4 Mose

18 Ni Yehowa kɛɛ Aaron akɛ: “Tɔmɔ fɛɛ tɔmɔ ni abaatɔ̃ ashi jamɔhe+ lɛ, bo kɛ obihii lɛ kɛ otsɛ shĩa lɛ ji mɛi ni baatere he sɔ̃ lɛ, ni tɔmɔ fɛɛ tɔmɔ ni abaatɔ̃ ashi nyɛsɔfoyeli lɛ, bo kɛ obihii ni kɛ bo yɔɔ lɛ ji mɛi ni baatere he sɔ̃ lɛ.+ 2 Agbɛnɛ hu, okɛ onyɛmimɛi ni jɛ Levi weku lɛ, ni ji otsɛmɛi aweku lɛ mli lɛ aba, koni amɛbafata ohe ni amɛbasɔmɔ bo+ kɛ obihii lɛ yɛ Odaseyeli buu lɛ hiɛ.+ 3 Amɛtsu amɛsɔ̃ lɛ he nii amɛhã bo, ni amɛtsu kpee buu lɛ fɛɛ he nii.+ Shi amɛkabɛŋkɛ he krɔŋkrɔŋ lɛ nibii lɛ kɛ afɔleshaa latɛ lɛ, koni amɛ kɛ nyɛ fɛɛ akagboi.+ 4 Amɛfata ohe, ni amɛtsu amɛsɔ̃i ni kɔɔ kpee buu lɛ he lɛ ahe nii, kɛ ehe nitsumɔi lɛ fɛɛ, ni mɔkpɔŋ ko mɔkpɔŋ ko* akabɛŋkɛ nyɛ.+ 5 Nyɛtsua nyɛsɔ̃ ni kɔɔ he krɔŋkrɔŋ+ lɛ kɛ afɔleshaa latɛ+ lɛ he lɛ he nii, koni mlifu+ ko akaba Israelbii lɛ anɔ dɔŋŋ. 6 Mi diɛŋtsɛ mijie nyɛnyɛmimɛi lɛ, ni ji Levibii lɛ, kɛjɛ Israelbii lɛ ateŋ mihã nyɛ akɛ nikeenii.+ Akɛ amɛ ehã Yehowa koni amɛtsu kpee buu lɛ he nitsumɔ lɛ he nii.+ 7 Nyɛsɔfoyeli nitsumɔi ni kɔɔ afɔleshaa latɛ lɛ he, kɛ nɔ ni kɔɔ nii ni yɔɔ pateeshɛŋ lɛ sɛɛ+ lɛ he sɔ̃ lɛ kã bo kɛ obihii lɛ anɔ, ni nyɛ esa akɛ nyɛtsu nitsumɔ nɛɛ.+ Mikɛ osɔfoyeli nitsumɔ lɛ ehã nyɛ akɛ nikeenii, ni mɔkpɔŋ fɛɛ mɔkpɔŋ* ni baabɛŋkɛ lɛ, agbe lɛ.”+

8 Yehowa tee nɔ ekɛ Aaron wie ekɛɛ: “Mi diɛŋtsɛ mihala bo koni okwɛ oniai ni atsuɔ ahãa mi lɛ anɔ.+ Mikɛ nibii krɔŋkrɔŋi fɛɛ ni Israelbii lɛ kɛhãa akɛ onia lɛ eko ehã bo kɛ obihii lɛ akɛ nyɛgbɛfaŋnɔ ni kã shi daa.+ 9 Afɔlei ni yɔɔ krɔŋkrɔŋ fe fɛɛ ni akɛ la shãa lɛ amli nɔ ni baatsɔ onɔ nɛ: afɔle fɛɛ afɔle ni amɛkɛbahãa, amɛŋmaa* afɔlei+ jio, amɛ-esha afɔlei+ jio, amɛsɔ̃ afɔlei+ ni amɛkɛbahãa mi lɛ jio. Eji nɔ krɔŋkrɔŋ fe fɛɛ kɛhã bo kɛ obihii lɛ. 10 Nyɛyea yɛ he ko ni yɔɔ krɔŋkrɔŋ waa.+ Nuu fɛɛ nuu baanyɛ aye eko. Efee nɔ krɔŋkrɔŋ kɛhã nyɛ.+ 11 Enɛ hu atsɔ onɔ: nibii ni amɛkɛbatsuɔ onia+ lɛ kɛ Israelbii lɛ afɔ̃ɔ afɔlei+ lɛ fɛɛ. Mikɛhã bo kɛ obihii kɛ obiyei ni kɛ bo yɔɔ lɛ akɛ nyɛgbɛfaŋnɔ ni kã shi daa.+ Oshĩabii lɛ ateŋ mɔ fɛɛ mɔ ni he tse lɛ baanyɛ aye eko.+

12 “Mu ni hi fe fɛɛ kɛ wain hee ni hi fe fɛɛ kɛ ŋmaa lɛ, ni ji amɛklɛŋklɛŋ yibii+ lɛ ní amɛkɛhãa Yehowa lɛ, mikɛ fɛɛ ehã bo.+ 13 Amɛshikpɔŋ lɛ nɔ nibaa nii lɛ fɛɛ amli klɛŋklɛŋ yibii ni amɛkɛbaabahã Yehowa lɛ baatsɔ onɔ.+ Oshĩabii lɛ ateŋ mɔ fɛɛ mɔ ni he tse lɛ baanyɛ aye eko.

14 “Nɔ fɛɛ nɔ ni ajɔɔ nɔ ake* yɛ Israel lɛ atsɔ onɔ.+

15 “Bɔɔ nii fɛɛ ni hiɛ kamɔ lɛ akromɔbi fɛɛ kromɔbi+ ni amɛkɛbaahã Yehowa lɛ, gbɔmɔ jio, kooloo jio, etsɔ onɔ. Shi gbɔmɔ kromɔbi lɛ, bɔ fɛɛ bɔ ni fee lɛ kpɔ̃ lɛ,+ ni kooloi ni he tseee lɛ akromɔbii lɛ hu, kpɔ̃ amɛ.+ 16 Kpɔ̃ lɛ yɛ kpɔmɔ he jara lɛ naa kɛji eye nyɔɔŋ kome loo nɔ ni fe nakai, yɛ jwiɛtɛi shekeli* enumɔ ni afo afɔ̃ shi lɛ naa,+ yɛ shekel ni akɛtsuɔ nii yɛ he krɔŋkrɔŋ lɛ naa.* Efeɔ gerai 20.* 17 Tsinanuu ni ji kromɔbi loo gwantɛŋbi nuu ni ji kromɔbi loo abotia kromɔbi pɛ esaaa akɛ okpɔ̃ɔ.+ Amɛji nii ni yɔɔ krɔŋkrɔŋ. Okɛ amɛlá lɛ ashwã afɔleshaa latɛ lɛ nɔ,+ ní oshã amɛfɔ lɛ* akɛ afɔle ni akɛ la shãa ni jeɔ ŋma jogbaŋŋ* woɔ Yehowa.+ 18 Ni amɛloo lɛ atsɔ onɔ. Tamɔ bɔ ni fɔ̃ɔ afɔle lɛ tsitsi lɛ kɛ nanejurɔ lɛ ji lɛ, enɛ hu atsɔ onɔ.+ 19 Oniai krɔŋkrɔŋi fɛɛ ni Israelbii lɛ tsuɔ amɛhãa Yehowa lɛ,+ mikɛhã bo kɛ obihii kɛ obiyei ni kɛ bo yɔɔ lɛ akɛ nyɛgbɛfaŋnɔ ni kã shi daa.+ Eji ŋoo kpaŋmɔ* ni kã shi daa yɛ Yehowa hiɛ kɛhã bo kɛ oshwiei ni kɛ bo yɔɔ lɛ.”

20 Yehowa tee nɔ ekɛ Aaron wie ekɛɛ: “Onáŋ gboshinii yɛ amɛshikpɔŋ lɛ nɔ, ni onáŋ amɛshikpɔŋ lɛ fã ko hu akɛ ogbɛfaŋnɔ.+ Miji ogbɛfaŋnɔ kɛ ogboshinii yɛ Israelbii lɛ ateŋ.+

21 “Agbɛnɛ naa, mikɛ Israelbii lɛ anibii lɛ amlijai nyɔŋma mli ekome fɛɛ mlijai nyɔŋma mli ekome ehã Levibii+ lɛ akɛ gboshinii yɛ nɔ ni amɛtsuɔ, ni ji kpee buu lɛ he nitsumɔ lɛ hewɔ. 22 Israelbii lɛ akabɛŋkɛ kpee buu lɛ dɔŋŋ, kɛjeee nakai lɛ ebaatsɔ esha ehã amɛ ni amɛbaagboi. 23 Levibii lɛ diɛŋtsɛ atsu kpee buu lɛ he nitsumɔ lɛ, ni amɛ amɛbaatere amɛtɔmɔi lɛ ahe sɔ̃ lɛ.+ Eji mla ni kã shi daa yɛ nyɛyinɔi fɛɛ amli akɛ, amɛkaŋɔ gboshinii ko yɛ Israelbii lɛ ateŋ.+ 24 Ejaakɛ mikɛ nibii amlijai nyɔŋma mli ekomekome ni Israelbii lɛ kɛbatsuɔ onia amɛhãa Yehowa lɛ ehã Levibii lɛ akɛ amɛgboshinii. No hewɔ ni mikɛɛ amɛ akɛ, ‘Amɛkaŋɔ gboshinii ko yɛ Israelbii lɛ ateŋ’ lɛ.”+

25 Ni Yehowa kɛɛ Mose akɛ: 26 “Kɛɛmɔ Levibii lɛ akɛ, ‘Israelbii lɛ kɛ amɛnibii amlijai nyɔŋma mli ekomekome ni mihe yɛ amɛdɛŋ mihã nyɛ lɛ baahã nyɛ akɛ nyɛgboshinii,+ ni esa akɛ nyɛ hu nyɛkɛ mlijai nyɔŋma mli ekome nɛɛ mlijai nyɔŋma mli ekome atsu onia nyɛhã Yehowa.+ 27 Ni abaabu no akɛ onia ni nyɛtsu, tamɔ nɔ ni eji ŋmaa ni jɛ nyɛŋmaagbeemɔhe+ loo nyɛbui ni nyɛŋaa wain loo mu yɛ mli lɛ amli nii ni fa babaoo. 28 Nɛkɛ gbɛ nɔ nyɛbaatsɔ ní nyɛ hu nyɛjɛ nibii amlijai nyɔŋma mli ekomekome ni nyɛnáa kɛjɛɔ Israelbii lɛ adɛŋ lɛ mli nyɛtsu onia nyɛhã Yehowa, ni nyɛjɛa nomɛi amli nyɛkɛ onia ni ji Yehowa nɔ lɛ ahãa osɔfo Aaron. 29 Nyɛkɛ nikeenii ni akɛhãa nyɛ akɛ nɔ krɔŋkrɔŋ lɛ mli nɔ ni hi fe fɛɛ lɛ atsua oniai srɔtoi fɛɛ nyɛhãa Yehowa.’+

30 “Ni kɛɛmɔ amɛ akɛ, ‘Kɛ́ nyɛkɛ nibii lɛ amli nɔ ni hi fe fɛɛ lɛ tsu onia lɛ, no lɛ, abaabu lɛ akɛ Levibii lɛ anibaa nii ni jɛ amɛŋmaagbeemɔhe kɛ amɛbui ni amɛŋaa wain loo mu yɛ mli lɛ amli nibaa nii. 31 Nyɛ kɛ nyɛshĩabii lɛ baanyɛ aye yɛ he fɛɛ he, ejaakɛ eji nitsumɔ ni nyɛtsuɔ yɛ kpee buu lɛ mli lɛ he nyɔmɔwoo.+ 32 Gbii abɔ ni nyɛkɛ nibii lɛ amli nɔ ni hi fe fɛɛ lɛ tsuɔ onia lɛ, no tsɔŋ esha kɛhãŋ nyɛ, agbɛnɛ hu, nyɛkabulea Israelbii lɛ anibii krɔŋkrɔŋi lɛ, kɛjeee nakai lɛ nyɛbaagboi.’”+