1 Mose
49 Ni Yakob tsɛ ebihii lɛ ni ekɛɛ: “Nyɛbuaa nyɛhe naa kutuu koni matsɔɔ nyɛ nɔ ni baaba nyɛnɔ yɛ gbii lɛ anaagbee lɛ mli. 2 Nyɛbuaa nyɛhe naa ní nyɛboa toi, nyɛ Yakob bihii, hɛɛ, nyɛboa nyɛtsɛ Israel toi.
3 “Ruben,+ bo ji mikromɔbi,+ mihewalɛ kɛ nyɛmɔ ní mikɛfɔɔ lɛ shishijee, mɔ ni fe fɛɛ yɛ woo kɛ hewalɛ gbɛfaŋ. 4 Akɛni ofee onii basabasa tamɔ nu ní efee hamahama hewɔ lɛ, onɔ kwɔŋ fe onyɛmimɛi lɛ, ejaakɛ okwɔ opapa saatso lɛ.+ Nakai beiaŋ lɛ, obule misaa lɛ.* Ekwɔ misaatso lɛ lɛɛlɛŋ!
5 “Simeon kɛ Levi lɛ, nyɛmimɛi ni.+ Amɛkɛ amɛtawuu nii lɛ tsuɔ yiwalɛ nii.+ 6 Misusuma,* okɛ amɛ akabɔ naanyo. Minunyam,* kaayafata amɛkpee lɛ he, ejaakɛ amɛmlifu mli lɛ amɛgbe gbɔmɛi,+ ni amɛfee tsinahii akpakei* kɛjie amɛhiɛtserɛ. 7 Alomɔ amɛmlifu lɛ, ejaakɛ eyitsoŋ wa, kɛ amɛmlila lɛ, ejaakɛ enaa wa.+ Magbála amɛmli yɛ Yakob shikpɔŋ lɛ nɔ, ni magbɛ amɛ mashwã Israel.+
8 “Shi bo Yuda+ lɛ, onyɛmimɛi lɛ baajie oyi.+ Onine baakã ohenyɛlɔi akuɛ nɔ.+ Opapa bihii lɛ baakoto bo.+ 9 Yuda lɛ, jatabi ni.+ Mibinuu, obaamɔ kooloo oye, ni obaate shi kɛbaaje he. Obaabu shi ni obaakpã omli tamɔ jata, ni tamɔ bɔ ni jata ji lɛ, namɔ baanyɛ awo ehiɛ la? 10 Maŋtsɛtso ejeŋ Yuda dɛŋ,+ ni nɔyeli tso hu ejeŋ enaji ateŋ, kɛyashi be ni Shilo* lɛ baaba,+ ni lɛ toi majimaji lɛ baabo.+ 11 Ekɛ eteji baaŋmɔ wain tso, ni ekɛ etejibi baaŋmɔ wain tso kpakpa, ni ekɛ wain baafɔ emama he, ni ekɛ wain yibii amli nu baafɔ etade he.* 12 Wain ehã ehiŋmɛii etsu fɔɔ, ni mliki* ehã enyanyɔji eyɛ.
13 “Zebulon+ baahi ŋshɔnaagbɛ, ŋshɔ lɛ naa gbɛ he ni aŋmɛɔ meelei sɛkɛ yɛ lɛ,+ ni ehusu lɛ mli baalɛɛ kɛya Sidon gbɛ tɔ̃ɔ.+
14 “Isakar+ lɛ, teji ni he wa ni, ni ekã baagii enyɔ ni afimɔ akpɛtɛ teji nɔtamɔnii lɛ he lɛ ateŋ. 15 Ni ebaana akɛ hejɔɔmɔhe lɛ hi, ni akɛ, shikpɔŋ lɛ nɔ yɛ fɛo. Ebaaba ekɔɔŋ shi ní etere jatsu lɛ, ni ebaaŋmɛ gbɛ koni anyɛ enɔ ní etsu nii dɛŋdɛŋ.
16 “Dan,+ ni ji Israel wekui lɛ ateŋ ekome lɛ baakojo ewebii lɛ.+ 17 Dan atsɔ onufu ni kã gbɛjegbɛ he, onufu akolontotsɛ ni kã gbɛ he, ní kɔ̃ɔ okpɔŋɔ nanetsitsi koni enɔtalɔ lɛ akpa sɛɛsɛɛ agbee shi.+ 18 Yehowa, mamɛ oyiwalaheremɔ lɛ.
19 “Gad+ lɛ, ojotswalɔi akuu baatutua lɛ, shi lɛ hu, ebaatutua amɛ ni ebaanyiɛ amɛsɛɛ.+
20 “Asher+ niyenii* baafa babaoo, ni ekɛ niyenii ni sa maŋtsɛ baahã.+
21 “Naftali+ ji baayelɔ yoo ní he yɔɔ oya. Ewieɔ wiemɔi ní ŋɔɔ.+
22 “Yosef+ ji tso nine ni tsɛ̃ yɛ tso ní woɔ yibii he, tso ní woɔ yibii ní ma nuhiŋmɛi he, ní eniji lɛɔ kɛtekeɔ gbogbo lɛ. 23 Shi gãitsɛ̃lɔi lɛ tee nɔ amɛhao lɛ, ni amɛtsɛ̃rɛ̃ lɛ gãi, ni amɛtee nɔ amɛbɛ lɛ amɛwo amɛmli.+ 24 Ni kɛ̃lɛ, egãi lɛ yɛ he ni eyɔɔ lɛ nɔŋŋ,+ ni eniji amli wa ni amɛhe yɛ oya.+ Enɛ jɛ Yakob hewalɔ lɛ, tookwɛlɔ lɛ, Israel tɛsaa lɛ dɛŋ. 25 Ejɛ* otsɛ Nyɔŋmɔ lɛ ŋɔɔ, ni Nyɔŋmɔ baaye abua bo; ekɛ Ofe lɛ yɔɔ, ni ebaajɔɔ bo kɛ jɔɔmɔi ni jɛ ŋwɛi, ebaajɔɔ bo kɛ jɔɔmɔi ni jɛ shikpɔŋ lɛ shishi,+ ni ebaajɔɔ bo kɛ bii babaoo kɛ kooloi babaoo.* 26 Otsɛ jɔɔmɔi lɛ baafe jɔɔmɔi ni naanɔ gɔji lɛ kɛhãa lɛ, amɛbaafe gɔŋkpɔi ní hiɔ shi daa lɛ anɔ nibii kpakpai lɛ.+ Amɛbaaya nɔ amɛhi Yosef pampam, amɛbaahi mɔ ni ajie lɛ ato afã kɛjɛ enyɛmimɛi lɛ ateŋ lɛ yiteŋ.+
27 “Benyamin+ baaya nɔ etserɛ kooloo ni emɔ lɛ mli tamɔ ŋa mli gbee feɔ lɛ.+ Leebi lɛ, ebaaye kooloo ni emɔ lɛ, ni gbɛkɛ lɛ, ebaaja ta mli nii.”+
28 Mɛnɛɛmɛi fɛɛ ji Israel wekui 12 lɛ, ni enɛ ji nɔ ni amɛpapa kɛɛ amɛ be ni ejɔɔ amɛ lɛ. Ejɔɔ amɛteŋ mɔ fɛɛ mɔ kɛ jɔɔmɔ ni sa lɛ.+
29 Enɛ sɛɛ lɛ, ekɛ famɔi nɛɛ hã amɛ akɛ: “Eshwɛ fioo ni magbo.*+ Nyɛfua mi nyɛfataa mitsɛmɛi lɛ ahe yɛ tɛkplo ni yɔɔ Hitnyo Efron shikpɔŋ lɛ nɔ lɛ mli,+ 30 tɛkplo ni yɔɔ Makpela shikpɔŋ lɛ nɔ lɛ mli, yɛ Mamre hiɛ, yɛ Kanaan shikpɔŋ lɛ nɔ lɛ, shikpɔŋ ní Abraham hé yɛ Hitnyo Efron dɛŋ ní ekɛfee fuuhe lɛ. 31 Jɛmɛ amɛfu Abraham kɛ eŋa Sara yɛ.+ Jɛmɛ amɛfu Isak+ kɛ eŋa Rebeka yɛ, ni jɛmɛ mifu Lea hu yɛ. 32 Shikpɔŋ lɛ kɛ tɛkplo ní yɔɔ nɔ lɛ, ahé yɛ Hetbii lɛ adɛŋ.”+
33 Ni Yakob gbe famɔi* nɛɛ ní ekɛhã ebihii lɛ naa. Kɛkɛ ni eloo enaji eshwie saatso lɛ nɔ, ni emu enaagbee mumɔ, ni afu lɛ tamɔ afu etsɛmɛi lɛ.*+