsɛŋi, kɛ kpãa saŋkui, kɛ saŋkui; amɛdamɔ afɔleshaa latɛ lɛ bokã, ni osɔfoi 120 ni miikpã tɛtɛrɛmantɛrɛi fata amɛhe.+ 13 Be ni mɛi ni kpãa tɛtɛrɛmantɛrɛi lɛ kɛ mɛi ni láa lɛ efee ekome kɛmiijie Yehowa yi ni amɛmiida lɛ shi, ni tɛtɛrɛmantɛrɛi lɛ kɛ tsɛŋtsɛŋi lɛ kɛ nibii krokomɛi ni akɛtswaa lala lɛ agbɛɛmɔ lɛ tee ŋwɛi be ni amɛjieɔ Yehowa yi akɛ, “ejaakɛ ehi; ni esuɔmɔ ni tsakeee lɛ hiɔ shi kɛyaa naanɔ”+ lɛ nɔŋŋ ni atatu bayi shĩa lɛ, ni ji Yehowa shĩa lɛ obɔ.+ 14 Osɔfoi lɛ nyɛɛɛ adamɔ shi ni amɛsɔmɔ yɛ atatu lɛ hewɔ, ejaakɛ Yehowa anunyam lɛ eyi anɔkwa Nyɔŋmɔ lɛ shĩa lɛ obɔ.+