Rut
4 Agbɛnɛ, Boaz tee maŋ lɛ agbó+ lɛ naa ni eyata jɛmɛ. Ni naa! mɔ ni Boaz tsĩ etã+ akɛ lɛ ji kpɔ̃lɔ lɛ baho. Kɛkɛ ni Boaz kɛɛ akɛ: “Ashimashi, ba ni obata biɛ.” Kɛkɛ ni eba ni ebata shi. 2 Kɛkɛ ni Boaz tsɛ maŋ lɛ mli onukpai nyɔŋma,+ ni ekɛɛ amɛ akɛ: “Nyɛbataraa biɛ.” Kɛkɛ ni amɛbatara shi.
3 Agbɛnɛ Boaz kɛɛ kpɔ̃lɔ+ lɛ akɛ: “Naomi, mɔ ni ku esɛɛ kɛjɛ Moab kpokpaa lɛ nɔ+ kɛba lɛ miihɔ̃ɔ wɔnyɛmi nuu Elimelek+ shikpɔŋ lɛ. 4 No hewɔ lɛ, mifee mijwɛŋmɔ akɛ mahã ole, ni makɛɛ bo akɛ, ‘Hemɔ yɛ maŋbii lɛ kɛ wɔmaŋ lɛ nɔ onukpai lɛ ahiɛ.+ Kɛ́ obaakpɔ̃ lɛ, kpɔ̃. Shi kɛ́ okpɔ̃ɔɔ lɛ, hã male, ejaakɛ bo klɛŋklɛŋ esa akɛ okpɔ̃, ni bo osɛɛ lɛ, mi.’” Eto he ehã lɛ akɛ: “Miisumɔ ni makpɔ̃.”+ 5 Kɛkɛ ni Boaz kɛɛ akɛ: “Gbi nɔ ni obaahe shikpɔŋ lɛ yɛ Naomi dɛŋ lɛ, esa akɛ ohe yɛ Rut, Moab yoo lɛ, ni ji nuu lɛ ni egbo lɛ ŋa lɛ hu dɛŋ, bɔ ni afee ni nuu lɛ ni egbo lɛ gbɛ́i abakã egboshinii lɛ nɔ.”+ 6 Enɛ hewɔ lɛ, kpɔ̃lɔ lɛ kɛɛ akɛ: “Minyɛŋ makpɔ̃, ejaakɛ no baanyɛ afite mi diɛŋtsɛ migboshinii lɛ. Mikɛ hegbɛ ni miyɔɔ akɛ kpɔ̃lɔ lɛ ehã bo koni okpɔ̃ ohã ohe, ejaakɛ minyɛŋ makpɔ̃.”
7 Yɛ blema lɛ, kɛ́ mɔ ko kpɔ̃ nɔ ko loo ekɛ hegbɛ ni eyɔɔ akɛ kpɔ̃lɔ lɛ hã mɔ kroko yɛ Israel lɛ, nɔ ni akɛmaa nɔ mi nɛ: Esa akɛ mɔ lɛ ajie etokota+ ni ekɛhã mɔ kroko lɛ, ni gbɛ nɛɛ nɔ atsɔɔ amaa gbeekpamɔ ko nɔ mi* yɛ Israel. 8 No hewɔ lɛ, be ni kpɔ̃lɔ lɛ kɛɛ Boaz akɛ, “Hemɔ ohã ohe” lɛ, ejie etokota lɛ. 9 Kɛkɛ ni Boaz kɛɛ onukpai lɛ kɛ mɛi lɛ fɛɛ akɛ: “Nyɛji odasefoi+ ŋmɛnɛ akɛ miihe nibii fɛɛ ni ji Elimelek nɔ, kɛ nibii fɛɛ ni ji Kilion kɛ Malon nɔ lɛ yɛ Naomi dɛŋ. 10 Agbɛnɛ hu, miiŋɔ Rut, Moab yoo lɛ, ni ji Malon ŋa lɛ akɛ miŋa bɔ ni afee ni nuu lɛ ni egbo lɛ gbɛ́i abakã egboshinii lɛ nɔ,+ koni nuu lɛ ni egbo lɛ gbɛ́i akalaaje yɛ enyɛmimɛi hii lɛ ateŋ kɛ agbɛnɛ hu yɛ maŋbii lɛ ateŋ.* Nyɛji odasefoi ŋmɛnɛ.”+
11 Kɛkɛ ni mɛi fɛɛ ni yɔɔ maŋ lɛ agbó lɛ naa lɛ kɛ onukpai lɛ kɛɛ akɛ: “Wɔji odasefoi! Yehowa ahã yoo ni baa oshĩa lɛ mli lɛ atsɔ tamɔ Rahel kɛ Lea, ni ji yei enyɔ ni Israel maŋ lɛ jɛ amɛmli lɛ.+ Shweremɔ yɛ Efrata+ ni oná gbɛ́i kpakpa* yɛ Betlehem.+ 12 Seshi ni Yehowa baatsɔ oblayoo nɛɛ nɔ ehã oná lɛ ahã oshĩa lɛ atsɔ tamɔ Perez,+ mɔ ni Tamar kɛ Yuda fɔ lɛ shĩa lɛ.”+
13 No hewɔ lɛ, Boaz ŋɔ Rut, ni ebatsɔ eŋa. Ekɛ lɛ ná bɔlɛ, ni Yehowa hã ená musu ni efɔ binuu. 14 Kɛkɛ ni yei lɛ kɛɛ Naomi akɛ: “Ajie Yehowa, mɔ ni ehã oná kpɔ̃lɔ ŋmɛnɛ lɛ yi. Ajaje egbɛ́i lɛ yɛ Israel! 15 Ehã* oná wala* ekoŋŋ, ni ebaakwɛ bo yɛ ogbɔlɛ beiaŋ, ejaakɛ oshaayoo ni sumɔɔ bo+ ni hi hã bo fe bihii kpawo lɛ ni fɔ lɛ.” 16 Naomi wó gbekɛ lɛ, ni ekɛ lɛ ŋmɛ ekpɔkɔiaŋ, ni ebatsɔ ekwɛlɔ. 17 Kɛkɛ ni yei ni yɔɔ akutso lɛ mli lɛ wo gbekɛ lɛ gbɛ́i. Amɛkɛɛ akɛ: “Afɔ binuu ahã Naomi,” ni amɛtsɛ lɛ Obed.+ Lɛ efɔ Yishai,+ ni ji David tsɛ lɛ.
18 Perez+ seshibii* lɛ nɛ: Perez fɔ Hezron;+ 19 Hezron fɔ Ram; Ram fɔ Aminadab;+ 20 Aminadab+ fɔ Nahashon; Nahashon fɔ Salmon; 21 Salmon fɔ Boaz; Boaz fɔ Obed; 22 Obed fɔ Yishai;+ ni Yishai fɔ David.+