1 Samuel
15 Kɛkɛ ni Samuel kɛɛ Saul akɛ: “Yehowa tsu mi koni mibafɔ bo mu ni miwó bo emaŋ Israel nɔ maŋtsɛ;+ no hewɔ lɛ, agbɛnɛ bo nɔ ni Yehowa kɛɔ bo lɛ toi.+ 2 Nɔ ni Yehowa, taiatsɛ lɛ kɛɛ nɛ: ‘Magbala Amalekbii lɛ atoi* yɛ shi ni amɛte amɛwo Israel yɛ gbɛ lɛ nɔ be ni amɛkwɔɔ kɛjɛɔ Ejipt kɛbaa lɛ hewɔ.+ 3 No hewɔ lɛ, yaa ni oyatswia Amalekbii lɛ nii+ ni okpãtã+ amɛ kɛ nɔ fɛɛ nɔ ni amɛyɔɔ lɛ hiɛ.* Okɛ amɛhe akake amɛ;* gbee amɛ,+ nuu jio, yoo jio, gbekɛ jio, abifao jio, tsinanuu jio, gwantɛŋ jio, afukpɔŋɔ jio, teji jio.’”+ 4 Saul bua mɛi lɛ anaa ni ekane amɛ yɛ Telaim: Amɛyibɔ ji asraafoi 200,000 ni nyiɛɔ amɛnane nɔ kɛ Yuda hii 10,000.+
5 Saul fã kɛtee Amalek maŋ lɛ niiaŋ tɔ̃ɔ ni eyawo ka yɛ jɔɔ* lɛ mli. 6 Kɛkɛ ni Saul kɛɛ Kenbii+ lɛ akɛ: “Nyɛyaa, nyɛjea Amalekbii lɛ ateŋ nyɛyaa, koni mikabɛɛ nyɛ kɛ amɛ fɛɛ mishwie.+ Ejaakɛ nyɛjie suɔmɔ ni tsakeee kpo nyɛtsɔɔ Israelbii+ lɛ fɛɛ be ni amɛkwɔɔ kɛjɛɔ Ejipt kɛbaa lɛ.” No hewɔ lɛ, Kenbii lɛ je Amalekbii lɛ ateŋ amɛtee. 7 No sɛɛ lɛ, Saul tswia Amalekbii lɛ nii+ kɛjɛ Havila+ aahu kɛtee Shur+ ni kɛ Ejipt jeɔ husu lɛ. 8 Emɔ Agag,+ Amalek maŋtsɛ lɛ hiɛkãalɔ, shi mɛi ni eshwɛ lɛ fɛɛ lɛ ekɛ klante kpãtã amɛhiɛ.*+ 9 Shi Saul kɛ asraafoi lɛ kɛ Agag, kɛ tooku lɛ, kɛ tsinai lɛ, kɛ kooloi ni eshwishwii lɛ, kɛ gwantɛŋhii lɛ ateŋ nɔ ni hi fe fɛɛ lɛ kɛ nii kpakpai lɛ fɛɛ ahe ke amɛ.*+ Amɛsumɔɔɔ ni amɛkpãtãa amɛhiɛ.* Shi amɛkpãtã nibii fɛɛ ni he bɛ sɛɛnamɔ ni asumɔɔɔ lɛ hiɛ.*
10 Kɛkɛ ni Yehowa kɛɛ Samuel akɛ: 11 “Edɔ mi* akɛ miwó Saul maŋtsɛ, ejaakɛ ekpa yɛ misɛɛ ni ekɛ miwiemɔi lɛ tsuko nii.”+ Samuel hao waa, ni etee nɔ ebo etsɛ Yehowa nyɔɔŋnyɔɔŋ fɛɛ.+ 12 Be ni Samuel te shi leebi maŋkpa ni ekɛ Saul ayakpe lɛ, akɛɛ Samuel akɛ: “Saul tee Karmel,+ ni eyama akulashiŋ ko yɛ jɛmɛ ehã ehe koni akɛkai lɛ.+ Ni no sɛɛ lɛ, eku esɛɛ ni ekpeleke shi kɛtee Gilgal.” 13 Sɛɛ mli be ni Samuel ba Saul ŋɔɔ lɛ, Saul kɛɛ lɛ akɛ: “Yehowa ajɔɔ bo. Mikɛ Yehowa wiemɔ lɛ etsu nii.” 14 Shi Samuel bi akɛ: “Belɛ mɛni ji toi abolɔmɔi ni gbɛɔ yɛ mitoiiaŋ kɛ tsinai abolɔmɔi ni minuɔ nɛɛ?”+ 15 Kɛkɛ ni Saul kɛɛ akɛ: “Akɛ amɛ jɛ Amalekbii lɛ aŋɔɔ, ejaakɛ asraafoi lɛ kɛ tooku lɛ kɛ tsinai lɛ ateŋ nɔ ni hi fe fɛɛ lɛ ahe ke amɛ* koni amɛkɛbashã afɔle amɛhã Yehowa, o-Nyɔŋmɔ lɛ; shi nɔ ni shwɛ lɛ, wɔkpãtã hiɛ.”* 16 Kɛkɛ ni Samuel kɛɛ Saul akɛ: “Mɛɛ dã! Hã makɛɛ bo nɔ ni Yehowa kɛɛ mi nyɔɔŋ nɛɛ mli.”+ Ni ekɛɛ lɛ akɛ: “Wiemɔ!”
17 Samuel wie kɛtsa nɔ akɛ: “Ani jeee be ni onaa ohe akɛ mɔ bibioo kwraa+ lɛ ni awó bo Israel wekui lɛ anɔ onukpa ni Yehowa fɔ bo mu ni ewó bo Israel nɔ maŋtsɛ?+ 18 Sɛɛ mli lɛ, Yehowa tsu bo ni ekɛɛ, ‘Yaa ni oyakpãtã Amalekbii eshafeelɔi lɛ ahiɛ.*+ Okɛ amɛ awu kɛyashi obaabule amɛshishi kwrakwra.’+ 19 No hewɔ lɛ, mɛni hewɔ oyabooo Yehowa gbee toi? Moŋ lɛ, odɔ ohiɛ oto ta mli nii+ lɛ anɔ gidigidi ni ofee efɔŋ yɛ Yehowa hiɛ!”
20 Shi Saul kɛɛ Samuel akɛ: “Shi bɛ mibo Yehowa gbee toi? Mitee tsumɔ ni Yehowa tsu mi lɛ, ni mikɛ Agag, Amalek maŋtsɛ lɛ eba, ni mikpãtã Amalekbii lɛ ahiɛ.*+ 21 Shi asraafoi lɛ ŋɔ ta mli nii lɛ amli gwantɛŋi kɛ tsinai, ni ji nii ni aŋɔ ahã hiɛkpatamɔ lɛ ateŋ nɔ ni hi fe fɛɛ lɛ kɛba, koni amɛkɛbashã afɔle amɛhã Yehowa, o-Nyɔŋmɔ lɛ yɛ Gilgal.”+
22 Kɛkɛ ni Samuel kɛɛ akɛ: “Ani Yehowa nyaa shãa afɔlei kɛ afɔlei krokomɛi ahe+ fe Yehowa gbee toi ni aaabo? Naa! Toiboo hi fe afɔleshaa,+ ni sane toi ni aboɔ jogbaŋŋ lɛ hi fe gwantɛŋhii afɔ;+ 23 ejaakɛ atuatsemɔ lɛ,+ etamɔ klamɔ esha nɔŋŋ,+ ni mɔ ni yeɔ etsuinaa sane lɛ, etamɔ mɔ ko ni feɔ majik kɛ mɔ ko ni jáa amaga* nɔŋŋ. Akɛni okwa Yehowa wiemɔ+ lɛ hewɔ lɛ, lɛ hu ekwa bo maŋtsɛ lɛ yeli.”+
24 Kɛkɛ ni Saul kɛɛ Samuel akɛ: “Mifee esha, ejaakɛ miyeko Yehowa famɔ lɛ kɛ owiemɔi lɛ anɔ, ejaakɛ miyashe mɛi lɛ gbeyei ni miyabo nɔ ni amɛkɛɛ lɛ toi. 25 No hewɔ lɛ, agbɛnɛ, ofainɛ, okɛ mihe esha lɛ ake mi, ni okɛ mi aku sɛɛ kɛya koni miyakula shi yɛ Yehowa hiɛ.”+ 26 Shi Samuel kɛɛ Saul akɛ: “Mikɛ bo ekuuu sɛɛ kɛyaaa, ejaakɛ oyayeee Yehowa wiemɔ lɛ nɔ, ni Yehowa hu ekwa bo maŋtsɛ lɛ yeli yɛ Israel.”+ 27 Be ni Samuel tsɔ ehe ni ebaaya lɛ, Saul mɔ Samuel atade ni nine bɛ he lɛ naamuu lɛ mli, shi etse. 28 Kɛkɛ ni Samuel kɛɛ lɛ akɛ: “Yehowa etse Israel maŋtsɛyeli lɛ kɛje ohe ŋmɛnɛ, ni ekɛbaahã onyɛmi gbɔmɔ ni hi fe bo.+ 29 Agbɛnɛ hu, Israel Anunyamtsɛ+ lɛ maleee+ ni etsakeee ejwɛŋmɔ* hu, ejaakɛ etamɔɔɔ gbɔmɔ ni tsakeɔ ejwɛŋmɔ* lɛ.”+
30 Kɛkɛ ni ekɛɛ akɛ: “Mifee esha. Shi ofainɛ, wó mihiɛ nyam yɛ mimaŋ lɛ onukpai lɛ kɛ Israel hiɛ. Okɛ mi aku sɛɛ kɛya, ni mayakula shi yɛ Yehowa, o-Nyɔŋmɔ lɛ hiɛ.”+ 31 No hewɔ lɛ, Samuel nyiɛ Saul sɛɛ kɛtee, ni Saul yakula shi yɛ Yehowa hiɛ. 32 Ni Samuel kɛɛ akɛ: “Nyɛkɛ Agag, Amalek maŋtsɛ lɛ abaa miŋɔɔ.” Kɛkɛ ni Agag shashao shi* kɛtee, ejaakɛ no mli lɛ, Agag miikɛɛ ehe akɛ: ‘Eyɛ faŋŋ akɛ, gbele lɛ eho.’* 33 Shi Samuel kɛɛ akɛ: “Bɔ ni oklante lɛ ehã yei etsɔmɔ mɛi ni bɛ bii lɛ, nakai nɔŋŋ omami hu baatsɔ mɔ ni bɛ bi ko kwraa yɛ yei ateŋ.” Kɛkɛ ni Samuel folɔ Agag mli dukuduku yɛ Yehowa hiɛ yɛ Gilgal.+
34 Agbɛnɛ Samuel tee Rama, ni Saul hu kwɔ kɛtee Saul maŋ, Gibea. 35 Samuel enaaa Saul dɔŋŋ kɛyashi gbi ni egbo, ejaakɛ Samuel yaye Saul he awerɛho.+ Ni Yehowa shwa ehe akɛ ewó Saul Israel maŋtsɛ.+