Bɔfoi Lɛ Anitsumɔi
26 Agripa+ kɛɛ Paulo akɛ: “Oyɛ hegbɛ akɛ ojieɔ onaa.” Kɛkɛ ni Paulo kpã enine mli ni ejie enaa ekɛɛ:
2 “Maŋtsɛ Agripa, yɛ nibii fɛɛ ni Yudafoi lɛ kɛshwieɔ minɔ lɛ he lɛ,+ eŋɔɔ minaa akɛ bo ohiɛ majie minaa yɛ ŋmɛnɛ gbi nɛɛ, 3 titri lɛ akɛni ole Yudafoi lɛ akusumii kɛ naataamɔi ni yaa nɔ yɛ amɛteŋ lɛ jogbaŋŋ lɛ hewɔ. No hewɔ lɛ, miikpa bo fai ni oto otsui shi obo mi toi.
4 “Anɔkwa, yɛ nɔ ni kɔɔ bɔ ni mihi shi mihã kɛjɛ migbekɛbiiashi yɛ mimaŋbii lɛ ateŋ kɛ agbɛnɛ hu, yɛ Yerusalem lɛ he lɛ, Yudafoi fɛɛ+ 5 ni le mi lɛ le jogbaŋŋ akɛ, mihi shi yɛ wɔjamɔ lɛ mli kuu ni yɔɔ kpɛŋŋ fe fɛɛ lɛ naa,+ akɛ Farisifonyo,+ ni kɛ́ amɛmiisumɔ lɛ, amɛbaanyɛ amɛye enɛ he odase. 6 Shi amrɔ nɛɛ, shi ni Nyɔŋmɔ wo wɔtsɛmɛi lɛ he hiɛnɔkamɔ lɛ hewɔ+ midamɔ biɛ ni ayeɔ misane nɛɛ; 7 ni wɔwekui 12 lɛ hu hiɛ kã nɔ akɛ amɛbaaná shiwoo nɛɛ mlibaa lɛ he sɛɛ, ejaakɛ amɛkɛ hiɛdɔɔ ŋɔɔ sɔɔmɔ krɔŋŋ amɛhãa lɛ jenamɔ kɛ jetsɛremɔ. Maŋtsɛ, hiɛnɔkamɔ nɛɛ hewɔ Yudafoi lɛ kɛ sane fɔ̃ɔ minɔ nɛɛ.+
8 “Mɛni hewɔ nyɛteŋ mɛi komɛi susuɔ* akɛ ejeee anɔkwale akɛ Nyɔŋmɔ teɔ gbohii ashi lɛ? 9 Mi lɛ, misusu akɛ eji nɔ ni ja akɛ mafee nibii babaoo kɛte shi mawo Yesu, Nazaretnyo lɛ gbɛ́i lɛ. 10 Nakai pɛpɛɛpɛ mifee yɛ Yerusalem, ni akɛni miná hegbɛ kɛjɛ osɔfoi hiɛnaanɔbii lɛ adɛŋ hewɔ lɛ,+ miwo mɛi krɔŋkrɔŋi lɛ ateŋ mɛi babaoo tsuŋ;+ ni kɛ́ aaba abagbe amɛ lɛ, mifɔ̃ɔ oshiki mishiɔ amɛ. 11 Migbala amɛtoi shii abɔ yɛ kpeehei lɛ fɛɛ, koni no ahã amɛkwa amɛhemɔkɛyeli lɛ; ni akɛni mimli wo la waa wo amɛ hewɔ lɛ, miwa amɛ yi aahu kɛtee maji krokomɛi anɔ po.
12 “Be ni mitsuɔ enɛɛmɛi ahe nii lɛ, be ko lɛ, miifã gbɛ kɛmiiya Damasko yɛ osɔfoi hiɛnaanɔbii lɛ ahewalɛ kɛ gbɛŋmɛɛ naa, 13 ni shwane fintiŋŋ be ni minyiɛ gbɛ lɛ nɔ lɛ, Maŋtsɛ, mina la ko ni kpɛɔ fe hulu la kpɛ kɛjɛ ŋwɛi kɛbabɔle mi kɛ mɛi ni kɛ mi fãa gbɛ lɛ hu.+ 14 Ni be ni wɔ fɛɛ wɔgbeegbee shi lɛ, minu gbee ko kɛ mi wie yɛ Hebri wiemɔ mli akɛ: ‘Saul, Saul, mɛni hewɔ owaa mi yi? Kɛ́ otee nɔ oshi kpalamɔ tso* lɛ ntia lɛ, obaaye ohe awui.’ 15 Shi mikɛɛ, ‘Bo namɔ, Nuŋtsɔ?’ Ni Nuŋtsɔ lɛ kɛɛ: ‘Miji Yesu, mɔ ni owaa lɛ yi lɛ. 16 Shi tee shi ni odamɔ onaji anɔ. Enɛ hewɔ mijie mihe kpo mitsɔɔ bo nɛɛ, koni mahala bo akɛ tsulɔ kɛ odasefonyo kɛhã nibii ni ona kɛ nibii ni mahã ona yɛ mihe lɛ fɛɛ.+ 17 Ni majie bo kɛjɛ mɛi nɛɛ kɛ jeŋmaji lɛ adɛŋ, mɛi ni miitsu bo kɛya amɛŋɔɔ+ 18 koni oyagbele amɛhiŋmɛii,+ koni oyajie amɛ kɛjɛ duŋ mli+ kɛba la he,+ kɛ agbɛnɛ hu, kɛjɛ Satan hewalɛ mli+ kɛba Nyɔŋmɔ ŋɔɔ, koni akɛ amɛhe eshai ake amɛ+ ni amɛná gboshinii yɛ mɛi ni hemɔkɛyeli ni amɛyɔɔ yɛ mimli lɛ efee amɛ krɔŋkrɔŋ lɛ ateŋ lɛ.’
19 “No hewɔ lɛ, Maŋtsɛ Agripa, migbooo ŋwɛi ninaa lɛ nɔ toi, 20 shi moŋ miyajaje mitsɔɔ mɛi ni yɔɔ Damasko+ lɛ klɛŋklɛŋ, no sɛɛ lɛ, mɛi ni yɔɔ Yerusalem lɛ,+ kɛ agbɛnɛ hu, Yudea kpokpaa lɛ nɔ fɛɛ, kɛ jeŋmaji lɛ hu, akɛ amɛtsake amɛtsui ni amɛba Nyɔŋmɔ ŋɔɔ ni amɛtsu nitsumɔi ni sa tsuitsakemɔ.+ 21 No hewɔ ni Yudafoi lɛ mɔ mi yɛ sɔlemɔ shĩa lɛ ni amɛka akɛ amɛbaagbe mi lɛ.+ 22 Shi akɛni miná yelikɛbuamɔ kɛjɛ Nyɔŋmɔ dɛŋ hewɔ lɛ, mitee nɔ miye mɛi bibii kɛ mɛi wuji fɛɛ odase kɛbashi ŋmɛnɛ gbi nɛɛ, ni miwieee wiemɔ ko akɛ ja nɔ ni Gbalɔi lɛ kɛ Mose hu ewie akɛ ebaaba mli lɛ+— 23 no ji akɛ, Kristo lɛ baana nɔ,+ ni akɛni lɛ ji klɛŋklɛŋ mɔ ni abaatee lɛ shi kɛjɛ gbohii ateŋ hewɔ lɛ,+ ebaashiɛ etsɔɔ maŋ nɛɛ kɛ jeŋmaji lɛ fɛɛ, ni ebaahã amɛná la.”+
24 Agbɛnɛ, be ni Paulo wieɔ nibii nɛɛ kɛjieɔ enaa lɛ, Festo kɛ gbee ni wa kɛɛ akɛ: “Paulo, ooye sɛkɛ! Nikasemɔ babaoo ehã ooye sɛkɛ!” 25 Shi Paulo kɛɛ: “Anunyamtsɛ Festo, jeee sɛkɛ miyeɔ, shi moŋ, miiwie wiemɔi ni ji anɔkwale ni jwɛŋmɔ yɔɔ mli. 26 Anɔkwa, maŋtsɛ ni miwieɔ kɛ nɔmimaa mitsɔɔ lɛ nɛɛ le nibii nɛɛ ahe saji jogbaŋŋ; ni miheɔ miyeɔ jogbaŋŋ akɛ ehiɛ hoko nibii nɛɛ eko eko nɔ ejaakɛ jeee teemɔŋ he ko afee enɛ yɛ.+ 27 Maŋtsɛ Agripa, ani oheɔ Gbalɔi lɛ oyeɔ? Mile akɛ oheɔ oyeɔ.” 28 Shi Agripa kɛɛ Paulo akɛ: “Eshwɛ fioo ni obaahã miyiŋ atsɔ ni matsɔ Kristofonyo.” 29 Kɛkɛ ni Paulo kɛɛ akɛ: “Miná ni kulɛ Nyɔŋmɔ hã eba mli akɛ, kɛ́ eshwɛ fioo jio, yɛ be kplaŋŋ mli jio lɛ, jeee bo pɛ, shi moŋ mɛi fɛɛ ni boɔ mi toi ŋmɛnɛ lɛ hu atsɔmɔ tamɔ mi, shi gboklɛi nɛɛ eko kɛkɛ ni akawo amɛ.”
30 Kɛkɛ ni maŋtsɛ lɛ te shi, ni amralo lɛ kɛ Bernike kɛ hii ni kɛ amɛ tara shi lɛ hu te shi. 31 Shi be ni amɛyaa lɛ amɛkɛ amɛhe bɔi wiemɔ amɛkɛɛ: “Nɔ ko bɛ nuu nɛɛ he ni tsɔɔ akɛ esa gbele loo tsuŋwoo.”+ 32 Kɛkɛ ni Agripa kɛɛ Festo akɛ: “Eji nuu nɛɛ kɛ esane lɛ hãko Kaisare kulɛ, abaanyɛ aŋmɛɛ ehe.”+