Bɔfoi Lɛ Anitsumɔi
28 Be ni wɔyashɛ shweshweeshwe lɛ, wɔná wɔle akɛ atsɛɔ ŋshɔkpɔ lɛ Malta.+ 2 Ni mɛi ni wieɔ maŋsɛɛ wiemɔ* lɛ kɛ wɔ ye yɛ mlihilɛ ni nɔ bɛ naa.* Amɛshɛre la ni amɛhere wɔ fɛɛ hiɛmɛɛ ejaakɛ no mli lɛ nugbɔ miinɛ ni fɛ̃i miiye. 3 Shi be ni Paulo bua lai naa ni ekɛyawo la lɛ mli lɛ, onufu ko je kpo kɛjɛ mli yɛ la lɛ naawalɛ lɛ hewɔ, ni ekpɛtɛ Paulo nine he. 4 Be ni mɛi ni wieɔ maŋsɛɛ wiemɔ lɛ ahiŋmɛi gba kooloo ni pɔizin yɔɔ emli lɛ nɔ akɛ etsotsoro enine he lɛ, amɛkɛɛkɛɛ amɛhe akɛ: “Ekã shi faŋŋ akɛ nuu nɛɛ gbɔmɔgbelɔ ji lɛ, ni eyɛ mli akɛ ejɛ ŋshɔ lɛ mli ebashɛ shi shweshweeshwe moŋ, shi Jalɛ Sane* eŋmɛɛɛ lɛ gbɛ ni eya nɔ ehi wala mli.” 5 Shi ehwanya kooloo lɛ ewo la lɛ mli ni nɔ ko nɔ ko efeee lɛ. 6 Shi amɛkpa gbɛ akɛ ebaafuu loo ebaatswa shi egbo trukaa. Be ni amɛkwɛ gbɛ aahu ni nɔ ko nɔ ko efeee lɛ lɛ, amɛtsake amɛjwɛŋmɔ ni amɛbɔi kɛɛmɔ akɛ, nyɔŋmɔ ko ji lɛ.
7 Agbɛnɛ ŋshɔkpɔ lɛ nɔ hiɛnaanɔ gbɔmɔ ni atsɛɔ lɛ Publio lɛ yɛ shikpɔji yɛ jɛmɛ niiaŋ, ni ehere wɔ hiɛmɛɛ ni efee wɔ gbɔ gbii etɛ. 8 Eba mli akɛ Publio papa kã saa nɔ kɛ atridii, ni emusuŋ hu etsɔ waa, ni Paulo tee eŋɔɔ ni eyasɔle, ekɛ eniji ŋmɛlɛ enɔ ni etsa lɛ.+ 9 Be ni afee enɛ sɛɛ lɛ, mɛi krokomɛi hu ni yɔɔ ŋshɔkpɔ lɛ nɔ ni bɛ hewalɛ lɛ bɔi eŋɔɔbaa, ni atsa amɛ.+ 10 Amɛ hu amɛke wɔ nibii babaoo kɛwo wɔhiɛ nyam, ni be ni wɔmiiba wɔbawo meele kɛshi lɛ, amɛhã wɔ nɔ fɛɛ nɔ ni he hiaa wɔ.
11 Nyɔji etɛ sɛɛ lɛ, wɔwo meele ko ni ekadimɔ nɔ yɛ eyitsogbɛ ji “Zeu Bihii.” Meele lɛ jɛ Aleksandria ni ebaye fɛ̃i be lɛ yɛ ŋshɔkpɔ lɛ nɔ. 12 Wɔyadamɔ Sirakusa ni wɔhi jɛmɛ gbii etɛ; 13 ni wɔjɛ jɛmɛ lɛ, wɔlɔgɔ shi kɛba Regio. Enɔ jetsɛremɔ lɛ, wuoyi kɔɔyɔɔ ko batswa ni wɔyashɛ Puteoli yɛ gbi ni ji enyɔ lɛ nɔ. 14 Wɔyana nyɛmimɛi yɛ jɛmɛ ni amɛkpa wɔ fai ni wɔkɛ amɛ ahi shi gbii kpawo, kɛkɛ ni wɔshi koni wɔya Roma. 15 Be ni nyɛmimɛi ni yɔɔ jɛmɛ lɛ nu wɔhe sane lɛ, amɛba koni amɛkɛ wɔ abakpe yɛ Apio Jara lɛ nɔ tɔ̃ɔ kɛ Gbɔiatoohei Etɛ lɛ. Be ni Paulo hiŋmɛi gba amɛnɔ lɛ, eda Nyɔŋmɔ shi ni ená ekãa.+ 16 Agbɛnɛ, be ni wɔbote Roma lɛ, aŋmɛ Paulo gbɛ ni ekome ehi shi, lɛ kɛ asraafonyo ni buɔ ehe lɛ.
17 Shi gbii etɛ sɛɛ lɛ, etsɛ Yudafoi lɛ ahiɛnaanɔbii lɛ kɛbakpe. Be ni amɛnaa ebakpe shi lɛ, ekɛɛ amɛ akɛ: “Ataamɛi, nyɛmimɛi, eyɛ mli akɛ mifeko nɔ ko mishiko maŋbii lɛ loo wɔtsɛmɛi lɛ akusumii lɛ moŋ,+ shi akɛ mi ewo Romabii lɛ adɛŋ akɛ gboklɛfonyo kɛjɛ Yerusalem.+ 18 Ni be ni mɛi nɛɛ tao misane lɛ mli lɛ,+ amɛtao akɛ amɛŋmɛɛ mihe, ejaakɛ amɛnaaa nɔ ko ni tsɔɔ akɛ misa gbele yɛ mihe.+ 19 Shi be ni Yudafoi lɛ ekpɛlɛɛɛ lɛ, no nyɛ minɔ koni mikɛ misane lɛ ahã Kaisare,+ shi jeee akɛ miyɛ sane ko ni mikɛbaafɔ̃ mimaŋ lɛ nɔ. 20 Enɛ hewɔ lɛ, mibi ni mana nyɛ, koni mikɛ nyɛ awie, ejaakɛ Israel hiɛnɔkamɔ lɛ hewɔ awo mi nɛkɛ tsein* nɛɛ.”+ 21 Amɛkɛɛ lɛ akɛ: “Wɔnine shɛko woji anɔ kɛjɛko Yudea yɛ ohewɔ, ni nyɛmimɛi ni jɛ jɛmɛ amɛba lɛ hu eko eko ebagbako loo ebawieko ohe sane gbonyo ko. 22 Shi wɔsusuɔ akɛ ehi akɛ wɔɔbo osusumɔi lɛ toi, ejaakɛ yɛ anɔkwale mli lɛ, nɛkɛ jamɔ kuu nɛɛ,+ wɔle akɛ awieɔ he efɔŋ yɛ he fɛɛ he.”+
23 Ni amɛto lɛ gbi, ni amɛteŋ mɛi babaoo ba eŋɔɔ yɛ eshihilɛhe lɛ. Ni kɛjɛ leebi kɛyashi gbɛkɛ lɛ, eye Nyɔŋmɔ Maŋtsɛyeli lɛ he odase fitsofitso kɛgbála sane lɛ mli etsɔɔ amɛ, ni ejɛ Mose Mla+ lɛ kɛ Gbalɔi+ lɛ fɛɛ mli ebɔ mɔdɛŋ akɛ ebaahã amɛyiŋ atsɔ kɛba Yesu gbɛfaŋ.+ 24 Mɛi komɛi bɔi hemɔkɛyeli námɔ yɛ nibii ni ewie lɛ amli; mɛi krokomɛi heee amɛyeee. 25 Ni akɛni amɛkɛ amɛhe kpãaa gbee hewɔ lɛ, amɛbɔi shimɔ, ni Paulo wie wiemɔ kome nɛɛ:
“Eja pɛ akɛ mumɔ krɔŋkrɔŋ lɛ tsɔ gbalɔ Yesaia nɔ ewie etsɔɔ nyɛtsɛmɛi lɛ 26 akɛ, ‘Yaa maŋ nɛɛ ŋɔɔ ni oyakɛɛ akɛ: “Nu lɛ nyɛbaanu moŋ nɛ, shi nyɛnuŋ shishi kɔkɔɔkɔ, ni kwɛmɔ lɛ nyɛbaakwɛ moŋ nɛ, shi nyɛnaŋ kɔkɔɔkɔ.+ 27 Ejaakɛ maŋ nɛɛ tsui ekpiliŋ, ni amɛkɛ amɛtoii nuɔ moŋ shi amɛfeee he nɔ ko, ni amɛŋamɔ amɛhiŋmɛii, koni amɛkɛ amɛhiŋmɛii akana ni amɛkɛ amɛtoii akanu ni amɛkɛ amɛtsui akanu shishi ni amɛku amɛsɛɛ, ni mitsa amɛ.”’+ 28 No hewɔ lɛ, nyɛnáa nyɛlea akɛ atsu yiwalaheremɔ ni jɛ Nyɔŋmɔ ŋɔɔ nɛɛ kɛtee jeŋmaji lɛ aŋɔɔ;+ bɔ fɛɛ bɔ ni fee lɛ, amɛbaabo toi.”+ 29* ——
30 No hewɔ lɛ, ehi jɛmɛ afii enyɔ sɔŋŋ yɛ shĩa ni lɛ diɛŋtsɛ eyahai lɛ mli,+ ni ehereɔ mɛi fɛɛ ni baa eŋɔɔ lɛ hiɛmɛɛ, 31 ni eshiɛɔ Nyɔŋmɔ Maŋtsɛyeli lɛ etsɔɔ amɛ ni ekɛ nɔmimaa babaoo* tsɔɔ amɛ Nuŋtsɔ Yesu Kristo he saji,+ ni mɔ ko mɔ ko etsĩii lɛ gbɛ.