Ezekiel
11 Ni mumɔ ko wó mi, ni ekɛ mi tee Yehowa shĩa lɛ agbó ni yɔɔ bokãgbɛ lɛ, agbó ni hiɛ kwɛɔ bokã lɛ naa.+ Mina hii 25 yɛ he ni atsɔɔ kɛboteɔ agbó lɛ mli lɛ, ni Yaazania, Azur binuu lɛ, kɛ Pelatia, Benaia binuu lɛ, ni ji maŋ lɛ mli lumɛi lɛ, yɛ amɛteŋ.+ 2 Kɛkɛ ni ekɛɛ mi akɛ: “Gbɔmɔ bi,* hii nɛɛ ji mɛi ni tsɔɔ ŋaa fɔŋ ni amɛwoɔ ŋaa gbonyo yɛ maŋ nɛɛ mli lɛ.* 3 Amɛkɛɔ akɛ, ‘Ani jeee be ni akɛmamɔɔ tsũi lɛ nɛ?+ Maŋ* lɛ ji kukwɛi*+ ni akɛhoɔ nii lɛ, ni wɔji loo lɛ.’
4 “No hewɔ lɛ, gbaa oshi amɛ. Gbɔmɔ bi,* gbaa.”+
5 Kɛkɛ ni Yehowa mumɔ lɛ ba minɔ,+ ni ekɛɛ mi akɛ: “Kɛɛmɔ akɛ, ‘Nɔ ni Yehowa kɛɛ nɛ: “Nyɛ Israel shĩa, nɔ ni nyɛkɛɔ lɛ ja, ni mile nɔ ni nyɛjwɛŋɔ lɛ.* 6 Nyɛhã mɛi babaoo egboi yɛ maŋ nɛɛ mli, ni nyɛhã gbohii eyi egbɛjegbɛi lɛ anɔ obɔbɔ.”’”+ 7 “No hewɔ lɛ, nɔ ni Nuŋtsɔ Ofe Yehowa kɛɛ nɛ: ‘Gbohii lɛ ni nyɛshɛrɛ nyɛshwie maŋ lɛ mli lɛ, amɛji loo lɛ, ni maŋ lɛ ji kukwɛi ni akɛhoɔ nii lɛ.+ Shi nyɛ lɛ abaajie nyɛ kɛje maŋ lɛ mli.’”
8 “‘Nyɛmiishe klante gbeyei,+ shi klante nɔŋŋ mikɛbaaba nyɛnɔ,’ Nuŋtsɔ Ofe Yehowa kɛɛ. 9 ‘Majie nyɛ kɛje emli, ni mikɛ nyɛ baawo gbɔi adɛŋ koni mikɛgbala nyɛtoi.+ 10 Nyɛbaanyɔ yɛ klante naa.+ Makojo nyɛ yɛ Israel husu lɛ naa,+ ni nyɛbaaná nyɛle akɛ miji Yehowa.+ 11 Maŋ lɛ tsɔŋ kukwɛi ni akɛhoɔ nii ehãŋ nyɛ, ni nyɛ hu nyɛfeŋ emli loo; makojo nyɛ yɛ Israel husu lɛ naa, 12 ni nyɛbaaná nyɛle akɛ miji Yehowa. Ejaakɛ nyɛnyiɛɛɛ yɛ mitaomɔ nii lɛ amli ni nyɛkɛ miyiŋkpɛi* lɛ tsuuu nii,+ shi jeŋmaji ni bɔle nyɛ lɛ ayiŋkpɛi* lɛ moŋ nyɛkɛtsuɔ nii.’”+
13 Be ni migba nɔŋŋ lɛ, Pelatia, Benaia binuu lɛ gbo, ni mikɛ mihiɛ bu shi ni mibo kɛ gbee ni wa akɛ: “Ao Nuŋtsɔ Ofe Yehowa! Ani obaakpãtã Israelbii lɛ ateŋ mɛi ni eshwɛ lɛ fɛɛ ahiɛ?”+
14 Yehowa kɛɛ mi ekoŋŋ akɛ: 15 “Gbɔmɔ bi,* mɛi ni yɔɔ Yerusalem lɛ ekɛɛ onyɛmimɛi lɛ, onyɛmimɛi lɛ ateŋ mɛi ni yɔɔ hegbɛ akɛ amɛkpɔ̃ɔ lɛ, kɛ Israel shĩa muu lɛ fɛɛ akɛ, ‘Nyɛtsia nyɛhe kɛjea Yehowa he kɛyaa sɛɛ shɔŋŋ. Shikpɔŋ lɛ wɔnɔ ni; akɛhã ni etsɔ wɔnɔ.’ 16 No hewɔ lɛ, kɛɛmɔ akɛ, ‘Nɔ ni Nuŋtsɔ Ofe Yehowa kɛɛ nɛ: “Eyɛ mli akɛ mijie amɛ kɛtee shɔŋŋ yɛ jeŋmaji lɛ ateŋ ni migbɛ amɛ mishwã shikpɔji lɛ anɔ moŋ,+ shi eshwɛ fioo ni matsɔ jamɔhe mahã amɛ yɛ shikpɔji ni amɛtee nɔ lɛ anɔ.”’+
17 “No hewɔ lɛ, kɛɛmɔ akɛ, ‘Nɔ ni Nuŋtsɔ Ofe Yehowa kɛɛ nɛ: “Agbɛnɛ hu, mabua nyɛnaa kɛjɛ majimaji lɛ amli, ni mabua nyɛnaa kɛjɛ shikpɔji ni agbɛ nyɛ ashwã amɛnɔ lɛ anɔ, ni mikɛ Israel shikpɔŋ lɛ baahã nyɛ.+ 18 Ni amɛbaaku amɛsɛɛ kɛya jɛmɛ ni amɛbaajie nyaŋemɔ nibii lɛ kɛ nifeemɔi ni yɔɔ nyaŋemɔ lɛ fɛɛ kɛje nɔ.+ 19 Ni mahã amɛ tsui ni efee ekome,*+ ni mikɛ mumɔ hee baawo amɛmli;+ ni majie tsui ni wa tamɔ tɛ* lɛ kɛje amɛgbɔmɔtsei lɛ amli,+ ni mahã amɛ tsui ni he jɔ,*+ 20 bɔ ni afee ni amɛnyiɛ yɛ mimlai lɛ amli, ni amɛbo miyiŋkpɛi* lɛ atoi ni amɛye nɔ. Kɛkɛ lɛ amɛbaatsɔ mimaŋ, ni mi hu matsɔ amɛ-Nyɔŋmɔ.”’
21 “‘“Shi mɛi ni ekpiliŋ amɛtsui akɛ amɛbaaya nɔ amɛfee amɛnyaŋemɔ nibii lɛ kɛ amɛnifeemɔi ni yɔɔ nyaŋemɔ lɛ, mikɛ nɔ ni baajɛ amɛgbɛi lɛ amli kɛba lɛ baaba amɛnɔ,”* Nuŋtsɔ Ofe Yehowa kɛɛ.’”
22 Ni kerubim lɛ hole amɛfiji anɔ, ni dade taii* lɛ yɛ amɛmasɛi kpaakpa,+ ni Israel Nyɔŋmɔ lɛ anunyam lɛ yɛ amɛyiteŋ.+ 23 Kɛkɛ ni Yehowa anunyam+ lɛ wó ehe nɔ yɛ maŋ lɛ nɔ ni eyawa yɛ gɔŋ ni yɔɔ maŋ lɛ bokãgbɛ lɛ yiteŋ.+ 24 Kɛkɛ ni mumɔ ko wó minɔ—yɛ Nyɔŋmɔ mumɔ lɛ ninaa mli—ni ekɛ mi tee mɛi ni aŋɔ amɛ nom lɛ aŋɔɔ yɛ Kaldea. Kɛkɛ ni ninaa ni mina lɛ je minɔ. 25 Ni mikɛɛ mɛi ni aŋɔ amɛ nom lɛ nibii fɛɛ ni Yehowa jie kpo etsɔɔ mi lɛ.