Zakaria

12 Sane ni ajaje atsɔɔ nɛ:

2 “Naa, mahã Yerusalem atsɔ kɔɔpoo* ni baahã majimaji fɛɛ ni bɔle lɛ lɛ adidãa; ni abaawo Yuda kɛ Yerusalem hu he ka.+ 3 Nakai gbi lɛ nɔ lɛ, mahã Yerusalem atsɔ tɛ ni tsii* mahã majimaji lɛ fɛɛ. Mɛi fɛɛ ni baawó nɔ lɛ, bɔ fɛɛ bɔ ni fee lɛ, amɛbaapila waa;+ ni shikpɔŋ lɛ nɔ jeŋmaji lɛ fɛɛ baabua amɛhe naa amɛwo lɛ.+ 4 Nakai gbi lɛ nɔ lɛ,” Yehowa kɛɛ, “Mahã ŋmiŋmi amɔ okpɔŋɔ fɛɛ okpɔŋɔ, ni mahã enɔtalɔ lɛ aye sɛkɛ. Mahã mihiŋmɛii ahi Yuda shĩa lɛ he, shi mahã majimaji lɛ akpɔŋɔi lɛ fɛɛ ashwila. 5 Ni Yuda sheikii* lɛ baakɛɛ yɛ amɛtsui mli akɛ, ‘Yerusalembii lɛ ji mihewalɛ ni jɛɔ Yehowa, taiatsɛ lɛ, ni ji amɛ-Nyɔŋmɔ lɛ ŋɔɔ.’+ 6 Nakai gbi lɛ nɔ lɛ, mahã Yuda sheikii lɛ atsɔ tamɔ gbɛ́* kɛ emli la yɛ tsei ateŋ, kɛ latso* ni miitso yɛ ŋmaa* ni afolɔ ni jwere shi sɛrɛnɛɛ ateŋ,+ ni amɛbaashã majimaji fɛɛ ni bɔle amɛ lɛ yɛ ninejurɔ kɛ abɛku nɔ,+ ni abaasaa ahi Yerusalem ekoŋŋ yɛ egbɛhe* lɛ, yɛ Yerusalem.+

7 “Ni Yehowa baahere Yuda mama tsũi lɛ ayiwala klɛŋklɛŋ, bɔ ni afee ni David shĩa lɛ fɛo* lɛ kɛ Yerusalembii lɛ ahe fɛo* lɛ akafe Yuda nɔ lɛ tsɔ. 8 Nakai gbi lɛ nɔ lɛ, Yehowa baatsɔ hebuu nɔ yɛ Yerusalem he kɛkpe;+ nakai gbi lɛ nɔ lɛ, mɔ ni baatɛ agbee shi* yɛ amɛteŋ lɛ baatsɔ tamɔ David, ni David shĩa lɛ baatsɔ tamɔ Nyɔŋmɔ, tamɔ Yehowa bɔfo ni nyiɛ amɛhiɛ.+ 9 Ni nakai gbi lɛ nɔ lɛ, bɔ fɛɛ bɔ ni fee lɛ, makpãtã jeŋmaji fɛɛ ni baate shi awo Yerusalem lɛ ahiɛ.+

10 “Mafɔse dromɔ kɛ faikpamɔ mumɔ mashwie David shĩa lɛ kɛ Yerusalembii lɛ fɛɛ anɔ, ni amɛbaakwɛ mɔ ni amɛtsu lɛ nɔ lɛ,+ ni amɛbaafó lɛ waa tamɔ afóɔ bi* kome pɛ lɛ; ni amɛbaaye ehe awerɛho waa tamɔ ayeɔ kromɔ bi* he awerɛho lɛ. 11 Nakai gbi lɛ nɔ lɛ, abaafó waa diɛŋtsɛ yɛ Yerusalem, tamɔ bɔ ni afó yɛ Hadadrimon, yɛ Megido Ŋa+ lɛ nɔ lɛ. 12 Ni shikpɔŋ lɛ baawo yara, weku fɛɛ weku baafó amɛ sɔŋŋ amɛyaafo; David shĩa lɛ weku lɛ sɔŋŋ baafó, ni amɛyei lɛ hu sɔŋŋ baafó; Natan+ shĩa lɛ weku lɛ sɔŋŋ baafó, ni amɛyei lɛ hu sɔŋŋ baafó; 13 Levi+ shĩa lɛ weku lɛ sɔŋŋ baafó, ni amɛyei lɛ hu sɔŋŋ baafó; Shimeibii+ lɛ ashĩa lɛ weku lɛ sɔŋŋ baafó, ni amɛyei lɛ hu sɔŋŋ baafó; 14 ni wekui fɛɛ ni eshwɛ lɛ ateŋ weku fɛɛ weku baafó amɛ sɔŋŋ amɛyaafo, ni amɛyei lɛ hu sɔŋŋ baafó.