3 Mose
1 Ni Yehowa tsɛ Mose ni ekɛ lɛ wie kɛjɛ kpee buu+ lɛ mli ekɛɛ: 2 “Okɛ Israelbii* lɛ awie ni okɛɛ amɛ akɛ, ‘Kɛ́ nyɛteŋ mɔ ko kɛ shĩa kooloo miiba ebahã Yehowa akɛ afɔle lɛ, ekɛ tsina loo too aba.+
3 “‘Kɛ́ efɔle lɛ ji shãa afɔle, ni ekɛ tsina miiba lɛ, no lɛ, ekɛ tsinanuu ni kpa ko bɛ ehe aba.+ Ejɛ esuɔmɔ mli ekɛbahã+ yɛ Yehowa hiɛ yɛ kpee buu lɛ shinaa lɛ naa. 4 Ekɛ enine aŋmɛ kooloo ni akɛbaashã shãa afɔle lɛ yiteŋ, ni abaakpɛlɛ nɔ, ni akɛbaakpãtã ahã lɛ.
5 “‘No sɛɛ lɛ, agbe tsinanuu* lɛ yɛ Yehowa hiɛ, ni Aaron bihii lɛ, ni ji osɔfoi+ lɛ, kɛ elá lɛ aba ni amɛkɛbashwã afɔleshaa latɛ lɛ ni yɔɔ kpee buu lɛ shinaa lɛ naa lɛ koji lɛ fɛɛ ahe kɛkpe.+ 6 Ajie kooloo ni akɛbaashã shãa afɔle lɛ hewolo lɛ, ní afolɔ loo lɛ mli kukuji.+ 7 Aaron bihii lɛ, ni ji osɔfoi lɛ kɛ la ashwie afɔleshaa latɛ lɛ nɔ,+ ní amɛto lai amɛshwie la lɛ nɔ. 8 Aaron bihii lɛ, ni ji osɔfoi lɛ ato afɔle loo lɛ ni afolɔ mli kukuji+ lɛ kɛ yitso lɛ kɛ fɔ* lɛ amɛshwie lai ni yɔɔ la lɛ nɔ yɛ afɔleshaa latɛ lɛ nɔ lɛ nɔ. 9 Akɛ nu afɔ emlinii lɛ kɛ enaji lɛ ahe, ni osɔfo lɛ ashã fɛɛ* yɛ afɔleshaa latɛ lɛ nɔ akɛ shãa afɔle, afɔle ni akɛ la shãa ni jeɔ ŋma jogbaŋŋ* woɔ Yehowa.+
10 “‘Kɛ́ efɔle lɛ ji shãa afɔle, ni ekɛ too miiba lɛ,+ gwantɛŋnuu* jio, abotianuu* jio, no lɛ, ekɛ nɔ ni kpa ko bɛ ehe aba.+ 11 Agbe lɛ yɛ afɔleshaa latɛ lɛ kooyigbɛ yɛ Yehowa hiɛ, ni Aaron bihii lɛ, ni ji osɔfoi lɛ, kɛ elá lɛ ashwã afɔleshaa latɛ lɛ koji lɛ fɛɛ ahe kɛkpe.+ 12 Afolɔ* loo lɛ mli kukuji, ní osɔfo lɛ ato kɛfata eyitso lɛ kɛ efɔ* lɛ he eshwie lai ni yɔɔ la lɛ nɔ yɛ afɔleshaa latɛ lɛ nɔ lɛ nɔ. 13 Akɛ* nu afɔ emlinii lɛ kɛ enaji lɛ ahe, ni osɔfo lɛ ashã fɛɛ* yɛ afɔleshaa latɛ lɛ nɔ akɛ shãa afɔle. Eji shãa afɔle, afɔle ni akɛ la shãa ni jeɔ ŋma jogbaŋŋ* woɔ Yehowa.
14 “‘Shi kɛji loofɔji ekɛbaa ekɛbashã shãa afɔle ehã Yehowa lɛ, no lɛ, ekɛ ŋa mli okpoi loo shĩa okpoi bibii aba.+ 15 Osɔfo lɛ kɛba afɔleshaa latɛ lɛ he, ní etse ekuɛŋshi, ni eshã* yɛ afɔleshaa latɛ lɛ nɔ, shi esa akɛ ahã elá lɛ atsere ashwie afɔleshaa latɛ lɛ he. 16 Ejie niyenii kotoku ni yɔɔ loofɔlɔ lɛ sɛ̃ shishi* lɛ kɛ etsɛji lɛ, ni eshɛrɛ eshwie afɔleshaa latɛ lɛ masɛi, yɛ bokãgbɛ, he ni akɛ lamulu* lɛ shwieɔ lɛ.+ 17 Egbá loofɔlɔ lɛ mli yɛ teŋ, yɛ efiji enyɔ lɛ ateŋ, shi ekaja emli enyɔ ni eje nɔ. No sɛɛ lɛ, osɔfo lɛ ashã yɛ afɔleshaa latɛ lɛ nɔ yɛ lai ni yɔɔ la lɛ nɔ lɛ nɔ. Eji shãa afɔle, afɔle ni akɛ la shãa ni jeɔ ŋma jogbaŋŋ* woɔ Yehowa.