Ezekiel
6 Ni Yehowa kɛɛ mi ekoŋŋ akɛ: 2 “Gbɔmɔ bi,* tsɔ ohiɛ ohã Israel gɔji lɛ ni ogba oshi amɛ. 3 Kɛɛmɔ akɛ, ‘Nyɛ Israel gɔji, nyɛboa Nuŋtsɔ Ofe Yehowa wiemɔ lɛ toi: Nɔ ni Nuŋtsɔ Ofe Yehowa kɛɔ gɔji lɛ, kɛ gɔŋkpɔi lɛ, kɛ fai lɛ, kɛ jɔi lɛ nɛ: “Naa! Mikɛ klante baaba nyɛnɔ, ni makpãtã nyɛhei grɔŋŋi lɛ ahiɛ. 4 Abaafite nyɛfɔleshaa latɛi lɛ, ni abaakumɔ nyɛtsofa-kɛ-ŋmashãa latɛi lɛ,+ ni mashɛrɛ omɛi ni abaagbe lɛ agbohii lɛ mashwie omagai ni yɔɔ nyaŋemɔ* lɛ ahiɛ.+ 5 Mashɛrɛ Israelbii lɛ agbohii lɛ mashwie amɛmagai ni yɔɔ nyaŋemɔ lɛ ahiɛ, ni mikɛ nyɛwui lɛ baashwã nyɛfɔleshaa latɛi lɛ ahe fɛɛ kɛkpe.+ 6 Abaakpãtã maji ni yɔɔ he fɛɛ he ni nyɛyɔɔ lɛ ahiɛ,+ ni abaafite hei grɔŋŋi lɛ, ni amɛbaakamɔ shi efolo.+ Abaafite nyɛfɔleshaa latɛi lɛ ni abaakumɔ ashwie shi, abaakpãtã nyɛmagai ni yɔɔ nyaŋemɔ lɛ ahiɛ, abaafolɔ nyɛtsofa-kɛ-ŋmashãa latɛi lɛ ashwie shi, ni abaabɛɛ nyɛnitsumɔi lɛ ashwie. 7 Ni mɛi ni abaagbe lɛ baanyɔnyɔi yɛ nyɛteŋ,+ ni nyɛbaaná nyɛle akɛ miji Yehowa.+
8 “‘“Shi mahã nyɛteŋ mɛi komɛi ashwɛ, ejaakɛ kɛ́ migbɛ nyɛ mishwã shikpɔji lɛ anɔ lɛ, nyɛteŋ mɛi komɛi baaje klante ni baaba jeŋmaji lɛ anɔ lɛ mli.+ 9 Ni mɛi ni baaje mli lɛ baakai mi yɛ jeŋmaji ni abaaŋɔ amɛ nom kɛya mli lɛ ateŋ.+ Amɛbaana akɛ mitsui kumɔ yɛ anɔkwa ni amɛtsui ni tsi ehe kɛje mihe lɛ yeee*+ kɛ amɛhiŋmɛii* ni yadi amagai ni yɔɔ nyaŋemɔ lɛ asɛɛ lɛ ahewɔ.+ Amɛhiɛ baagboi ni amɛbaanyaŋe efɔŋ kɛ nyaŋemɔ nii fɛɛ ni amɛfee lɛ.+ 10 Amɛbaaná amɛle akɛ miji Yehowa, ni sane fɔŋ nɛɛ ni miwie akɛ mikɛbaaba amɛnɔ lɛ jeee wiemɔ folo.”’+
11 “Nɔ ni Nuŋtsɔ Ofe Yehowa kɛɛ nɛ: ‘Tswaa odɛ̃ ni okɛ onane ashimɔ shi ni oye awerɛho yɛ efɔŋ kɛ nyaŋemɔ nibii ni Israel shĩa lɛ efee lɛ hewɔ, ejaakɛ klante kɛ hɔmɔ kɛ tsɛŋemɔ hela ni gbeɔ mɔ baagbe amɛ.+ 12 Mɔ ni yɔɔ shɔŋŋ lɛ, tsɛŋemɔ hela ni gbeɔ mɔ baagbe lɛ, mɔ ni bɛŋkɛ hu lɛ, klante baagbe lɛ, mɔ fɛɛ mɔ ni baaje enɛɛmɛi amli ni baashwɛ lɛ, ebaagbo yɛ hɔmɔ naa; ni maŋmɛɛ mimlila lɛ he mashwie amɛnɔ.+ 13 Kɛ́ mɛi ni agbe yɛ amɛteŋ lɛ jwere shi yɛ amɛmagai ni yɔɔ nyaŋemɔ lɛ ateŋ, yɛ amɛfɔleshaa latɛi lɛ ahe fɛɛ,+ yɛ gɔŋkpɔ fɛɛ gɔŋkpɔ nɔ, yɛ gɔji lɛ fɛɛ anɔ, yɛ tso fɛɛ tso ni ebu kusuu shishi, kɛ agbɛnɛ hu, yɛ tsei wuji aniji ashishi, he ni amɛshãa tsofa-kɛ-ŋma* yɛ amɛhãa amɛmagai fɛɛ ni yɔɔ nyaŋemɔ kɛkpatãa amɛ lɛ,+ nyɛbaaná nyɛle akɛ miji Yehowa.+ 14 Makpã minine mli yɛ amɛnɔ ni mahã shikpɔŋ lɛ akã shi amaŋfɔ ni amɛshihilɛhei lɛ fɛɛ baakamɔ shi efolo fe ŋa ni yɔɔ Dibla masɛi lɛ. Ni amɛbaaná amɛle akɛ miji Yehowa.’”