2 Kronika
9 Ni Sheba maŋnyɛ+ lɛ nu gbɛ́i ni Solomon ehe lɛ he, no hewɔ lɛ, eba Yerusalem koni ekɛ sanebimɔi ni mli wawai* abaka Solomon ekwɛ. Ekɛ mɛi babaoo ni eto sɛrɛnɛɛ kɛnyiɛ esɛɛ, kɛ afukpɔŋɔi ni tere balsam mu kɛ shika tsuru babaoo,+ kɛ ojarawatɛi fata ehe kɛba. Etee Solomon ŋɔɔ ni ekɛ lɛ yawie nɔ fɛɛ nɔ ni yɔɔ etsui mli.+ 2 Kɛkɛ ni Solomon hã esanebimɔi lɛ fɛɛ ahetoo. Emli eko eko bɛ ni mli wa kɛhã* Solomon ni enyɛɛɛ egbála mli etsɔɔ maŋnyɛ lɛ.
3 Be ni Sheba maŋnyɛ lɛ na Solomon nilee* lɛ,+ shĩa ni ema,+ 4 kɛ ekpɔlɔ nɔ niyenii,+ kɛ etsuji lɛ ashitaramɔ yɛ ekpɔlɔ lɛ he, kɛ bɔ ni ekpɔlɔ he sɔɔlɔi lɛ sɔmɔɔ yɛ ekpɔlɔ lɛ he kɛ atadei ni amɛwoɔ, kɛ edãawolɔi lɛ kɛ atadei ni amɛwoɔ, kɛ shãa afɔlei ni eshãa daa yɛ Yehowa shĩa lɛ,+ ehe jɔ.* 5 No hewɔ lɛ, ekɛɛ maŋtsɛ lɛ akɛ: “Ohe saji ni minu yɛ mi diɛŋtsɛ mishikpɔŋ lɛ nɔ yɛ nibii ni ofee* kɛ onilee* lɛ he lɛ fɛɛ lɛ, anɔkwale ni. 6 Shi miheee saji ni minu lɛ miyeee kɛyashi miba ni mikɛ mi diɛŋtsɛ mihiŋmɛii bana.+ Ni naa! nɔ ni agba mi lɛ shɛɛɛ onilee* kpele lɛ mli fã po.+ Nɔ ni mibana lɛ fa kwraa fe nɔ ni agba mi lɛ.+ 7 Anɔkwa, owebii* lɛ yɛ miishɛɛ, ni otsuji ni damɔɔ ohiɛ be fɛɛ be ni amɛboɔ onilee* lɛ toi lɛ hu yɛ miishɛɛ! 8 Ajie Yehowa, o-Nyɔŋmɔ lɛ yi, mɔ ni ená ohe miishɛɛ ni ekɛ bo eta emaŋtsɛ sɛi lɛ nɔ koni odamɔ Yehowa, o-Nyɔŋmɔ lɛ, najiaŋ oye maŋtsɛ lɛ.* Akɛni o-Nyɔŋmɔ lɛ sumɔɔ Israel+ ni eesumɔ ni ehi shi kɛya naanɔ hewɔ lɛ, ewó bo Israel nɔ maŋtsɛ koni okojo ni oye jalɛ sane.”
9 Kɛkɛ ni ehã maŋtsɛ lɛ shika tsuru talɛntai* 120+ kɛ balsam mu babaoo kɛ ojarawatɛi. Mɔ ko kɛ balsam mu tamɔ nɛkɛ baaa dɔŋŋ yɛ nɔ ni Sheba maŋnyɛ lɛ kɛbahã Maŋtsɛ Solomon lɛ sɛɛ.+
10 Agbɛnɛ hu, Hiram tsuji lɛ kɛ Solomon tsuji lɛ ni kɛ shika tsuru jɛɔ Ofir+ kɛbaa lɛ hu kɛ algum tsei, kɛ ojarawatɛi ba.+ 11 Maŋtsɛ lɛ kɛ algum tsei lɛ fee atrakpoi kɛhã Yehowa shĩa+ lɛ kɛ maŋtsɛ shĩa lɛ,+ ni ekɛ eko hu fee saŋkui kɛ kpãa saŋkui kɛhã lalɔi lɛ.+ Anako enɛɛmɛi eko pɛŋ yɛ Yuda shikpɔŋ lɛ nɔ.
12 Maŋtsɛ Solomon hu hã Sheba maŋnyɛ lɛ nɔ fɛɛ nɔ ni etaoɔ ni ebi maŋtsɛ lɛ, maŋtsɛ lɛ hã lɛ nii babaoo fe nɔ ni ekɛbahã maŋtsɛ lɛ.* No sɛɛ lɛ, maŋnyɛ lɛ shi kɛtee lɛ diɛŋtsɛ eshikpɔŋ lɛ nɔ, lɛ kɛ etsuji lɛ fɛɛ.+
13 Ni shika tsuru ni akɛbahã Solomon yɛ afi kome mli lɛ tsiimɔ ji shika tsuru talɛntai 666,+ 14 soro nɔ ni Solomon náa kɛjɛɔ jarayelɔi gbɛfalɔi lɛ kɛ guɔyelɔi lɛ kɛ Arab maŋtsɛmɛi lɛ fɛɛ kɛ shikpɔŋ lɛ nɔ amralofoi lɛ ni kɛ shika tsuru kɛ jwiɛtɛi bahãa lɛ lɛ adɛŋ.+
15 Maŋtsɛ Solomon kɛ shika tsuru ni akɛ dade kroko efutu fee tsɛŋi wuji 200+ (ekɛ shika tsuru ni akɛ dade kroko efutu shekeli* 600 ha tsɛŋi lɛ eko fɛɛ eko he),+ 16 ni ekɛ shika tsuru ni akɛ dade kroko efutu fee tsɛŋi bibii* 300 hu (ekɛ shika tsuru minai* etɛ ha tsɛŋi bibii lɛ eko fɛɛ eko he). Kɛkɛ ni maŋtsɛ lɛ kɛyato Lebanon Koo Shĩa lɛ mli.+
17 Maŋtsɛ lɛ kɛ shwuɔ wu* fee maŋtsɛ sɛi wulu ko hu, ni ekɛ shika tsuru krɔŋŋ ha he.+ 18 Afee atrakpoi ekpaa yɛ maŋtsɛ sɛi lɛ hiɛ, ni akɛ shika tsuru efee najiashi sɛi akpɛtɛ maŋtsɛ sɛi lɛ he, ni niji yɛ maŋtsɛ sɛi lɛ biɛ kɛ biɛ, ni jata+ damɔ niji enyɔ lɛ eko fɛɛ eko he. 19 Ni jatai+ 12 damɔ atrakpoi ekpaa lɛ anɔ, atrakpoi ekpaa lɛ eko fɛɛ eko naa biɛ kɛ biɛ lɛ, ekome damɔ jɛmɛ. Maŋtsɛyeli ko efeko nɔ ko tamɔ nakai pɛŋ. 20 Shika tsuru akɛfee kɔɔpoi ni Maŋtsɛ Solomon kɛnuɔ nii lɛ fɛɛ, ni shika tsuru krɔŋŋ akɛfee nibii fɛɛ ni yɔɔ Lebanon Koo Shĩa lɛ mli lɛ. Nɔ ko nɔ ko bɛ ni akɛ jwiɛtɛi fee, ejaakɛ yɛ Solomon gbii lɛ amli lɛ, abuuu jwiɛtɛi ahãaa nɔ ko.+ 21 Ejaakɛ maŋtsɛ lɛ meelei lɛ kɛ Hiram tsuji+ lɛ yaa Tarshish.+ Shi kome yɛ daa afii etɛ mli lɛ, Tarshish meelei lɛ kɛ shika tsuru, kɛ jwiɛtɛi, kɛ shwuɔ wu,*+ kɛ aduji wuji,* kɛ piikɔk babaoo baa.
22 No hewɔ lɛ, Maŋtsɛ Solomon fe maŋtsɛmɛi krokomɛi fɛɛ ni yɔɔ shikpɔŋ lɛ nɔ yɛ ninámɔ kɛ hiɛshikamɔ gbɛfaŋ.+ 23 Ni maŋtsɛmɛi ni jɛ shikpɔŋ lɛ nɔ hei srɔtoi fɛɛ lɛ ba Solomon ŋɔɔ* koni amɛbabo nilee* ni anɔkwa Nyɔŋmɔ lɛ kɛwo etsui mli lɛ toi.+ 24 Amɛteŋ mɔ fɛɛ mɔ kɛ nikeenii ko baa—jwiɛtɛi nibii, kɛ shika tsuru nibii, kɛ atadei,+ kɛ tawuu hewulamɔ nii, kɛ balsam mu, kɛ okpɔŋɔi, kɛ tejii*—ni nɛkɛ eyaa nɔ daa afi. 25 Ni Solomon yɛ okpɔŋɔi atsũi 4,000 kɛhã ekpɔŋɔi kɛ eshwiilii lɛ kɛ okpɔŋɔi* 12,000,+ ni ekɛ amɛ to shwiilii amaji lɛ amli, kɛ agbɛnɛ hu, yɛ maŋtsɛ lɛ masɛi yɛ Yerusalem.+ 26 Solomon ye maŋtsɛmɛi lɛ fɛɛ anɔ, kɛjɛ Faa* lɛ naa kɛtee Filistibii lɛ ashikpɔŋ lɛ nɔ, aahu kɛyashi Ejipt husu lɛ naa.+ 27 Maŋtsɛ lɛ hã jwiɛtɛi bu yɛ Yerusalem tamɔ tɛi, ni ehã tseneduru tsei hu bu tamɔ sikamore tsei ni yɔɔ Shefela lɛ.+ 28 Akɛ okpɔŋɔi jɛɔ Ejipt+ kɛ maji krokomɛi lɛ fɛɛ anɔ akɛbahãa Solomon.
29 Shi Solomon shihilɛ mli saji krokomɛi fɛɛ,+ kɛjɛ shishijee kɛyashi naagbee lɛ, aŋmala yɛ gbalɔ Natan+ wolo lɛ mli, kɛ Ahiya,+ Shilonyo lɛ gbalɛ lɛ mli, kɛ Ido,+ ninalɔ lɛ, ninai ni kɔɔ Nebat binuu Yeroboam+ he ni aŋmala lɛ amli. 30 Solomon ye Israel fɛɛ nɔ afii 40 yɛ Yerusalem. 31 Kɛkɛ ni Solomon gbo.* No hewɔ lɛ, afu lɛ yɛ etsɛ David Maŋ lɛ mli;+ ni ebinuu Rehoboam baye maŋtsɛ yɛ esɛɛ.+