1 Maŋtsɛmɛi

6 Yɛ afi ni ji 480 lɛ nɔ kɛjɛ be ni Israelbii lɛ shi Ejipt shikpɔŋ lɛ nɔ,+ ni ji afi ni ji ejwɛ lɛ nɔ kɛjɛ be ni Solomon batsɔ Israel nɔ maŋtsɛ lɛ mli, yɛ Ziv*+ nyɔɔŋ (ni ji nyɔɔŋ ni ji enyɔ) lɛ nɔ lɛ, Solomon bɔi Yehowa shĩa lɛ* maa.+ 2 Shĩa ni Maŋtsɛ Solomon ma ehã Yehowa lɛ kɛlɛ ji ninetalɔi* 60, elɛɛmɔ ji ninetalɔi 20, ni ekwɔlɛ ji ninetalɔi 30.+ 3 Ablanaa+ ni yɔɔ sɔlemɔ shĩa* lɛ hiɛ lɛ lɛɛmɔ* ji ninetalɔi 20, tamɔ shĩa lɛ lɛɛmɔ lɛ nɔŋŋ.* Ni kɛjɛ shĩa lɛ hiɛ kɛyaa lɛ, ekɛlɛ ji ninetalɔi nyɔŋma.

4 Efee samfɛji ni amɛmligbɛ lɛɛ fe amɛsɛɛgbɛ+ ewo shĩa lɛ he. 5 Agbɛnɛ hu, etswa gbogbo ewo shĩa lɛ gbogbo lɛ he; etswa gbogbo nɛɛ kɛbɔle shĩa lɛ gbogboi lɛ, ni ji sɔlemɔ shĩa* lɛ kɛ sɛɛtsu+ lɛ fɛɛ he, ni ekɛfee tsũi yɛ shĩa lɛ he fɛɛ kɛkpe.+ 6 Shishigbɛ tsũ lɛ lɛɛmɔ ji ninetalɔi enumɔ, teŋ nɔ lɛ lɛɛmɔ ji ninetalɔi ekpaa, ni nɔ ni tsa nɔ etɛ lɛ lɛɛmɔ ji ninetalɔi kpawo, ejaakɛ efee kpokui yɛ shĩa lɛ gbogboi lɛ ahe fɛɛ bɔ ni afee ni akaka nɔ ko awo shĩa lɛ gbogboi lɛ amli.+

7 Akɛ tɛi ni ako ni asaa he momo ni ma shĩa lɛ,+ no hewɔ lɛ, be ni amaa shĩa lɛ, anuuu hamlɛ loo lema loo dɛŋdade ko gbɛɛmɔ yɛ shĩa lɛ. 8 He ni atsɔɔ kɛboteɔ shishigbɛ tsũ lɛ mli lɛ yɛ shĩa lɛ wuoyigbɛ,*+ ni akwɔɔ atrakpoi ko ni lɔgɔɔ shi kɛyaa teŋ nɔ lɛ mli, ni akwɔɔ atrakpoi nɛɛ kɛjɛɔ teŋ nɔ lɛ hu mli kɛyaa nsɔɔdo ni ji etɛ lɛ mli. 9 Etee nɔ etswa tsũ* lɛ, ni egbe naa,+ ni ekɛ tseneduru mplaŋi kɛ tseneduru ŋmoŋmoloi+ ni eko kã eko nɔ shwie nɔ. 10 Tsũi ni emamɔ kɛbɔle shĩa lɛ he fɛɛ+ lɛ ateŋ eko fɛɛ eko kwɔlɛ ji ninetalɔi enumɔ, ni akɛ tseneduru tsei emɔmɔ tsũi nɛɛ kɛkpɛtɛ shĩa lɛ.

11 Ni Yehowa kɛɛ Solomon akɛ: 12 “Shĩa ni omaa nɛɛ, kɛ́ onyiɛ yɛ mimlai lɛ anaa ni oye miyiŋkpɛi* lɛ kɛ mikitãi lɛ anɔ, ni onyiɛ yɛ amɛnaa lɛ,+ mi hu maye shi ni miwo otsɛ David yɛ ohe lɛ nɔ,+ 13 ni mahi Israelbii lɛ ateŋ,+ ni mikwaŋ mimaŋ Israel.”+

14 Solomon tee nɔ ema shĩa lɛ koni egbe naa. 15 Ekɛ tseneduru ŋmoŋmoloi ha shĩa lɛ mligbɛ gbogboi lɛ ahe.* Ekɛ tsei ha shĩa lɛ mligbɛ gbogboi lɛ ahe, kɛjɛ eshishi kɛyashi mplaŋi ni akɛfee sɛndo lɛ anaa, ni ekɛ junipa ŋmoŋmoloi+ ha shĩa lɛ shikpɔŋ lɛ nɔ. 16 Agbɛnɛ hu, kɛjɛ shĩa lɛ mligbɛ kɛmɔ esɛɛ gbogbo lɛ, ekɛ tseneduru ŋmoŋmolo fee nɔ ko ni kɛlɛ ji ninetalɔi 20, kɛjɛ eshishi kɛyashi mplaŋi lɛ anaa, ni ema sɛɛtsu+ lɛ ni ji He Krɔŋkrɔŋ Fe Fɛɛ+ lɛ yɛ mli.* 17 Ni sɔlemɔ shĩa*+ lɛ—ni ji, shĩa lɛ mli tsũi lɛ ateŋ nɔ ni yɔɔ hiɛgbɛ lɛ—kɛlɛ ji ninetalɔi 40. 18 Akpɛ́ tsene tɔi+ kɛ fɔfɔii+ yɛ tsenedurui ni ha shĩa lɛ mli lɛ ahe. Akɛ tsenedurui eha shĩa lɛ mli fɛɛ; anaaa tɛ ko tɛ ko.

19 Ni esaa sɛɛtsu+ ni yɔɔ shĩa lɛ mli lɛ mli koni ekɛ Yehowa kpaŋmɔ adeka lɛ ama jɛmɛ.+ 20 Sɛɛtsu lɛ kɛlɛ ji ninetalɔi 20, elɛɛmɔ ji ninetalɔi 20, ni ekwɔlɛ ji ninetalɔi 20;+ ni ekɛ shika tsuru krɔŋŋ ha mli; ekɛ tseneduru ha afɔleshaa latɛ+ lɛ he. 21 Solomon kɛ shika tsuru krɔŋŋ+ ha shĩa lɛ mli fɛɛ, ni ekɛ shika tsuru tsein* fo sɛɛtsu+ ni akɛ shika tsuru eha mli lɛ hiɛ. 22 Ekɛ shika tsuru ha shĩa muu lɛ mli fɛɛ kɛyashi egbe shĩa lɛ fɛɛ naa; ekɛ shika tsuru ha afɔleshaa latɛ lɛ ni yɔɔ sɛɛtsu lɛ hiɛ lɛ hu he fɛɛ.+

23 Ekɛ paini tso* fee kerubim enyɔ+ ewo sɛɛtsu lɛ mli; eko fɛɛ eko kwɔlɛ ji ninetalɔi nyɔŋma.+ 24 Kerub lɛ fine kome kɛlɛ ji ninetalɔi enumɔ, ni efine kroko lɛ hu kɛlɛ ji ninetalɔi enumɔ. Kɛjɛ efine kome naa kɛyashi efine kroko lɛ naa lɛ, efeɔ ninetalɔi nyɔŋma. 25 Ni kerub ni ji enyɔ lɛ hu, ninetalɔi nyɔŋma. Kerubim enyɔ lɛ fɛɛ daramɔ kome ni amɛyɛ su kome hu. 26 Kerub kome lɛ kwɔlɛ ji ninetalɔi nyɔŋma, ni nakai nɔŋŋ kerub kroko lɛ hu ji. 27 Kɛkɛ ni ekɛ kerubim+ lɛ wo sɛɛtsu* lɛ mli. Kerubim lɛ egbɛgbɛɛ amɛfiji amli bɔ ni ekome fine saa gbogbo kome he, ni kerub kroko lɛ hu fine saa gbogbo kroko lɛ he, ni amɛgbɛ amɛfiji lɛ amli hu kɛba tsũ lɛ teŋ, no hewɔ lɛ, amɛfiji lɛ kpeɔ. 28 Ni ekɛ shika tsuru ha kerubim lɛ ahe.

29 Ni ekpɛ́ kerubim,+ kɛ tɛŋ tsei,+ kɛ fɔfɔii+ yɛ shĩa lɛ gbogboi lɛ fɛɛ ahe, yɛ sɛɛtsu lɛ kɛ hiɛtsu lɛ fɛɛ mli.* 30 Ekɛ shika tsuru ha shikpɔŋ lɛ yɛ sɛɛtsu lɛ kɛ hiɛtsu lɛ fɛɛ mli. 31 Ni ekɛ paini tso fee shinai ewo he ni atsɔɔ kɛyaa sɛɛtsu lɛ mli lɛ naa, shinaa lɛ he akulashiŋi lɛ, kɛ shinaatsei lɛ ji mlijai enumɔ mli ekome.* 32 Akɛ paini tso fee shinai enyɔ lɛ, ni ekpɛ́ kerubim, kɛ tɛŋ tsei, kɛ fɔfɔii yɛ amɛhe, ni ekɛ shika tsuru ha amɛhe; ni ekɛ hamlɛ tswia shika tsuru ni akɛha kerubim lɛ kɛ tɛŋ tsei lɛ ahe lɛ nɔ. 33 Nakai nɔŋŋ efee shinaatsei ni akɛ paini tso fee ni yɔɔ he ni atsɔɔ kɛyaa sɔlemɔ shĩa* lɛ, eji mlijai ejwɛ mli ekome.* 34 Ekɛ junipa tso fee shinai enyɔ. Shinaa lɛ ekome lɛ, eji shinaa nta ni tsɔmɔɔ ehe yɛ nɔ ko nɔ, ni shinaa kroko lɛ hu ji shinaa nta ni tsɔmɔɔ ehe yɛ nɔ ko nɔ.+ 35 Ekpɛ́ kerubim, kɛ tɛŋ tsei, kɛ fɔfɔii yɛ amɛhe, ni ekɛ shika tsuru fɛtɛfɛtɛ ha nibii ni ekpɛ́ lɛ ahe.

36 Ekɛ tɛi ni ako ni eko kã eko nɔ, nɔkwɔlɛi etɛ kɛ tseneduru mplaŋi nɔkwɔlɛ kome tswa gbogbo,+ ni ekɛfee mligbɛ kpo+ lɛ.

37 Ato Yehowa shĩa lɛ faneshi lɛ shishi yɛ afi ni ji ejwɛ lɛ mli, yɛ Ziv* nyɔɔŋ lɛ nɔ;+ 38 ni yɛ afi ni ji 11 lɛ mli, yɛ Bul* nyɔɔŋ lɛ (ni ji nyɔɔŋ ni ji kpaanyɔ lɛ) nɔ lɛ, agbe shĩa lɛ kɛ ehewɔ nibii lɛ fɛɛ anaa yɛ bɔ ni ato akɛ ama lɛ ahã lɛ naa.+ No hewɔ lɛ, ekɛ afii kpawo ma shĩa lɛ.