Ezekiel

43 Kɛkɛ ni ekɛ mi tee agbó ni hiɛ kwɛɔ bokãgbɛ lɛ naa.+ 2 Mina Israel Nyɔŋmɔ lɛ anunyam lɛ jɛ bokãgbɛ kɛmiiba yɛ jɛmɛ,+ ni egbee tamɔ nui babaoo agbɛɛmɔ;+ ni enunyam lɛ kpɛ shikpɔŋ lɛ nɔ.+ 3 Nɔ ni mina lɛ tamɔ ninaa ni mina be ni miba koni mibakpãtã* maŋ lɛ hiɛ lɛ, ni etamɔ nɔ ni mina yɛ Kebar faa lɛ he lɛ;+ ni mikɛ mihiɛ bu shi.

4 Kɛkɛ ni Yehowa anunyam lɛ tsɔ agbó ni hiɛ kwɛɔ bokãgbɛ lɛ mli kɛbote sɔlemɔ shĩa* lɛ mli.+ 5 Kɛkɛ ni mumɔ ko wó mi ni ekɛ mi ba mligbɛ kpo lɛ nɔ, ni mina akɛ sɔlemɔ shĩa lɛ mli eyi obɔ kɛ Yehowa anunyam lɛ.+ 6 Kɛkɛ ni minu ni mɔ ko jɛ sɔlemɔ shĩa lɛ mli ekɛ mi miiwie, ni nuu lɛ ba ni ebadamɔ mimasɛi.+ 7 Ekɛɛ mi akɛ:

“Gbɔmɔ bi,* mimaŋtsɛ sɛi+ lɛ maahe kɛ minajiashi maahe hu nɛ,+ he ni mahi shi yɛ Israelbii lɛ ateŋ kɛya naanɔ lɛ.+ Israel shĩa lɛ, amɛ kɛ amɛmaŋtsɛmɛi lɛ, ejeŋ misɛɛ dɔŋŋ* kɛwoŋ migbɛ́i krɔŋkrɔŋ lɛ he muji+ ni amɛkɛ amɛmaŋtsɛmɛi lɛ agbohii lɛ hu woŋ migbɛ́i krɔŋkrɔŋ lɛ he muji dɔŋŋ. 8 Akɛni amɛhã amɛshinaa shi bɛŋkɛ mishinaa shi, ni amɛhã amɛshinaatso lɛ bɛŋkɛ mishinaatso lɛ, ni gbogbo pɛ ni fo mi kɛ amɛ teŋ hewɔ lɛ,+ amɛkɛ nyaŋemɔ nibii ni amɛfee lɛ wo migbɛ́i krɔŋkrɔŋ lɛ he muji, no hewɔ lɛ, mikpãtã amɛhiɛ yɛ mimlifu lɛ mli.+ 9 Agbɛnɛ, hã amɛjie amɛtoigbele* lɛ kɛ amɛmaŋtsɛmɛi lɛ agbohii lɛ kɛje mihe kɛya sɛɛ shɔŋŋ, ni mahi shi yɛ amɛteŋ kɛya naanɔ.+

10 “Bo gbɔmɔ bi,* tsɔɔmɔ Israel shĩa lɛ bɔ ni sɔlemɔ shĩa lɛ yɔɔ,+ koni amɛhiɛ agboi yɛ amɛtɔmɔi lɛ ahewɔ,+ ni amɛkase sɔlemɔ shĩa lɛ he nitɛŋmɔ ni yɔɔ wolo nɔ lɛ.* 11 Kɛ́ amɛhiɛ gboi yɛ nibii fɛɛ ni amɛfee lɛ ahewɔ lɛ, hã amɛle bɔ ni sɔlemɔ shĩa lɛ he nitɛŋmɔ ni yɔɔ wolo nɔ lɛ ji, ehe gbɛjianɔtoo, hei ni atsɔɔ kɛjeɔ kpo kɛ hei ni atsɔɔ kɛboteɔ mli.+ Hã amɛle bɔ ni ehe nitɛŋmɔ ni yɔɔ wolo nɔ lɛ fɛɛ ji kɛ ehe gbɛtsɔɔmɔi lɛ, ehe nitɛŋmɔ ni yɔɔ wolo nɔ lɛ kɛ ehe mlai lɛ, ni oŋmala oshwie shi yɛ amɛhiɛ koni amɛna bɔ ni ehe nitɛŋmɔ ni yɔɔ wolo nɔ lɛ fɛɛ ji, ni amɛye ehe gbɛtsɔɔmɔi lɛ anɔ.+ 12 Sɔlemɔ shĩa lɛ he mla lɛ nɛ. Gɔŋ lɛ yiteŋ he ni ema lɛ kɛ gɔŋ lɛ yiteŋ shikpɔŋ muu lɛ fɛɛ ni bɔle lɛ lɛ ji he ni yɔɔ krɔŋkrɔŋ fe fɛɛ.+ Naa! Sɔlemɔ shĩa lɛ he mla lɛ nɛ.

13 “Afɔleshaa latɛ lɛ susumɔi yɛ ninetalɔi amli nɛ+ (akɛ dɛ̃ lɛɛmɔ kome kɛlɛ efata ninetalɔ kome fɛɛ ninetalɔ kome he).* Eshishi lɛ, ninetalɔ kome ni, elɛɛmɔ hu, ninetalɔ kome ni. Eshishi lɛ naabu ni bɔle he kɛkpe lɛ, elɛɛmɔ ji dɛ̃ ni agbɛ mli lɛɛmɔ kome.* Afɔleshaa latɛ lɛ shishi lɛ nɛ. 14 Kɛjɛ eshishi ni ma shikpɔŋ lɛ nɔ kɛyashi eshishi kpoku ni bɔle he lɛ nɔ lɛ, eji ninetalɔi enyɔ, ni elɛɛmɔ ji ninetalɔ kome. Kɛjɛ kpoku bibioo ni bɔle he lɛ nɔ kɛyashi kpoku agbo ni bɔle he lɛ nɔ lɛ, eji ninetalɔi ejwɛ, ni elɛɛmɔ ji ninetalɔ kome. 15 Nɔ ni ashãa afɔle lɛ yɛ nɔ lɛ kwɔlɛ ji ninetalɔi ejwɛ, ni akolontoi ejwɛ eje kpo yɛ nɔ ni ashãa afɔle lɛ yɛ nɔ lɛ he.+ 16 Nɔ ni ashãa afɔle lɛ yɛ nɔ lɛ hiɛ koji ejwɛ, ekɛlɛ ji ninetalɔi 12, ni elɛɛmɔ ji ninetalɔi 12.+ 17 Kpoku ni bɔle he kɛkpe lɛ koji ejwɛ lɛ kɛlɛ ji ninetalɔi 14, ni elɛɛmɔ ji ninetalɔi 14; ni enaabu ni bɔle he lɛ lɛɛmɔ ji ninetalɔ fã, ni eshishi lɛ kɛbɔle kɛkpe lɛ, ninetalɔ kome ni.

“Ni ehe atrakpoi lɛ hiɛ miikwɛ bokãgbɛ.”

18 Kɛkɛ ni ekɛɛ mi akɛ, “Gbɔmɔ bi,* nɔ ni Nuŋtsɔ Ofe Yehowa kɛɛ nɛ: ‘Kɛ́ ama afɔleshaa latɛ lɛ koni ashã shãa afɔlei yɛ nɔ, ni akɛ lá ashwã nɔ lɛ, gbɛtsɔɔmɔi ni esa akɛ akɛtsu nii nɛ.’+

19 “‘Okɛ tsinai lɛ ateŋ tsinanuu* ahã Levi osɔfoi ni jɛ Zadok+ seshibii lɛ ateŋ ni baa mihiɛ amɛbasɔmɔɔ mi lɛ koni amɛkɛshã esha afɔle,’+ Nuŋtsɔ Ofe Yehowa kɛɛ. 20 ‘Ŋɔɔ elá lɛ eko ni okɛkpa afɔleshaa latɛ lɛ akolontoi ejwɛ lɛ, kɛ kpoku ni bɔle he lɛ koji ejwɛ lɛ, kɛ eshishi lɛ naabu ni bɔle he kɛkpe lɛ ahe, koni okɛjie ehe esha lɛ ni okɛkpãtã ohã lɛ.+ 21 No sɛɛ lɛ, ŋɔɔ tsinanuu* lɛ, ni ji esha afɔle lɛ, koni oshã yɛ he ni ato yɛ sɔlemɔ shĩa lɛ mli akɛ ashã yɛ lɛ, yɛ jamɔhe lɛ sɛɛ.+ 22 Yɛ gbi ni ji enyɔ lɛ nɔ lɛ, okɛ abotianuu ni kpa ko bɛ ehe baahã akɛ esha afɔle; ni amɛkɛbaajie afɔleshaa latɛ lɛ he esha tamɔ bɔ ni amɛkɛ tsinanuu* lɛ jie ehe esha lɛ.’

23 “‘Kɛ́ ojie ehe esha lɛ ogbe naa lɛ, okɛ tsinai lɛ ateŋ tsinanuu* ni kpa ko bɛ ehe kɛ tooku lɛ ateŋ gwantɛŋnuu ni kpa ko bɛ ehe baahã. 24 Okɛ amɛ baaba Yehowa hiɛ, ni osɔfoi lɛ kɛ ŋoo baashwã amɛnɔ,+ ni amɛkɛ amɛ baashã shãa afɔle amɛhã Yehowa. 25 Okɛ abotianuu, kɛ tsinai lɛ ateŋ tsinanuu,* kɛ tooku lɛ ateŋ gwantɛŋnuu baahã gbii kpawo akɛ nɔ ni akɛbaashã esha afɔle daa gbi;+ okɛ kooloi ni kpa ko bɛ amɛhe* baahã. 26 Amɛkɛ amɛ baakpãtã amɛhã afɔleshaa latɛ lɛ gbii kpawo, ni amɛfee lɛ krɔŋkrɔŋ, ni amɛgbele naa kɛhã nitsumɔ. 27 Kɛ́ gbii lɛ ba naagbee lɛ, yɛ gbi ni ji kpaanyɔ lɛ nɔ,+ kɛ no sɛɛ lɛ, osɔfoi lɛ baashã nyɛshãa afɔlei lɛ kɛ nyɛnaanyobɔɔ afɔlei* lɛ yɛ afɔleshaa latɛ lɛ nɔ; ni maná nyɛhe miishɛɛ,’+ Nuŋtsɔ Ofe Yehowa kɛɛ.”