1 Mose

37 Yakob tee nɔ ehi Kanaan shikpɔŋ lɛ nɔ, he ni epapa hi akɛ gbɔ lɛ.+

2 Yakob he sane nɛ.

Be ni oblanyo Yosef+ eye afii 17 lɛ, ekɛ epapa ŋamɛi ni ji Bilha+ kɛ Zilpa+ bihii lɛ kwɛɔ toi+ lɛ. Ni Yosef babɔ epapa nibii gbohii ní enyɛmimɛi hii lɛ feɔ lɛ. 3 Ni Israel sumɔɔ Yosef fe ebihii krokomɛi lɛ fɛɛ,+ ejaakɛ eji bi ni efɔ yɛ egbɔlɛ beiaŋ, ni ehã akpɛ atade kakadaŋŋ fɛfɛo* ko ahã lɛ. 4 Be ni enyɛmimɛi hii lɛ na akɛ amɛpapa sumɔɔ lɛ fe enyɛmimɛi hii krokomɛi lɛ fɛɛ lɛ, amɛbɔi lɛ nyɛɛ, ni amɛnyɛɛɛ amɛkɛ lɛ awie yɛ toiŋjɔlɛ mli.

5 Sɛɛ mli lɛ, Yosef la lamɔ ko, ni egba enyɛmimɛi lɛ,+ ni amɛná yiŋtoo kroko ni amɛaadamɔ nɔ amɛnyɛ lɛ. 6 Ekɛɛ amɛ akɛ: “Nyɛfainɛ, nyɛboa lamɔ ní mila nɛɛ toi. 7 No mli lɛ, wɔmiifimɔ ŋmaa* kei yɛ ŋmɔ lɛ teŋ, kɛkɛ ni mike lɛ te shi damɔ shi jaŋŋ, ni nyɛkei lɛ babɔle mike lɛ ni amɛkoto lɛ.”+ 8 Enyɛmimɛi lɛ kɛɛ lɛ akɛ: “Ani obaafee ohe maŋtsɛ yɛ wɔnɔ, ní oye wɔnɔ?”+ No hewɔ lɛ, amɛná yiŋtoo kroko ní amɛaadamɔ nɔ amɛnyɛ lɛ, yɛ elamɔi lɛ kɛ nɔ ni ewie lɛ hewɔ.

9 No sɛɛ lɛ, ela lamɔ kroko hu, ni egba enyɛmimɛi hii lɛ lamɔ lɛ ekɛɛ: “Mila lamɔ kroko hu. Yɛ enɛ mli lɛ, hulu lɛ kɛ nyɔɔŋtsere lɛ kɛ ŋulamii 11 miikoto mi.”+ 10 Ni egba epapa kɛ enyɛmimɛi hii lɛ hu lamɔ lɛ, ni epapa kã ehiɛ ni ebi lɛ akɛ: “Mɛni ji olamɔ nɛɛ shishi? Ani mi kɛ omami kɛ onyɛmimɛi hii lɛ baaba abakula shi ni wɔkɛ wɔhiɛ abumɔ shi yɛ ohiɛ?” 11 Ni enyɛmimɛi hii lɛ ye ehe awuŋa,+ shi epapa kɛ wiemɔ lɛ to ejwɛŋmɔ mli.

12 Agbɛnɛ, enyɛmimɛi hii lɛ kɛ amɛpapa tooku lɛ tee niyeli yɛ he ko ni bɛŋkɛ Shekem.+ 13 Sɛɛ mli lɛ, Israel kɛɛ Yosef akɛ: “Onyɛmimɛi hii lɛ miikwɛ toi lɛ yɛ he ko ni bɛŋkɛ Shekem, aloo jeee nakai? Ba ní matsu bo amɛŋɔɔ.” Kɛkɛ ni ekɛɛ lɛ akɛ: “Mifee klalo!” 14 No hewɔ lɛ, Israel kɛɛ lɛ akɛ: “Ofainɛ, yaa ní oyakwɛ akɛ onyɛmimɛi hii lɛ yɛ jogbaŋŋ lo. Kwɛmɔ bɔ ni toi lɛ yɔɔ, ni obakɛɛ mi.” Kɛkɛ ni ewo lɛ gbɛ kɛjɛ Hebron+ jɔɔ lɛ mli, ni eyi mli akɛ eeya Shekem. 15 Sɛɛ mli lɛ, nuu ko na lɛ ní eetsomlo yɛ ŋa lɛ mli. Nuu lɛ bi lɛ akɛ: “Mɛni otaoɔ?” 16 Kɛkɛ ni ekɛɛ: “Miitao minyɛmimɛi lɛ. Ofainɛ, kɛɛmɔ mi, nɛgbɛ amɛkwɛɔ toi lɛ yɛ?” 17 Nuu lɛ tsa nɔ ekɛɛ akɛ: “Amɛshi biɛ, ejaakɛ minu ni amɛmiikɛɛ akɛ, ‘Nyɛhãa wɔyaa Dotan.’” No hewɔ lɛ, Yosef tiu enyɛmimɛi lɛ, ni eyana amɛ yɛ Dotan.

18 Agbɛnɛ, amɛhiŋmɛi gba enɔ yɛ shɔŋŋ, ni dani ebaashɛ amɛmasɛi lɛ amɛbɔi eyi nɔ kpaŋmɔ akɛ amɛbaagbe lɛ. 19 No hewɔ lɛ, amɛkɛɛkɛɛ amɛhe akɛ: “Naa! Nakai lamɔiatsɛ lɛ baa lɛ.+ 20 Agbɛnɛ, nyɛbaa, nyɛhãa wɔgbea lɛ ni wɔshɛa lɛ wɔfɔ̃a bui ní akɛtoɔ nu lɛ eko mli, ni wɔbaakɛɛ akɛ kooloo awuiyelɔ ko eye lɛ. Kɛkɛ lɛ, wɔbaakwɛ bɔ ni elamɔi lɛ anaa baayakpa ahã.” 21 Be ni Ruben+ nu enɛ lɛ, etao akɛ ejie lɛ yɛ amɛdɛŋ. No hewɔ lɛ ekɛɛ: “Nyɛkahãa wɔgbea lɛ.”*+ 22 Ruben kɛɛ amɛ akɛ: “Nyɛkashwiea lá shi.+ Nyɛshɛa lɛ nyɛfɔ̃a bu ni akɛtoɔ nu nɛɛ ni yɔɔ ŋa lɛ nɔ lɛ mli, shi nyɛkayea lɛ awui.”*+ Eyiŋtoo ji koni ejie lɛ yɛ amɛdɛŋ bɔ ni afee ni ekɛ lɛ aku sɛɛ ayahã epapa.

23 No hewɔ lɛ, be ni Yosef bashɛ enyɛmimɛi lɛ aŋɔɔ nɔŋŋ lɛ, amɛjie etade kakadaŋŋ lɛ yɛ ehe, atade kakadaŋŋ fɛfɛo ni ewo lɛ,+ 24 ni amɛmɔ lɛ ni amɛshɛ lɛ amɛfɔ̃ bu ni akɛtoɔ nu lɛ mli. Nakai beiaŋ lɛ, bu folo ni; nu bɛ mli.

25 Kɛkɛ ni amɛtara shi koni amɛye nii. Be ni amɛwó amɛhiɛ nɔ lɛ, amɛna Ishmaelbii+ akuu ko kɛ amɛkooloi jɛ Gilead miiba. Amɛfukpɔŋɔi lɛ tere labdanum* kɛ balsam kɛ tso he totoi ni ama yɔɔ mli,+ ni amɛnyiɛ gbɛ kɛmiikpeleke shi kɛmiiya Ejipt. 26 Kɛkɛ ni Yuda kɛɛ enyɛmimɛi lɛ akɛ: “Kɛ́ wɔgbe wɔnyɛmi nuu lɛ ni wɔtsimɔ elá nɔ lɛ, mɛɛ sɛɛ wɔbaaná?+ 27 Agbɛnɛ, nyɛbaa, nyɛhãa wɔhɔ̃a lɛ+ wɔhãa Ishmaelbii lɛ, ni nyɛkahãa wɔkɛ wɔnine taa ehe. Yɛ anɔkwale mli lɛ, wɔnyɛmi nuu ni, wɔheloo ni.” No hewɔ lɛ, amɛbo amɛnyɛmi nuu lɛ toi. 28 Ni be ni Midianbii+ jarayelɔi lɛ hoɔ lɛ, Yosef nyɛmimɛi lɛ gbala lɛ kɛje bu ni akɛtoɔ nu lɛ mli, ni amɛhɔ̃ɔ lɛ amɛhã Ishmaelbii lɛ amɛhe jwiɛtɛi kapɛji 20.+ Hii nɛɛ ŋɔ Yosef kɛtee Ejipt.

29 Sɛɛ mli be ni Ruben ku esɛɛ eba bu ni akɛtoɔ nu lɛ he ní ebana akɛ Yosef bɛ bu lɛ mli lɛ, egbala ehe atadei lɛ. 30 Be ni eku esɛɛ kɛba enyɛmimɛi lɛ aŋɔɔ lɛ, ebo akɛ: “Gbekɛ lɛ etee! Ni mi lɛ—mɛni mafee?”

31 No hewɔ lɛ, amɛkɔ Yosef atade kakadaŋŋ lɛ, ni amɛgbe abotianuu, ni amɛkɛ atade kakadaŋŋ lɛ tsɔ lá lɛ mli. 32 No sɛɛ lɛ, amɛtsu akɛ atade kakadaŋŋ fɛfɛo lɛ yahã amɛpapa kɛ wiemɔi nɛɛ akɛ: “Nɔ ni wɔna nɛ. Ofainɛ, kwɛmɔ akɛ obinuu lɛ atade kakadaŋŋ lɛ ni loo jeee no ni.”+ 33 Ni ekwɛ atade lɛ, ni ebo waa akɛ: “Mibinuu lɛ atade kakadaŋŋ lɛ ni! Benɛ kooloo awuiyelɔ ko ni eye lɛ lɛ! Ekã shi faŋŋ akɛ, etserɛ Yosef mli dukuduku!” 34 Kɛkɛ ni Yakob gbála ehe atadei lɛ, ni ekɛ kpekpe ŋmɔ ehɛ, ni eye ebinuu lɛ he awerɛho gbii pii. 35 Ni ebihii kɛ ebiyei lɛ fɛɛ bɔ mɔdɛŋ shii abɔ akɛ amɛbaashɛje emii, shi ekpɛlɛɛɛ miishɛjemɔ, ni ekɛɛ: “Maye mibinuu lɛ he awerɛho kɛaakpeleke shi kɛya Gbonyobu*+ lɛ mli!” Ni epapa tee nɔ efó lɛ.

36 Agbɛnɛ, Midianbii lɛ yahɔ̃ɔ lɛ yɛ Ejipt amɛhã Potifar, ní eji Farao maŋtsɛ shĩa lɛ onukpai lɛ ateŋ mɔ kome+ kɛ bulɔi lɛ anɔ onukpa hu lɛ.+