1 Mose
25 Ni Abraham saa eŋɔ yoo kroko akɛ eŋa, ni egbɛ́i ji Ketura. 2 Sɛɛ mli lɛ, Ketura fɔ Zimran kɛ Yokshan kɛ Medan kɛ Midian+ kɛ Ishbak kɛ Shua+ ehã lɛ.
3 Yokshan fɔ Sheba kɛ Dedan.
Dedan bihii ji Ashur kɛ Letush kɛ Leum.*
4 Midian bihii ji Efa kɛ Efer kɛ Hanok kɛ Abida kɛ Eldaa.
Ketura bihii ji mɛnɛɛmɛi fɛɛ.
5 Sɛɛ mli lɛ, Abraham kɛ nɔ fɛɛ nɔ ni eyɔɔ lɛ hã Isak,+ 6 shi Abraham ke bihii ní ekɛ ehemɛi* lɛ fɔ lɛ nii. Ni be ni eyɔɔ wala mli lolo lɛ, ewo amɛ gbɛ kɛshi ebinuu Isak masɛi kɛtee bokãgbɛ,+ yɛ Bokã shikpɔŋ lɛ nɔ. 7 Afii ni Abraham ye yɛ ewala shihilɛ mli ji afii 175. 8 Ni Abraham mu enaagbee mumɔ, ni egbo be ni egbɔ jogbaŋŋ, ni eye afii pii, ni etsui nyɔ emli yɛ shihilɛ mli, ni afu lɛ tamɔ afu etsɛmɛi lɛ.* 9 Ebihii ni ji Isak kɛ Ishmael fu lɛ yɛ tɛkplo ni yɔɔ Makpela lɛ mli, yɛ Hitnyo Zohar binuu Efron shikpɔŋ lɛ ni yɔɔ Mamre+ hiɛ lɛ nɔ, 10 shikpɔŋ ní Abraham hé yɛ Hetbii lɛ adɛŋ lɛ. Jɛmɛ afu Abraham afata eŋa Sara he yɛ.+ 11 Abraham gbele sɛɛ lɛ, Nyɔŋmɔ tee nɔ ejɔɔ ebinuu Isak,+ ni Isak hi shi yɛ he ko ni bɛŋkɛ Beer-lahai-roi.+
12 Ishmael,+ Abraham binuu ní Ejiptnyo Hagar,+ ni ji Sara tsulɔ yoo lɛ fɔ ehã Abraham lɛ he sane nɛ.
13 Agbɛnɛ, Ishmael bihii lɛ agbɛ́ii nɛ, aŋmala amɛgbɛ́ii lɛ yɛ amɛwekui lɛ anaa: Ishmael kromɔbi ji Nebaiot,+ ni lɛ esɛɛ lɛ, efɔ Kedar+ kɛ Adbeel kɛ Mibsam+ 14 kɛ Mishma kɛ Duma kɛ Masa 15 kɛ Hadad kɛ Tema kɛ Yetur kɛ Nafish kɛ Kedema. 16 Mɛnɛɛmɛi ji Ishmael bihii lɛ, ni amɛgbɛ́ii nɛ, yɛ hei ni amɛhi kɛ amɛnsarai* lɛ anaa, lumɛi 12 yɛ amɛwekui lɛ anaa.+ 17 Ni Ishmael hi shi afii 137. Ni emu enaagbee mumɔ ni egbo, ni afu lɛ tamɔ afu etsɛmɛi lɛ.* 18 Ni amɛhi kɛjɛ Havila+ ni bɛŋkɛ Shur,+ ni bɛŋkɛ Ejipt lɛ aahu kɛyashi Asiria. Ehi shi yɛ enyɛmimɛi lɛ fɛɛ amasɛi.*+
19 Ni Isak, Abraham binuu lɛ he sane nɛ.+
Abraham fɔ Isak. 20 Isak eye afii 40 be ni ekpee Rebeka, ni ji Betuel,+ Aramnyo ni jɛ Padan-aram lɛ biyoo, kɛ Laban, Aramnyo lɛ nyɛmi yoo lɛ. 21 Ni Isak tee nɔ ekpa Yehowa fai yɛ eŋa lɛ hewɔ, ejaakɛ kene ni; no hewɔ lɛ, Yehowa bo efaikpamɔ lɛ toi, ni eŋa Rebeka ná musu. 22 Ni bihii ni yɔɔ emusuŋ lɛ bɔi amɛhe shilɛmɔ,+ no hewɔ lɛ ekɛɛ: “Kɛ́ nɛkɛ eji lɛ, mɛni hewɔ esa akɛ maya nɔ mahi shi?” No hewɔ lɛ, eyabi Yehowa. 23 Ni Yehowa kɛɛ lɛ akɛ: “Jeŋmaji enyɔ yɔɔ omusuŋ,+ ni abaagbála maji enyɔ ateŋ yɛ omusuŋ;+ ni jeŋmaŋ kome he baawa fe jeŋmaŋ kroko lɛ,+ ni onukpa lɛ baasɔmɔ gbekɛ lɛ.”+
24 Be ni efɔmɔ be shɛ lɛ, naa! hãaji yɔɔ emusuŋ lɛ. 25 Kɛkɛ ni klɛŋklɛŋ mɔ lɛ ba, etsuɔ waa, ni ehe fɛɛ tsɔi tsuru tamɔ nɔ ni ewo atade ni akɛ tsɔi fee,+ no hewɔ lɛ, amɛwo lɛ gbɛ́i akɛ Esau.*+ 26 No sɛɛ lɛ, enyɛmi nuu lɛ ba, ni enine hiɛ Esau nanetsitsi mli,+ no hewɔ lɛ, awo lɛ gbɛ́i akɛ Yakob.*+ Isak eye afii 60 be ni Rebeka fɔ amɛ lɛ.
27 Be ni gbekɛbii hii lɛ dara lɛ, Esau batsɔ gbɔbilɔ ni he esa jogbaŋŋ,+ mɔ ni fɔɔ ŋa mli hilɛ, shi Yakob ji nuu ni he bɛ shwamɔ ko, ni ehiɔ mama tsũi amli.+ 28 Ni Isak sumɔɔ Esau, ejaakɛ Esau hãa enáa jwɛiaŋ loo eyeɔ, shi Rebeka sumɔɔ Yakob.+ 29 Be ko lɛ, Yakob miifee flɔ, ni Esau jɛ ŋa lɛ mli eba ní etɔ lɛ bliboo. 30 No hewɔ lɛ, Esau kɛɛ Yakob akɛ: “Ofainɛ, feemɔ oya, hã mi oflɔ tsuru* nɛɛ eko,* ejaakɛ etɔ mi bliboo!”* No hewɔ ni atsɛɔ lɛ Edom*+ lɛ. 31 Kɛkɛ ni Yakob kɛɛ: “Hɔɔmɔ okromɔbi gbɛnaa+ lɛ ohã mi dã!” 32 Ni Esau tsa nɔ ekɛɛ akɛ: “Naa, miihe magbo! Mɛni mikɛ kromɔbi gbɛnaa yaafee?” 33 Ni Yakob kɛɛ kɛfata he akɛ: “Kã mi kitã dã!” No hewɔ lɛ, ekã lɛ kitã ni ehɔ̃ɔ ekromɔbi gbɛnaa lɛ ehã Yakob.+ 34 Kɛkɛ ni Yakob hã Esau blodo kɛ yɔɔ* flɔ, ni eye ni enu nɔ ko, ni ete shi eyi mli etee. Nɛkɛ fee ni Esau gbe ekromɔbi gbɛnaa lɛ he guɔ.