Yoshua

23 Gbii pii asɛɛ, be ni Yehowa ehã Israelbii lɛ ahe ejɔ amɛ+ kɛje amɛhenyɛlɔi ni bɔle amɛ lɛ adɛŋ, ni agbɛnɛ Yoshua egbɔ ni eye afii pii lɛ,+ 2 Yoshua tsɛ Israel muu fɛɛ,+ amɛnukpai lɛ kɛ amɛwekunukpai lɛ kɛ amɛkojolɔi lɛ kɛ amɛnɔkwɛlɔi lɛ kɛba,+ ni ekɛɛ amɛ akɛ: “Migbɔ; miye afii pii. 3 Ni nyɛ diɛŋtsɛ nyɛna nibii fɛɛ ni Yehowa, nyɛ-Nyɔŋmɔ lɛ, fee jeŋmaji nɛɛ fɛɛ yɛ nyɛhewɔ, ejaakɛ Yehowa, nyɛ-Nyɔŋmɔ lɛ, ji mɔ ni wu ehã nyɛ.+ 4 Naa, mitsɔ oshikifɔɔ+ nɔ mikɛ jeŋmaji ni shwɛ lɛ ashikpɔŋ lɛ hã* nyɛwekui lɛ akɛ gboshinii,+ ni agbɛnɛ hu, mikɛ jeŋmaji lɛ fɛɛ ni mikpãtã amɛhiɛ+ kɛjɛ Yordan lɛ naa kɛyashi Ŋshɔ Wulu* lɛ naa yɛ anaigbɛ* lɛ ashikpɔŋ lɛ hã nyɛwekui lɛ. 5 Ni Yehowa, nyɛ-Nyɔŋmɔ lɛ, ji mɔ ni tee nɔ etsirɛ amɛyisɛɛ kɛje nyɛhiɛ,+ ni eshwie amɛ* ehã nyɛ, ni nyɛŋɔ amɛshikpɔŋ lɛ akɛ nyɛnɔ, tamɔ bɔ ni Yehowa, nyɛ-Nyɔŋmɔ lɛ, wo nyɛ shi lɛ pɛpɛɛpɛ.+

6 “Agbɛnɛ, nyɛfea ekãa waa, ni nyɛboa nɔ fɛɛ nɔ ni aŋma yɛ Mose Mla wolo+ lɛ mli lɛ toi ni nyɛyea nɔ, ni tsɔɔ akɛ, nyɛkagbáa afã kɛmiije he kɛmiiya ninejurɔ loo abɛku,+ 7 ni nyɛkɛ jeŋmaji ni eshwɛ yɛ nyɛteŋ nɛɛ akabɔa kɔkɔɔkɔ.+ Nyɛkatsĩa amɛnyɔŋmɔi lɛ agbɛ́ii atã po,+ ni nyɛkɛ amɛ akakãa kitã, ni nyɛkasɔmɔa amɛ kɔkɔɔkɔ, ni nyɛkakotoa amɛ hu.+ 8 Shi nyɛkpɛtɛa Yehowa, nyɛ-Nyɔŋmɔ lɛ he,+ tamɔ bɔ ni nyɛfee kɛbashi ŋmɛnɛ gbi nɛɛ. 9 Yehowa baashwie jeŋmaji wuji ni he wala kɛje nyɛhiɛ,+ ejaakɛ mɔ ko mɔ ko nyɛko adamɔ nyɛhiɛ kɛbashi ŋmɛnɛ gbi nɛɛ.+ 10 Nyɛteŋ mɔ kome pɛ baawo mɛi akpe foi,+ ejaakɛ Yehowa, nyɛ-Nyɔŋmɔ lɛ, miiwu eehã nyɛ,+ tamɔ bɔ ni ewo nyɛ shi lɛ pɛpɛɛpɛ.+ 11 No hewɔ lɛ, nyɛhiɛ ahia nyɛhe nɔ be fɛɛ be*+ ní nyɛsumɔ Yehowa, nyɛ-Nyɔŋmɔ lɛ.+

12 “Shi kɛ́ nyɛku nyɛsɛɛ ni nyɛkɛ nyɛhe yakpɛtɛ mɛi ni eshwɛ yɛ jeŋmaji ni eshwɛ+ yɛ nyɛteŋ nɛɛ amli lɛ ahe, ni nyɛkɛ amɛ bote gbalashihilɛ mli,*+ ni nyɛkɛ amɛ bɔ, ni amɛ hu amɛkɛ nyɛ fee nakai lɛ, 13 no lɛ, nyɛnáa nyɛlea akɛ, bɔ fɛɛ bɔ ni fee lɛ, Yehowa, nyɛ-Nyɔŋmɔ lɛ, eyaŋ nɔ eshwieŋ jeŋmaji nɛɛ* ehãŋ nyɛ dɔŋŋ.+ Amɛbaatsɔmɔ tsɔne kɛ akpa kɛ kpãi ni akɛyiɔ mɔ yɛ nyɛŋmawuiaŋ+ kɛ ŋmei yɛ nyɛhiŋmɛiiaŋ kɛyashi nyɛhiɛ baakpãtã yɛ shikpɔŋ kpakpa nɛɛ ni Yehowa, nyɛ-Nyɔŋmɔ lɛ, kɛhã nyɛ lɛ nɔ.

14 “Agbɛnɛ naa! Eshwɛ fioo ni magbo,* ni nyɛle jogbaŋŋ kɛ nyɛtsui fɛɛ kɛ nyɛsusuma* fɛɛ akɛ nibii kpakpai fɛɛ ni Yehowa, nyɛ-Nyɔŋmɔ lɛ, wo nyɛ shi akɛ ebaafee ehã nyɛ lɛ ateŋ ekome folo po bɛ ni efeko. Fɛɛ eba mli ehã nyɛ. Emli wiemɔ kome folo po bɛ ni bako mli.+ 15 Shi bɔ ni nibii kpakpai fɛɛ ni Yehowa, nyɛ-Nyɔŋmɔ lɛ, wo nyɛ shi akɛ ebaafee ehã nyɛ lɛ eba mli lɛ,+ nakai nɔŋŋ Yehowa kɛ amanehulu fɛɛ amanehulu ni ewo he shi* lɛ baaba nyɛnɔ, ni ebaakpãtã nyɛhiɛ kɛje shikpɔŋ kpakpa nɛɛ ni Yehowa, nyɛ-Nyɔŋmɔ lɛ, kɛhã nyɛ lɛ nɔ.+ 16 Kɛ́ nyɛku kpaŋmɔ ni Yehowa, nyɛ-Nyɔŋmɔ lɛ, fã nyɛ akɛ nyɛye nɔ lɛ mli, ni nyɛtee nyɛyasɔmɔ nyɔŋmɔi krokomɛi ni nyɛkoto amɛ lɛ, no lɛ, Yehowa mli baawo la ewo nyɛ,+ ni nyɛhiɛ baakpãtã oya kɛje shikpɔŋ kpakpa ni ekɛhã nyɛ lɛ nɔ.”+